RbhugItA 45 || nidAdha-kRta-guru-stuti varNanam ||

nidAghaH -

• puNye zivarahasye'sminnitihAse zivodite |
• devyai zivena kathite devyA skandAya modataH || 1||
• tadetasmin hi SaSThAMze SaDAsyakamalodite |
• pAramezvaravijJAnaM zrutametanmahAghabhit || 2||
• mahAmAyAtamastomavinivAraNabhAskaram |
• asyAdhyAyaikakathanAd vijJAnaM mahadaznute || 3||
• zlokasya zravaNenApi jIvanmukto na saMzayaH |
• etadgranthapravaktA hi SaNmukhaH ziva eva hi || 4||
• jaigISavyo mahAyogI sa eva zravaNe'rhati |
• bhasmarudrAkSadhRG nityaM sadA hyatyAzramI muniH || 5||
• etadgranthapravaktA hi sa gururnAtra saMzayaH |
• etadgranthapravaktA hi paraM brahma na saMzayaH || 6||
• etadgranthapravaktA hi ziva eva na cAparaH |
• etadgranthapravaktA hi sAkSAddevI na saMzayaH || 7||
• etadgranthapravaktA hi gaNezo nAtra saMzayaH |
• etadgranthapravaktA hi skandaH skanditatArakaH || 8||
• etadgranthapravaktA hi nandikezo na saMzayaH |
• etadgranthapravaktA hi dattAtreyo muniH svayam || 9||
• etadgranthapravaktA hi dakSiNAmUrtireva hi |
• etadgranthArthakathane bhAvane munayaH surAH || 10||
• na zaktA munizArdUla tvadRte'haM zivaM zape |
• etadgranthArthavaktAraM guruM sarvAtmanA yajet || 11||
• etadgranthapravaktA tu zivo vighnezvaraH svayam |
• pitA hi janmado dAtA gururjanmavinAzakaH || 12||
• etadgranthaM samabhyasya gurorvAkyAdvizeSataH |
• na duhyeta guruM ziSyo manasA kiJca kAyataH || 13||
• gurureva zivaH sAkSAt gurureva zivaH svayam |
• zive ruSTe gurustrAtA gurau ruSTe na kazcana || 14||
• etadgranthapadAbhyAse zraddhA vai kAraNaM param |
• azraddhadhAnaH puruSo naitallezamihArhati || 15||
• zraddhaiva paramaM zreyo jIvabrahmaikyakAraNam |
• asti brahmeti ca zrutvA bhAvayan santa eva hi || 16||
• zivaprasAdahIno yo naitadgranthArthavidbhavet |
• bhAvagrAhyo'yamAtmAyaM para ekaH zivo dhruvaH || 17||
• sarvamanyat parityajya dhyAyItezAnamavyayam |
• zivajJAnamidaM zuddhaM dvaitAdvaitavinAzanam || 18||
• anyeSu ca purANeSu itihAseSu na kvacit |
• etAdRzaM zivajJAnaM zrutisAramahodayam || 19||
• uktaM sAkSAcchivenaitad yogasAMkhyavivarjitam |
• bhAvanAmAtrasulabhaM bhaktigamyamanAmayam || 20||
• mahAnandapradaM sAkSAt prasAdenaiva labhyate |
• tasyaite kathitA hyarthAH prakAzante mahAtmanaH || 21||
• etadgranthaM guroH zrutvA na pUjAM kurute yadi |
• zvAnayonizataM prApya caNDAlaH koTijanmasu || 22||
• etadgranthasya mAhAtmyaM na yajantIzvaraM hRdA |
• sa sUkaro bhavatyeva sahasraparivatsarAn || 23||
• etadgranthArthavaktAramabhyasUyeta yo dvijaH |
• anekabrahmakalpaM ca viSThAyAM jAyate krimiH || 24||
• etadgranthArthavidbrahmA sa brahma bhavati svayam |
• kiM punarbahunoktena jJAnametadvimuktidam || 25||
• yastvetacchRNuyAcchivodimahAvedAntAMbudhi (?)
• vIcijAtapuNyaM nApekSatyanizaM na cAbdakalpaiH |
• zabdAnAM nikhilo raso hi sa zivaH kiM vA tuSAdri
• parikhaMDanato bhavet syAt taNDulo'pi sa mRSA bhavamohajAlam || 26||
• tadvat sarvamazAstramityeva hi satyaM
• dvaitotthaM parihAya vAkyajAlam |
• evaM tvaM tvanizaM bhajasva nityaM
• zAntodyakhilavAk samUhabhAvanA || 27||
• satyatvAbhAvabhAvito'nurUpazIlaH |
• saMpazyan jagadidamAsamaJjasaM sadA hi || 28||

• || iti zrIzivarahasye zaGkarAkhye SaSThAMze RbhunidAghasaMvAde nidAghakRtagurustutivarNanaM nAma paJcacatvAriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com