RbhugItA 5 || zivena kumAropadeza varNanam ||

nidAghaH -

• evaM sthite Rbho ko vai brahmabhAvAya kalpate |
• tanme vada vizeSeNa jJAnaM zaGkaravAkyajam || 1||

RbhuH -

• tvameva brahma evAsi tvameva paramo guruH |
• tvamevAkAzarUpo'si tvaM brahmAsi na saMzayaH || 2||
• tvameva sarvabhAvo'si tvamevArthastvamavyayaH |
• tvaM sarvahInastvaM sAkSI sAkSihIno'si sarvadA || 3||
• kAlastvaM sarvahInastvaM sAkSihIno'si sarvadA |
• kAlahIno'si kAlo'si sadA brahmAsi cidghanaH |
• sarvatattvasvarUpo'si tvaM brahmAsi na saMzayaH || 4||
• satyo'si siddho'si sanAtano'si
• mukto'si mokSo'si sadA'mRto'si |
• devo'si zAnto'si nirAmayo'si
• brahmAsi pUrNo'si parAvaro'si || 5||
• samo'si saccAsi sanAtano'si
• satyAdivAkyaiH pratipAdito'si |
• sarvAGgahIno'si sadAsthito'si
• brahmAsi pUrNo'si parAvaro'si || 6||var was parAparo'si
• sarvaprapaJcabhramavarjito'si sarveSu bhUteSu sadodito'si |
• sarvatra saMkalpavivarjito'si brahmAsi pUrNo'si parAvaro'si || 7||
• sarvatra santoSasukhAsano'si sarvatra vidveSavivarjito'si |
• sarvatra kAryAdivivarjito'si brahmAsi pUrNo'si parAvaro'si || 8||
• cidAkArasvarUpo'si cinmAtro'si niraGkuzaH |
• AtmanyevAvasthito'si tvaM brahmAsi na saMzayaH || 9||
• Anando'si paro'si tvaM sarvazUnyo'si nirguNaH |
• eka evAdvitIyo'si tvaM brahmAsi na saMzayaH || 10||
• cidghanAnandarUpo'si cidAnando'si sarvadA |
• paripUrNasvarUpo'si tvaM brahmAsi na saMzayaH || 11||
• tadasi tvamasi jJo'si so'si jAnAsi vIkSyasi |
• cidasi brahmabhUto'si tvaM brahmAsi na saMzayaH || 12||
• amRto'si vibhuzcAsi devo'si tvaM mahAnasi |
• caJcaloSThakalaGko'si tvaM brahmAsi na saMzayaH || 13||
• sarvo'si sarvahIno'si zAnto'si paramo hyasi |
• kAraNaM tvaM prazAnto'si tvaM brahmAsi na saMzayaH || 14||
• sattAmAtrasvarUpo'si sattAsAmAnyako hyasi |
• nityazuddhasvarUpo'si tvaM brahmAsi na saMzayaH || 15||
• ISaNmAtravihIno'si aNumAtravivarjitaH |
• astitvavarjito'si tvaM nAstitvAdivivarjitaH || 16||
• yo'si so'si mahAnto'si tvaM brahmAsi na saMzayaH || 17||
• lakSyalakSaNahIno'si cinmAtro'si nirAmayaH |
• akhaNDaikaraso nityaM tvaM brahmAsi na saMzayaH || 18||
• sarvAdhArasvarUpo'si sarvatejaH svarUpakaH |
• sarvArthabhedahIno'si tvaM brahmAsi na saMzayaH || 19||
• brahmaiva bhedazUnyo'si viplutyAdivivarjitaH |
• zivo'si bhedahIno'si tvaM brahmAsi na saMzayaH || 20||
• prajJAnavAkyahIno'si svasvarUpaM prapazyasi |
• svasvarUpasthito'si tvaM tvaM brahmAsi na saMzayaH || 21||
• svasvarUpAvazeSo'si svasvarUpo mato hyasi |
• svAnandasindhumagno'si tvaM brahmAsi na saMzayaH || 22||
• svAtmarAjye tvamevAsi svayamAtmAnamo hyasi |
• svayaM pUrNasvarUpo'si tvaM brahmAsi na saMzayaH || 23||
• svasmin sukhe svayaM cAsi svasmAt kiJcinna pazyasi |
• svAtmanyAkAzavadbhAsi tvaM brahmAsi na saMzayaH || 24||
• svasvarUpAnna calasi svasvarUpAnna pazyasi |
• svasvarUpAmRto'si tvaM tvaM brahmAsi na saMzayaH || 25||
• svasvarUpeNa bhAsi tvaM svasvarUpeNa jRMbhasi |
• svasvarUpAdananyo'si tvaM brahmAsi na saMzayaH || 26||
• svayaM svayaM sadA'si tvaM svayaM sarvatra pazyasi |
• svasmin svayaM svayaM bhuGkSe tvaM brahmAsi na saMzayaH || 27||

sUtaH -

• tadA nidhAghavacasA tuSTo RbhuruvAca tam |
• zivapremarase pAtraM taM vIkSyAbjajanandanaH || 28||

