RbhugItA 16 || cideva-tvaM prakaraNa nirUpaNam ||

RbhuH -

• atyantaM durlabhaM vakSye vedazAstrAgamAdiSu |
• zRNvantu sAvadhAnena asadeva hi kevalam || 1||
• yatkiJcid dRzyate loke yatkiJcidbhASate sadA |
• yatkiJcid bhujyate kvApi tatsarvamasadeva hi || 2||
• yadyat kiJcijjapaM vApi snAnaM vA jalameva vA |
• Atmano'nyat paraM yadyat asat sarvaM na saMzayaH || 3||
• cittakAryaM buddhikAryaM mAyAkAryaM tathaiva hi |
• Atmano'nyat paraM kiJcit tatsarvamasadeva hi || 4||
• ahantAyAH paraM rUpaM idaMtvaM satyamityapi |
• Atmano'nyat paraM kiJcit tatsarvamasadeva hi || 5||
• nAnAtvameva rUpatvaM vyavahAraH kvacit kvacit |
• AtmIya eva sarvatra tatsarvamasadeva hi || 6||
• tattvabhedaM jagadbhedaM sarvabhedamasatyakam |
• icchAbhedaM jagadbhedaM tatsarvamasadeva hi || 7||
• dvaitabhedaM citrabhedaM jAgradbhedaM manomayam |
• ahaMbhedamidaMbhedamasadeva hi kevalam || 8||
• svapnabhedaM suptibhedaM turyabhedamabhedakam |
• kartRbhedaM kAryabhedaM guNabhedaM rasAtmakam |
• liGgabhedamidaMbhedamasadeva hi kevalam || 9||
• AtmabhedamasadbhedaM sadbhedamasadaNvapi |
• atyantAbhAvasadbhedam asadeva hi kevalam || 10||
• astibhedaM nAstibhedamabhedaM bhedavibhramaH |
• bhrAntibhedaM bhUtibhedamasadeva hi kevalam || 11||
• punaranyatra sadbhedamidamanyatra vA bhayam |
• puNyabhedaM pApabhedaM asadeva hi kevalam || 12||
• saGkalpabhedaM tadbhedaM sadA sarvatra bhedakam |
• jJAnAjJAnamayaM sarvaM asadeva hi kevalam || 13||
• brahmabhedaM kSatrabhedaM bhUtabhautikabhedakam |
• idaMbhedamahaMbhedaM asadeva hi kevalam || 14||
• vedabhedaM devabhedaM lokAnAM bhedamIdRzam |
• paJcAkSaramasannityam asadeva hi kevalam || 15||
• jJAnendriyamasannityaM karmendriyamasatsadA |
• asadeva ca zabdAkhyaM asatyaM tatphalaM tathA || 16||
• asatyaM paJcabhUtAkhyamasatyaM paJcadevatAH |
• asatyaM paJcakozAkhyam asadeva hi kevalam || 17||
• asatyaM SaDvikArAdi asatyaM SaTkamUrmiNAm |
• asatyamariSaDvargamasatyaM SaDRtustadA || 18||var was tathA
• asatyaM dvAdazamAsAH asatyaM vatsarastathA |
• asatyaM SaDavasthAkhyaM SaTkAlamasadeva hi || 19||
• asatyameva SaTzAstraM asadeva hi kevalam |
• asadeva sadA jJAnaM asadeva hi kevalam || 20||
• anuktamuktaM noktaM ca asadeva hi kevalam |
• asatprakaraNaM proktaM sarvavedeSu durlabham || 21||
• bhUyaH zRNu tvaM yogIndra sAkSAnmokSaM bravImyaham |
• sanmAtramahamevAtmA saccidAnanda kevalam || 22||
• sanmayAnandabhUtAtmA cinmayAnandasadghanaH |
• cinmayAnandasandohacidAnando hi kevalam || 23||
• cinmAtrajyotirAndazcinmAtrajyotivigrahaH |
• cinmAtrajyotirIzAnaH sarvadAnandakevalam || 24||
• cinmAtrajyotirakhilaM cinmAtrajyotirasmyaham |
• cinmAtraM sarvamevAhaM sarvaM cinmAtrameva hi || 25||
• cinmAtrameva cittaM ca cinmAtraM mokSa eva ca |
• cinmAtrameva mananaM cinmAtraM zravaNaM tathA || 26||
• cinmAtramahamevAsmi sarvaM cinmAtrameva hi |
• cinmAtraM nirguNaM brahma cinmAtraM saguNaM param || 27||
• cinmAtramahameva tvaM sarvaM cinmAtrameva hi |
• cinmAtrameva hRdayaM cinmAtraM cinmayaM sadA || 28||
• cideva tvaM cidevAhaM sarvaM cinmAtrameva hi |
• cinmAtrameva zAntatvaM cinmAtraM zAntilakSaNam || 29||
• cinmAtrameva vijJAnaM cinmAtraM brahma kevalam |
• cinmAtrameva saMkalpaM cinmAtraM bhuvanatrayam || 30||
• cinmAtrameva sarvatra cinmAtraM vyApako guruH |
• cinmAtrameva zuddhatvaM cinmAtraM brahma kevalam || 31||
• cinmAtrameva caitanyaM cinmAtraM bhAskarAdikam |
• cinmAtrameva sanmAtraM cinmAtraM jagadeva hi || 32||
• cinmAtrameva satkarma cinmAtraM nityamaGgalam |
• cinmAtrameva hi brahma cinmAtraM harireva hi || 33||
