RbhugItA 12 || videhamukti prakaraNa varNanam ||

RbhuH -

• dehamuktiprakaraNaM nidAgha zRNu durlabham |
• tyaktAtyaktaM na smarati videhAnmukta eva saH || 1||
• brahmarUpaH prazAntAtmA nAnyarUpaH sadA sukhI |
• svastharUpo mahAmaunI videhAnmukta eva saH || 2||
• sarvAtmA sarvabhUtAtmA zAntAtmA muktivarjitaH |
• ekAtmavarjitaH sAkSI videhAnmukta eva saH || 3||
• lakSyAtmA lAlitAtmAhaM lIlAtmA svAtmamAtrakaH |
• tUSNImAtmA svabhAvAtmA videhAnmukta eva saH || 4||
• zubhrAtmA svayamAtmAhaM sarvAtmA svAtmamAtrakaH |
• ajAtmA cAmRtAtmA hi videhAnmukta eva saH || 5||
• AnandAtmA priyaH svAtmA mokSAtmA ko'pi nirNayaH |
• ityevamiti nidhyAyI videhAnmukta eva saH || 6||
• brahmaivAhaM cidevAhaM ekaM vApi na cintyate |
• cinmAtreNaiva yastiSThedvidehAnmukta eva saH || 7||
• nizcayaM ca parityajya ahaM brahmeti nizcayaH |
• AnandabhUridehastu videhAnmukta eva saH || 8||
• sarvamastIti nAstIti nizcayaM tyajya tiSThati |
• ahaM brahmAsmi nAnyo'smi videhAnmukta eva saH || 9||
• kiJcit kvacit kadAcicca AtmAnaM na smaratyasau |
• svasvabhAvena yastiSThet videhAnmukta eva saH || 10||
• ahamAtmA paro hyAtmA cidAtmAhaM na cintyate |
• sthAsyAmItyapi yo yukto videhAnmukta eva saH || 11||
• tUSNImeva sthitastUSNIM sarvaM tUSNIM na kiJcana |
• ahamarthaparityakto videhAnmukta eva saH || 12||
• paramAtmA guNAtItaH sarvAtmApi na saMmataH |
• sarvabhAvAnmahAtmA yo videhAnmukta eva saH || 13||
• kAlabhedaM dezabhedaM vastubhedaM svabhedakam |
• kiJcidbhedaM na yasyAsti videhAnmukta eva saH || 14||
• ahaM tvaM tadidaM so'yaM kiJcidvApi na vidyate |
• atyantasukhamAtro'haM videhAnmukta eva saH || 15||
• nirguNAtmA nirAtmA hi nityAtmA nityanirNayaH |
• zUnyAtmA sUkSmarUpo yo videhAnmukta eva saH || 16||
• vizvAtmA vizvahInAtmA kAlAtmA kAlahetukaH |
• devAtmA devahIno yo videhAnmukta eva saH || 17||
• mAtrAtmA meyahInAtmA mUDhAtmA'nAtmavarjitaH |
• kevalAtmA parAtmA ca videhAnmukta eva saH || 18||
• sarvatra jaDahInAtmA sarveSAmantarAtmakaH |
• sarveSAmiti yastUkto videhAnmukta eva saH || 19||
• sarvasaGkalpahIneti saccidAnandamAtrakaH |
• sthAsyAmIti na yasyAnto videhAnmukta eva saH || 20||
• sarvaM nAsti tadastIti cinmAtro'stIti sarvadA |
• prabuddho nAsti yasyAnto videhAnmukta eva saH || 21||
• kevalaM paramAtmA yaH kevalaM jJAnavigrahaH |
• sattAmAtrasvarUpo yo videhAnmukta eva saH || 22||
• jIvezvareti caityeti vedazAstre tvahaM tviti |
• brahmaiveti na yasyAnto videhAnmukta eva saH || 23||
• brahmaiva sarvamevAhaM nAnyat kiJcijjagadbhavet |
• ityevaM nizcayo bhAvaH videhAnmukta eva saH || 24||
• idaM caitanyameveti ahaM caitanyameva hi |
• iti nizcayazUnyo yo videhAnmukta eva saH || 25||
• caitanyamAtraH saMsiddhaH svAtmArAmaH sukhAsanaH |
• sukhamAtrAntaraGgo yo videhAnmukta eva saH || 26||
• aparicchinnarUpAtmA aNoraNuvinirmalaH |
• turyAtItaH parAnando videhAnmukta eva saH || 27||
• nAmApi nAsti sarvAtmA na rUpo na ca nAstikaH |
• parabrahmasvarUpAtmA videhAnmukta eva saH || 28||
• turyAtItaH svato'tItaH ato'tItaH sa sanmayaH |
• azubhAzubhazAntAtmA videhAnmukta eva saH || 29||
• bandhamuktiprazAntAtmA sarvAtmA cAntarAtmakaH |
• prapaJcAtmA paro hyAtmA videhAnmukta eva saH || 30||
• sarvatra paripUrNAtmA sarvadA ca parAtparaH |
• antarAtmA hyanantAtmA videhAnmukta eva saH || 31||
• abodhabodhahInAtmA ajaDo jaDavarjitaH |
• atattvAtattvasarvAtmA videhAnmukta eva saH || 32||
