RbhugItA 10 || brahma-tarpaNa Atma-homAkhya-prakaraNa-dvaya-varNanam ||

RbhuH -

• nityatarpaNamAcakSye nidAgha zRNu me vacaH |
• vedazAstreSu sarveSu atyantaM durlabhaM nRNAm || 1||
• sadA prapaJcaM nAstyeva idamityapi nAsti hi |
• brahmamAtraM sadApUrNaM ityevaM brahmatarpaNam || 2||
• sarUpamAtraM brahmaiva saccidAnandamapyaham |
• Anandaghana evAhaM ityevaM brahmatarpaNam || 3||
• sarvadA sarvazUnyo'haM sadAtmAnandavAnaham |
• nityAnityasvarUpo'haM ityevaM brahmatarpaNam || 4||
• ahameva cidAkAza AtmAkAzo'smi nityadA |
• AtmanA''tmani tRpto'haM ityevaM brahmatarpaNam || 5||
• ekatvasaMkhyAhIno'smi arUpo'smyahamadvayaH |
• nityazuddhasvarUpo'haM ityevaM brahmatarpaNam || 6||
• AkAzAdapi sUkSmo'haM atyantAbhAvako'smyaham |
• sarvaprakAzarUpo'haM ityevaM brahmatarpaNam || 7||
• parabrahmasvarUpo'haM parAvarasukho'smyaham |
• satrAmAtrasvarUpo'haM dRgdRzyAdivivarjitaH || 8||
• yat kiJcidapyahaM nAsti tUSNIM tUSNImihAsmyaham |
• zuddhamokSasvarUpo'ham ityevaM brahmatarpaNam || 9||
• sarvAnandasvarUpo'haM jJAnAnandamahaM sadA |
• vijJAnamAtrarUpo'ham ityevaM brahmatarpaNam || 10||
• brahmamAtramidaM sarvaM nAsti nAnyatra te zape |
• tadevAhaM na sandehaH ityevaM brahmatarpaNam || 11||
• tvamityetat tadityetannAsti nAstIha kiJcana |
• zuddhacaitanyamAtro'haM ityevaM brahmatarpaNam || 12||
• atyantAbhAvarUpo'hamahameva parAtparaH |
• ahameva sukhaM nAnyat ityevaM brahmatarpaNam || 13||
• idaM hemamayaM kiJcinnAsti nAstyeva te zape |
• nirguNAnandarUpo'haM ityevaM brahmatarpaNam || 14||
• sAkSivastuvihInatvAt sAkSitvaM nAsti me sadA |
• kevalaM brahmabhAvatvAt ityevaM brahmatarpaNam || 15||
• ahamevAvizeSo'hamahameva hi nAmakam |
• ahameva vimohaM vai ityevaM brahmatarpaNam || 16||
• indriyAbhAvarUpo'haM sarvAbhAvasvarUpakam |
• bandhamuktivihIno'smi ityevaM brahmatarpaNam || 17||
• sarvAnandasvarUpo'haM sarvAnandaghano'smyaham |
• nityacaitanyamAtro'haM ityevaM brahmatarpaNam || 18||
• vAcAmagocarazcAhaM vAGmano nAsti kiJcana |
• cidAnandamayazcAhaM ityevaM brahmatarpaNam || 19||
• sarvatra pUrNarUpo'haM sarvatra sukhamasmyaham |
• sarvatrAcintyarUpo'ham ityevaM brahmatarpaNam || 20||
• sarvatra tRptirUpo'haM sarvAnandamayo'smyaham |
• sarvazUnyasvarUpo'ham ityevaM brahmatarpaNam || 21||
• sarvadA matsvarUpo'haM paramAnandavAnaham |
• eka evAhamevAhaM ityevaM brahmatarpaNam || 22||
• mukto'haM mokSarUpo'haM sarvamaunaparo'smyaham |
• sarvanirvANarUpo'haM ityevaM brahmatarpaNam || 23||
• sarvadA satsvarUpo'haM sarvadA turyavAnaham |
• turyAtItasvarUpo'haM ityevaM brahmatarpaNam || 24||
• satyavijJAnamAtro'haM sanmAtrAnandavAnaham |
• nirvikalpasvarUpo'ham ityevaM brahmatarpaNam || 25||
• sarvadA hyajarUpo'haM nirIho'haM niraJjanaH |
• brahmavijJAnarUpo'haM ityevaM brahmatarpaNam || 26||
• brahmatarpaNamevoktaM etatprakaraNaM mayA |
• yaH zRNoti sakRdvApi brahmaiva bhavati svayam || 27||
• nityahomaM pravakSyAmi sarvavedeSu durlabham |
• sarvazAstrArthamadvaitaM sAvadhAnamanAH zRNu || 28||
• ahaM brahmAsmi zuddho'smi nityo'smi prabhurasmyaham |
• OMkArArthasvarUpo'smi evaM homaM sudurlabham || 29||
• paramAtmasvarUpo'smi parAnandaparo'smyaham |
• cidAnandasvarUpo'smi evaM homaM sudurlabham || 30||