RbhuH -

• kailAse zaGkaraH putraM kadAcidupadiSTavAn |
• tadeva te pravakSyAmi sAvadhAnamanAH zRNu || 29||
• ayaM prapaJco nAstyeva notpanno na svataH kvacit |
• citraprapaJca ityAhurnAsti nAstyeva sarvadA || 30||
• na prapaJco na cittAdi nAhaMkAro na jIvakaH |
• kevalaM brahmamAtratvAt nAsti nAstyeva sarvadA || 31||
• mAyakAryAdikaM nAsti mAyAkAryabhayaM nahi |
• kevalaM brahmamAtratvAt nAsti nAstyeva sarvadA || 32||
• kartA nAsti kriyA nAsti karaNaM nAsti putraka |
• kevalaM brahmamAtratvAt nAsti nAstyeva sarvadA || 33||
• ekaM nAsti dvayaM nAsti mantratantrAdikaM ca na |
• kevalaM brahmamAtratvAt nAsti nAstyeva sarvadA || 34||
• zravaNaM mananaM nAsti nididhyAsanavibhramaH |
• kevalaM brahmamAtratvAt nAsti nAstyeva sarvadA || 35||
• samAdhidvividhaM nAsti mAtRmAnAdi nAsti hi |
• kevalaM brahmamAtratvAt nAsti nAstyeva sarvadA || 36||
• ajJAnaM cApi nAstyeva avivekakathA na ca |
• kevalaM brahmamAtratvAt nAsti nAstyeva sarvadA || 37||
• anubandhacatuSkaM ca saMbandhatrayameva na |
• kevalaM brahmamAtratvAt nAsti nAstyeva sarvadA || 38||
• bhUtaM bhaviSyanna kvApi vartamAnaM na vai kvacit |
• kevalaM brahmamAtratvAt nAsti nAstyeva sarvadA || 39||
• gaGgA gayA tathA setuvrataM vA nAnyadasti hi |
• kevalaM brahmamAtratvAt nAsti nAstyeva sarvadA || 40||
• na bhUmirna jalaM vahnirna vAyurna ca khaM kvacit |
• kevalaM brahmamAtratvAt nAsti nAstyeva sarvadA || 41||
• naiva devA na dikpAlA na pitA na guruH kvacit |
• kevalaM brahmamAtratvAt nAsti nAstyeva sarvadA || 42||
• na dUraM nAntikaM nAntaM na madhyaM na kvacit sthitiH |
• nAdvaitadvaitasatyatvamasatyaM vA idaM na ca || 43||
• na mokSo'sti na bandho'sti na vArtAvasaro'sti hi |
• kvacidvA kiJcidevaM vA sadasadvA sukhAni ca || 44||
• dvandvaM vA tIrthadharmAdi AtmAnAtmeti na kvacit |
• na vRddhirnodayo mRnyurna gamAgamavibhramaH || 45||
• iha nAsti paraM nAsti na gururna ca ziSyakaH |
• sadasannAsti bhUrnAsti kAryaM nAsti kRtaM ca na || 46||
• jAtirnAsti gatirnAsti varNo nAsti na laukikam |
• zamAdiSaTkaM nAstyeva niyamo vA yamo'pi vA || 47||
• sarvaM mithyeti nAstyeva brahma ityeva nAsti hi |
• cidityeva hi nAstyeva cidahaM bhASaNaM na hi || 48||
• ahamityeva nAstyeva nityo'smIti ca na kvacit |
• kevalaM brahmamAtratvAt nAsti nAstyeva sarvathA || 49||
• vAcA yaducyate kiJcinmanasA manute ca yat |
• buddhyA nizcIyate yacca cittena jJAyate hi yat || 50||
• yogena yujyate yacca indriyAdyaizca yat kRtam |
• jAgratsvapnasuSuptiM ca svapnaM vA na turIyakam || 51||
• sarvaM nAstIti vijJeyaM yadupAdhivinizcitam |
• snAnAcchuddhirna hi kvApi dhyAnAt zuddhirna hi kvacit || 52||
• guNatrayaM nAsti kiJcidguNatrayamathApi vA |
• ekadvitvapadaM nAsti na bahubhramavibhramaH || 53||
• bhrAntyabhrAnti ca nAstyeva kiJcinnAstIti nizcinu |
• kevalaM brahmamAtratvAt na kiJcidavaziSyate || 54||
• idaM zRNoti yaH samyak sa brahma bhavati svayam || 55||

IzvaraH -

• vArAzyambuni budbudA iva ghanAnandAmbudhAvapyumA-
• kAnte'nantajagadgataM suranaraM jAtaM ca tiryaG muhuH |
• bhUtaM cApi bhaviSyati pratibhavaM mAyAmayaM cormijaM
• samyaG mAmanupazyatAmanubhavairnAstyeva teSAM bhavaH || 56||
• haraM vijJAtAraM nikhilatanukAryeSu karaNaM
• na jAnante mohAdyamitakaraNA apyatitarAm |
• umAnAthAkAraM hRdayadaharAntargatasarA
• payojAte bhAsvadbhavabhujaganAzANDajavaram || 57||

• ||iti zrIzivarahasye zaGkarAkhye SaSThAMze RbhunidAghasaMvAde zivena kumAropadezavarNanaM nAma paJcamo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com