RbhugItA 50 || sudarzanasya muktilAbha varNanaM ca ||

skandaH -

• viSNustavAnte vipro'sau sudarzanasamAhvayaH |
• snAtvA'tha maNikarNyAM sa bhasmarudrAkSabhUSaNaH || 1||
• saJjapan zatarudrIyaM paJcAkSaraparAyaNaH |
• saMpAdya bilvapatrANi kamalAnyamalAnyapi || 2||
• gandhAkSatairdhUpadIpairnaivedyairvividhairapi |
• viSNUpadiSTamArgeNa nityamantargRhasya hi || 3||
• pradakSiNaM cakArAsau liGgAnyabhyarcayaMstathA |
• vizvezvarAvimuktezau vIrezaM ca trilocanam || 4||
• kRttivAsaM vRddhakAle kedAraM zUlaTaGkakam |
• ratnezaM bhArabhUtezaM candrezaM siddhakezvaram || 5||
• ghaNTAkarNezvaraM caiva nAradezaM yamezvaram |
• pulastipulahezaM ca vikarNezaM phalezvaram || 6||
• kadrudrezamakhaNDezaM ketumAliM gabhastikam |
• yamunezaM varNakezaM bhadrezaM jyeSThazaGkaram || 7||
• nandikezaM ca rAmezaM karamardezvaraM tathA |
• AvardezaM mataGgezaM vAsukIzaM drutIzvaram || 8||
• sUryezamaryamezaM ca tUNIzaM gAlavezvaram |
• kaNvakAtyAyanezaM ca candracUDezvaraM tathA || 9||
• udAvartezvaraM caiva tRNajyotIzvaraM sadA |
• kaGkaNezaM taGkaNezaM skandezaM tArakezvaram || 10||
• jambukezaM ca jJAnezaM nandIzaM gaNapezvaram |
• etAnyantargRhe vipraH pUjayan parayA mudA || 11||
• DhuNDhyAdigaNapAMzcaiva bhairavaM cApi nityazaH |
• annapUrNAmannadAtrIM sAkSAllokaikamAtaram || 12||
• daNDapANiM kSetrapAlaM samyagabhyarcya tasthivAn |
• tIrthAnyanyAnyapi munirmaNikarNyAdi sattama || 13||
• jJAnodaM siddhakUpaM ca vRddhakUpaM pizAcakam |
• RNamocanatIrthaM ca gargatIrthaM mahattaram || 14||
• snAtvA saniyamaM vipro nityaM paJcanade hRde |
• kiraNAM dhUtapApAM ca paJcagaGgAmapi dvijaH || 15||
• gaGgAM manoramAM tuGgAM sarvapApapraNAzinIm |
• muktimaNTapamAsthAya sa japan zatarudriyam || 16||
• aSTottarasahasraM vai japan paJcAkSaraM dvijaH |
• pakSe pakSe tathA kurvan paJcakrozapradakSiNam || 17||
• antargRhAdbahirdeze cakArAvasathaM tadA |
• evaM saMvasatastasya kAlo bhUyAnavartata || 18||
• tatra dRSTvA taponiSThaM sudarzanasamAhvayam |
• viSNustadA vai taM vipraM samAhUya zivArcakam || 19||
• punaH prAha prasannena cetasA munisattamam |

viSNuH -

• bhoH sudarzanaviprendra zivArcanaparAyaNa |
• jJAnapAtraM bhavAneva vizvezakRpayA'dhunA || 20||
• tvayA tapAMsi taptAni iSTA yajJAstvayaiva hi |
• adhItAzca tvayA vedAH kAzyAM vAso yatastava || 21||
• bahubhirjanmabhiryena kRtaM kSetre mahattapaH |
• tasyaiva siddhyatyamalA kAzIyaM muktikAzikA || 22||
• tava bhAgyasya nAnto'sti mune tvaM bhAgyavAnasi |
• kiJcaikaM tava vakSyAmi hitamAtyantikaM zRNu || 23||
• vizvezakRpayA te'dya muktirante bhaviSyati |
• rudrAkSanAmapuNyaM yat nAmnAM sAhasramuttamam || 24||
• upadekSyAmi te vipra nAmasAhasramIzituH |
• tenArcayezaM vizvezaM bilvapatrairmanoharaiH || 25||
• varSamekaM nirAhAro vizvezaM pUjayan sadA |
• saMvatsarAnte muktastvaM bhaviSyati na saMzayaH || 26||
• tvaddehApagame mantraM paJcAkSaramanuttamam |
• dadAti devo vizvezastena mukto bhaviSyati || 27||
• zaivebhyaH sannajIvebhyo dadAtImaM mahAmanum |

