RbhugItA 37 || sarva-siddhAnta prakaraNam ||

RbhuH -

• nidAgha zRNu vakSyAmi rahasyaM paramadbhutam |
• zlokaikazravaNenaiva sadyo mokSamavApnuyAt || 1||
• idaM dRSTaM paraM brahma dRzyavadbhAti cittataH |
• sarvaM caitanyamAtratvAt nAnyat kiJcinna vidyate || 2||
• idameva hi nAstyeva ayamityapi nAsti hi |
• eka evApyaNurvApi nAsti nAsti na saMzayaH || 3||
• vyavahAramidaM kvApi vArtAmAtramapi kva vA |
• bandharUpaM bandhavArtA bandhakAryaM paraM ca vA || 4||
• sanmAtrakAryaM sanmAtramahaM brahmeti nizcayam |
• duHkhaM sukhaM vA bodho vA sAdhakaM sAdhyanirNayaH || 5||
• Atmeti paramAtmeti jIvAtmeti pRthaG na hi |
• deho'hamiti mUrto'haM jJAnavijJAnavAnaham || 6||
• kAryakAraNarUpo'hamantaHkaraNakAryakam |
• ekamityekamAtraM vA nAsti nAstIti bhAvaya || 7||
• sarvasaGkalpamAtreti sarvaM brahmeti vA jagat |
• tattvajJAnaM paraM brahma oGkArArthaM sukhaM japam || 8||
• dvaitAdvaitaM sadAdvaitaM tathA mAnAvamAnakam |
• sarvaM caitanyamAtratvAt nAnyat kiJcinna vidyate || 9||
• AtmAnandamahaM brahma prajJAnaM brahma eva hi |
• idaM rUpamahaM rUpaM priyApriyavicAraNam || 10||
• yadyat saMbhAvyate loke yadyat sAdhanakalpanam |
• yadyantarahitaM brahmabhAvanaM cittanirmitam || 11||
• sthUladeho'hamevAtra sUkSmadeho'hameva hi |
• buddherbhedaM manobhedaM ahaMkAraM jaDaM ca tat || 12||
• sarvaM caitanyamAtratvAt nAnyat kiJcinna vidyate |
• zravaNaM mananaM caiva sAkSAtkAravicAraNam || 13||
• AtmaivAhaM paraM caiva nAhaM mohamayaM svayam |
• brahmaiva sarvamevedaM brahmaiva paramaM padam || 14||
• brahmaiva kAraNaM kAryaM brahmaiva jagatAM jayaH |
• brahmaiva sarvaM caitanyaM brahmaiva manasAyate || 15||
• brahmaiva jIvavadbhAti brahmaiva ca harIyate |
• brahmaiva zivavadbhAti brahmaiva priyamAtmanaH || 16||
• brahmaiva zAntivadbhAti brahmaNo'nyanna kiJcana |
• nAhaM na cAyaM naivAnyannotpannaM na parAt param || 17||
• na cedaM na ca zAstrArthaM na mImAMsaM na codbhavam |
• na lakSaNaM na vedAdi nApi cittaM na me manaH || 18||
• na me nAyaM nedamidaM na buddhinizcayaM sadA |
• kadAcidapi nAstyeva satyaM satyaM na kiJcana || 19||
• naikamAtraM na cAyaM vA nAntaraM na bahirna hi |
• ISaNmAtraM ca na dvaitaM na janyaM na ca dRzyakam || 20||
• na bhAvanaM na smaraNaM na vismaraNamaNvapi |
• na kAladezakalanaM na saGkalpaM na vedanam || 21||
• na vijJAnaM na dehAnyaM na vedo'haM na saMsRtiH |
• na me duHkhaM na me mokSaM na gatirna ca durgatiH || 22||
• nAtmA nAhaM na jIvo'haM na kUTastho na jAyate |
• na deho'haM na ca zrotraM na tvagindriyadevatA || 23||
• sarvaM caitanyamAtratvAt sarvaM nAstyeva sarvadA |
• akhaNDAkArarUpatvAt sarvaM nAstyeva sarvadA || 24||
• huMkArasyAvakAzo vA huMkArajananaM ca vA |
• nAstyeva nAsti nAstyeva nAsti nAsti kadAcana || 25||
• anyat padArthamalpaM vA anyadevAnyabhASaNam |
• Atmano'nyadasatyaM vA satyaM vA bhrAntireva ca || 26||
• nAstyeva nAsti nAstyeva nAsti zabdo'pi nAsti hi |
• sarvaM caitanyamAtratvAt sarvaM nAstyeva sarvadA || 27||
• sarvaM brahma na sandeho brahmaivAhaM na saMzayaH |
• vAkyaM ca vAcakaM sarvaM vaktA ca tripuTIdvayam || 28||
• jJAtA jJAnaM jJeyabhedaM mAtRmAnamiti priyam |
• yadyacchAstreSu nirNItaM yadyadvedeSu nizcitam || 29||
• parAparamatItaM ca atIto'hamavedanam |
