Ribhu Gita - Siva Rahasya Purana Amsha 6

RbhugItA 41 || grantha-prazasti nirUpaNam ||

RbhuH -

  • ahaM brahma na sandehaH ahaM brahma na saMzayaH |
  • ahaM brahmaiva nityAtmA ahameva parAtparaH || 1||
  • cinmAtro'haM na sandeha iti nizcitya taM tyaja |
  • satyaM satyaM punaH satyamAtmano'nyanna kiJcana || 2||
  • zivapAdadvayaM spRSTvA vadAmIdaM na kiJcana |
  • gurupAdadvayaM spRSTvA vadAmIdaM na kiJcana || 3||
  • jihvayA parazuM taptaM dhArayAmi na saMzayaH |
  • vedazAstrAdikaM spRSTvA vadAmIdaM vinizcitam || 4||
  • nizcayAtman nizcayastvaM nizcayena sukhI bhava |
  • cinmayastvaM cinmayatvaM cinmayAnanda eva hi || 5||
  • brahmaiva brahmabhUtAtmA brahmaiva tvaM na saMzayaH |
  • sarvamuktaM bhagavatA yoginAmapi durlabham || 6||
  • devAnAM ca RSINAM ca atyantaM durlabhaM sadA |
  • aizvaraM paramaM jJAnamupadiSTaM zivena hi || 7||
  • etat jJAnaM samAnItaM kailAsAcchaGkarAntikAt |
  • devAnAM dakSiNAmUrtirdazasAhasravatsarAn || 8||
  • vighnezo bahusAhasraM vatsaraM copadiSTavAn |
  • sAkSAcchivo'pi pArvatyai vatsaraM copadiSTavAn || 9||
  • kSIrAbdhau ca mahAviSNurbrahmaNe copadiSTavAn |
  • kadAcitbrahmaloke tu matpituzcoktavAnaham || 10||
  • nAradAdi RSINAM ca upadiSTaM mahadbahu |
  • ayAtayAmaM vistAraM gRhItvA'hamihAgataH || 11||
  • na samaM pAdamekaM ca tIrthakoTiphalaM labhet |
  • na samaM granthametasya bhUmidAnaphalaM labhet || 12||
  • ekAnubhavamAtrasya na sarvaM sarvadAnakam |
  • zlokArdhazravaNasyApi na samaM kiJcideva hi || 13||
  • tAtparyazravaNAbhAve paThaMstUSNIM sa mucyate |
  • sarvaM santyajya satatametadgranthaM samabhyaset || 14||
  • sarvamantraM ca santyajya etadgranthaM samabhyaset |
  • sarvadevAMzca santyajya etadgranthaM samabhyaset || 15||
  • sarvasnAnaM ca santyajya etadgranthaM samabhyaset |
  • sarvabhAvaM ca santyajya etadgranthaM samabhyaset || 16||
  • sarvahomaM ca santyajya etadgranthaM samabhyaset |
  • sarvadAnaM ca santyajya etadgranthaM samabhyaset || 17||
  • sarvapUjAM ca santyajya etadgranthaM samabhyaset |
  • sarvaguhyaM ca santyajya etadgranthaM samabhyaset || 18||
  • sarvasevAM ca santyajya etadgranthaM samabhyaset |
  • sarvAstitvaM ca santyajya etadgranthaM samabhyaset || 19||
  • sarvapAThaM ca santyajya etadgranthaM samabhyaset |
  • sarvAbhyAsaM ca santyajya etadgranthaM samabhyaset || 20||
  • dezikaM ca parityajya etadgranthaM samabhyaset |
  • guruM vApi parityajya etadgranthaM samabhyaset || 21||
  • sarvalokaM ca santyajya etadgranthaM samabhyaset |
  • sarvaizvaryaM ca santyajya etadgranthaM samabhyaset || 22||
  • sarvasaGkalpakaM tyajya etadgranthaM samabhyaset |
  • sarvapuNyaM ca santyajya etadgranthaM samabhyaset || 23||
  • etadgranthaM paraM brahma etadgranthaM samabhyaset |
  • atraiva sarvavijJAnaM atraiva paramaM padam || 24||
  • atraiva paramo mokSa atraiva paramaM sukham |
  • atraiva cittavizrAntiratraiva granthibhedanam || 25||
  • atraiva jIvanmuktizca atraiva sakalo japaH |
  • etadgranthaM paThaMstUSNIM sadyo muktimavApnuyAt || 26||
  • sarvazAstraM ca santyajya etanmAtraM sadAbhyaset |
  • dine dine caikavAraM paTheccenmukta eva saH || 27||
  • janmamadhye sakRdvApi zrutaM cet so'pi mucyate |
  • sarvazAstrasya siddhAntaM sarvavedasya saMgraham || 28||
  • sArAt sArataraM sAraM sArAt sArataraM mahat |
  • etadgranthasya na samaM trailokye'pi bhaviSyati || 29 ||
  • na prasiddhiM gate loke na svarge'pi ca durlabham |
  • brahmalokeSu sarveSu zAstreSvapi ca durlabham || 30||
  • etadgranthaM kadAcittu cauryaM kRtvA pitAmahaH |
  • kSIrAbdhau ca parityajya sarve muJcantu no iti || 31||
  • jJAtvA kSIrasamudrasya tIre prAptaM gRhItavAn |
  • gRhItaM cApyasau dRSTvA zapathaM ca pradattavAn || 32||
  • tat Arabhya tallokaM tyaktvAhamimamAgataH |
  • atyadbhutamidaM jJAnaM granthaM caiva mahAdbhutam || 33||
  • tad jJo vaktA ca nAstyeva granthazrotA ca durlabhaH |
  • AtmaniSThaikalabhyo'sau sadgururnaiSa labhyate || 34||
  • granthavanto na labhyante tena na khyAtirAgatA |
  • bhavate darzitaM hyetadgamiSyAmi yathAgatam || 35||
  • etAvaduktamAtreNa nidAgha RSisattamaH |
  • patitvA pAdayostasya AnandAzrupariplutaH || 36||
  • uvAca vAkyaM sAnandaM sASTAGgaM praNipatya ca |

