RbhugItA 3 || ziva-Rbhu saMvAda ||

sUtaH -

• tato mahezAt saMzrutya sUtrANi Rbhureva hi |
• kailAsezaM mahAdevaM tuSTAva vinayAJjaliH || 1||
• labdhajJAno mahAdevAn munibhyo'kathayacca tat |
• tat stutiM ca zRNuSveti jagAda girijAsutaH || 2||
• jaigISavyaM mahAtmAnaM jitaSaDvargamuttamam |

skandaH -

• saMstutya sAMbamIzAnamRbhurjJAnamavindata |
• zAMbhavaH sa mahAyogI tuSTAvASTatanuM haram || 3||

RbhuH -

• gandhadvipavaravRndatvacirucibandhodyatapaTa
• gandhapramukha madAndhavrajadali harimukhanakharodyat
• skandhodyanmukha bandhakSuranibha niryadrasadasRbhindannagadhara
• vindhyaprabhaziva medhyaprabhuvara |
• medhyottamaziva bhedyAkhilajagadudyadbhavagata
• vedyAgamaziva gadyastutapada padyaprakaTahR -
• dudyadbhavagada vaidyottama pAhi zambho || 4||
• caNDadvipakara kANDaprabhabhuja daNDodyatanaga
• khaNDatripura mahANDasphuTaduDupazikhaNDa |
• dyutivara gaNDadvaya kodaNDAntaka daNDitapAda pAhi zaMbho || 5||
• kiJcijjalalava siJcaddvijakula muJcadvRjina
• kuluMcadvijapati caJcacchavijaTa kuJcatpadanakha
• muJcannatavara karuNA pAhi zaMbho || 6||
• deva zaGkara haramahezvara pApataskara amaramayaskara |
• zivadazaMkara puramahezvara bhavaharezvara pAhi zaMbho || 7||
• aGgajabhaGga turaGgarathAGga jaladhiniSaGga
• dhRtabhujaGgAGga dRzi supataGga
• karasukuraGga jaTadhRtagaGga
• yamihRdisaGga bhajazivaliGga bhavabhayabhaGga || 8||
• zaMbarakarazara dambaravaracara DaMbaraghoSaNa duMbaraphalajaga
• nikuruMbabharahara biMbitahRdicira laMbitapadayuga
• laMbodarajanakAntakahara ziva binduvarAsana
• bindugahana zaradinduvadanavara kundadhavala gaNavRndavinata
• bhavabhayahara paravara karuNAkara phaNivarabhUSaNa
• smara hara garadhara paripAhi || 9||
• rAsabhavRSabhebha zarabhAnanagaNaguNanandita-
• triguNapathAtiga zaravaNabhavanuta taraNisthita varuNAlaya
• kRtapAraNa munizaraNAyita padapadmAruNa piGgajaTAdhara
• kuru karuNAM zaGkara zaM kuru me || 10||
• jambhapraharaNa kumbhodbhavanuta kumbhapramatha nizumbhadyutihara
• bhindadraNagaNa DimbhAyitasura tArakaharasuta
• kuMbhyudyatapada vindhyasthitaditimAndyaprahara madAndhadvipavara
• kRttipravara sudhAndhonutapada buddhyAgamaziva
• medhyAtithivarada mamAvandhyaM kuru divasaM
• tava pUjanataH paripAhi zaMbho || 11||
• kundasadRza makarandanibhasuravRndavinuta kuruvindamaNigaNa
• vRndanibhAGghrijamandara vasadindumakuTa zaradaMbujakRza
• garanindanagala sundaragiritanayAkRti
• dehavarAGgabindukalita zivaliGgagahana sutasinduravaramukha
• bandhuravarasindhunadItaTa liGganivahavaradigvasa pAhi zaMbho || 12||
• pannagAbharaNa mAramAraNa vibhUtibhUSaNa zailajAramaNa |
• ApaduddharaNa yAminIramaNazekhara sukhada pAhi zaMbho || 13||
• dakSAdhvaravarazikSa prabhuvara tryakSa prabalamahokSasthita
• sitavakSassthalakulacakSuHzravasa varAkSasraja hara |
• vIkSAnihatAdhokSajAtmaja varakakSAzraya purapakSavidAraNa
• lIkSAyitasura bhikSAzana hara padmAkSArcanatuSTa
• bhagAkSiharAvyaya zaGkara mokSaprada paripAhi mahezvara || 14||
• akSayaphalada zubhAkSa harAkSatatakSakakara
• garabhakSa parisphuradakSa kSitiratha surapakSAvyaya |
• purahara bhava hara harizara ziva ziva
• zaGkara kuru kuru karuNAM zazimaule || 15||
• bhajAmyagasutAdhavaM pazupatiM mahokSadhvajaM
• valakSabhasitojjvalaM prakaTadakSadAhAkSikam |
• bhagAkSiharaNaM zivaM pramathitorudakSAdhvaraM
• prapakSasuratAmunipramathazikSitAdhokSajam || 16||
• zrInAthAkSisarojarAjitapadAMbhojaikapUjotsavai-
• rnityaM mAnasametadastu bhagavan sadrAjamaule hara |
• bhUSAbhUtabhujaGgasaGgata mahAbhasmAGganetrojvala-
• jjvAlAdagdhamanaGgapataGgadRgumAkAntAva gaGgAdhara || 17||
• svAtmAnandaparAyaNAMbujabhavastutyA'dhunA pAhi mAm
• ... ... ... ... ... ... ... ... |
• girijAmukhasakha SaNmukha paJcamukhodyatadurmukhamukha-
• hara Akhuvahonmukha lekhagaNonmukha zaGkara khagagamaparipUjya || 18||
• koTijanmaviprakarmazuddhacittavartmanAM
• zrautasiddhazuddhabhasmadagdhasarvavarSmaNAm |
• rudrabhuktamedhyabhuktidagdhasarvapApmanAM
• rudrasUkti uktibhaktibhuktimuktidAyikAm |
• purahara iSTatuSTimuktilAsyavAsanA
• bhaktibhAsakailAsamIza Azu labhyate || 19||

