RbhugItA 18 || Rbhi-nidAdha saMvAdaH ||

RbhuH -

• zRNu bhUyaH paraM tattvaM sadyo mokSapradAyakam |
• sarvaM brahmaiva satataM sarvaM zAntaM na saMzayaH || 1||
• brahmAkSaramidaM sarvaM parAkAramidaM nahi |
• idamityapi yaddoSaM vayamityapi bhASaNam || 2||
• yatkiJcitsmaraNaM nAsti yatkiJcid dhyAnameva hi |
• yatkiJcid jJAnarUpaM vA tatsarvaM brahma eva hi || 3||
• yatkiJcid brahmavAkyaM vA yatkiJcidvedavAkyakam |
• yatkiJcidguruvAkyaM vA tatsarvaM brahma eva hi || 4||
• yatkiJcitkalmaSaM satyaM yatkiJcit priyabhASaNam |
• yatkiJcinmananaM sattA tatsarvaM brahma eva hi || 5||
• yatkiJcit zravaNaM nityaM yat kiJciddhyAnamaznute |
• yatkiJcinnizcayaM zraddhA tatsarvaM brahma eva hi || 6||
• yatkiJcid gurUpadezaM yatkiJcidgurucintanam |
• yatkiJcidyogabhedaM vA tatsarvaM brahma eva hi || 7||
• sarvaM tyajya guruM tyajya sarvaM santyajya nityazaH |
• tUSNImevAsanaM brahma sukhameva hi kevalam || 8||
• sarvaM tyaktvA sukhaM nityaM sarvatyAgaM sukhaM mahat |
• sarvatyAgaM parAnandaM sarvatyAgaM paraM sukham || 9||
• sarvatyAgaM manastyAgaH sarvatyAgamahaMkRteH |
• sarvatyAgaM mahAyAgaH sarvatyAgaM sukhaM param || 10||
• sarvatyAgaM mahAmokSaM cittatyAgaM tadeva hi |
• cittameva jagannityaM cittameva hi saMsRtiH || 11||
• cittameva mahAmAyA cittameva zarIrakam |
• cittameva bhayaM dehaH cittameva manomayam || 12||
• cittameva prapaJcAkhyaM cittameva hi kalmaSam |
• cittameva jaDaM sarvaM cittamevendriyAdikam || 13||
• cittameva sadA satyaM cittameva nahi kvacit |
• cittameva mahAzAstraM cittameva manaHpradam || 14||
• cittameva sadA pApaM cittameva sadA matam |
• cittameva hi sarvAkhyaM cittameva sadA jahi || 15||
• cittaM nAstIti cintA syAt AtmamAtraM prakAzate |
• cittamastIti cintA cet cittatvaM svayameva hi || 16||
• svayameva hi cittAkhyaM svayaM brahma na saMzayaH |
• cittameva hi sarvAkhyaM cittaM sarvamiti smRtam || 17||
• brahmaivAhaM svayaMjyotirbrahmaivAhaM na saMzayaH |
• sarvaM brahma na sandehaH sarvaM cijjyotireva hi || 18||
• ahaM brahmaiva nityAtmA pUrNAt pUrNataraM sadA |
• ahaM pRthvyAdisahitaM ahameva vilakSaNam || 19||
• ahaM sUkSmazarIrAntamahameva purAtanam |
• ahameva hi mAnAtmA sarvaM brahmaiva kevalam || 20||
• cidAkAro hyahaM pUrNazcidAkAramidaM jagat |
• cidAkAraM cidAkAzaM cidAkAzamahaM sadA || 21||
• cidAkAzaM tvamevAsi cidAkAzamahaM sadA |
• cidAkAzaM cidevedaM cidAkAzAnna kiJcana || 22||
• cidAkAzatataM sarvaM cidAkAzaM prakAzakam |
• cidAkAraM mano rUpaM cidAkAzaM hi cidghanam || 23||
• cidAkAzaM paraM brahma cidAkAzaM ca cinmayaH |
• cidAkAzaM zivaM sAkSAccidAkAzamahaM sadA || 24||
• saccidAnandarUpo'haM saccidAnandazAzvataH |
• saccidAnanda sanmAtraM saccidAnandabhAvanaH || 25||
• saccidAnandapUrNo'haM saccidAnandakAraNam |
• saccidAnandasandohaH saccidAnanda IzvaraH || 26||var was hInakaH
• saccidAnandanityo'haM saccidAnandalakSaNam |
• saccidAnandamAtro'haM saccidAnandarUpakaH || 27||
• AtmaivedamidaM sarvamAtmaivAhaM na saMzayaH |
• AtmaivAsmi paraM satyamAtmaiva paramaM padam || 28||
• Atmaiva jagadAkAraM Atmaiva bhuvanatrayam |
• Atmaiva jagatAM zreSThaH Atmaiva hi manomayaH || 29||
• Atmaiva jagatAM trAtA Atmaiva gururAtmanaH |
• Atmaiva bahudhA bhAti AtmaivaikaM parAtmanaH || 30||
