RbhugItA 47 || Rbhu-kRta saMgrahopadeza varNanam ||
RbhuH -
- nidAgha zRNu vakSyAmi dRDhIkaraNamastu te |
- zivaprasAdaparyantamevaM bhAvaya nityazaH || 1||
- ahameva paraM brahma ahameva sadAzivaH |
- ahameva hi cinmAtramahameva hi nirguNaH || 2||
- ahameva hi caitanyamahameva hi niSkalaH |
- ahameva hi zUnyAtmA ahameva hi zAzvataH || 3||
- ahameva hi sarvAtmA ahameva hi cinmayaH |
- ahameva paraM brahma ahameva mahezvaraH || 4||
- ahameva jagatsAkSI ahameva hi sadguruH |
- ahameva hi muktAtmA ahameva hi nirmalaH || 5||
- ahamevAhamevoktaH ahameva hi zaGkaraH |
- ahameva hi mahAviSNurahameva caturmukhaH || 6||
- ahameva hi zuddhAtmA hyahameva hyahaM sadA |
- ahameva hi nityAtmA ahameva hi matparaH || 7||
- ahameva manorUpaM ahameva hi zItalaH |
- ahamevAntaryAmI ca ahameva parezvaraH || 8||
- evamuktaprakAreNa bhAvayitvA sadA svayam |
- dravyo'sti cenna kuryAttu vaMcakena guruM param || 9||
- kumbhIpAke sughore tu tiSThatyeva hi kalpakAn |
- zrutvA nidAghazcothAya putradArAn pradattavAn || 10||
- svazarIraM ca putratve datvA sAdarapUrvakam |
- dhanadhAnyaM ca vastrAdIn datvA'tiSThat samIpataH || 11||
- gurostu dakSiNAM datvA nidAghastuSTavAnRbhum |
- santuSTo'smi mahAbhAga tava zuzrUSayA sadA || 12||
- brahmavijJAnamApto'si sukRtArtho na saMzayaH |
- brahmarUpamidaM ceti nizcayaM kuru sarvadA || 13||
- nizcayAdaparo mokSo nAsti nAstIti nizcinu |
- nizcayaM kAraNaM mokSo nAnyat kAraNamasti vai || 14||
- sakalabhuvanasAraM sarvavedAntasAraM
- samarasagurusAraM sarvavedArthasAram |
- sakalabhuvanasAraM saccidAnandasAraM
- samarasajayasAraM sarvadA mokSasAram || 15||
- sakalajananamokSaM sarvadA turyamokSaM
- sakalasulabhamokSaM sarvasAmrAjyamokSam |
- viSayarahitamokSaM vittasaMzoSamokSaM
- zravaNamananamAtrAdetadatyantamokSam || 16||
- tacchuzrUSA ca bhavataH tacchrutvA ca prapedire |
- evaM sarvavacaH zrutvA nidAghaRSidarzitam |
- zukAdayo mahAntaste paraM brahmamavApnuvan || 17||
- zrutvA zivajJAnamidaM RbhustadA
- nidAghamAhetthaM munIndramadhye |
- mudA hi te'pi zrutizabdasAraM
- zrutvA praNamyAhuratIva harSAt || 18||
munayaH -
- pitA mAtA bhrAtA gururasi vayasyo'tha hitakRt
- avidyAbdheH pAraM gamayasi bhavAneva zaraNam |
- balenAsmAn nItvA mama vacanabalenaiva sugamaM
- pathaM prAptyaivArthaiH zivavacanato'smAn sukhayasi || 19||
- || iti zrIzivarahasye zaGkarAkhye SaSThAMze RbhunidAghasaMvAde RbhukRtasaMgrahopadezavarNanaM nAma saptacatvAriMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com