RbhugItA 26 || jJAnAmRta-manomaya-prakaraNa varNanam ||

RbhuH -

• vakSye saccitparAnandaM svabhAvaM sarvadA sukham |
• sarvavedapurANAnAM sArAt sArataraM svayam || 1||
• na bhedaM ca dvayaM dvandvaM na bhedaM bhedavarjitam |
• idameva paraM brahma jJAnAzrayamanAmayam || 2||
• na kvacinnAta evAhaM nAkSaraM na parAtparam |
• idameva paraM brahma jJAnAzrayamanAmayam || 3||
• na bahirnAntaraM nAhaM na saGkalpo na vigrahaH |
• idameva paraM brahma jJAnAzrayamanAmayam || 4||
• na satyaM ca parityajya na vArtA nArthadUSaNam |
• idameva paraM brahma jJAnAzrayamanAmayam || 5||
• na guNo guNivAkyaM vA na manovRttinizcayaH |
• na japaM na paricchinnaM na vyApakamasat phalam || 6||
• na gururna ca ziSyo vA na sthiraM na zubhAzubham |
• naikarUpaM nAnyarUpaM na mokSo na ca bandhakam || 7||
• ahaM padArthastatpadaM vA nendriyaM viSayAdikam |
• na saMzayaM na tucchaM vA na nizcayaM na vA kRtam || 8||
• na zAntirUpamadvaitaM na cordhvaM na ca nIcakam |
• na lakSaNaM na duHkhAGgaM na sukhaM na ca caJcalam || 9||
• na zarIraM na liGgaM vA na kAraNamakAraNam |
• na duHkhaM nAntikaM nAhaM na gUDhaM na paraM padam || 10||
• na saJcitaM ca nAgAmi na satyaM ca tvamAhakam |
• nAjJAnaM na ca vijJAnaM na mUDho na ca vijJavAn || 11||
• na nIcaM narakaM nAntaM na muktirna ca pAvanam |
• na tRSNA na ca vidyAtvaM nAhaM tattvaM na devatA || 12||
• na zubhAzubhasaGketo na mRtyurna ca jIvanam |
• na tRptirna ca bhojyaM vA na khaNDaikaraso'dvayam || 13||
• na saGkalpaM na prapaJcaM na jAgaraNarAjakam |
• na kiJcitsamatAdoSo na turyagaNanA bhramaH || 14||
• na sarvaM samalaM neSTaM na nItirna ca pUjanam |
• na prapaJcaM na bahunA nAnyabhASaNasaGgamaH || 15||
• na satsaGgamasatsaGgaH na brahma na vicAraNam |
• nAbhyAsaM na ca vaktA ca na snAnaM na ca tIrthakam || 16||
• na puNyaM na ca vA pApaM na kriyA doSakAraNam |
• na cAdhyAtmaM nAdhibhUtaM na daivatamasambhavam || 17||
• na janmamaraNe kvApi jAgratsvapnasuSuptikam |
• na bhUlokaM na pAtAlaM na jayApajayAjayau || 18||
• na hInaM na ca vA bhItirna ratirna mRtistvarA |
• acintyaM nAparAdhyAtmA nigamAgamavibhramaH || 19||
• na sAttvikaM rAjasaM ca na tAmasaguNAdhikam |
• na zaivaM na ca vedAntaM na svAdyaM tanna mAnasam || 20||
• na bandho na ca mokSo vA na vAkyaM aikyalakSaNam |
• na strIrUpaM na puMbhAvaH na SaNDo na sthiraH padam || 21||
• na bhUSaNaM na dUSaNaM na stotraM na stutirna hi |
• na laukikaM vaidikaM na zAstraM na ca zAsanam || 22||
• na pAnaM na kRzaM nedaM na modaM na madAmadam |
• na bhAvanamabhAvo vA na kulaM nAmarUpakam || 23||
• notkRSTaM ca nikRSTaM ca na zreyo'zreya eva hi |
• nirmalatvaM malotsargo na jIvo na manodamaH || 24||
• na zAntikalanA nAgaM na zAntirna zamo damaH |
• na krIDA na ca bhAvAGgaM na vikAraM na doSakam || 25||
• na yatkiJcinna yatrAhaM na mAyAkhyA na mAyikA |
• yatkiJcinna ca dharmAdi na dharmaparipIDanam || 26||
• na yauvanaM na bAlyaM vA na jarAmaraNAdikam |
• na bandhurna ca vA'bandhurna mitraM na ca sodaraH || 27||
