RbhugItA 23 || rahasyopadeza prakaraNam ||

RbhuH -

• nidAgha zRNu vakSyAmi sarvalokeSu durlabham |
• idaM brahma paraM brahma saccidAnanda eva hi || 1||
• nAnAvidhajanaM lokaM nAnA kAraNakAryakam |
• brahmaivAnyadasat sarvaM saccidAnanda eva hi || 2||
• ahaM brahma sadA brahma asmi brahmAhameva hi |
• kAlo brahma kSaNo brahma ahaM brahma na saMzayaH || 3||
• vedo brahma paraM brahma satyaM brahma parAt paraH |
• haMso brahma harirbrahma zivo brahma cidavyayaH || 4||
• sarvopaniSado brahma sAmyaM brahma samo'smyaham |
• ajo brahma raso brahma viyadbrahma parAtparaH || 5||
• truTirbrahma mano brahma vyaSTirbrahma sadAmudaH |
• idaM brahma paraM brahma tattvaM brahma sadA japaH || 6||
• akAro brahma evAhamukAro'haM na saMzayaH |
• makArabrahmamAtro'haM mantrabrahmamanuH param || 7||
• zikArabrahmamAtro'haM vAkAraM brahma kevalam |
• yakAraM brahma nityaM ca paJcAkSaramahaM param || 8||
• recakaM brahma sadbrahma pUrakaM brahma sarvataH |
• kuMbhakaM brahma sarvo'haM dhAraNaM brahma sarvataH || 9||
• brahmaiva nAnyat tatsarvaM saccidAnanda eva hi |
• evaM ca nizcito muktaH sadya eva na saMzayaH || 10||
• kecideva mahAmUDhAH dvaitamevaM vadanti hi |
• na saMbhASyAH sadAnarhA namaskAre na yogyatA || 11||
• mUDhA mUDhatarAstucchAstathA mUDhatamAH pare |
• ete na santi me nityaM ahaMvijJAnamAtrataH || 12||
• sarvaM cinmAtrarUpatvAdAnandatvAnna me bhayam |
• ahamityapi nAstyeva paramityapi na kvacit || 13||
• brahmaiva nAnyat tatsarvaM saccidAnanda eva hi |
• kAlAtItaM sukhAtItaM sarvAtItamatItakam || 14||
• nityAtItamanityAnAmamitaM brahma kevalam |
• brahmaiva nAnyadyatsarvaM saccidAnandamAtrakam || 15||
• dvaitasatyatvabuddhizca dvaitabuddhyA na tat smara |
• sarvaM brahmaiva nAnyo'sti sarvaM brahmaiva kevalam || 16||
• buddhyAtItaM mano'tItaM vedAtItamataH param |
• AtmAtItaM janAtItaM jIvAtItaM ca nirguNam || 17||
• kASThAtItaM kalAtItaM nATyAtItaM paraM sukham |
• brahmamAtreNa saMpazyan brahmamAtraparo bhava || 18||
• brahmamAtraparo nityaM cinmAtro'haM na saMzayaH |
• jyotirAnandamAtro'haM nijAnandAtmamAtrakaH || 19||
• zUnyAnandAtmamAtro'haM cinmAtro'hamiti smara |
• sattAmAtro'hamevAtra sadA kAlaguNAntaraH || 20||
• nityasanmAtrarUpo'haM zuddhAnandAtmamAtrakam |
• prapaJcahInarUpo'haM saccidAnandamAtrakaH || 21||
• nizcayAnandamAtro'haM kevalAnandamAtrakaH |
• paramAnandamAtro'haM pUrNAnando'hameva hi || 22||
• dvaitasyamAtrasiddho'haM sAmrAjyapadalakSaNam |
• ityevaM nizcayaM kurvan sadA triSu yathAsukham || 23||
• dRDhanizcayarUpAtmA dRDhanizcayasanmayaH |
• dRDhanizcayazAntAtmA dRDhanizcayamAnasaH || 24||
• dRDhanizcayapUrNAtmA dRDhanizcayanirmalaH |
• dRDhanizcayajIvAtmA dRDhanizcayamaGgalaH || 25||
• dRDhanizcayajIvAtmA saMzayaM nAzameSyati |
• dRDhanizcayamevAtra brahmajJAnasya lakSaNam || 26||
• dRDhanizcayamevAtra vAkyajJAnasya lakSaNam |
• dRDhanizcayamevAtra kAraNaM mokSasaMpadaH || 27||
• evameva sadA kAryaM brahmaivAhamiti sthiram |
• brahmaivAhaM na sandehaH saccidAnanda eva hi || 28||
• AtmAnandasvarUpo'haM nAnyadastIti bhAvaya |
• tatastadapi santyajya eka eva sthiro bhava || 29||
