RbhugItA 38 || prapaJca zUnyatva prakaraNam ||

RbhuH -

• vakSye atyadbhutaM vyaktaM saccidAnandamAtrakam |
• sarvaprapaJcazUnyatvaM sarvamAtmeti nizcitam || 1||
• AtmarUpaprapaJcaM vA AtmarUpaprapaJcakam |
• sarvaprapaJcaM nAstyeva sarvaM brahmeti nizcitam || 2||
• nityAnubhavamAnandaM nityaM brahmeti bhAvanam |
• cittarUpaprapaJcaM vA cittasaMsArameva vA || 3||
• idamastIti sattAtvamahamastIti vA jagat |
• svAntaHkaraNadoSaM vA svAntaHkaraNakAryakam || 4||
• svasya jIvabhramaH kazcit svasya nAzaM svajanmanA |
• IzvaraH kazcidastIti jIvo'hamiti vai jagat || 5||
• mAyA sattA mahA sattA cittasattA jaganmayam |
• yadyacca dRzyate zAstrairyadyadvede ca bhASaNam || 6||
• ekamityeva nirdezaM dvaitamityeva bhASaNam |
• zivo'smIti bhramaH kazcit brahmAsmIti vibhramaH || 7||
• viSNurasmIti vibhrAntirjagadastIti vibhramaH |var was jagadasmIti
• ISadastIti vA bhedaM ISadastIti vA dvayam || 8||
• sarvamastIti nAstIti sarvaM brahmeti nizcayam |
• AtmadhyAnaprapaJcaM vA smaraNAdiprapaJcakam || 9||
• duHkharUpaprapaJcaM vA sukharUpaprapaJcakam |
• dvaitAdvaitaprapaJcaM vA satyAsatyaprapaJcakam || 10||
• jAgratprapaJcamevApi tathA svapnaprapaJcakam |
• suptijJAnaprapaJcaM vA turyajJAnaprapaJcakam || 11||
• vedajJAnaprapaJcaM vA zAstrajJAnaprapaJcakam |
• pApabuddhiprapaJcaM vA puNyabhedaprapaJcakam || 12||
• jJAnarUpaprapaJcaM vA nirguNajJAnaprapaJcakam |
• guNAguNaprapaJcaM vA doSAdoSavinirNayam || 13||
• satyAsatyavicAraM vA carAcaravicAraNam |
• eka Atmeti sadbhAvaM mukhya Atmeti bhAvanam || 14||
• sarvaprapaJcaM nAstyeva sarvaM brahmeti nizcayam |
• dvaitAdvaitasamudbhedaM nAsti nAstIti bhASaNam || 15||
• asatyaM jagadeveti satyaM brahmeti nizcayam |
• kAryarUpaM kAraNaM ca nAnAbhedavijRmbhaNam || 16||
• sarvamantrapradAtAraM dUre dUraM tathA tathA |
• sarvaM santyajya satataM svAtmanyeva sthiro bhava || 17||
• maunabhAvaM maunakAryaM maunayogaM manaHpriyam |
• paJcAkSaropadeSTAraM tathA cASTAkSarapradam || 18||
• yadyadyadyadvedazAstraM yadyadbhedo guro'pi vA |
• sarvadA sarvalokeSu sarvasaGkalpakalpanam || 19||
• sarvavAkyaprapaJcaM hi sarvacittaprapaJcakam |
• sarvAkAravikalpaM ca sarvakAraNakalpanam || 20||
• sarvadoSaprapaJcaM ca sukhaduHkhaprapaJcakam |
• sahAdeyamupAdeyaM grAhyaM tyAjyaM ca bhASaNam || 21||
• vicArya janmamaraNaM vAsanAcittarUpakam |
• kAmakrodhaM lobhamohaM sarvaDambhaM ca huMkRtim || 22||
• trailokyasaMbhavaM dvaitaM brahmendravaruNAdikam |
• jJAnendriyaM ca zabdAdi digvAyvarkAdidaivatam || 23||
• karmendriyAdisadbhAvaM viSayaM devatAgaNam |
• antaHkaraNavRttiM ca viSayaM cAdhidaivatam || 24||
• cittavRttiM vibhedaM ca buddhivRttinirUpaNam |
• mAyAmAtramidaM dvaitaM sadasattAdinirNayam || 25||
• kiJcid dvaitaM bahudvaitaM jIvadvaitaM sadA hyasat |
• jagadutpattimohaM ca guruziSyatvanirNayam || 26||
• gopanaM tatpadArthasya tvaMpadArthasya melanam |
• tathA cAsipadArthasya aikyabuddhyAnubhAvanam || 27||
• bhedeSu bhedAbhedaM ca nAnyat kiJcicca vidyate |
