RbhugItA 27 || Ananda-rUpatva nirUpaNa prakaraNam ||
RbhuH -
- vakSye prakaraNaM satyaM brahmAnandamanomayam |
- kAryakAraNanirmuktaM nityAnandamayaM tvidam || 1||
- akSayAnanda evAhamAtmAnandaprakAzakam |
- jJAnAnandasvarUpo'haM lakSyAnandamayaM sadA || 2||
- viSayAnandazUnyo'haM mithyAnandaprakAzakaH |
- vRttizUnyasukhAtmAhaM vRttizUnyasukhAtparam || 3||
- jaDAnandaprakAzAtmA AtmAnandaraso'smyaham |
- AtmAnandavihIno'haM nAstyAnandAtmavigrahaH || 4||
- kAryAnandavihIno'haM kAryAnandakalAtmakaH |
- guNAnandavihIno'haM guhyAnandasvarUpavAn || 5||
- guptAnandasvarUpo'haM kRtyAnandamahAnaham |
- jJeyAnandavihIno'haM gopyAnandavivarjitaH || 6||
- sadAnandasvarUpo'haM mudAnandanijAtmakaH |
- lokAnando mahAnando lokAtItamahAnayam || 7||
- bhedAnandazcidAnandaH sukhAnando'hamadvayaH |
- kriyAnando'kSayAnando vRttyAnandavivarjitaH || 8||
- sarvAnando'kSayAnandazcidAnando'hamavyayaH |
- satyAnandaH parAnandaH sadyonandaH parAtparaH || 9||
- vAkyAnandamahAnandaH zivAnando'hamadvayaH |
- zivAnandottarAnanda AdyAnandavivarjitaH || 10||
- amalAtmA parAnandazcidAnando'hamadvayaH |
- vRttyAnandaparAnando vidyAtIto hi nirmalaH || 11||
- kAraNAtIta AnandazcidAnando'hamadvayaH |
- sarvAnandaH parAnando brahmAnandAtmabhAvanaH || 12||
- jIvAnando layAnandazcidAnandasvarUpavAn |
- zuddhAnandasvarUpAtmA buddhyAnando manomayaH || 13||
- zabdAnando mahAnandazcidAnando'hamadvayaH |
- AnandAnandazUnyAtmA bhedAnandavizUnyakaH || 14||
- dvaitAnandaprabhAvAtmA cidAnando'hamadvayaH |
- evamAdimahAnanda ahameveti bhAvaya || 15||
- zAntAnando'hameveti cidAnandaprabhAsvaraH |
- ekAnandaparAnanda eka eva cidavyayaH || 16||
- eka eva mahAnAtmA ekasaMkhyAvivarjitaH |
- ekatattvamahAnandastattvabhedavivarjitaH || 17||
- vijitAnandahIno'haM nirjitAnandahInakaH |
- hInAnandaprazAnto'haM zAnto'hamiti zAntakaH || 18||
- mamatAnandazAnto'hamahamAdiprakAzakam |
- sarvadA dehazAnto'haM zAnto'hamiti varjitaH || 19||
- brahmaivAhaM na saMsArI ityevamiti zAntakaH |
- antarAdantaro'haM vai antarAdantarAntaraH || 20||
- eka eva mahAnanda eka evAhamakSaraH |
- eka evAkSaraM brahma eka evAkSaro'kSaraH || 21||
- eka eva mahAnAtmA eka eva manoharaH |
- eka evAdvayo'haM vai eka eva na cAparaH || 22||
- eka eva na bhUrAdi eka eva na buddhayaH |
- eka eva prazAnto'haM eka eva sukhAtmakaH || 23||
- eka eva na kAmAtmA eka eva na kopakam |
- eka eva na lobhAtmA eka eva na mohakaH || 24||
- eka eva mado nAhaM eka eva na me rasaH |
- eka eva na cittAtmA eka eva na cAnyakaH || 25||
- eka eva na sattAtmA eka eva jarAmaraH |
- eka eva hi pUrNAtmA eka eva hi nizcalaH || 26||
- eka eva mahAnanda eka evAhamekavAn |
- deho'hamiti hIno'haM zAnto'hamiti zAzvataH || 27||
- zivo'hamiti zAnto'haM AtmaivAhamiti kramaH |
- jIvo'hamiti zAnto'haM nityazuddhahRdantaraH || 28||
- evaM bhAvaya niHzaGkaM sadyo muktastvamadvaye |
- evamAdi suzabdaM vA nityaM paThatu nizcalaH || 29||
- kAlasvabhAvo niyataizca bhUtaiH
- jagadvijAyeta iti zrutIritam |
- tadvai mRSA syAjjagato jaDatvataH
- icchAbhavaM caitadathesvarasya || 30||
- || iti zrIzivarahasye zaGkarAkhye SaSThAMze RbhunidAghasaMvAde AnandarUpatvanirUpaNaprakaraNaM nAma saptaviMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com