skandaH -

• iti viSNuvacaH zrutvA praNamyAha hariM tadA |
• sudarzano yayAcetthaM nAmnAM sAhasramuttamam || 28||
• bhagavan daityavRndaghna viSNo jiSNo namo'stu te |
• sahasranAmnAM yaddivyaM vizvezasyAzu tadvada || 29||
• yena japtena devezaH pUjito bilvapatrakaiH |
• dadAti mokSasAmrAjyaM dehAnte tadvadAzu me || 30||
• tadA vipravacaH zrutvA tasmai copAdizat svayam |
• sahasranAmnAM devasya hiraNyasyetyAdi sattama || 31||
• tena saMpUjya vizvezaM varSamekamatandritaH |
• komalAraktabilvaizca stotreNAnena tuSTuve || 32||

sudarzanaH -

• AzIviSAGgaparimaNDalakaNThabhAga-
• rAjatsusAgarabhavograviSoruzobha |
• phAlasphurajjvalanadIptividIpitAzA-
• zokAvakAza tapanAkSa mRgAGkamaule || 33||
• kruddhoDujAyApatidhRtArdhazarIrazobha
• pAhyAzu zAsitamakhAndhakadakSazatro |
• sutrAmavajrakaradaNDavikhaNDitoru-
• pakSAdyaghakSitidharordhvazayAva zaMbho || 34||
• utphullahallakalasatkaravIramAlA-
• bhrAjatsukandharazarIra pinAkapANe |
• caJcatsucandrakalikottamacArumauliM
• liGge kuluJcapatimambikayA sametam || 35||
• chAyAdhavAnujalasacchadanaiH paripUjya bhaktyA
• muktena svasya ca virAjitavaMzakoTyA |
• sAyaM saGgavapuGgavoruvahanaM zrItuGgaliGgArcakaH
• zAGgaH pAtakasaGgabhaGgacaturazcAsaGganityAntaraH || 36||
• phAlAkSasphuradakSijasphuradurusphUliGgadagdhAGgakA-
• naGgottuGgamataGgakRttivasanaM liGgaM bhaje zAGkaram |
• acchAcchAgavahAM suratAmIkSAzinAnte vibho
• vRSyaM zAGkaravAhanAmaniratAH somaM tathA vAjinam || 37||
• tyaktvA janmavinAzanaM tviti muhuste jihvayA sattamAH
• ye zaMbhoH sakRdeva nAmaniratAH zAGgAH svataH pAvanAH || 38||
• mRgAGka maulimIzvaraM mRgendrazatrujatvacam |
• vasAnamindusaprabhaM mRgAdyabAlasatkaram |
• bhaje mRgendrasaprabhaM ..??... || 39||

skandaH -

• evaM stuvantaM vizvezaM sudarzanamatandritam |
• prAhetthaM zaurimAbhASya zaMbhorbhaktivivardhanam || 40||