• etat prapaJcaM nAstyeva sarvaM brahmeti nizcayaH || 28||
• sarvaM caitanyamAtratvAt kevalaM brahma eva saH |
• AtmAkAramidaM sarvamAtmano'nyanna kiJcana || 29||
• turyAtItaM brahmaNo'nyat satyAsatyaM na vidyate |
• sarvaM tyaktvA tu satataM svAtmanyeva sthiro bhava || 30||
• cittaM kAlaM vastubhedaM saGkalpaM bhAvanaM svayam |
• sarvaM saMtyajya satataM sarvaM brahmaiva bhAvaya || 31||
• yadyadbhedaparaM zAstraM yadyad bhedaparaM manaH |
• sarvaM saMtyajya satataM svAtmanyeva sthiro bhava || 32||
• manaH kalpitakalpaM vA AtmAkalpanavibhramam |
• ahaMkAraparicchedaM deho'haM dehabhAvanA || 33||
• sarvaM saMtyajya satatamAtmanyeva sthiro bhava |
• prapaJcasya ca sadbhAvaM prapaJcodbhavamanyakam || 34||
• bandhasadbhAvakalanaM mokSasadbhAvabhASaNam |
• devatAbhAvasadbhAvaM devapUjAvinirNayam || 35||
• paJcAkSareti yaddvaitamaSTAkSarasya daivatam |
• prANAdipaJcakAstitvamupaprANAdipaJcakam || 36||
• pRthivIbhUtabhedaM ca guNA yat kuNThanAdikam |
• vedAntazAstrasiddhAntaM zaivAgamanameva ca || 37||
• laukikaM vAstavaM doSaM pravRttiM ca nivRttikam |
• sarvaM saMtyajya satatamAtmanyeva sthiro bhava || 38||
• AtmajJAnasukhaM brahma anAtmajJAnadUSaNam |
• recakaM pUrakaM kumbhaM SaDAdhAravizodhanam || 39||
• dvaitavRttizca deho'haM sAkSivRttizcidaMzakam |
• akhaNDAkAravRttizca akhaNDAkArasaMmatam || 40||
• anantAnubhavaM cApi ahaM brahmeti nizcayam |
• uttamaM madhyamaM cApi tathA caivAdhamAdhamam || 41||
• dUSaNaM bhUSaNaM caiva sarvavastuvinindanam |
• ahaM brahma idaM brahma sarvaM brahmaiva tattvataH || 42||
• ahaM brahmAsmi mugdho'smi vRddho'smi sadasatparaH |
• vaizvAnaro virAT sthUlaprapaJcamiti bhAvanam || 43||
• AnandasphAraNenAhaM parAparavivarjitaH |
• nityAnandamayaM brahma saccidAnandavigrahaH || 44||
• dRgrUpaM dRzyarUpaM ca mahAsattAsvarUpakam |
• kaivalyaM sarvanidhanaM sarvabhUtAntaraM gatam || 45||
• bhUtabhavyaM bhaviSyacca vartamAnamasat sadA |
• kAlabhAvaM dehabhAvaM satyAsatyavinirNayam || 46||
• prajJAnaghana evAhaM zAntAzAntaM niraJjanam |
• prapaJcavArtAsmaraNaM dvaitAdvaitavibhAvanam || 47||
• zivAgamasamAcAraM vedAntazravaNaM padam |
• ahaM brahmAsmi zuddho'smi cinmAtro'smi sadAzivaH || 48||
• sarvaM brahmeti santyajya svAtmanyeva sthiro bhava |
• ahaM brahma na sandeha idaM brahma na saMzayaH || 49||
• sthUladehaM sUkSmadehaM kAraNaM dehameva ca |
• evaM jJAtuM ca satataM brahmaivedaM kSaNe kSaNe || 50||
• zivo hyAtmA zivo jIvaH zivo brahma na saMzayaH |
• etat prakaraNaM yastu sakRdvA sarvadApi vA || 51||
• paThedvA zRNuyAdvApi sa ca mukto na saMzayaH |
• nimiSaM nimiSArdhaM vA zrutvaitabrahmabhAgbhavet || 52||
• lokAlokajagatsthitipravilayaprodbhAvasattAtmikA
• bhItiH zaGkaranAmarUpamaskRdvyAkurvate kevalam |
• satyAsatyaniraGkuzazrutivacovIcIbhirAmRzyate
• yastvetat saditIva tattvavacanairmImAMsyate'yaM zivaH || 53||

• || iti zrIzivarahasye zaGkarAkhye SaSThAMze RbhunidAghasaMvAde prapaJcazUnyatvaprakaraNaM nAma aSTatriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com