• asamAdhisamAdhyantaH alakSyAlakSyavarjitaH |
• abhUto bhUta evAtmA videhAnmukta eva saH || 33||
• cinmayAtmA cidAkAzazcidAnandazcidaMbaraH |
• cinmAtrarUpa evAtmA videhAnmukta eva saH || 34||
• saccidAnandarUpAtmA saccidAnandavigrahaH |
• saccidAnandapUrNAtmA videhAnmukta eva saH || 35||
• sadA brahmamayo nityaM sadA svAtmani niSThitaH |
• sadA'khaNDaikarUpAtmA videhAnmukta eva saH || 36||
• prajJAnaghana evAtmA prajJAnaghanavigrahaH |
• nityajJAnaparAnando videhAnmukta eva saH || 37||
• yasya dehaH kvacinnAsti yasya kiJcit smRtizca na |
• sadAtmA hyAtmani svastho videhAnmukta eva saH || 38||
• yasya nirvAsanaM cittaM yasya brahmAtmanA sthitiH |
• yogAtmA yogayuktAtmA videhAnmukta eva saH || 39||
• caitanyamAtra eveti tyaktaM sarvamatirna hi |
• guNAguNavikArAnto videhAnmukta eva saH || 40||
• kAladezAdi nAstyanto na grAhyo nAsmRtiH paraH |
• nizcayaM ca parityakto videhAnmukta eva saH || 41||
• bhUmAnandAparAnando bhogAnandavivarjitaH |
• sAkSI ca sAkSihInazca videhAnmukta eva saH || 42||
• so'pi ko'pi na so ko'pi kiJcit kiJcinna kiJcana |
• AtmAnAtmA cidAtmA ca cidaciccAhameva ca || 43||
• yasya prapaJcazcAnAtmA brahmAkAramapIha na |
• svasvarUpaH svayaMjyotirvidehAnmukta eva saH || 44||
• vAcAmagocarAnandaH sarvendriyavivarjitaH |
• atItAtItabhAvo yo videhAnmukta eva saH || 45||
• cittavRtteratIto yazcittavRttirna bhAsakaH |
• sarvavRttivihIno yo videhAnmukta eva saH || 46||
• tasmin kAle videho yo dehasmaraNavarjitaH |
• na sthUlo na kRzo vApi videhAnmukta eva saH || 47||
• ISaNmAtrasthito yo vai sadA sarvavivarjitaH |
• brahmamAtreNa yastiSThet videhAnmukta eva saH || 48||
• paraM brahma parAnandaH paramAtmA parAtparaH |
• parairadRSTabAhyAnto videhAnmukta eva saH || 49||
• zuddhavedAntasAro'yaM zuddhasattvAtmani sthitaH |
• tadbhedamapi yastyakto videhAnmukta eva saH || 50||
• brahmAmRtarasAsvAdo brahmAmRtarasAyanam |
• brahmAmRtarase magno videhAnmukta eva saH || 51||
• brahmAmRtarasAdhAro brahmAmRtarasaH svayam |
• brahmAmRtarase tRpto videhAnmukta eva saH || 52||
• brahmAnandaparAnando brahmAnandarasaprabhaH |
• brahmAnandaparaMjyotirvidehAnmukta eva saH || 53||
• brahmAnandarasAnando brahmAmRtanirantaram |
• brahmAnandaH sadAnando videhAnmukta eva saH || 54||
• brahmAnandAnubhAvo yo brahmAmRtazivArcanam |
• brahmAnandarasaprIto videhAnmukta eva saH || 55||
• brahmAnandarasodvAho brahmAmRtakuTumbakaH |
• brahmAnandajanairyukto videhAnmukta eva saH || 56||
• brahmAmRtavare vAso brahmAnandAlaye sthitaH |
• brahmAmRtajapo yasya videhAnmukta eva saH || 57||
• brahmAnandazarIrAnto brahmAnandendriyaH kvacit |
• brahmAmRtamayI vidyA videhAnmukta eva saH || 58||
• brahmAnadamadonmatto brahmAmRtarasaMbharaH |
• brahmAtmani sadA svastho videhAnmukta eva saH || 59||
• dehamuktiprakaraNaM sarvavedeSu durlabham |
• mayoktaM te mahAyogin videhaH zravaNAdbhavet || 60||

skandaH -

• anAtha nAtha te padaM bhajAmyumAsanAtha sa-
• nnizIthanAthamaulisaMsphuTallalATasaGgaja-
• sphuliGgadagdhamanmathaM pramAthanAtha pAhi mAm || 61||
• vibhUtibhUSagAtra te trinetramitratAmiyAt
• manaHsaroruhaM kSaNaM tathekSaNena me sadA |
• prabandhasaMsRtibhramadbhramajjanaughasantatau
• na veda vedamaulirapyapAstaduHkhasantatim || 62||

• ||iti zrIzivarahasye zaGkarAkhye SaSThAMze RbhunidAghasaMvAde dehamuktiprakaraNavarNanaM nAma dvAdazo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com