RbhugItA 34 || dRSTAntair-brahma-sAdhana prakaraNam ||
RbhuH -
- zRNuSva brahma vijJAnamadbhutaM tvatidurlabham |
- ekaikazravaNenaiva kaivalyaM paramaznute || 1||
- satyaM satyaM jagannAsti saMkalpakalanAdikam |
- nityAnandamayaM brahmavijJAnaM sarvadA svayam || 2||
- AnandamavyayaM zAntamekarUpamanAmayam |
- cittaprapaJcaM naivAsti nAsti kAryaM ca tattvataH || 3||
- prapaJcabhAvanA nAsti dRzyarUpaM na kiJcana |
- asatyarUpaM saGkalpaM tatkAryaM ca jaganna hi || 4||
- sarvamityeva nAstyeva kAlamityevamIzvaraH |
- vandhyAkumAre bhItizca tadadhInamidaM jagat || 5||
- gandharvanagare zRGge madagre dRzyate jagat |
- mRgatRSNAjalaM pItvA tRptizcedastvidaM jagat || 6||
- nage zRGge na bANena naSTaM puruSamastvidam |
- gandharvanagare satye jagadbhavatu sarvadA || 7||
- gagane nIlamAsindhau jagat satyaM bhaviSyati |
- zuktikArajataM satyaM bhUSaNaM cijjagadbhavet || 8||
- rajjusarpeNa naSTazcet naro bhavati saMsRtiH |
- jAtirUpeNa bANena jvAlAgnau nAzite sati || 9||
- raMbhAstambhena kASThena pAkasiddhirjagadbhavet |
- nityAnandamayaM brahma kevalaM sarvadA svayam || 10||
- sadyaH kumArikArUpaiH pAke siddhe jagadbhavet |
- nityAnandamayaM brahma kevalaM sarvadA svayam || 11||
- mityATavyAM vAyasAnnaM asti cejjagadudbhavam |
- mUlAropaNamantrasya prItizcedbhASaNaM jagat || 12||
- mAsAt pUrvaM mRto martya Agatazcejjagad bhavet |
- takraM kSIrasvarUpaM cet kiJcit kiJcijjagadbhavet || 13||
- gostanAdudbhavaM kSIraM punarArohaNaM jagat |
- bhUrajasyAabdamutpannaM jagadbhavatu sarvadA || 14||
- kUrmaromNA gaje baddhe jagadastu madotkaTe |
- mRNAlatantunA meruzcalitazcejjagad bhavet || 15||
- taraGgamAlayA sindhuH baddhazcedastvidaM jagat |
- jvAlAgnimaNDale padmaM vRddhaM cet tajjagadbhavet || 16||
- mahacchailendranilayaM saMbhavazcedidaM bhavet |
- nityAnandamayaM brahma kevalaM sarvadA svayam || 17||
- mIna Agatya padmAkSe sthitazcedastvidaM jagat |
- nigIrNazcedbhaGgasUnuH merupucchavadastvidam || 18||
- mazakenAzite siMhe hate bhavatu kalpanam |
- aNukoTaravistIrNe trailokye cejjagadbhavet || 19||
- svapne tiSThati yadvastu jAgare cejjagadbhavet |
- nadIvego nizcalazcet jagadbhavatu sarvadA || 20||
- jAtyandhai ratnaviSayaH sujJAtazcejjagadbhavet |
- candrasUryAdikaM tyaktvA rAhuzcet dRzyate jagat || 21||
- bhraSTabIjena utpanne vRddhizceccittasaMbhavaH |
- mahAdaridrairADhyAnAM sukhe jJAte jagadbhavet || 22||
- dugdhaM dugdhagatakSIraM punarArohaNaM punaH |
- kevalaM darpaNe nAsti pratibimbaM tadA jagat || 23||
- yathA zUnyagataM vyoma pratibimbena vai jagat |
- ajakukSau gajo nAsti AtmakukSau jaganna hi || 24||
- yathA tAntre samutpanne tathA brahmamayaM jagat |
- kArpAsake'gnidagdhena bhasma nAsti tathA jagat || 25||
- paraM brahma paraM jyotiH parastAt parataH paraH |
- sarvadA bhedakalanaM dvaitAdvaitaM na vidyate || 26||
- cittavRttirjagadduHkhaM asti cet kila nAzanam |
- manaHsaMkalpakaM bandha asti cedbrahmabhAvanA || 27||
- avidyA kAryadehAdi asti ceddvaitabhAvanam |
- cittameva mahArogo vyAptazcedbrahmabheSajam || 28||
- ahaM zatruryadi bhavedahaM brahmaiva bhAvanam |
- deho'hamiti dukhaM cedbrahmAhamiti nizcinu || 29||
- saMzayazca pizAcazcedbrahmamAtreNa nAzaya |
- dvaitabhUtAviSTareNa advaitaM bhasma Azraya || 30||
- anAtmatvapizAcazcedAtmamantreNa bandhaya |
- nityAnandamayaM brahma kevalaM sarvadA svayam || 31||
- catuHSaSTikadRSTAntairevaM brahmaiva sAdhitam |
- yaH zRNoti naro nityaM sa mukto nAtra saMzayaH || 32||
- kRtArtha eva satataM nAtra kAryA vicAraNA || 33||
- manovacovidUragaM tvarUpagandhavarjitaM
- hRdarbhakokasantataM vijAnatAM mude sadA |
- sadAprakAzadujvalaprabhAvikAsasadyuti
- prakAzadaM mahezvara tvadIyapAdapaGkajam || 34||
- || iti zrIzivarahasye zaGkarAkhye SaSThAMze RbhunidAghasaMvAde dRSTAntairbrahmasAdhanaprakaraNaM nAma catustriMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com