• gururgurUpadezazca guruM vakSye na kasyacit || 30||
• gururUpA guruzraddhA sadA nAsti guruH svayam |
• Atmaiva gururAtmaiva anyAbhAvAnna saMzayaH || 31||
• AtmanaH zubhamAtmaiva anyAbhAvAnna saMzayaH |
• Atmano mohamAtmaiva Atmano'sti na kiJcana || 32||
• AtmanaH sukhamAtmaiva anyannAsti na saMzayaH |
• AtmanyevAtmanaH zaktiH AtmanyevAtmanaH priyam || 33||
• AtmanyevAtmanaH snAnaM AtmanyevAtmano ratiH |
• AtmajJAnaM paraM zreyaH AtmajJAnaM sudurlabham || 34||
• AtmajJAnaM paraM brahma AtmajJAnaM sukhAt sukham |
• AtmajJAnAt paraM nAsti AtmajJAnAt smRtirna hi || 35||
• brahmaivAtmA na sandeha Atmaiva brahmaNaH svayam |
• svayameva hi sarvatra svayameva hi cinmayaH || 36||
• svayameva cidAkAzaH svayameva nirantaram |
• svayameva ca nAnAtmA svayameva ca nAparaH || 37||
• svayameva guNAtItaH svayameva mahat sukham |
• svayameva hi zAntAtmA svayameva hi niSkalaH || 38||
• svayameva cidAnandaH svayameva mahatprabhuH |
• svayameva sadA sAkSI svayameva sadAzivaH || 39||
• svayameva hariH sAkSAt svayameva prajApatiH |
• svayameva paraM brahma brahma eva svayaM sadA || 40||
• sarvaM brahma svayaM brahma svayaM brahma na saMzayaH |
• dRDhanizcayameva tvaM sarvathA kuru sarvadA || 41||
• vicArayan svayaM brahma brahmamAtraM svayaM bhavet |
• etadeva paraM brahma ahaM brahmeti nizcayaH || 42||
• eSa eva paro mokSa ahaM brahmeti nizcayaH |
• eSa eva kRtArtho hi eSa eva sukhaM sadA || 43||
• etadeva sadA jJAnaM svayaM brahma svayaM mahat |
• ahaM brahma etadeva sadA jJAnaM svayaM mahat || 44||
• ahaM brahma etadeva svabhAvaM satataM nijam |
• ahaM brahma etadeva sadA nityaM svayaM sadA || 45||
• ahaM brahma etadeva bandhanAzaM na saMzayaH |
• ahaM brahma etadeva sarvasiddhAntanizcayam || 46||
• eSa vedAntasiddhAnta ahaM brahma na saMzayaH |
• sarvopaniSadAmarthaH sarvAnandamayaM jagat || 47||
• mahAvAkyasya siddhAnta ahaM brahmeti nizcayaH |
• sAkSAcchivasya siddhAnta ahaM brahmeti nizcayaH || 48||
• nArAyaNasya siddhAnta ahaM brahmeti nizcayaH |
• caturmukhasya siddhAnta ahaM brahmeti nizcayaH || 49||
• RSINAM hRdayaM hyetat devAnAmupadezakam |
• sarvadezikasiddhAnta ahaM brahmeti nizcayaH || 50||
• yacca yAvacca bhUtAnAM mahopadeza eva tat |
• ahaM brahma mahAmokSaM paraM caitadahaM svayam || 51||
• ahaM cAnubhavaM caitanmahAgopyamidaM ca tat |
• ahaM brahma etadeva sadA jJAnaM svayaM mahat || 52||
• mahAprakAzamevaitat ahaM brahma eva tat |
• etadeva mahAmantraM etadeva mahAjapaH || 53||
• etadeva mahAsnAnamahaM brahmeti nizcayaH |
• etadeva mahAtIrthamahaM brahmeti nizcayaH || 54||
• etadeva mahAgaGgA ahaM brahmeti nizcayaH |
• eSa eva paro dharma ahaM brahmeti nizcayaH || 55||
• eSa eva mahAkAza ahaM brahmeti nizcayaH |
• etadeva hi vijJAnamahaM brahmAsmi kevalam |
• sarvasiddhAntamevaitadahaM brahmeti nizcayaH || 56||
• savyAsavyatayAdyavajJahRdayA gopodahAryaH sriyaH
• pazyantyambujamitramaNDalagataM zaMbhuM hiraNyAtmakam |
• sarvatra prasRtaiH karairjagadidaM puSNAti muSNan dhanaiH
• ghRSTaM cauSadhijAlamambunikarairvizvotthadhUtaM haraH || 57||

• || iti zrIzivarahasye zaGkarAkhye SaSThAMze RbhunidAghasaMvAde sarvasiddhAntaprakaraNaM nAma saptatriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com