• nApi sarvaM na cAkiJcinna viriJco na kezavaH |
• na zivo nASTadikpAlo na vizvo na ca taijasaH || 28||
• na prAjJo hi na turyo vA na brahmakSatraviDvaraH |
• idameva paraM brahma jJAnAmRtamanAmayam || 29||
• na punarbhAvi pazcAdvA na punarbhavasaMbhavaH |
• na kAlakalanA nAhaM na saMbhASaNakAraNam || 30||
• na cordhvamantaHkaraNaM na ca cinmAtrabhASaNam |
• na brahmAhamiti dvaitaM na cinmAtramiti dvayam || 31||
• nAnnakozaM na ca prANamanomayamakozakam |
• na vijJAnamayaH kozaH na cAnandamayaH pRthak || 32||
• na bodharUpaM bodhyaM vA bodhakaM nAtra yadbhramaH |
• na bAdhyaM bAdhakaM mithyA tripuTIjJAnanirNayaH || 33||
• na pramAtA pramANaM vA na prameyaM phalodayam |
• idameva paraM brahma jJAnAmRtamanomayam || 34||
• na guhyaM na prakAzaM vA na mahatvaM na cANutA |
• na prapaJco vidyamAnaM na prapaJcaH kadAcana || 35||
• nAntaHkaraNasaMsAro na mano jagatAM bhramaH |
• na cittarUpasaMsAro buddhipUrvaM prapaJcakam || 36||
• na jIvarUpasaMsAro vAsanArUpasaMsRtiH |
• na liGgabhedasaMsAro nAjJAnamayasaMsmRtiH || 37||var was saMsRtiH
• na vedarUpasaMsAro na zAstrAgamasaMsRtiH |
• nAnyadastIti saMsAramanyadastIti bhedakam || 38||
• na bhedAbhedakalanaM na doSAdoSakalpanam |
• na zAntAzAntasaMsAraM na guNAguNasaMsRtiH || 39||
• na strIliGgaM na puMliGgaM na napuMsakasaMsRtiH |
• na sthAvaraM na jaGgamaM ca na duHkhaM na sukhaM kvacit || 40||
• na ziSTAziSTarUpaM vA na yogyAyogyanizcayaH |
• na dvaitavRttirUpaM vA sAkSivRttitvalakSaNam || 41||
• akhaNDAkAravRttitvamakhaNDaikarasaM sukham |
• deho'hamiti yA vRttirbrahmAhamiti zabdakam || 42||
• akhaNDanizcayA vRttirnAkhaNDaikarasaM mahat |
• na sarvavRttibhavanaM sarvavRttivinAzakam || 43||
• sarvavRttyanusandhAnaM sarvavRttivimocanam |
• sarvavRttivinAzAntaM sarvavRttivizUnyakam || 44||
• na sarvavRttisAhasraM kSaNakSaNavinAzanam |
• na sarvavRttisAkSitvaM na ca brahmAtmabhAvanam || 45||
• na jaganna mano nAnto na kAryakalanaM kvacit |
• na dUSaNaM bhUSaNaM vA na niraGkuzalakSaNam || 46||
• na ca dharmAtmano liGgaM guNazAlitvalakSaNam |
• na samAdhikaliGgaM vA na prArabdhaM prabandhakam || 47||
• brahmavittaM Atmasatyo na paraH svapnalakSaNam |
• na ca varyaparo rodho variSTho nArthatatparaH || 48||
• AtmajJAnavihIno yo mahApAtakireva saH |
• etAvad jJAnahIno yo mahArogI sa eva hi || 49||
• ahaM brahma na sandeha akhaNDaikarasAtmakaH |
• brahmaiva sarvameveti nizcayAnubhavAtmakaH || 50||
• sadyo mukto na sandehaH sadyaH prajJAnavigrahaH |
• sa eva jJAnavAn loke sa eva paramezvaraH || 51||
• idameva paraM brahma jJAnAmRtamanomayam |
• etatprakaraNaM yastu zRNute brahma eva saH || 52||
• ekatvaM na bahutvamapyaNumahat kAryaM na vai kAraNaM
• vizvaM vizvapatitvamapyarasakaM no gandharUpaM sadA |
• baddhaM muktamanuttamottamamahAnandaikamodaM sadA
• bhUmAnandasadAzivaM janijarArogAdyasaGgaM mahaH || 53||

• || iti zrIzivarahasye zaGkarAkhye SaSThAMze RbhunidAghasaMvAde jJAnAmRtamanomayaprakaraNavarNanaM nAma SaDviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com