• Atmaiva paramaM brahma AtmaivAhaM na saMzayaH |
• Atmaiva paramaM lokaM Atmaiva paramAtmanaH || 31||
• Atmaiva jIvarUpAtmA AtmaivezvaravigrahaH |
• Atmaiva harirAnandaH Atmaiva svayamAtmanaH || 32||
• AtmaivAnandasandoha AtmaivedaM sadA sukham |
• Atmaiva nityazuddhAtmA Atmaiva jagataH paraH || 33||
• Atmaiva paJcabhUtAtmA Atmaiva jyotirAtmanaH |
• Atmaiva sarvadA nAnyadAtmaiva paramo'vyayaH || 34||
• Atmaiva hyAtmabhAsAtmA Atmaiva vibhuravyayaH |
• Atmaiva brahmavijJAnaM AtmaivAhaM tvameva hi || 35||
• Atmaiva paramAnanda AtmaivAhaM jaganmayaH |
• AtmaivAhaM jagadbhAnaM AtmaivAhaM na kiJcana || 36||
• Atmaiva hyAtmanaH snAnamAtmaiva hyAtmano japaH |
• Atmaiva hyAtmano modamAtmaivAtmapriyaH sadA || 37||
• Atmaiva hyAtmano nityo hyAtmaiva guNabhAsakaH |
• Atmaiva turyarUpAtmA AtmAtItastataH paraH || 38||
• Atmaiva nityapUrNAtmA AtmaivAhaM na saMzayaH |
• Atmaiva tvamahaM cAtmA sarvamAtmaiva kevalam || 39||
• nityo'haM nityapUrNo'haM nityo'haM sarvadA sadA |
• AtmaivAhaM jagannAnyad amRtAtmA purAtanaH || 40||
• purAtano'haM puruSo'hamIzaH parAt paro'haM paramezvaro'ham |
• bhavaprado'haM bhavanAzano'haM sukhaprado'haM sukharUpamadvayam || 41||
• Anando'hamazeSo'hamamRtohaM na saMzayaH |
• ajo'hamAtmarUpo'hamanyannAsti sadA priyaH || 42||
• brahmaivAhamidaM brahma sarvaM brahma sadA'vyayaH |
• sadA sarvapadaM nAsti sarvameva sadA na hi || 43||
• nirguNo'haM nirAdhAra ahaM nAstIti sarvadA |
• anarthamUlaM nAstyeva mAyAkAryaM na kiJcana || 44||
• avidyAvibhavo nAsti ahaM brahma na saMzayaH |
• sarvaM brahma cidAkAzaM tadevAhaM na saMzayaH || 45||
• tadevAhaM svayaM cAhaM paraM cAhaM parezvaraH |
• vidyAdharo'hamevAtra vidyAvidye na kiJcana || 46||
• cidahaM cidahaM nityaM turyo'haM turyakaH paraH |
• brahmaiva sarvaM brahmaiva sarvaM brahma sadA'smyaham || 47||
• matto'nyannAparaM kiJcinmatto'nyadbrahma ca kvacit |
• matto'nyat paramaM nAsti matto'nyaccitpadaM nahi || 48||
• matto'nyat satpadaM nAsti matto'nyaccitpadaM na me |
• matto'nyat bhavanaM nAsti matto'nyad brahma eva na || 49||
• matto'nyat kAraNaM nAsti matto'nyat kiJcidapyaNu |
• matto'nyat sattvarUpaM ca matto'nyat zuddhameva na || 50||
• matto'nyat pAvanaM nAsti matto'nyat tatpadaM na hi |
• matto'nyat dharmarUpaM vA matto'nyadakhilaM na ca || 51||
• matto'nyadasadevAtra matto'nyanmithyA eva hi |
• matto'nyadbhAti sarvasvaM matto'nyacchazazRGgavat || 52||
• matto'nyadbhAti cenmithyA matto'nyaccendrajAlakam |
• matto'nyat saMzayo nAsti matto'nyat kArya kAraNam || 53||
• brahmamAtramidaM sarvaM so'hamasmIti bhAvanam |
• sarvamuktaM bhagavatA evameveti nizcinu || 54||
• bahunoktena kiM yogin nizcayaM kuru sarvadA |
• sakRnnizcayamAtreNa brahmaiva bhavati svayam || 55||
• vananagabhuvanaM yacchaGkarAnnAnyadasti
• jagadidamasurAdyaM devadevaH sa eva |
• tanumanagamanAdyaiH kozakAzAvakAze
• sa khalu parazivAtmA dRzyate sUkSmabuddhyA || 56||
• cakSuHzrotramano'savazca hRdi khAdudbhAsitadhyAntarAt
• tasminneva vilIyate gatiparaM yadvAsanA vAsinI |
• cittaM cetayate hRdindriyagaNaM vAcAM manodUragaM
• taM brahmAmRtametadeva girijAkAntAtmanA saMjJitam || 57||

• || iti zrIzivarahasye zaGkarAkhye SaSThAMze RbhunidAghasaMvAde aSTAdazo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com