RbhugItA 48 || skanda-kRta zivavratopadeza varNanam ||
skandaH -
- jJAnAGgasAdhanaM vakSye zRNu vakSyAmi te hitam |
- yat kRtvA jJAnamApnoti tat prAdAt parameSThinaH || 1||
- jaigISavya zRNuSvaitat sAvadhAnena cetasA |
- prathamaM vedasaMproktaM karmAcaraNamiSyate || 2||
- upanIto dvijo vApi vaizyaH kSatriya eva vA |
- agnirityAdibhirmantrairbhasmadhRk pUyate tvaghaiH || 3||
- triyAyuSaistryambakaizca tripuNDraM bhasmanA''caret |
- liGgArcanaparo nityaM rudrAkSAn dhArayan kramaiH || 4||
- kaNThe bAhvorvakSasI ca mAlAbhiH zirasA tathA |
- tripuNDravaddhArayeta rudrAkSAn kramazo mune || 5||
- ekAnanaM dvivaktraM vA trivaktraM caturAsyakam |
- paJcavaktraM ca SaT sapta tathASTadazakaM nava || 6||
- ekAdazaM dvAdazaM vA tathordhvaM dhArayet kramAt |
- bhasmadhAraNamAtreNa prasIdati mahezvaraH || 7||
- rudrAkSadhAraNAdeva naro rudratvamApnuyAt |
- bhasmarudrAkSadhRGmartyo jJAnAGgI bhavati priyaH || 8||
- rudrAdhyAyI bhasmaniSThaH paJcAkSarajapAdharaH |
- bhasmoddhUlitadeho'yaM zrIrudraM prajapan dvijaH || 9||
- sarvapApairvimuktazca jJAnaniSTho bhavenmune |
- bhasmasaMchannasarvAGgo bhasmaphAlatripuNDrakaH || 10||
- vedamaulijavAkyeSu vicArAdhikRto bhavet |
- nAnyapuNDradharo vipro yatirvA viprasattama || 11||
- zamAdiniyamopetaH kSamAyukto'pyasaMskRtaH |
- zirovratamidaM proktaM bhasmadhAraNameva hi || 12||
- zirovrataM ca vidhivadyaizcIrNaM munisattama |
- teSAmeva brahmavidyAM vadeta gururAstikaH || 13||
- zAMbhavA eva vedeSu niSThA naSTAzubhAH param |
- zivaprasAdasaMpanno bhasmarudrAkSadhArakaH || 14||
- rudrAdhyAyajapAsaktaH paJcAkSaraparAyaNaH |
- sa eva vedavedAntazravaNe'dhikRto bhavet || 15||
- nAnyapuNDradharo vipraH kRtvApi zravaNaM bahu |
- naiva labhyeta tadjJAnaM prasAdena vinezituH || 16||
- prasAdajanakaM zambhorbhasmadhAraNameva hi |
- zivaprasAdahInAnAM jJAnaM naivopajAyate || 17||
- prasAde sati devasya vijJAnasphuraNaM bhavet |
- rudrAdhyAyajApinAM tu bhasmadhAraNapUrvakam || 18||
- prasAdo jAyate zambhoH punarAvRttivarjitaH |
- prasAde sati devasya vedAntasphuraNaM bhavet || 19||
- tasyaivAkathitA hyarthAH prakAzante mahAtmanaH |
- paJcAkSarajapAdeva paJcAsyadhyAnapUrvakam || 20||
- tasyaiva bhavati jJAnaM zivaproktamidaM dhruvam |
- sarvaM zivAtmakaM bhAti jagadetat carAcaram || 21||
- sa prasAdo mahezasya vijJeyaH zAMbhavottamaiH |
- zivaliGgArcanAdeva prasAdaH zAMbhavottame || 22||
- niyamAdbilvapatraizca bhasmadhAraNapUrvakam |
- prasAdo jAyate zambhoH sAkSAdjJAnaprakAzakaH || 23||
- zivakSetranivAsena jJAnaM samyak dRDhaM bhavet |
- zivakSetranivAse tu bhasmadhAryadhikAravAn || 24||
- naktAzanArcanAdeva prIyeta bhagavAn bhavaH |
- pradoSapUjanaM zaMbhoH prasAdajanakaM param || 25||
- somavAre nizItheSu pUjanaM priyamIzituH |
- bhUtAyAM bhUtanAthasya pUjanaM paramaM priyam || 26||
- zivazabdoccAraNaM ca prasAdajanakaM mahat |
- jJAnAGgasAdhaneSvevaM zivabhaktArcanaM mahat || 27||
- bhaktAnAmarcanAdeva zivaH prIto bhaviSyati |
- ityetattaM samAsena jJAnAGgaM kathitaM mayA |
- akaitavena bhAvena zravaNIyo mahezvaraH || 28||
sUtaH -
- yaH ko'pi prasabhaM pradoSasamaye bilvIdalAlaGkRtaM
- liGgaM tuGgamapArapuNyavibhavaiH pazyedathArceta vA |
- prAptaM rAjyamavApya kAmahRdayastuSyedakAmo yadi
- muktidvAramapAvRtaM sa tu labhet zambhoH kaTAkSAGkuraiH || 29||
- acalAtularAjakanyakAkucalIlAmalabAhujAlamIzam |
- bhajatAmanalAkSipAdapadmaM bhavalIlaM na bhaveta cittabAlam || 30||
- bhasmatripuNDraracitAGgakabAhuphAla-
- rudrAkSajAlakavacAH zrutisUktimAlAH |
- vedoruratnapadakAGkitazambhunAma-
- lolA hi zAMbhavavarAH parizIlayanti || 31||
- || iti zrIzivarahasye zaGkarAkhye SaSThAMze RbhunidAghasaMvAde skandakRtazivavratopadezavarNanaM nAma aSTacatvAriMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com