RbhugItA 21 || sarva-prapaJca-heyatva prakaraNa nirUpaNam ||

RbhuH -

• mahArahasyaM vakSyAmi vedAnteSu ca gopitam |
• yasya zravaNamAtreNa brahmaiva bhavati svayam || 1||
• saccidAnandamAtro'haM sarvaM saccinmayaM tatam |
• tadeva brahma saMpazyat brahmaiva bhavati svayam || 2||
• ahaM brahma idaM brahma nAnA brahma na saMzayaH |
• satyaM brahma sadA brahmApyahaM brahmaiva kevalam || 3||
• gururbrahma guNo brahma sarvaM brahmaparo'smyaham |
• nAntaM brahma ahaM brahma sarvaM brahmAparo'smyaham || 4||
• vedavedyaM paraM brahma vidyA brahma vizeSataH |
• AtmA brahma ahaM brahma AdyantaM brahma so'smyaham || 5||
• satyaM brahma sadA brahma anyannAsti sadA param |
• ahaM brahma tvahaM nAsti ahaMkAraparaM nahi || 6||
• ahaM brahma idaM nAsti ayamAtmA mahAn sadA |
• vedAntavedyo brahmAtmA aparaM zazazRGgavat || 7||
• bhUtaM nAsti bhaviSyaM na brahmaiva sthiratAM gataH |
• cinmayo'haM jaDaM tucchaM cinmAtraM dehanAzanam || 8||
• cittaM kiJcit kvaciccApi cittaM dUro'hamAtmakaH |var was haro'hamAtmakaH
• satyaM jJAnamanantaM yannAnRtaM jaDaduHkhakam || 9||
• AtmA satyamanantAtmA dehameva na saMzayaH |
• vArtApyasacchrutaM tanna ahameva mahomahaH || 10||
• ekasaMkhyApyasadbrahma satyameva sadA'pyaham |
• sarvamevamasatyaM ca utpannatvAt parAt sadA || 11||
• sarvAvayavahIno'pi nityatvAt paramo hyaham |
• sarvaM dRzyaM na me kiJcit cinmayatvAdvadAmyaham || 12||
• AgrahaM ca na me kiJcit cinmayatvAdvadAmyaham |
• idamityapi nirdezo na kvacinna kvacit sadA || 13||
• nirguNabrahma evAhaM sugurorupadezataH |
• vijJAnaM saguNo brahma ahaM vijJAnavigrahaH || 14||
• nirguNo'smi niraMzo'smi bhavo'smi bharaNo'smyaham |
• devo'smi dravyapUrNo'smi zuddho'smi rahito'smyaham || 15||
• raso'smi rasahIno'smi turyo'smi zubhabhAvanaH |
• kAmo'smi kAryahIno'smi nityanirmalavigrahaH || 16||
• AcAraphalahIno'smi ahaM brahmAsmi kevalam |
• idaM sarvaM paraM brahma ayamAtmA na vismayaH || 17||
• pUrNApUrNasvarUpAtmA nityaM sarvAtmavigrahaH |
• paramAnandatattvAtmA paricchinnaM na hi kvacit || 18||
• ekAtmA nirmalAkAra ahameveti bhAvaya |
• ahaMbhAvanayA yukta ahaMbhAvena saMyutaH || 19||
• zAntaM bhAvaya sarvAtmA zAmyatattvaM manomalaH |
• deho'hamiti santyajya brahmAhamiti nizcinu || 20||
• brahmaivAhaM brahmamAtraM brahmaNo'nyanna kiJcana |
• idaM nAhamidaM nAhamidaM nAhaM sadA smara || 21||
• ahaM so'hamahaM so'hamahaM brahmeti bhAvaya |
• cidahaM cidahaM brahma cidahaM cidahaM vada || 22||
• nedaM nedaM sadA nedaM na tvaM nAhaM ca bhAvaya |
• sarvaM brahma na sandehaH sarvaM vedaM na kiJcana || 23||
• sarvaM zabdArthabhavanaM sarvalokabhayaM na ca |
• sarvatIrthaM na satyaM hi sarvadevAlayaM na hi || 24||
• sarvacaitanyamAtratvAt sarvaM nAma sadA na hi |
• sarvarUpaM parityajya sarvaM brahmeti nizcinu || 25||
• brahmaiva sarvaM tatsatyaM prapaJcaM prakRtirnahi |
• prAkRtaM smaraNaM tyajya brahmasmaraNamAhara || 26||
• tatastadapi santyajya nijarUpe sthiro bhava |
• sthirarUpaM parityajya AtmamAtraM bhavatyasau || 27||
• tyAgatvamapi santyajya bhedamAtraM sadA tyaja |
• svayaM nijaM samAvRtya svayameva svayaM bhaja || 28||
• idamityaGgulIdRSTamidamastamacetanam |
• idaM vAkyaM ca vAkyena vAcA'pi parivedanam || 29||
