RbhugItA 19 || brahmAnanda prakaraNam ||

RbhuH -

• brahmAnandaM pravakSyAmi triSu lokeSu durlabham |
• yasya zravaNamAtreNa sadA muktimavApnuyAt || 1||var was yuktimApnuyAt
• paramAnando'hamevAtmA sarvadAnandameva hi |
• pUrNAnandasvarUpo'haM cidAnandamayaM jagat || 2||
• sadAnantamananto'haM bodhAnandamidaM jagat |
• buddhAnandasvarUpo'haM nityAnandamidaM manaH || 3||
• kevalAnandamAtro'haM kevalajJAnavAnaham |
• iti bhAvaya yatnena prapaJcopazamAya vai || 4||
• sadA satyaM paraM jyotiH sadA satyAdilakSaNaH |
• sadA satyAdihInAtmA sadA jyotiH priyo hyaham || 5||
• nAsti mithyAprapaJcAtmA nAsti mithyA manomayaH |
• nAsti mithyAbhidhAnAtmA nAsti cittaM durAtmavAn || 6||
• nAsti mUDhataro loke nAsti mUDhatamo naraH |
• ahameva paraM brahma ahameva svayaM sadA || 7||
• idaM paraM ca nAstyeva ahameva hi kevalam |
• ahaM brahmAsmi zuddho'smi sarvaM brahmaiva kevalam || 8||
• jagatsarvaM sadA nAsti cittameva jaganmayam |
• cittameva prapaJcAkhyaM cittameva zarIrakam || 9||
• cittameva mahAdoSaM cittameva hi bAlakaH |
• cittameva mahAtmA'yaM cittameva mahAnasat || 10||
• cittameva hi mithyAtmA cittaM zazaviSANavat |
• cittaM nAsti sadA satyaM cittaM vandhyAkumAravat || 11||
• cittaM zUnyaM na sandeho brahmaiva sakalaM jagat |
• ahameva hi caitanyaM ahameva hi nirguNam || 12||
• mana eva hi saMsAraM mana eva hi maNDalam |
• mana eva hi bandhatvaM mana eva hi pAtakam || 13||
• mana eva mahadduHkhaM mana eva zarIrakam |
• mana eva prapaJcAkhyaM mana eva kalevaram || 14||
• mana eva mahAsattvaM mana eva caturmukhaH |
• mana eva hariH sAkSAt mana eva zivaH smRtaH || 15||
• mana evendrajAlAkhyaM manaH saGkalpamAtrakam |
• mana eva mahApApaM mana eva durAtmavAn || 16||
• mana eva hi sarvAkhyaM mana eva mahadbhayam |
• mana eva paraM brahma mana eva hi kevalam || 17||
• mana eva cidAkAraM mana eva manAyate |
• cideva hi paraM rUpaM cideva hi paraM padam || 18||
• paraM brahmAhamevAdya paraM brahmAhameva hi |
• ahameva hi tRptAtmA ahamAnandavigrahaH || 19||
• ahaM buddhiH pravRddhAtmA nityaM nizcalanirmalaH |
• ahameva hi zAntAtmA ahamAdyantavarjitaH || 20||
• ahameva prakAzAtmA ahaM brahmaiva kevalam |
• ahaM nityo na sandeha ahaM buddhiH priyaH sadA || 21||var was buddhipriyaH sadA
• ahamevAhamevaikaH ahamevAkhilAmRtaH |
• ahameva svayaM siddhaH ahamevAnumodakaH || 22||
• ahameva tvamevAhaM sarvAtmA sarvavarjitaH |
• ahameva paraM brahma ahameva parAtparaH || 23||
• ahaGkAraM na me duHkhaM na me doSaM na me sukham |
• na me buddhirna me cittaM na me deho na mendriyam || 24||
• na me gotraM na me netraM na me pAtraM na me tRNam |
• na me japo na me mantro na me loko na me suhRt || 25||
• na me bandhurna me zatrurna me mAtA na me pitA |
• na me bhojyaM na me bhoktA na me vRttirna me kulam || 26||
• na me jAtirna me varNaH na me zrotraM na me kvacit |
