Ribhu Gita - Siva Rahasya Purana Amsha 6

RbhugItA 35 || brahma-bhAvanopadeza prakaraNam ||

RbhuH -

  • nidAgha zRNu guhyaM me sadyo muktipradaM nRNAm |
  • Atmaiva nAnyadevedaM paramAtmAhamakSataH || 1||
  • ahameva paraM brahma saccidAnandavigrahaH |
  • ahamasmi mahAnasmi zivo'smi paramo'smyaham || 2||
  • adRzyaM paramaM brahma nAnyadasti svabhAvataH |
  • sarvaM nAstyeva nAstyeva ahaM brahmaiva kevalam || 3||
  • zAntaM brahma paraM cAsmi sarvadA nityanirmalaH |
  • sarvaM nAstyeva nAstyeva ahaM brahmaiva kevalam || 4||
  • sarvasaGkalpamukto'smi sarvasantoSavarjitaH |
  • kAlakarmajagaddvaitadraSTRdarzanavigrahaH || 5||
  • Anando'smi sadAnandakevalo jagatAM priyam |
  • samarUpo'smi nityo'smi bhUtabhavyamajo jayaH || 6||
  • cinmAtro'smi sadA bhukto jIvo bandho na vidyate |var was muktaH
  • zravaNaM SaDvidhaM liGgaM naivAsti jagadIdRzam || 7||
  • cittasaMsArahIno'smi cinmAtratvaM jagat sadA |
  • cittameva hitaM deha avicAraH paro ripuH || 8||
  • avicAro jagadduHkhamavicAro mahadbhayam |
  • sadyo'smi sarvadA tRptaH paripUrNaH paro mahAn || 9||
  • nityazuddho'smi buddho'smi cidAkAzo'smi cetanaH |
  • Atmaiva nAnyadevedaM paramAtmA'hamakSataH || 10||
  • sarvadoSavihIno'smi sarvatra vitato'smyaham |
  • vAcAtItasvarUpo'smi paramAtmA'hamakSataH || 11||
  • citrAtItaM paraM dvandvaM santoSaH samabhAvanam |
  • antarbahiranAdyantaM sarvabhedavinirNayam || 12||
  • ahaMkAraM balaM sarvaM kAmaM krodhaM parigraham |
  • brahmendroviSNurvaruNo bhAvAbhAvavinizcayaH || 13||
  • jIvasattA jagatsattA mAyAsattA na kiJcana |
  • guruziSyAdibhedaM ca kAryAkAryavinizcayaH || 14||
  • tvaM brahmAsIti vaktA ca ahaM brahmAsmi saMbhavaH |
  • sarvavedAntavijJAnaM sarvAmnAyavicAraNam || 15||
  • idaM padArthasadbhAvamahaM rUpeNa saMbhavam |
  • vedavedAntasiddhAntajagadbhedaM na vidyate || 16||
  • sarvaM brahma na sandehaH sarvamityeva nAsti hi |
  • kevalaM brahmazAntAtmA ahameva nirantaram || 17||
  • zubhAzubhavibhedaM ca doSAdoSaM ca me na hi |
  • cittasattA jagatsattA buddhivRttivijRmbhaNam || 18||
  • brahmaiva sarvadA nAnyat satyaM satyaM nijaM padam |
  • AtmAkAramidaM dvaitaM mithyaiva na paraH pumAn || 19||
  • saccidAnandamAtro'haM sarvaM kevalamavyayam |
  • brahmA viSNuzca rudrazca Izvarazca sadAzivaH || 20||
  • mano jagadahaM bhedaM cittavRttijagadbhayam |
  • sarvAnandamahAnandamAtmAnandamanantakam || 21||
  • atyantasvalpamalpaM vA prapaJcaM nAsti kiJcana |
  • prapaJcamiti zabdo vA smaraNaM vA na vidyate || 22||
  • antarasthaprapaJcaM vA kvacinnAsti kvacidbahiH |
  • yat kiJcidevaM tUSNIM vA yacca kiJcit sadA kva vA || 23||
  • yena kena yadA kiJcidyasya kasya na kiJcana |
  • zuddhaM malinarUpaM vA brahmavAkyamabodhakam || 24||
  • IdRSaM tAdRSaM veti na kiJcit vaktumarhati |
  • brahmaiva sarvaM satataM brahmaiva sakalaM manaH || 25||
  • AnandaM paramAnadaM nityAnandaM sadA'dvayam |
  • cinmAtrameva satataM nAsti nAsti paro'smyaham || 26||
  • prapaJcaM sarvadA nAsti prapaJcaM citrameva ca |
  • cittameva hi saMsAraM nAnyat saMsArameva hi || 27||
  • mana eva hi saMsAro deho'hamiti rUpakam |
  • saGkalpameva saMsAraM tannAze'sau vinazyati || 28||
  • saGkalpameva jananaM tannAze'sau vinazyati |
  • saGkalpameva dAridryaM tannAze'sau vinazyati || 29||
  • saGkalpameva mananaM tannAze'sau vinazyati |
  • Atmaiva nAnyadevedaM paramAtmA'hamakSataH || 30||
  • nityamAtmamayaM bodhamahameva sadA mahAn |
  • Atmaiva nAnyadevedaM paramAtmA'hamakSataH || 31||
  • ityevaM bhAvayennityaM kSipraM mukto bhaviSyati |
  • tvameva brahmarUpo'si tvameva brahmavigrahaH || 32||
  • evaM ca paramAnandaM dhyAtvA dhyAtvA sukhIbhava |
  • sukhamAtraM jagat sarvaM priyamAtraM prapaJcakam || 33||
  • jaDamAtramayaM lokaM brahmamAtramayaM sadA |
  • brahmaiva nAnyadevedaM paramAtmA'hamavyayaH || 34||
  • eka eva sadA eSa eka eva nirantaram |
  • eka eva paraM brahma eka eva cidavyayaH || 35||
  • eka eva guNAtIta eka eva sukhAvahaH |
  • eka eva mahAnAtmA eka eva nirantaram || 36||
  • eka eva cidAkAra eka evAtmanirNayaH |
  • brahmaiva nAnyadevedaM paramAtmA'hamakSataH || 37||
  • paramAtmAhamanyanna paramAnandamandiram |
  • ityevaM bhAvayannityaM sadA cinmaya eva hi || 38||

sUtaH -

  • viriJcivaJcanAtataprapaJcapaJcabANabhit
  • sukAJcanAdridhAriNaM kuluJcanAM patiM bhaje |
  • akiJcane'pi siJcake jalena liGgamastake
  • vimuJcati kSaNAdaghaM na kiJcidatra ziSyate || 39||
  • || iti zrIzivarahasye zaGkarAkhye SaSThAMze RbhunidAghasaMvAde brahmabhAvanopadezaprakaraNaM nAma paJcatriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com