RbhugItA 46 || jJAnopAya-bhUta ziva-vrata nirUpaNam ||
nidAghaH -
- etadgranthaM sadA zrutvA cittajADyamakurvataH |
- yAvaddehaM sadA vittaiH zuzrUSet pUjayedgurum || 1||
- tatpUjayaiva satataM ahaM brahmeti nizcinu |
- nityaM pUrNo'smi nityo'smi sarvadA zAntavigrahaH || 2||
- etadevAtmavijJAnaM ahaM brahmeti nirNayaH |
- niraGkuzasvarUpo'smi ativarNAzramI bhava || 3||
- agnirityAdibhirman{}traiH sarvadA bhasmadhAraNam |
- triyAyuSaistryaMbakaizca kurvanti ca tripuNDrakam || 4||
- tripuNDradhAriNAmeva sarvadA bhasmadhAraNam |
- zivaprasAdasaMpattirbhaviSyati na saMzayaH || 5||
- zivaprasAdAdetadvai jJAnaM saMprApyate dhruvam |
- zirovratamidaM proktaM kevalaM bhasmadhAraNam || 6||
- bhasmadhAraNamAtreNa jJAnametadbhaviSyati |
- ahaM vatsaraparyantaM kRtvA vai bhasmadhAraNam || 7||
- tvatpAdAbjaM prapanno'smi tvatto labdhAtma nirvRtiH |
- sarvAdhArasvarUpo'haM saccidAnandamAtrakam || 8||
- brahmAtmAhaM sulakSaNyo brahmalakSaNapUrvakam |
- AnandAnubhavaM prAptaH saccidAnandavigrahaH || 9||
- guNarUpAdimukto'smi jIvanmukto na saMzayaH |
- maitryAdiguNasaMpanno brahmaivAhaM paro mahAn || 10||
- samAdhimAnahaM nityaM jIvanmukteSu sattamaH |
- ahaM brahmAsmi nityo'smi samAdhiriti kathyate || 11||
- prArabdhapratibandhazca jIvanmukteSu vidyate |
- prArabdhavazato yadyat prApyaM bhuJje sukhaM vasa || 12||
- dUSaNaM bhUSaNaM caiva sadA sarvatra saMbhavet |
- svasvanizcayato buddhyA mukto'hamiti manyate || 13||
- ahameva paraM brahma ahameva parA gatiH |
- evaM nizcayavAn nityaM jIvanmukteti kathyate || 14||
- etadbhedaM ca santyajya svarUpe tiSThati prabhuH |
- indriyArthavihIno'hamindriyArthavivarjitaH || 15||
- sarvendriyaguNAtItaH sarvendriyavivarjitaH |
- sarvasya prabhurevAhaM sarvaM mayyeva tiSThati || 16||
- ahaM cinmAtra evAsmi saccidAndavigrahaH |
- sarvaM bhedaM sadA tyaktvA brahmabhedamapi tyajet || 17||
- ajasraM bhAvayan nityaM videho mukta eva saH |
- ahaM brahma paraM brahma ahaM brahma jagatprabhuH || 18||
- ahameva guNAtItaH ahameva manomayaH |
- ahaM mayyo manomeyaH prANameyaH sadAmayaH || 19||
- sadRGmayo brahmamayo'mRtamayaH sabhUtomRtameva hi |
- ahaM sadAnandadhano'vyayaH sadA |
- sa vedamayyo praNavo'hamIzaH || 20||
- apANipAdo javano gRhItA
- apazyaH pazyAmyAtmavat sarvameva |
- yattadbhUtaM yacca bhavyo'hamAtmA
- sarvAtIto vartamAno'hameva || 22||
- || iti zrIzivarahasye zaGkarAkhye SaSThAMze RbhunidAghasaMvAde jJAnopAyabhUtazivavratanirUpaNaM nAma SaTcatvAriMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com