• tatastadapi santyajya nirguNo bhava sarvadA |
• nirguNatvaM ca santyajya vAcAtIto bhavet tataH || 30||
• vAcAtItaM ca santyajya cinmAtratvaparo bhava |
• AtmAtItaM ca santyajya brahmamAtraparo bhava || 31||
• cinmAtratvaM ca santyajya sarvatUSNIMparo bhava |
• sarvatUSNIM ca santyajya mahAtUSNIMparo bhava || 32||
• mahAtUSNIM ca santyajya cittatUSNIM samAzraya |
• cittatUSNIM ca santyajya jIvatUSNIM samAhara || 33||
• jIvatUSNIM parityajya jIvazUnyaparo bhava |
• zUnyatyAgaM parityajya yathA tiSTha tathAsi bho || 34||
• tiSThatvamapi santyajya avAGmAnasagocaraH |
• tataH paraM na vaktavyaM tataH pazyenna kiJcana || 35||
• no cet sarvaparityAgo brahmaivAhamitIraya |
• sadA smaran sadA cintyaM sadA bhAvaya nirguNam || 36||
• sadA tiSThasva tattvajJa sadA jJAnI sadA paraH |
• sadAnandaH sadAtItaH sadAdoSavivarjitaH || 37||
• sadA zAntaH sadA tRptaH sadA jyotiH sadA rasaH |
• sadA nityaH sadA zuddhaH sadA buddhaH sadA layaH || 38||
• sadA brahma sadA modaH sadAnandaH sadA paraH |
• sadA svayaM sadA zUnyaH sadA maunI sadA zivaH || 39||
• sadA sarvaM sadA mitraH sadA snAnaM sadA japaH |
• sadA sarvaM ca vismRtya sadA maunaM parityaja || 40||
• dehAbhimAnaM santyajya cittasattAM parityaja |
• AtmaivAhaM svayaM cAhaM ityevaM sarvadA bhava || 41||
• evaM sthite tvaM mukto'si na tu kAryA vicAraNA |
• brahmaiva sarvaM yatkiJcit saccidAnanda eva hi || 42||
• ahaM brahma idaM brahma tvaM brahmAsi nirantaraH |
• prajJAnaM brahma evAsi tvaM brahmAsi na saMzayaH || 43||
• dRDhanizcayameva tvaM kuru kalyANamAtmanaH |
• manaso bhUSaNaM brahma manaso bhUSaNaM paraH || 44||
• manaso bhUSaNaM kartA brahmaivAhamavekSataH |
• brahmaiva saccidAnadaH saccidAnandavigrahaH || 45||
• saccidAnandamakhilaM saccidAnanda eva hi |
• saccidAnandajIvAtmA saccidAnandavigrahaH || 46||
• saccidAnandamadvaitaM saccidAnandazaGkaraH |
• saccidAnandavijJAnaM saccidAnandabhojanaH || 47||
• saccidAnandapUrNAtmA saccidAnandakAraNaH |
• saccidAnandalIlAtmA saccidAnandazevadhiH || 48||
• saccidAnandasarvAGgaH saccidAnandacandanaH |
• saccidAnandasiddhAntaH saccidAnandavedakaH || 49||
• saccidAnandazAstrArthaH saccidAnandavAcakaH |
• saccidAnandahomazca saccidAnandarAjyakaH || 50||
• saccidAnandapUrNAtmA saccidAnandapUrNakaH |
• saccidAnandasanmAtraM mUDheSu paThitaM ca yat || 51||
• zuddhaM mUDheSu yaddattaM subaddhaM mArgacAriNA |
• viSayAsaktacitteSu na saMbhASyaM vivekinA || 52||
• sakRcchravaNamAtreNa brahmaiva bhavati svayam |
• icchA cedyadi nArINAM mukhaM brAhmaNa eva hi || 53||
• sarvaM caitanyamAtratvAt strIbhedaM ca na vidyate |
• vedazAstreNa yukto'pi jJAnAbhAvAd dvijo'dvijaH || 54||
• brahmaiva tantunA tena baddhAste mukticintakAH |
• sarvamuktaM bhagavatA rahasyaM zaGkareNa hi || 55||
• somApIDapadAMbujArcanaphalairbhuktyai bhavAn mAnasaM
• nAnyadyogapathA zrutizravaNataH kiM karmabhirbhUyate |
• yuktyA zikSitamAnasAnubhavato'pyazmApyasaGgo vacAM
• kiM grAhyaM bhavatIndriyArtharahitAnandaikasAndraH zivaH || 56||

• || iti zrIzivarahasye zaGkarAkhye SaSThAMze RbhunidAghasaMvAde rahasyopadezaprakaraNaM nAma trayoviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com