RbhugItA 22 || nAma-rUpa niSedha prakaraNam ||

RbhuH -

• vakSye brahmamayaM sarvaM nAsti sarvaM jaganmRSA |
• ahaM brahma na me cintA ahaM brahma na me jaDam || 1||
• ahaM brahma na me doSaH ahaM brahma na me phalam |
• ahaM brahma na me vArtA ahaM brahma na me dvayam || 2||
• ahaM brahma na me nityamahaM brahma na me gatiH |
• ahaM brahma na me mAtA ahaM brahma na me pitA || 3||
• ahaM brahma na me so'yamahaM vaizvAnaro na hi |
• ahaM brahma cidAkAzamahaM brahma na saMzayaH || 4||
• sarvAntaro'haM pUrNAtmA sarvAntaramano'ntaraH |
• ahameva zarIrAntarahameva sthiraH sadA || 5||
• evaM vijJAnavAn mukta evaM jJAnaM sudurlabham |
• anekazatasAhastreSveka eva vivekavAn || 6||
• tasya darzanamAtreNa pitarastRptimAgatAH |
• jJAnino darzanaM puNyaM sarvatIrthAvagAhanam || 7||
• jJAninaH cArcanenaiva jIvanmukto bhavennaraH |
• jJAnino bhojane dAne sadyo mukto bhavennaraH || 8||
• ahaM brahma na sandehaH ahameva guruH paraH |
• ahaM zAnto'smi zuddho'smi ahameva guNAntaraH || 9||
• guNAtIto janAtItaH parAtIto manaH paraH |
• parataH parato'tIto buddhyAtIto rasAt paraH || 10||
• bhAvAtIto manAtIto vedAtIto vidaH paraH |
• zarIrAdezca parato jAgratsvapnasuSuptitaH || 11||
• avyaktAt parato'tIta ityevaM jJAnanizcayaH |
• kvacidetatparityajya sarvaM saMtyajya mUkavat || 12||
• tUSNIM brahma paraM brahma zAzvatabrahmavAn svayam |
• jJAnino mahimA kiJcidaNumAtramapi sphuTam || 13||
• hariNApi hareNApi brahmaNApi surairapi |
• na zakyate varNayituM kalpakoTizatairapi || 14||
• ahaM brahmeti vijJAnaM triSu lokeSu durlabham |
• vivekinaM mahAtmAnaM brahmamAtreNAvasthitam || 15||
• draSTuM ca bhASituM vApi durlabhaM pAdasevanam |
• kadAcit pAdatIrthena snAtazcet brahma eva saH || 16||
• sarvaM mithyA na sandehaH sarvaM brahmaiva kevalam |
• etat prakaraNaM proktaM sarvasiddhAntasaMgrahaH || 17||
• durlabhaM yaH paThedbhaktyA brahma saMpadyate naraH |
• vakSye brahmamayaM sarvaM nAnyat sarvaM jaganmRSA || 18||
• brahmaiva jagadAkAraM brahmaiva paramaM padam |
• ahameva paraM brahma ahamityapi varjitaH || 19||
• sarvavarjitacinmAtraM sarvavarjitacetanaH |
• sarvavarjitazAntAtmA sarvamaGgalavigrahaH || 20||
• ahaM brahma paraM brahma asannedaM na me na me |
• na me bhUtaM bhaviSyacca na me varNaM na saMzayaH || 21||
• brahmaivAhaM na me tucchaM ahaM brahma paraM tapaH |
• brahmarUpamidaM sarvaM brahmarUpamanAmayam || 22||
• brahmaiva bhAti bhedena brahmaiva na paraH paraH |
• Atmaiva dvaitavadbhAti Atmaiva paramaM padam || 23||
• brahmaivaM bhedarahitaM bhedameva mahadbhayam |
• AtmaivAhaM nirmalo'hamAtmaiva bhuvanatrayam || 24||
• Atmaiva nAnyat sarvatra sarvaM brahmaiva nAnyakaH |
• ahameva sadA bhAmi brahmaivAsmi paro'smyaham || 25||
• nirmalo'smi paraM brahma kAryAkAryavivarjitaH |
• sadA zuddhaikarUpo'smi sadA caitanyamAtrakaH || 26||
• nizcayo'smi paraM brahma satyo'smi sakalo'smyaham |
• akSaro'smi paraM brahma zivo'smi zikharo'smyaham || 27||
• samarUpo'smi zAnto'smi tatparo'smi cidavyayaH |
• sadA brahma hi nityo'smi sadA cinmAtralakSaNaH || 28||
• sadA'khaNDaikarUpo'smi sadAmAnavivarjitaH |
• sadA zuddhaikarUpo'smi sadA caitanyamAtrakaH || 29||
• sadA sanmAnarUpo'smi sadA sattAprakAzakaH |
• sadA siddhAntarUpo'smi sadA pAvanamaGgalaH || 30||
