RbhugItA 49 || zivasya jJAnadAtRtva nirUpaNam ||

skandaH -

• purA magadhadezIyo brAhmaNo vedapAragaH |
• ucathyatanayo vAgmI vedArthapravaNe dhRtaH || 1||
• nAmnA sudarzano viprAn pAThayan zAstramuttamam |
• vedAntaparayA bhaktyA varNAzramarataH sadA || 2||
• mokSamicchedapi sadA vipro'pi ca janArdanAt |
• viSNupUjAparo nityaM viSNukSetreSu saMvasan || 3||
• gopIcandanaphAlosau tulasyaivArcayaddharim |
• uvAsa niyataM vipro viSNudhyAnaparAyaNaH || 4||
• dazavarSamidaM tasya kRtyaM dRSTvA janArdanaH |
• mokSecchorAjuhAvainaM puratodbhUya taM dvijam || 5||

viSNuH -

• aucathya munizArdUla tapasyabhirataH sadA |
• vRNu kAmaM dadAmyeva vinA jJAnaM dvijottama || 6||

sUtaH -

• iti viSNorgiraM zrutvA vipraH kiJcidbhayAnvitaH |
• praNipatyAha taM viSNuM stuvannArAyaNeti tam || 7||

sudarzanaH -

• viSNo jiSNo namaste'stu zaGkhacakragadAdhara |
• tvatpAdanalinaM prApto jJAnAyAnarhaNaH kimu || 8||
• kimanyairdharmakAmArthairnazvarairiha zaGkhabhRt |
• ityuktaM tadvacaH zrutvA viSNu prAha sudarzanam || 9||

viSNuH -

• sudarzana zRNuSvaitanmatto nAnyamanA dvija |
• vadAmi te hitaM satyaM mayA prAptaM yathA tava || 10||
• madarcanena dhyAnena mokSecchA jAyate nRNAm |
• mokSadAtA mahAdevo jJAnavijJAnadAyakaH || 11||
• tadarcanena saMprAptaM mayA pUrvaM sudarzanam |
• sahasrAraM daityahantR sAkSAt tryakSaprapUjayA || 12||
• tamArAdhaya yatnena bhasmadhAraNapUrvakam |
• agnirityAdibhirmantraistriyAyuSatripuNDrakaiH || 13||
• rudrAkSadhArako nityaM rudrapaJcAkSarAdaraH |
• zivaliGgaM bilvapatraiH pUjayan jJAnavAn bhava || 14||
• vasan kSetre mahezasya snAhi tIrthe ca zAGkare |
• ahaM brahmAdayo devAH pUjayaiva pinAkinaH || 15||
• balinaH zivaliGgasya pUjayA viprasattama |
• yasya phAlatalaM me'dya tripuNDraparicinhitam || 16||
• brahmendradevamunibhistripuNDraM bhasmanA dhRtam |
• pazya vakSasi bAhvorme rudrAkSANAM srajaM zubhAm || 17||
• paJcAkSarajapAsakto rudrAdhyAyaparAyaNaH |
• trikAlamarcayAmIzaM bilvapatrairahaM zivam || 18||
• kamalA vimalA nityaM komalairbilvapallavaiH |
• pUjayatyanizaM liGge tathA brahmAdayaH surAH || 19||
• munayo manavo'pyevaM tathAnye dvijasattamAH |
• nRpAsurAstathA daityA balinaH zivapUjayA || 20||
• jJAnaM mokSastathA bhAgyaM labhyate zaGkarArcanAt |
• tasmAt tvamapi bhaktyaiva samArAdhaya zaGkaram || 21||
• pazavo viSNuvidhayastathAnye munayaH surAH |
• sarveSAM patirIzAnastatprasAdAdvimuktibhAk || 22||
• prasAdajanakaM tasya bhasmadhAraNameva hi |
• prasAdajanakaM tasya mune rudrAkSadhAraNam || 23||
• prasAdajanakastasya rudrAdhyAyajapaH sadA |
• prasAdajanakastasya paJcAkSarajapo dvija || 24||
• prasAdajanakaM tasya zivaliGgaikapUjanam |
• prasAde zAMbhave jAte bhuktimuktI kare sthite || 25||
• tasya bhaktyaiva sarveSAM mocanaM bhavapAzataH |
• tasya prItikaraM sAkSAdbilvairliGgasya pUjanam || 26||
• tasya prItikaraM sAkSAcchivakSetreSu vartanam |
• tasya prItikaraM sAkSAt zivatIrthaniSevaNam || 27||
• tasya prItikaraM sAkSAt bhasmarudrAkSadhAraNam |
• tasya prItikaraM sAkSAt pradoSe zivapUjanam || 28||
• tasya prItikaraM sAkSAd rudrapaJcAkSarAvRtiH |
• tasya prItikaraM sAkSAcchivabhaktajanArcanam || 29||
• tasya prItikaraM sAkSAt some sAyantanArcanam |
• tasya prItikaraM sAkSAt tannirmAlyaikabhojanam || 30||
• tasya prItikaraM sAkSAd aSTamISvarcanaM nizi |
• tasya prItikaraM sAkSAt caturdazyarcanaM nizi || 31||
• tasya prItikaraM sAkSAt tannAmnAM smRtireva hi |
• etAvAnena dharmo hi zambhoH priyakaro mahAn || 32||
• anyadabhyudayaM vipra zrutismRtiSu kIrtitam |
• dharmo varNAzramaprokto munibhiH kathito mune || 33||
• avimukte vizeSeNa zivo nityaM prakAzate |
• tasmAt kAzIti tat proktaM yato hIzaH prakAzate || 34||
• tatraivAmaraNaM tiSThediti jAbAlikI zrutiH |
• tatra vizvezvare liGge nityaM brahma prakAzate || 35||
• tatrAnnapUrNA sarveSAM bhuktyannaM saMprayacchati |
• tatrAsti maNikarNAkhyaM maNikuNDaM vinirmitam || 36||
• jJAnodayo'pi tatrAsti sarveSAM jJAnadAyakaH |
• tatra yAhi mayA sArdhaM tatraiva vasa vai mune || 37||
• tatrAnte mokSadaM jJAnaM dadAtIzvara eva hi |
• ityuktvA tena vipreNa yayau kAzIM hariH svayam || 38||
• snAtvA tIrthe cakrasaMjJe jJAnavApyAM haridvijaH |
• taM dvijaM snApayAmAsa bhasmanApAdamastakam || 39||
• dhRtatripuNDrarudrAkSaM kRtvA taM ca sudarzanam |
• pUjayaccAtha vizvezaM pUjayAmAsa ca dvijAn || 40||
• bilvairgandhAkSatairdIpairnaivedyaizca manoharaiH |
• tuSTAva praNipatyaivaM sa dvijo madhusUdanaH || 41||

