RbhugItA 28 || Atma-vailakSaNya prakaraNam ||
RbhuH -
- brahmaivAhaM cidevAhaM nirmalo'haM nirantaraH |
- zuddhasvarUpa evAhaM nityarUpaH paro'smyaham || 1||
- nityanirmalarUpo'haM nityacaitanyavigrahaH |
- AdyantarUpahIno'hamAdyantadvaitahInakaH || 2||
- ajasrasukharUpo'haM ajasrAnandarUpavAn |
- ahamevAdinirmuktaH ahaM kAraNavarjitaH || 3||
- ahameva paraM brahma ahamevAhameva hi |
- ityevaM bhAvayannityaM sukhamAtmani nirmalaH || 4||
- sukhaM tiSTha sukhaM tiSTha suciraM sukhamAvaha |
- sarvavedamananyastvaM sarvadA nAsti kalpanam || 5||
- sarvadA nAsti cittAkhyaM sarvadA nAsti saMsRtiH |
- sarvadA nAsti nAstyeva sarvadA jagadeva na || 6||
- jagatprasaGgo nAstyeva dehavArtA kutastataH |
- brahmaiva sarvacinmAtramahameva hi kevalam || 7||
- cittamityapi nAstyeva cittamasti hi nAsti hi |
- astitvabhAvanA niSThA jagadastitvavAGmRSA || 8||
- astitvavaktA vArtA hi jagadastIti bhAvanA |
- svAtmano'nyajjagadrakSA deho'hamiti nizcitaH || 9||
- mahAcaNDAla evAsau mahAvipro'pi nizcayaH |
- tasmAditi jaganneti cittaM vA buddhireva ca || 10||
- nAsti nAstIti sahasA nizcayaM kuru nirmalaH |
- dRzyaM nAstyeva nAstyeva nAsti nAstIti bhAvaya || 11||
- ahameva paraM brahma ahameva hi niSkalaH |
- ahameva na sandehaH ahameva sukhAt sukham || 12||
- ahameva hi divyAtmA ahameva hi kevalaH |
- vAcAmagocaro'haM vai ahameva na cAparaH || 13||
- ahameva hi sarvAtmA ahameva sadA priyaH |
- ahameva hi bhAvAtmA ahaM vRttivivarjitaH || 14||
- ahamevAparicchinna ahameva nirantaraH |
- ahameva hi nizcinta ahameva hi sadguruH || 15||
- ahameva sadA sAkSI ahamevAhameva hi |
- nAhaM gupto na vA'gupto na prakAzAtmakaH sadA || 16||
- nAhaM jaDo na cinmAtraH kvacit kiJcit tadasti hi |
- nAhaM prANo jaDatvaM tadatyantaM sarvadA bhramaH || 17||
- ahamatyantamAnanda ahamatyantanirmalaH |
- ahamatyantavedAtmA ahamatyantazAGkaraH || 18||
- ahamityapi me kiJcidahamityapi na smRtiH |
- sarvahIno'hamevAgre sarvahInaH sukhAcchubhAt || 19||
- parAt parataraM brahma parAt parataraH pumAn |
- parAt parataro'haM vai sarvasyAt parataH paraH || 20||
- sarvadehavihIno'haM sarvakarmavivarjitaH |
- sarvamantraH prazAntAtmA sarvAntaHkaraNAt paraH || 21||
- sarvastotravihIno'haM sarvadevaprakAzakaH |
- sarvasnAnavihInAtmA ekamagno'hamadvayaH || 22||
- AtmatIrthe hyAtmajale AtmAnandamanohare |
- AtmaivAhamiti jJAtvA AtmArAmovasAmyaham || 23||
- Atmaiva bhojanaM hyAtmA tRptirAtmasukhAtmakaH |
- Atmaiva hyAtmano hyAtmA Atmaiva paramo hyaham || 24||
- ahamAtmA'hamAtmAhamahamAtmA na laukikaH |
- sarvAtmAhaM sadAtmAhaM nityAtmAhaM guNAntaraH || 25||
- evaM nityaM bhAvayitvA sadA bhAvaya siddhaye |
- siddhaM tiSThati cinmAtro nizcayaM mAtrameva sA |
- nizcayaM ca layaM yAti svayameva sukhI bhava || 26||
- zAkhAdibhizca zrutayo hyanantA-
- stvAmekameva bhagavan bahudhA vadanti |
- viSNvindradhAtRravisUnvanalAnilAdi
- bhUtAtmanAtha gaNanAthalalAma zambho || 27||
- || iti zrIzivarahasye zaGkarAkhye SaSThAMze RbhunidAghasaMvAde AtmavailakSaNyaprakaraNaM nAma aSTAviMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com