RbhugItA 24 || ahaMbrahma prakaraNa nirUpaNam ||

RbhuH -

• punaH punaH paraM vakSye Atmano'nyadasat svataH |
• asato vacanaM nAsti sato nAsti sadA sthite || 1||
• brahmAbhyAsa parasyAhaM vakSye nirNayamAtmanaH |
• tasyApi sakRdevAhaM vakSye maGgalapUrvakam || 2||
• sarvaM brahmAhamevAsmi cinmAtro nAsti kiJcana |
• ahameva paraM brahma ahameva cidAtmakam || 3||
• ahaM mameti nAstyeva ahaM jJAnIti nAsti ca |
• zuddho'haM brahmarUpo'hamAnando'hamajo naraH || 4||var was najaH
• devo'haM divyabhAno'haM turyo'haM bhavabhAvyaham |
• aNDajo'hamazeSo'hamantarAdantaro'smyaham || 5||
• amaro'hamajasro'hamatyantaparamo'smyaham |
• parAparasvarUpo'haM nityAnityaraso'smyaham || 6||
• guNAguNavihIno'haM turyAturyaraso'smyaham |
• zAntAzAntavihIno'haM jJAnAjJAnaraso'smyaham || 7||
• kAlAkAlavihIno'hamAtmAnAtmavivarjitaH |
• labdhAlabdhAdihIno'haM sarvazUnyo'hamavyayaH || 8||
• ahamevAhamevAhamanantaranirantaram |
• zAzvato'hamalakSyo'hamAtmA na paripUrNataH || 9||
• ityAdizabdamukto'haM ityAdyaM ca na cAsmyaham |
• ityAdivAkyamukto'haM sarvavarjitadurjayaH || 10||
• nirantaro'haM bhUto'haM bhavyo'haM bhavavarjitaH |
• lakSyalakSaNahIno'haM kAryahIno'hamAzugaH || 11||
• vyomAdirUpahIno'haM vyomarUpo'hamacyutaH |
• antarAntarabhAvo'hamantarAntaravarjitaH || 12||
• sarvasiddhAntarUpo'haM sarvadoSavivarjitaH |
• na kadAcana mukto'haM na baddho'haM kadAcana || 13||
• evameva sadA kRtvA brahmaivAhamiti smara |
• etAvadeva mAtraM tu mukto bhavatu nizcayaH || 14||
• cinmAtro'haM zivo'haM vai zubhamAtramahaM sadA |
• sadAkAro'haM mukto'haM sadA vAcAmagocaraH || 15||
• sarvadA paripUrNo'haM vedopAdhivivarjitaH |
• cittakAryavihIno'haM cittamastIti me na hi || 16||
• yat kiJcidapi nAstyeva nAstyeva priyabhASaNam |
• AtmapriyamanAtmA hi idaM me vastuto na hi || 17||
• idaM duHkhamidaM saukhyamidaM bhAti ahaM na hi |
• sarvavarjitarUpo'haM sarvavarjitacetanaH || 18||
• anirvAcyamanirvAcyaM paraM brahma raso'smyaham |
• ahaM brahma na sandeha ahameva parAt paraH || 19||
• ahaM caitanyabhUtAtmA deho nAsti kadAcana |
• liGgadehaM ca nAstyeva kAraNaM dehameva na || 20||
• ahaM tyaktvA paraM cAhaM ahaM brahmasvarUpataH |
• kAmAdivarjito'tItaH kAlabhedaparAtparaH || 21||
• brahmaivedaM na saMvedyaM nAhaM bhAvaM na vA nahi |
• sarvasaMzayasaMzAnto brahmaivAhamiti sthitiH || 22||
• nizcayaM ca na me kiJcit cintAbhAvAt sadA'kSaraH |
• cidahaM cidahaM brahma cidahaM cidahaM sadA || 23||
• evaM bhAvanayA yuktastyaktazaGkaH sukhIbhava |
• sarvasaGgaM parityajya AtmaikyaivaM bhavAnvaham || 24||
• saGgaM nAma pravakSye'haM brahmAhamiti nizcayaH |
• satyo'haM paramAtmA'haM svayameva svayaM svayam || 25||
• nAhaM deho na ca prANo na dvandvo na ca nirmalaH |
• eSa eva hi satsaGgaH eSa eva hi nirmalaH || 26||
• mahatsaGge mahadbrahmabhAvanaM paramaM padam |
• ahaM zAntaprabhAvo'haM ahaM brahma na saMzayaH || 27||
• ahaM tyaktasvarUpo'haM ahaM cintAdivarjitaH |
• eSa eva hi satsaGgaH eSa nityaM bhavAnaham || 28||
