RbhugItA 44 || nidAdhAnubhava varNana prakaraNam ||

nidAghaH -

• zRNuzva sadguro brahman tvatprasAdAnvinizcitam |
• ahameva hi tadbrahma ahameva hi kevalam || 1||
• ahameva hi nityAtmA ahameva sadA'jaraH |
• ahameva hi zAntAtmA ahameva hi niSkalaH || 2||
• ahameva hi nizcintaH ahameva sukhAtmakaH |
• ahameva gurustvaM hi ahaM ziSyo'smi kevalam || 3||
• ahamAnanda evAtmA ahameva niraJjanaH |
• ahaM turyAtigo hyAtmA ahameva guNojjhitaH || 4||
• ahaM videha evAtmA ahameva hi zaGkaraH |
• ahaM vai paripUrNAtmA ahamevezvaraH paraH || 5||
• ahameva hi lakSyAtmA ahameva manomayaH |
• ahameva hi sarvAtmA ahameva sadAzivaH || 6||
• ahaM viSNurahaM brahmA ahamindrastvahaM surAH |
• ahaM vai yakSarakSAMsi pizAcA guhyakAstathA || 7||
• ahaM samudrAH sarita ahameva hi parvatAH |
• ahaM vanAni bhuvanaM ahamevedameva hi || 8||
• nityatRpto hyahaM zuddhabuddho'haM prakRteH paraH |
• ahameva hi sarvatra ahameva hi sarvagaH || 9||
• ahameva mahAnAtmA sarvamaGgalavigrahaH |
• ahameva hi mukto'smi zuddho'smi paramaH zivaH || 10||
• ahaM bhUmirahaM vAyurahaM tejo hyahaM nabhaH |
• ahaM jalamahaM sUryazcandramA bhagaNA hyaham || 11||
• ahaM lokA alokAzca ahaM lokyA ahaM sadA |
• ahamAtmA pAradRzya ahaM prajJAnavigrahaH || 12||
• ahaM zUnyo azUnyo'haM sarvAnandamayo'smyaham |
• zubhAzubhaphalAtIto hyahameva hi kevalam || 13||
• ahameva RtaM satyamahaM saccitsukhAtmakaH |
• ahamAnanda evAtmA bahudhA caikadhA sthitaH || 14||
• ahaM bhUtabhaviSyaM ca vartamAnamahaM sadA |
• ahameko dvidhAhaM ca bahudhA cAhameva hi || 15||
• ahameva paraM brahma ahameva prajApatiH |
• svarAT samrAD jagadyonirahameva hi sarvadA || 16||
• ahaM vizvastaijasazca prAjJo'haM turya eva hi |
• ahaM prANo manazcAhamahamidriyavargakaH || 17||
• ahaM vizvaM hi bhuvanaM gaganAtmAhameva hi |
• anupAdhi upAdhyaM yattatsarvamahameva hi || 18||
• upAdhirahitazcAhaM nityAnando'hameva hi |
• evaM nizcayavAnantaH sarvadA sukhamaznute |
• evaM yaH zRNuyAnnityaM sarvapApaiH pramucyate || 19||
• nityo'haM nirvikalpo janavanabhuvane pAvano'haM manISI
• vizvo vizvAtigo'haM prakRtivinikRto ekadhA saMsthito'ham |
• nAnAkAravinAzajanmarahitasvajJAnakAryojjhitaiH
• bhUmAnandaghano'smyahaM parazivaH satyasvarUpo'smyaham || 20||

• || iti zrIzivarahasye zaGkarAkhye SaSThAMze RbhunidAghasaMvAde nidAghAnubhavavarNanaM nAma catuzcatvAriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com