skandaH -

• tatstutyA toSitaH zaMbhustamAha RbhumIzvaraH |
• prasannaH karuNAmbhodhirambhojasutamodanaH || 20||

IzvaraH -

• vedAntapAThapaThanena haThAdiyogaiH
• zrInIlakaNThapadabhaktivikuNThabhAvAH |
• ye karmaThA yativarA harisaurigehe
• sAlAvRkairvarakaThorakuThAraghAtaiH || 21||
• bhinnottamAGgahRdayAzca bhusuNDibhiste |
• bhikSAzanA jaraTharAsabhavadbhramanti || 22||
• vidyuccaJcalajIvite'pi na manAgutpadyate zAMbhavI
• bhaktirbhImapadAmbujottamapade bhasmatripuNDre'pi ca |
• rudrAkSAmalarudrasUktijapane niSThA kaniSThAtmanAM
• viSThAviSTakuniSThakaSTakudhiyAM duSTAtmanAM sarvadA || 23||
• bhraSTAnAM duradRSTato janijarAnAzena naSTAtmanAM
• jyeSThazrIzipiviSTacArucaraNAMbhojArcanAnAdaraH |
• tenAniSTaparaMparAsamudayairaSTAkRterna smRtiH
• viSThApUritadurmukheSu narake bhraSTe ciraM saMsthitiH || 24||
• ajJAyatteSvabhijJAH suravaranikaraM stotrazAstrAdituSTaM
• satrAzaM mantramAtrairvidhivihitadhiyA sAmabhAgairyajanti |
• zrAddhe zraddhAbharaNaharaNabhrAntarUpAnpitRRMste
• tattacchraddhAsamuditamanaH svAntarA zambhumIzam ||
• nAbhyarcanti praNatazaraNaM mokSadaM mAM mahezam || 25||
• AryAH zarvasamarcanena satataM dUrvAdalaiH komalaiH
• bilvAkharvadalaizca zaGkaramahAbhAgaM hRdantaH sadA |
• parvasvapyavizeSitena manasA garvaM vihAyAdarAt
• durgANyAzu taranti zaGkarakRpApIyUSadhArArasaiH || 26 ||
• zrIcandracUDacaraNAMbuja pUjanena
• kAlaM nayanti pazupAzavimuktihetoH |
• bhAvAH paraM bhasitaphAlalasattripuNDra-
• rudrAkSakaGkaNalasatkaradaNDayugmAH || 27||
• paJcAkSarapraNavasUktadhiyA vadanti
• nAmAni zAMbhavamanoharadAni zaMbho |
• muktipradAni satataM zivabhaktavaryAH
• ye bilvamUlazivaliGgasamarcanena || 28||
• kAlaM nayedvimalakomalabilvapatraiH
• no tasya kAlajabhayaM bhavatApapApam |
• santApabhUpajanitaM bhajatAM mahezam || 29||
• zazvadvizvezapAdau yamazamaniyamairbhUtirudrAkSagAtro
• vizvatrasto bhujaGgAGgadavaragirijAnAyake labdhabhaktiH |
• mugdho'pyadhyAtmavid yo bhavati bhavaharasyArcayA prAptakAmaH || 30||
• zabdairabdazate'pi naiva sa labhet jJAnaM na tarkabhramaiH
• mImAMsA dvayatastathAdvayapadaM kiM sAMkhyasaMkhyA vada |
• yogAyAsaparaMparAdivihitairvedAntakAntArake
• zrAmyan bhaktivivarjitena manasA zambhoH pade muktaye || 31||
• kiM gaGgayA vA makare prayAga-
• snAnena vA yogamakhakriyAdyaiH |
• yatrArcitaM liGgavaraM zivasya
• tatraiva sarvArthaparaMparA syAt || 32||
• zrIzailo himabhUdharo'ruNagirirvRddhAdrigoparvatau
• zrImaddhemasabhAvihAra bhagavan nRttaM trinetro giriH |
• kailAsottaradakSiNau ca bhagavAn yatrArcane zaGkaro