viSNuH -

• atraivAmaraNaM vipra vasa tvaM niyatAzanaH |
• nAmnAM sahasraM prajapan zatarudrIyameva ca || 41||
• antargRhAt bahiH sthitvA pUjayAzu mahezvaram |
• tavAnte bhUrikaruNo mokSaM dAsyatyasaMzayam || 42||
• sa praNamyAha vizvezaM dRSTvA prAha sudarzanam |
• dhanyastvaM liGge'pyanudinagalitasvAntaraGgAghasaGghaH
• puMsAM varyAdyabhaktyA yamaniyamavarairvizvavandyaM prabhAte |
• datvA bilvavaraM sadaMbujadalaM kiJcijjalaM vA muhuH
• prApnotIzvarapAdapaGkajamumAnAthAdya muktipradam || 43||
• ko vA tvatsadRzo bhavedagapatipremaikaliGgArcako
• muktAnAM pravarordhvakezavilasacchrIbhaktibIjAGkuraiH |
• devA vApyasurAH surA munivarA bhArA bhuvaH kevalaM
• vIrA vA karavIrapuSpavilasanmAlAprade no samaH || 44||
• vane vA rAjye vApyagapatisutAnAyakamaho
• sphuralliGgArcAyAM niyamamatabhAvena manasA |
• haraM bhaktyA sAdhya tribhuvanatRNADambaravara-
• prarUDhairbhAgyairvA na hi khalu sa sajjeta bhuvane || 45||
• na dAnairyogairvA vidhivihitavarNAzramabharaiH
• apArairvedAntaprativacanavAkyAnusaraNaiH |
• na manye'haM svAnte bhavabhajanabhAvena manasA
• muhurliGgaM zAGgaM bhajati paramAnandakuharaH || 46||
• zarvaM paravatanandinIpatimahAnandAmbudheH pAragA
• rAgatyAgahRdA virAgaparamA bhasmAGgarAgAdarAH |
• mArApArazarAbhighAtarahitA dhIrorudhArArasaiH
• pArAvAramahAghasaMsRtibharaM tIrNAH zivAbhyarcanAt || 47||
• mArkaNDeyasutaM purA'ntakabhayAdyo'rakSadIzo haraH
• tatpAdAmbujarAgaraJjitamanA nApnoti kiM vA phalam |
• taM mRtyuJjayamaJjasA praNamatAmojojimadhye jayaM
• jetArotaparAjayo janijarArogairvimuktiM labhet || 48||
• bhUtAyAM bhUtanAthaM tvaghamatitilakAkArabhillotthazalyaiH
• dhAvan bhallUkapRSThe nizi kila sumahadvyAghrabhItyA'ruroha |
• bilvaM nalvaprabhaM tacchadaghanamasakRt pAtayAmAsa mUle
• nidrAtandrojjhito'sau mRgagaNakalane mUlaliGge'tha zAGge || 49||
• tenAbhUdbhagavAn gaNottamavaro muktAghasaGghastadA
• caNDAMzostanayena pUjitapadaH sArUpyamApezituH |
• gaGgAcandrakalAkapardavilasatphAlasphuliGgojjvalad
• vAlanyaGkukarAgrasaMgatamahAzUlAhi TaMkodyataH || 50||
• caitre citraiH pAtakairvipramukto vaizAkhe vai duHkhazAkhAvimuktaH |
• jyeSThe zreSTho bhavateSADhamAsi putraprAptiH zrAvaNe zrAntinAzaH || 51||
• bhAdre bhadro bhavate cAzvine vai azvaprAptiH kArtike kIrtilAbhaH |
• mArge muktermArgametallabheta puSye puNyaM mAghake cAghanAzaH || 52||
• phalgu tvaMho phAlgune mAsi
• nazyedIzArcAto bilvapatraizcaliGge |
• evaM tattanmAsi pUjyezaliGgaM
• citraiH pApairvipramukto dvijendraH || 53||
• dUrvAGkurairabhinavaiH zazidhAmacUDa-
• liGgArcanena parizeSayadaGkurANi |
• saMsAraghoratararUpakarANi sadyaH
• muktyaGkurANi parivardhayatIha dhanyaH || 54||
• gokSIrekSukSaudrakhaNDAjyadadhnA
• sannArelaiH pAnasAmrAdisAraiH |
• vizvezAnaM satsitAratnatoyaiH
• gandhodairvA siJcya doSairvimuktaH || 55||
• liGgaM candanalepasaGgatamumAkAntasya pazyanti ye
• te saMsArabhujaGgabhaGgapatanAnaGgAGgasaGgojjhitAH |
• vyaGgaM sarvasamarcanaM bhagavataH sAGgaM bhavecchAGkaraM
• zaGgApAGgakRpAkaTAkSalaharI tasmiMzciraM tiSThati || 56||
• muralisaralirAgairmardalaistAlazaGkhaiH
• paTupaTahaninAdadhvAntasandhAnaghoSaiH |
• dundubhyAghAtavAdairvarayuvatimahAnRttasaMraMbharaGgaiH
• darzeSvAdarzadarzo bhagavati girijAnAyake muktihetuH || 57||
• svacchacchatrachavInAM vividhajitamahAcchAyayA channamaizaM
• zIrSaM vicchinnapApo bhavati bhavaharaH pUjakaH zambhubhaktyA |
• caJcaccandrAbhakANDapravilasadamalasvarNaratnAgrabhAbhi-
• rdIpyaccAmarakoTibhiH sphuTapaTaghaTitaizcAkacakyaiH patAkaiH || 58||
• saMpazyAruNabhUruhottamazikhAsaMleDhitArAgaNaM
• tArAnAthakalAdharorusumahAliGgaughasaMsevitam |
• bilvAnAM kulametadatra sumahApApaughasaMhArakRt
• vArANAM nikhilapramodajanakaM zambhoH priyaM kevalam || 59||
• annaM potrimalAyate dhanarasaM kauleyamUtrAyate
• saMvezo nigalAyate mama sadAnando kandAyate |
• zambho te smaraNAntarAyabharita prANaH kRpANAyate || 60||
• kaH kalpadrumupekSya cittaphaladaM tUlAdidAnakSayaM
• babbUlaM parisevate kSudadhiko vAtUladAnakSamam |
• tadvacchaGkarakiGkaro vidhiharibrahmendracandrAnalAn
• sevedyo vidhivaJcitaH kalibalaprAcuryato mUDhadhIH || 61||
• suvarNANDodbhUtastutigatisamarcyANDajavara-
• prapAdaM tvAM kazcid bhajati bhuvane bhaktiparamaH |
• mahAcaNDoddaNDaprakaTitabhuvaM tANDavaparaM
• vibhuM santaM nityaM bhaja bhagaNanAthAmalajaTam || 62||
• ajagavakara viSNubANa zambho
• duritaharAntakanAza pAhi mAmanAtham |
• bhavadabhayapadAbjavaryameta
• mama cittasarastaTAnnayAtu cAdya || 63||
• itthaM viSNuzca kAzyAM pramathapatimagAt pUjya vizvezvaraM taM
• kSitisuravaravaryaM cAnuzAsyetthamiSTam |
• sa ca munigaNamadhye prApya muktiM tathAnte
• pramathapatipadAb{}je lInahInAGgasaGgaH || 64||