• evaM nizcitavAn muktaH evaM nityaparo varaH |
• evaM bhAvanayA yuktaH paraM brahmaiva sarvadA || 31||
• evaM brahmAtmavAn jJAnI brahmAhamiti nizcayaH |
• sa eva puruSo loke brahmAhamiti nizcitaH || 32||
• sa eva puruSo jJAnI jIvanmuktaH sa AtmavAn |
• brahmaivAhaM mahAnAtmA saccidAnandavigrahaH || 33||
• nAhaM jIvo na me bhedo nAhaM cintA na me manaH |
• nAhaM mAMsaM na me'sthIni nAhaMkArakalevaraH || 34||
• na pramAtA na meyaM vA nAhaM sarvaM paro'smyaham |
• sarvavijJAnarUpo'smi nAhaM sarvaM kadAcana || 35||
• nAhaM mRto janmanAnyo na cinmAtro'smi nAsmyaham |
• na vAcyo'haM na mukto'haM na buddho'haM kadAcana || 36||
• na zUnyo'haM na mUDho'haM na sarvo'haM paro'smyaham |
• sarvadA brahmamAtro'haM na raso'haM sadAzivaH || 37||
• na ghrANo'haM na gandho'haM na cihno'yaM na me priyaH |
• nAhaM jIvo raso nAhaM varuNo na ca golakaH || 38||
• brahmaivAhaM na sandeho nAmarUpaM na kiJcana |
• na zrotro'haM na zabdo'haM na dizo'haM na sAkSikaH || 39||
• nAhaM na tvaM na ca svargo nAhaM vAyurna sAkSikaH |
• pAyurnAhaM visargo na na mRtyurna ca sAkSikaH || 40||
• guhyaM nAhaM na cAnando na prajApatidevatA |
• sarvaM brahma na sandehaH sarvaM brahmaiva kevalam || 41||
• nAhaM mano na saGkalpo na candro na ca sAkSikaH |
• nAhaM buddhIndriyo brahmA nAhaM nizcayarUpavAn || 42||
• nAhaMkAramahaM rudro nAbhimAno na sAkSikaH |
• cittaM nAhaM vAsudevo dhAraNA nAyamIzvaraH || 43||
• nAhaM vizvo na jAgradvA sthUladeho na me kvacit |
• na prAtibhAsiko jIvo na cAhaM vyAvahArikaH || 44||
• na pAramArthiko devo nAhamannamayo jaDaH |
• na prANamayakozo'haM na manomayakozavAn || 45||
• na vijJAnamayaH kozo nAnandamayakozavAn |
• brahmaivAhaM na sandeho nAmarUpe na kiJcana || 46||
• etAvaduktvA sakalaM nAmarUpadvayAtmakam |
• sarvaM kSaNena vismRtya kASThaloSTAdivat tyajet || 47||
• etatsarvamasannityaM sadA vandhyAkumAravat |
• zazazRGgavadevedaM narazRGgavadeva tat || 48||
• AkAzapuSpasadRzaM yathA marumarIcikA |
• gandharvanagaraM yadvadindrajAlavadeva hi || 49||
• asatyameva satataM paJcarUpakamiSyate |
• ziSyopadezakAlo hi dvaitaM na paramArthataH || 50||
• mAtA mRte rodanAya dravyaM datvA''hvayejjanAn |
• teSAM rodanamAtraM yat kevalaM dravyapaJcakam || 51||
• tadadvaitaM mayA proktaM sarvaM vismRtya kuDyavat |
• ahaM brahmeti nizcitya ahameveti bhAvaya || 52||
• ahameva sukhaM ceti ahameva na cAparaH |
• ahaM cinmAtrameveti brahmaiveti vinizcinu || 53||
• ahaM nirmalazuddheti ahaM jIvavilakSaNaH |
• ahaM brahmaiva sarvAtmA ahamityavabhAsakaH || 54||
• ahameva hi cinmAtramahameva hi nirguNaH |
• sarvAntaryAmyahaM brahma cinmAtro'haM sadAzivaH || 55||
• nityamaGgalarUpAtmA nityamokSamayaH pumAn |
• evaM nizcitya satataM svAtmAnaM svayamAsthitaH || 56||
• brahmaivAhaM na sandeho nAmarUpe na kiJcana |
• etadrUpaprakaraNaM sarvavedeSu durlabham |
• yaH zRNoti sakRdvApi brahmaiva bhavati svayam || 57||
• taM vedAdivacobhirIDitamahAyAgaizca bhogairvratai-
• rdAnaizcAnazanairyamAdiniyamaistaM vidviSante dvijAH |
• tasyAnaGgariporatIva sumahAhRdyaM hi liGgArcanaM
• tenaivAzu vinAzya mohamakhilaM jJAnaM dadAtIzvaraH || 58||

• || iti zrIzivarahasye zaGkarAkhye SaSThAMze RbhunidAghasaMvAde nAmarUpaniSedhaprakaraNaM nAma dvAviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com