nidAghaH -

  • aho brahman kRtArtho'smi kRtArtho'smi na saMzayaH |
  • bhavatAM darzanenaiva majjanma saphalaM kRtam || 37||
  • ekavAkyasya manane mukto'haM nAtra saMzayaH |
  • namaskaromi te pAdau sopacAraM na vAstavau || 38||
  • tasyApi nAvakAzo'sti ahameva na vAstavam |
  • tvameva nAsti me nAsti brahmeti vacanaM na ca || 39||
  • brahmeti vacanaM nAsti brahmabhAvaM na kiJcana |
  • etadgranthaM na me nAsti sarvaM brahmeti vidyate || 40||
  • sarvaM brahmeti vAkyaM na sarvaM brahmeti taM na hi |
  • taditi dvaitabhinnaM tu tvamiti dvaitamapyalam || 41||
  • evaM kiJcit kvacinnAsti sarvaM zAntaM nirAmayam |
  • ekameva dvayaM nAsti ekatvamapi nAsti hi || 42||
  • bhinnadvandvaM jagaddoSaM saMsAradvaitavRttikam |
  • sAkSivRttiprapaJcaM vA akhaNDAkAravRttikam || 43||
  • akhaNDaikaraso nAsti gururvA ziSya eva vA |
  • bhavaddarzanamAtreNa sarvamevaM na saMzayaH || 44||
  • brahmajyotirahaM prApto jyotiSAM jyotirasmyaham |
  • namaste suguro brahman namaste gurunandana |
  • evaM kRtya namaskAraM tUSNImAste sukhI svayam || 45||
  • kiM caNDabhAnukaramaNDaladaNDitAni
  • kASThAmukheSu galitAni namastatIti |
  • yAdRkca tAdRgatha zaGkaraliGgasaGga-
  • bhaGgIni pApakalazailakulAni sadyaH |
  • zrImRtyuJjaya raJjaya tribhuvanAdhyakSa prabho pAhi naH || 46||
  • || iti zrIzivarahasye zaGkarAkhye SaSThAMze RbhunidAghasaMvAde granthaprazastinirUpaNaM nAma ekacatvAriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com