• sarvabhAvaM na sandehaH sarvaM nAsti na saMzayaH |
• sarvaM tucchaM na sandehaH sarvaM mAyA na saMzayaH || 30||
• tvaM brahmAhaM na sandeho brahmaivedaM na saMzayaH |
• sarvaM cittaM na sandehaH sarvaM brahma na saMzayaH || 31||
• brahmAnyadbhAti cenmithyA sarvaM mithyA parAvarA |
• na dehaM paJcabhUtaM vA na cittaM bhrAntimAtrakam || 32||
• na ca buddhIndriyAbhAvo na muktirbrahmamAtrakam |
• nimiSaM ca na zaGkApi na saGkalpaM tadasti cet || 33||
• ahaGkAramasadviddhi abhimAnaM tadasti cet |
• na cittasmaraNaM taccenna sandeho jarA yadi || 34||
• prANo...dIyate zAsti ghrANo yadiha gandhakam |
• cakSuryadiha bhUtasya zrotraM zravaNabhAvanam || 35||
• tvagasti cet sparzasattA jihvA cedrasasaGgrahaH |
• jIvo'sti cejjIvanaM ca pAdazcet pAdacAraNam || 36||
• hastau yadi kriyAsattA sraSTA cet sRSTisaMbhavaH |
• rakSyaM cedrakSako viSNurbhakSyaM cedbhakSakaH zivaH || 37||
• sarvaM brahma na sandehaH sarvaM brahmaiva kevalam |
• pUjyaM cet pUjanaM cAsti bhAsyaM cedbhAsakaH zivaH || 38||
• sarvaM mithyA na sandehaH sarvaM cinmAtrameva hi |
• asti cet kAraNaM satyaM kAryaM caiva bhaviSyati || 39||
• nAsti cennAsti hIno'haM brahmaivAhaM parAyaNam |
• atyantaduHkhametaddhi atyantasukhamavyayam || 40||
• atyantaM janmamAtraM ca atyantaM raNasaMbhavam |
• atyantaM malinaM sarvamatyantaM nirmalaM param || 41||
• atyantaM kalpanaM duSTaM atyantaM nirmalaM tvaham |
• atyantaM sarvadA doSamatyantaM sarvadA guNam || 42||
• atyantaM sarvadA zubhramatyantaM sarvadA malam |
• atyantaM sarvadA cAhamatyantaM sarvadA idam || 43||
• atyantaM sarvadA brahma atyantaM sarvadA jagat |
• etAvaduktamabhayamahaM bhedaM na kiJcana || 44||
• sadasadvApi nAstyeva sadasadvApi vAkyakam |
• nAsti nAsti na sandeho brahmaivAhaM na saMzayaH || 45||
• kAraNaM kAryarUpaM vA sarvaM nAsti na saMzayaH |
• kartA bhoktA kriyA vApi na bhojyaM bhogatRptatA || 46||
• sarvaM brahma na sandehaH sarva zabdo na vAstavam |
• bhUtaM bhaviSyaM vArtaM tu kAryaM vA nAsti sarvadA || 47||
• sadasadbhedyabhedaM vA na guNA guNabhAginaH |
• nirmalaM vA malaM vApi nAsti nAsti na kiJcana || 48||
• bhASyaM vA bhASaNaM vA'pi nAsti nAsti na kiJcana |
• prabalaM durbalaM vApi ahaM ca tvaM ca vA kvacit || 49||
• grAhyaM ca grAhakaM vApi upekSyaM nAtmanaH kvacit |
• tIrthaM vA snAnarUpaM vA devo vA deva pUjanam || 50||
• janma vA maraNaM heturnAsti nAsti na kiJcana |
• satyaM vA satyarUpaM vA nAsti nAsti na kiJcana || 51||
• mAtaraH pitaro vApi deho vA nAsti kiJcana |
• dRgrUpaM dRzyarUpaM vA nAsti nAstIha kiJcana || 52||
• mAyAkAryaM ca mAyA vA nAsti nAstIha kiJcana |
• jJAnaM vA jJAnabhedo vA nAsti nAstIha kiJcana || 53||
• sarvaprapaJcaheyatvaM proktaM prakaraNaM ca te |
• yaH zRNoti sakRdvApi AtmAkAraM prapadyate || 54||

skandaH -

• mAyA sA triguNA gaNAdhipaguroreNAGkacUDAmaNeH
• pAdAmbhojasamarcanena vilayaM yAtyeva nAstyanyathA |
• vidyA hRdyatamA suvidyudiva sA bhAtyeva hRtpaGkaje
• yasyAnalpatapobhirugrakaraNAdRk tasya muktiH sthirA || 55||

• || iti zrIzivarahasye zaGkarAkhye SaSThAMze RbhunidAghasaMvAde sarvaprapaJcaheyatvaprakaraNavarNanaM nAma ekaviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com