sudarzanaviSNU -

• bhaja bhaja bhasitAnalojvalAkSaM
• bhujagAbhogabhujaGgasaGgahastam |
• bhavabhImamahograrudramIDyaM
• bhavabharjakatarjakaM mahainasAm || 42||
• vedaghoSabhaTakATakAvadhRk dehadAhadahanAmala kAla |
• jUTakoTisujaTAtaTidudyadrAgaraJjitaTinIzazimaule || 43||
• zaMbarAGkavarabhUSa pAhi mAmambarAntaracarasphuTavAha |
• vArijAdyaghanaghoSa zaGkara trAhi vArijabhaveDya maheza || 44||
• madagajavarakRttivAsa zaMbho
• madhumadanAkSisaroruhArcyapAda |
• yamamadadamanAndhazikSa zaMbho
• purahara pAhi dayAkaTAkSasAraiH || 45||
• apAM puSpaM maulau himabhayaharaH phAlanayanaH
• jaTAjUTe gaGgA'mbujavikasanaH savyanayanaH |
• garaM kaNThe yasya tribhuvanaguroH zaMbarahara
• mataGgodyatkRtterbhavaharaNapAdAbjabhajanam || 46||
• zrIbilvamUlazitikaNThamahezaliGgaM
• bilvAmbujottamavaraiH paripUjya bhaktyA |
• stamberamAGgavadanottamasaGgabhaGga
• rAjadviSAGgaparisaGgamahezazAGgam || 47||
• yo gaurIramaNArcanodyatamatirbhUyo bhavecchAMbhavo
• bhakto janmaparaMparAsu tu bhavenmukto'tha muktyaGganA-
• kAntasvAntanitAntazAntahRdaye kArtAntavArtojjhitaH |
• viSNubrahmasurendraraJjitamumAkAntAMghripaGkeruha-
• dhyAnAnandanimagnasarvahRdayaH kiJcinna jAnAtyapi || 48||
• kAmArAtipadAmbujArcanarataH pApAnutApAdhika-
• vyApArapravaNaprakIrNamanasA puNyairagaNyairapi |
• no dUyeta vizeSasantatimahAsArAnukArAdarA-
• dArAgrAhakumAramArasuzarAdyAghAtabhItairapi || 49||

• || iti zrIzivarahasye zaGkarAkhye SaSThAMze viSNUcathyasaMvAde zivasya jJAnadAtRtvanirUpaNaM nAma ekonapaJcAzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com