• cinmAtrameva maunAtmA cinmAtraM siddhireva hi |
• cinmAtrameva janitaM cinmAtraM sukhameva hi || 34||
• cinmAtrameva gaganaM cinmAtraM parvataM jalam |
• cinmAtrameva nakSatraM cinmAtraM meghameva hi || 35||
• cideva devatAkAraM cideva zivapUjanam |
• cinmAtrameva kAThinyaM cinmAtraM zItalaM jalam || 36||
• cinmAtrameva mantavyaM cinmAtraM dRzyabhAvanam |
• cinmAtrameva sakalaM cinmAtraM bhuvanaM pitA || 37||
• cinmAtrameva jananI cinmAtrAnnAsti kiJcana |
• cinmAtrameva nayanaM cinmAtraM zravaNaM sukham || 38||
• cinmAtrameva karaNaM cinmAtraM kAryamIzvaram |
• cinmAtraM cinmayaM satyaM cinmAtraM nAsti nAsti hi || 39||
• cinmAtrameva vedAntaM cinmAtraM brahma nizcayam |
• cinmAtrameva sadbhAvi cinmAtraM bhAti nityazaH || 40||
• cideva jagadAkAraM cideva paramaM padam |
• cideva hi cidAkAraM cideva hi cidavyayaH || 41||
• cideva hi zivAkAraM cideva hi zivavigrahaH |
• cidAkAramidaM sarvaM cidAkAraM sukhAsukham || 42||
• cideva hi jaDAkAraM cideva hi nirantaram |
• cidevakalanAkAraM jIvAkAraM cideva hi || 43||
• cideva devatAkAraM cideva zivapUjanam |
• cideva tvaM cidevAhaM sarvaM cinmAtrameva hi || 44||
• cideva paramAkAraM cideva hi nirAmayam |
• cinmAtrameva satataM cinmAtraM hi parAyaNam || 45||
• cinmAtrameva vairAgyaM cinmAtraM nirguNaM sadA |
• cinmAtrameva saJcAraM cinmAtraM mantratantrakam || 46||
• cidAkAramidaM vizvaM cidAkAraM jagattrayam |
• cidAkAramahaGkAraM cidAkAraM parAt param || 47||
• cidAkAramidaM bhedaM cidAkAraM tRNAdikam |
• cidAkAraM cidAkAzaM cidAkAramarUpakam || 48||
• cidAkAraM mahAnandaM cidAkAraM sukhAt sukham |
• cidAkAraM sukhaM bhojyaM cidAkAraM paraM gurum || 49||
• cidAkAramidaM vizvaM cidAkAramidaM pumAn |
• cidAkAramajaM zAntaM cidAkAramanAmayam || 50||
• cidAkAraM parAtItaM cidAkAraM cideva hi |
• cidAkAraM cidAkAzaM cidAkAzaM zivAyate || 51||
• cidAkAraM sadA cittaM cidAkAraM sadA'mRtam |
• cidAkAraM cidAkAzaM tadA sarvAntarAntaram || 52||
• cidAkAramidaM pUrNaM cidAkAramidaM priyam |
• cidAkAramidaM sarvaM cidAkAramahaM sadA || 53||
• cidAkAramidaM sthAnaM cidAkAraM hRdambaram |
• cidAbodhaM cidAkAraM cidAkAzaM tataM sadA || 54||
• cidAkAraM sadA pUrNaM cidAkAraM mahatphalam |
• cidAkAraM paraM tattvaM cidAkAraM paraM bhavAn || 55||
• cidAkAraM sadAmodaM cidAkAraM sadA mRtam |
• cidAkAraM paraM brahma cidahaM cidahaM sadA || 56||
• cidahaM cidahaM cittaM cittaM svasya na saMzayaH |
• cideva jagadAkAraM cideva zivazaGkaraH || 57||
• cideva gaganAkAraM cideva gaNanAyakam |
• cideva bhuvanAkAraM cideva bhavabhAvanam || 58||
• cideva hRdayAkAraM cideva hRdayezvaraH |
• cideva amRtAkAraM cideva calanAspadam || 59||
• cidevAhaM cidevAhaM cinmayaM cinmayaM sadA |
• cideva satyavizvAsaM cideva brahmabhAvanam || 60||
• cideva paramaM devaM cideva hRdayAlayam |
• cideva sakalAkAraM cideva janamaNDalam || 61||
• cideva sarvamAnandaM cideva priyabhASaNam |
• cideva tvaM cidevAhaM sarvaM cinmAtrameva hi || 62||
• cideva paramaM dhyAnaM cideva paramarhaNam |
• cideva tvaM cidevAhaM sarvaM cinmayameva hi || 63||
• cideva tvaM prakaraNaM sarvavedeSu durlabham |
• sakRcchravaNamAtreNa brahmaiva bhavati dhruvam || 64||
• yasyAbhidhyAnayogAjjanimRtivivazAH zAzvataM vRttibhirye
• mAyAmohairvihInA hRdudarabhayajaM chidyate granthijAtam |
• vizvaM vizvAdhikarasaM bhavati bhavato darzanAdAptakAmaH
• so nityo nirvikalpo bhavati bhuvi sadA brahmabhUto'ntarAtmA || 65||

• || iti zrIzivarahasye zaGkarAkhye SaSThAMze RbhunidAghasaMvAde cidevatvaMprakaraNavarNanaM nAma SoDazo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com