sUtaH -

• itthaM zrutvA munIndro'sau jaigISavyo'vadadvibhum |
• praNipatya prahRSTAtmA SaSThAMzaM vai SaDAsyataH || 65||

jaigISavyaH -

• mAramArakajAnandavasatermahimA katham |
• nAmnAM sahasrametacca vada me karuNAnidhe || 66||
• kSetrANAM cApyathAnyAnAM mahimAM vada sadguro |
• zUratArakasaMhartastvatto nAnyo gururmama || 67||
• tacchrutvA tu munervAkyaM skandaH prAhAtha taM munim |

skandaH -

• AgAminyaMzake'smiMstava hRdayamahAnandasindhau vidhUttha-
• prAcuryaprakaTaiH karopamamahAsaptamAMze vizeSe |
• nAmnAM cApi sahasrakaM bhagavataH zambhoH priyaM kevalaM
• asyAnandavanasya caiva mahimA tvaM vai zRNuSvAdarAt || 68||
• ugroM'zaH zazizekhareNa kathito vedAntasArAtmakaH
• SaSThaH SaNmukhasattamAya sa dadau tadbrahmaNe so'pyadAt |
• putrAyAtmabhavAya tadbhavaharaM zrutvA bhaved jJAnavit
• coktvA janmazatAyutArjitamahApApairvimukto bhavet || 69||
• zrutvAMzametad bhavatApapApahaM zivAspadajJAnadamuttamaM mahat |
• dhyAnena vijJAnadamAtmadarzanaM dadAti zambhoH padabhaktibhAvataH || 70||

sUtaH -

• adhyAyapAdAdhyayane'pi vidyA buddhyA hRdi dhyAyati bandhamuktyai |
• svAdhyAyatAntAya zamAnvitAya dadyAdyadadyAnna vibhedyametat || 71||
• itthaM sUtavacodyatamahAnandaikamodaprabhA
• bhAsvadbhAskarasaprabhA munivarAH saMtuSTuvustaM tadA |
• vedodyadvacanAziSA prahRSitAH sUtaM jayetyuccaran
• pyAho jagmuratIva harSitahRdA vizvezvaraM vIkSitum || 72||
• || zaGkarAkhyaH SaSThAMzaH samAptaH||
• || sarvaM zrIramaNArpaNamastu ||

• || iti zrIzivarahasye zaGkarAkhye SaSThAMze sudarzanasya muktilAbhavarNanaM aMzazravaNaphalanirUpaNaM ca nAma paJcAzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com