• na me bAhyaM na me buddhiH sthAnaM vApi na me vayaH || 27||
• na me tattvaM na me loko na me zAntirna me kulam |
• na me kopo na me kAmaH kevalaM brahmamAtrataH || 28||
• kevalaM brahmamAtratvAt kevalaM svayameva hi |
• na me rAgo na me lobho na me stotraM na me smRtiH || 29||
• na me moho na me tRSNA na me sneho na me guNaH |
• na me kozaM na me bAlyaM na me yauvanavArdhakam || 30||
• sarvaM brahmaikarUpatvAdekaM brahmeti nizcitam |
• brahmaNo'nyat paraM nAsti brahmaNo'nyanna kiJcana || 31||
• brahmaNo'nyadidaM nAsti brahmaNo'nyadidaM na hi |
• Atmano'nyat sadA nAsti AtmaivAhaM na saMzayaH || 32||
• Atmano'nyat sukhaM nAsti Atmano'nyadahaM na ca |
• grAhyagrAhakahIno'haM tyAgatyAjyavivarjitaH || 33||
• na tyAjyaM na ca me grAhyaM na bandho na ca bhuktidam |var was muktidam
• na me lokaM na me hInaM na zreSThaM nApi dUSaNam || 34||
• na me balaM na caNDAlo na me viprAdivarNakam |
• na me pAnaM na me hrasvaM na me kSINaM na me balam || 35||
• na me zaktirna me bhuktirna me daivaM na me pRthak |
• ahaM brahmaikamAtratvAt nityatvAnyanna kiJcana || 36||
• na mataM na ca me mithyA na me satyaM vapuH kvacit |
• ahamityapi nAstyeva brahma ityapi nAma vA || 37||
• yadyadyadyatprapaJco'sti yadyadyadyadgurorvacaH |
• tatsarvaM brahma evAhaM tatsarvaM cinmayaM matam || 38||
• cinmayaM cinmayaM brahma sanmayaM sanmayaM sadA |
• svayameva svayaM brahma svayameva svayaM paraH || 39||
• svayameva svayaM mokSaH svayameva nirantaraH |
• svayameva hi vijJAnaM svayameva hi nAstyakam || 40||
• svayameva sadAsAraH svayameva svayaM paraH |
• svayameva hi zUnyAtmA svayameva manoharaH || 41||
• tUSNImevAsanaM snAnaM tUSNImevAsanaM japaH |
• tUSNImevAsanaM pUjA tUSNImevAsanaM paraH || 42||
• vicArya manasA nityamahaM brahmeti nizcinu |
• ahaM brahma na sandehaH evaM tUSNIMsthitirjapaH || 43||
• sarvaM brahmaiva nAstyanyat sarvaM jJAnamayaM tapaH |
• svayameva hi nAstyeva sarvAtItasvarUpavAn || 44||
• vAcAtItasvarUpo'haM vAcA japyamanarthakam |
• mAnasaH paramArtho'yaM etadbhedamahaM na me || 45||
• kuNapaM sarvabhUtAdi kuNapaM sarvasaGgraham |
• asatyaM sarvadA lokamasatyaM sakalaM jagat || 46||
• asatyamanyadastitvamasatyaM nAsti bhASaNam |
• asatyAkAramastitvaM brahmamAtraM sadA svayam || 47||
• asatyaM vedavedAGgaM asatyaM zAstranizcayaH |
• asatyaM zravaNaM hyetadasatyaM mananaM ca tat || 48||
• asatyaM ca nididhyAsaH sajAtIyamasatyakam |
• vijAtIyamasat proktaM satyaM satyaM na saMzayaH |
• sarvaM brahma sadA brahma ekaM brahma cidavyayam || 49||
• cetovilAsajanitaM kila vizvameta-
• dvizvAdhikasya kRpayA paripUrNabhAsyAt |
• nAstyanyataH zrutizirotthitavAkyamogha-
• zAstrAnusArikaraNairbhavate vimuktyai || 50||

• || iti zrIzivarahasye zaGkarAkhye SaSThAMze RbhunidAghasaMvAde brahmAnandaprakaraNaM nAma ekonaviMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com