• liGge sannihito vasatyanudinaM zAGgasya hRtpaGkaje || 33||
• tatrAvimuktaM zazicUDavAsaM
• OMkArakAlaJjara rudrakoTim |
• gaGgAbudheH saGgamamambikApati-
• priyaM tu gokarNakasahyajAtaTam || 34||
• yatrAbhyarNagataM mahezakaruNApUrNaM tu tUrNaM hRdA
• liGgaM pUjitamapyapAstaduritaM tIrthAni gaGgAdayaH |
• puNyAzcAzramasaMghakA girivarakSetrANi zaMbhoH padaM
• bhaktiyuktabhajanena maheze zaktivajjagadidaM paribhAti || 35||
• karmandivRndA api vedamauli-
• siddhAntavAkyakalane'pi bhavanti mandAH |
• kAmAdibaddhahRdayAH sitabhasmapuNDra-
• rudrAkSa zaGkarasamarcanato vihInAH || 36||
• hInA bhavanti bahudhApyabudhA bhavanti
• matpremavAsabhavaneSu vihInavAsAH || 37||
• aSTamyAmaSTamUrtirnizi zazidivase somacUDaM tu muktyai
• bhUtAyAM bhUtanAthaM dhRtabhasitatanurvItadoSe pradoSe |
• gavyaiH paJcAmRtAdyaiH phalavarajarasairbilvapatraizca liGge
• tuGge zAGge'pyasaGgo bhajati yatahRdA naktabhuktyaikabhaktaH || 38||
• jJAnAnutpattaye taddharividhisamatAbuddhirIzAnamUrtau
• bhasmAkSAdhRtirIzaliGgabhajanAzUnyaM tu durmAnasam |
• zaMbhostIrthamahatsutIrthavarake nindAvare zAGkare
• zrImadrudrajapAdyadrohakaraNAt jJAnaM na cotpadyate || 39||
• IzotkarSadhiyaikaliGganiyamAdabhyarcanaM bhasmadhRk
• rudrAkSAmala sAramantra sumahApaJcAkSare jApinAm |
• IzasthAnanivAsazAMbhavakathA bhaktizca saMkIrtanaM
• bhaktasyArcanato bhavet sumahAjJAnaM paraM muktidam || 40||
• AdyantayoryaH praNavena yuktaM
• zrIrudramantraM prajapatyaghaghnam |
• tasyAMghrireNuM zirasA vahanti
• brahmAdayaH svAghanivRttikAmAH || 41||
• apUrvAtharvokta zrutizirasi vijJAnamanaghaM
• mahAkharvAjJAnaprazamanakaraM yo viracayet |
• mune hRtparvANAM vizasanakaraM saptamanubhi-
• rvrataM zIrSaNyaM yo viracayati tasyedamuditam || 42||
• gurau yasya prema zrutizirasi sUtrArthapadagaM
• mayi zraddhA vRddhA bhavati kila tasyaiSa sulabhaH |
• ananyo mArgo'yam akathitamidaM tvayyapi mudA
• yadA gopyo mugdhe suvihitamuniSveva diza vai || 43||

skandaH -

• iti stutvA zaMbhoH pramuditamanAstveSa sa RbhuH
• munirnatvA devaM nagamagapadIzasya nilayam |
• yato gaGgA tuGgA prapatati himAdreH zikharato
• munIndreSvAhedaM tadapi zRNu viprottama hRdA || 44||

RbhuH -

• patantvazanayo muhurgirivaraiH samudrorvarA
• bhavatvadharasaMplavA grahagaNAH surA yAntvaghaH |
• bhavajjanima pUjanAnmama mano na yAtyanyataH
• zapAmi prapade prabhostava saroruhAbhe hara || 45||

• || iti zrIzivarahasye zaGkarAkhye SaSThAMze zivaRbhusaMvAdo nAma tRtIyo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com