• sarvasaGkalpahIno'haM sarvavRttivivarjitaH |
• amRto'hamajo nityaM mRtibhItiratItikaH || 29||
• sarvakalyANarUpo'haM sarvadA priyarUpavAn |
• samalAGgo malAtItaH sarvadAhaM sadAnugaH || 30||
• aparicchinnasanmAtraM satyajJAnasvarUpavAn |
• nAdAntaro'haM nAdo'haM nAmarUpavivarjitaH || 31||
• atyantAbhinnahIno'hamAdimadhyAntavarjitaH |
• evaM nityaM dRDhAbhyAsa evaM svAnubhavena ca || 32||
• evameva hi nityAtmabhAvanena sukhI bhava |
• evamAtmA sukhaM prAptaH punarjanma na saMbhavet || 33||
• sadyo mukto bhavedbrahmAkAreNa paritiSThati |
• AtmAkAramidaM vizvamAtmAkAramahaM mahat || 34||
• Atmaiva nAnyadbhUtaM vA Atmaiva mana eva hi |
• Atmaiva cittavadbhAti Atmaiva smRtivat kvacit || 35||
• Atmaiva vRttivadbhAti Atmaiva krodhavat sadA |var was vRttimadbhAti
• Atmaiva zravaNaM tadvadAtmaiva mananaM ca tat || 36||
• AtmaivopakramaM nityamupasaMhAramAtmavat |
• AtmaivAbhyAM samaM nityamAtmaivApUrvatAphalam || 37||
• arthavAdavadAtmA hi paramAtmopapatti hi |
• icchA prArabhyavadbrahma icchAmArabhyavat paraH || 38||var was prArabdhavad
• parecchArabdhavadbrahmA icchAzaktizcideva hi |
• anicchAzaktirAtmaiva parecchAzaktiravyayaH || 39||
• paramAtmaivAdhikAro viSayaM paramAtmanaH |
• saMbandhaM paramAtmaiva prayojanaM parAtmakam || 40||
• brahmaiva paramaM saGgaM karmajaM brahma saGgamam |
• brahmaiva bhrAntijaM bhAti dvandvaM brahmaiva nAnyataH || 41||
• sarvaM brahmeti nizcitya sadya eva vimokSadam |
• savikalpasamAdhisthaM nirvikalpasamAdhi hi || 42||
• zabdAnuviddhaM brahmaiva brahma dRzyAnuviddhakam |
• brahmaivAdisamAdhizca tanmadhyamasamAdhikam || 43||
• brahmaiva nizcayaM zUnyaM taduktamasamAdhikam |
• dehAbhimAnarahitaM tadvairAgyasamAdhikam || 44||
• etadbhAvanayA zAntaM jIvanmuktasamAdhikaH |
• atyantaM sarvazAntatvaM deho muktasamAdhikam || 45||
• etadabhyAsinAM proktaM sarvaM caitatsamanvitam |
• sarvaM vismRtya vismRtya tyaktvA tyaktvA punaH punaH || 46||
• sarvavRttiM ca zUnyena sthAsyAmIti vimucya hi |
• na sthAsyAmIti vismRtya bhAsyAmIti ca vismara || 47||
• caitanyo'hamiti tyaktvA sanmAtro'hamiti tyaja |
• tyajanaM ca parityajya bhAvanaM ca parityaja || 48||
• sarvaM tyaktvA manaH kSipraM smaraNaM ca parityaja |
• smaraNaM kiJcidevAtra mahAsaMsArasAgaram || 49||
• smaraNaM kiJcidevAtra mahAduHkhaM bhavet tadA |
• mahAdoSaM bhavaM bandhaM cittajanma zataM manaH || 50||
• prArabdhaM hRdayagranthi brahmahatyAdi pAtakam |
• smaraNaM caivameveha bandhamokSasya kAraNam || 51||
• ahaM brahmaprakaraNaM sarvaduHkhavinAzakam |
• sarvaprapaJcazamanaM sadyo mokSapradaM sadA |
• etacchravaNamAtreNa brahmaiva bhavati svayam || 52||
• bhaktyA padmadalAkSapUjitapadadhyAnAnuvRttyA manaH
• svAntAnantapathapracAravidhuraM muktyai bhavenmAnasam |
• saGkalpojjhitametadalpasumahAzIlo dayAmbhonidhau
• kazcit syAcchivabhaktadhuryasumahAzAntaH zivapremataH || 53||

• || iti zrIzivarahasye zaGkarAkhye SaSThAMze RbhunidAghasaMvAde ahaM brahmaprakaraNanirUpaNaM nAma caturviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com