• nityAnandasvarUpo'smi niSkalaGkamayo hyaham |
• cidAkArasvarUpo'haM evaM homaM sudurlabham || 31||
• na hi kiJcit svarUpo'smi nAhamasmi na so'smyaham |
• nirvyApArasvarUpo'smi evaM homaM sudurlabham || 32||
• niraMzo'smi nirAbhAso na mano nendriyo'smyaham |
• na buddhirna vikalpo'haM evaM homaM sudurlabham || 33||
• na dehAdisvArUpo'smi trayAdiparivarjitaH |
• na jAgratsvapnarUpo'smi evaM homaM sudurlabham || 34||
• zravaNaM mananaM nAsti nididhyAsanameva hi |
• svagataM ca na me kiJcid evaM homaM sudurlabham || 35||
• asatyaM hi manaHsattA asatyaM buddhirUpakam |
• ahaGkAramasadviddhi kAlatrayamasat sadA || 36||
• guNatrayamasadviddhi evaM homaM sudurlabham || 37||
• zrutaM sarvamasadviddhi vedaM sarvamasat sadA |
• sarvatattvamasadviddhi evaM homaM sudurlabham || 38||
• nAnArUpamasadviddhi nAnAvarNamasat sadA |
• nAnAjAtimasadviddhi evaM homaM sudurlabham || 39||
• zAstrajJAnamasadviddhi vedajJAnaM tapo'pyasat |
• sarvatIrthamasadviddhi evaM homaM sudurlabham || 40||
• guruziSyamasadviddhi gurormantramasat tataH |
• yad dRzyaM tadasadviddhi evaM homaM sudurlabham || 41||
• sarvAn bhogAnasadviddhi yaccintyaM tadasat sadA |
• yad dRzyaM tadasadviddhi evaM homaM sudurlabham || 42||
• sarvendriyamasadviddhi sarvamantramasat tviti |
• sarvaprANAnasadviddhi evaM homaM sudurlabham || 43||
• jIvaM dehamasadviddhi pare brahmaNi naiva hi |
• mayi sarvamasadviddhi evaM homaM sudurlabham || 44||
• dRSTaM zrutamasadviddhi otaM protamasanmayi |
• kAryAkAryamasadviddhi evaM homaM sudurlabham || 45||
• dRSTaprAptimasadviddhi santoSamasadeva hi |
• sarvakarmANyasadviddhi evaM homaM sudurlabham || 46||
• sarvAsarvamasadviddhi pUrNApUrNamasat pare |
• sukhaM duHkhamasadviddhi evaM homaM sudurlabham || 47||
• yathAdharmamasadviddhi puNyApuNyamasat sadA |
• lAbhAlAbhamasadviddhi sadA dehamasat sadA || 48||
• sadA jayamasadviddhi sadA garvamasat sadA |
• manomayamasadviddhi saMzayaM nizcayaM tathA || 49||
• zabdaM sarvamasadviddhi sparzaM sarvamasat sadA |
• rUpaM sarvamasadviddhi rasaM sarvamasat sadA || 50||
• gandhaM sarvamasadviddhi jJAnaM sarvamasat sadA |
• bhUtaM bhavyamasadviddhi asat prakRtirucyate || 51||
• asadeva sadA sarvamasadeva bhavodbhavam |
• asadeva guNaM sarvaM evaM homaM sudurlabham || 52||
• zazazRGgavadeva tvaM zazazRGgavadasmyaham |
• zazazRGgavadevedaM zazazRGgavadantaram || 53||
• ityevamAtmahomAkhyamuktaM prakaraNaM mayA |
• yaH zRNoti sakRdvApi brahmaiva bhavati svayam || 54||

skandaH -

• yasmin saMca vicaiti vizvamakhilaM dyotanti sUryendavo
• vidyudvahnimarudgaNAH savaruNA bhItA bhajantIzvaram |
• bhUtaM cApi bhavatyadRzyamakhilaM zambhoH sukhAMzaM jagat
• jAtaM cApi janiSyati pratibhavaM devAsurairniryapi |
• tannehAsti na kiJcidatra bhagavaddhyAnAnna kiJcit priyam || 55||
• yaH prANApAnabhedairmananadhiyA dhAraNApaJcakAdyaiH
• madhye vizvajanasya sannapi zivo no dRzyate sUkSmayA |
• buddhayAdadhyAtayApi zrutivacanazatairdezikoktyaikasUktyA
• yogairbhaktisamanvitaiH zivataro dRzyo na cAnyat tathA || 56||

• || iti zrIzivarahasye zaGkarAkhye SaSThAMze RbhunidAghasaMvAde brahmatarpaNAtmahomAkhya prakaraNadvayavarNanaM nAma dazamo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com