RbhugItA 29 || tanmaya-bhAvopadeza prakaraNam ||

RbhuH -

• atyantaM tanmayaM vakSye durlabhaM yoginAmapi |
• vedazAstreSu deveSu rahasyamatidurlabham || 1||
• yaH paraM brahma sarvAtmA saccidAnandavigrahaH |
• sarvAtmA paramAtmA hi tanmayo bhava sarvadA || 2||
• AtmarUpamidaM sarvamAdyantarahito'jayaH |
• kAryAkAryamidaM nAsti tanmayo bhava sarvadA || 3||
• yatra dvaitabhayaM nAsti yatrAdvaitaprabodhanam |
• zAntAzAntadvayaM nAsti tanmayo bhava sarvadA || 4||
• yatra saGkalpakaM nAsti yatra bhrAntirna vidyate |
• tadeva hi matirnAsti tanmayo bhava sarvadA || 5||
• yatra brahmaNi nAstyeva yatra bhAvi vikalpanam |
• yatra sarvaM jagannAsti tanmayo bhava sarvadA || 6||
• yatra bhAvamabhAvaM vA manobhrAnti vikalpanam |
• yatra bhrAnterna vArtA vA tanmayo bhava sarvadA || 7||
• yatra nAsti sukhaM nAsti deho'hamiti rUpakam |
• sarvasaGkalpanirmuktaM tanmayo bhava sarvadA || 8||
• yatra brahma vinA bhAvo yatra doSo na vidyate |
• yatra dvandvabhayaM nAsti tanmayo bhava sarvadA || 9||
• yatra vAkkAyakAryaM vA yatra kalpo layaM gataH |
• yatra prapaJcaM notpannaM tanmayo bhava sarvadA || 10||
• yatra mAyA prakAzo na mAyA kAryaM na kiJcana |
• yatra dRzyamadRzyaM vA tanmayo bhava sarvadA || 11||
• vidvAn vidyApi nAstyeva yatra pakSavipakSakau |
• na yatra doSAdoSau vA tanmayo bhava sarvadA || 12||
• yatra viSNutvabhedo na yatra brahmA na vidyate |
• yatra zaGkarabhedo na tanmayo bhava sarvadA || 13||
• na yatra sadasadbhedo na yatra kalanApadam |
• na yatra jIvakalanA tanmayo bhava sarvadA || 14||
• na yatra zaGkaradhyAnaM na yatra paramaM padam |
• na yatra kalanAkAraM tanmayo bhava sarvadA || 15||
• na yatrANurmahattvaM ca yatra santoSakalpanam |
• yatra prapaJcamAbhAsaM tanmayo bhava sarvadA || 16||
• na yatra dehakalanaM na yatra hi kutUhalam |
• na yatra cittakalanaM tanmayo bhava sarvadA || 17||
• na yatra buddhivijJAnaM na yatrAtmA manomayaH |
• na yatra kAmakalanaM tanmayo bhava sarvadA || 18||
• na yatra mokSavizrAntiryatra bandhatvavigrahaH |
• na yatra zAzvataM jJAnaM tanmayo bhava sarvadA || 19||
• na yatra kAlakalanaM yatra duHkhatvabhAvanam |
• na yatra dehakalanaM tanmayo bhava sarvadA || 20||
• na yatra jIvavairAgyaM yatra zAstravikalpanam |
• yatrAhamahamAtmatvaM tanmayo bhava sarvadA || 21||
• na yatra jIvanmuktirvA yatra dehavimocanam |
• yatra saGkalpitaM kAryaM tanmayo bhava sarvadA || 22||
• na yatra bhUtakalanaM yatrAnyatvaprabhAvanam |
• na yatra jIvabhedo vA tanmayo bhava sarvadA || 23||
• yatrAnandapadaM brahma yatrAnandapadaM sukham |
• yatrAnandaguNaM nityaM tanmayo bhava sarvadA || 24||
• na yatra vastuprabhavaM na yatrApajayojayaH |
• na yatra vAkyakathanaM tanmayo bhava sarvadA || 25||
• na yatrAtmavicArAGgaM na yatra zravaNAkulam |
• na yatra ca mahAnandaM tanmayo bhava sarvadA || 26||
• na yatra hi sajAtIyaM vijAtIyaM na yatra hi |
• na yatra svagataM bhedaM tanmayo bhava sarvadA || 27||
• na yatra narako ghoro na yatra svargasaMpadaH |
• na yatra brahmaloko vA tanmayo bhava sarvadA || 28||
• na yatra viSNusAyujyaM yatra kailAsaparvataH |
• brahmANDamaNDalaM yatra tanmayo bhava sarvadA || 29||
• na yatra bhUSaNaM yatra dUSaNaM vA na vidyate |
• na yatra samatA doSaM tanmayo bhava sarvadA || 30||
• na yatra manasA bhAvo na yatra savikalpanam |
• na yatrAnubhavaM duHkhaM tanmayo bhava sarvadA || 31||
• yatra pApabhayaM nAsti paJcapApAdapi kvacit |
• na yatra saGgadoSaM vA tanmayo bhava sarvadA || 32||
• yatra tApatrayaM nAsti yatra jIvatrayaM kvacit |
• yatra vizvavikalpAkhyaM tanmayo bhava sarvadA || 33||
• na yatra bodhamutpannaM na yatra jagatAM bhramaH |
• na yatra karaNAkAraM tanmayo bhava sarvadA || 34||
• na yatra hi mano rAjyaM yatraiva paramaM sukham |
• yatra vai zAzvataM sthAnaM tanmayo bhava sarvadA || 35||
• yatra vai kAraNaM zAntaM yatraiva sakalaM sukham |
• yadgatvA na nivartante tanmayo bhava sarvadA || 36||
• yad jJAtvA mucyate sarvaM yad jJAtvA'nyanna vidyate |
• yad jJAtvA nAnyavijJAnaM tanmayo bhava sarvadA || 37||
• yatraiva doSaM notpannaM yatraiva sthAnanizcalaH |
• yatraiva jIvasaGghAtaH tanmayo bhava sarvadA || 38||
• yatraiva nityatRptAtmA yatraivAnandanizcalam |
• yatraiva nizcalaM zAntaM tanmayo bhava sarvadA || 39||
• yatraiva sarvasaukhyaM vA yatraiva sannirUpaNam |
• yatraiva nizcayAkAraM tanmayo bhava sarvadA || 40||
• na yatrAhaM na yatra tvaM na yatra tvaM svayaM svayam |
• yatraiva nizcayaM zAntaM tanmayo bhava sarvadA || 41||
• yatraiva modate nityaM yatraiva sukhamedhate |
• yatra duHkhabhayaM nAsti tanmayo bhava sarvadA || 42||
• yatraiva cinmayAkAraM yatraivAnandasAgaraH |
• yatraiva paramaM sAkSAt tanmayo bhava sarvadA || 43||
• yatraiva svayamevAtra svayameva tadeva hi |
• svasvAtmanoktabhedo'sti tanmayo bhava sarvadA || 44||
• yatraiva paramAnandaM svayameva sukhaM param |
• yatraivAbhedakalanaM tanmayo bhava sarvadA || 45||
• na yatra cANumAtraM vA na yatra manaso malam |
• na yatra ca dadAmyeva tanmayo bhava sarvadA || 46||
• yatra cittaM mRtaM dehaM mano maraNamAtmanaH |
• yatra smRtirlayaM yAti tanmayo bhava sarvadA || 47||
• yatraivAhaM mRto nUnaM yatra kAmo layaM gataH |
• yatraiva paramAnandaM tanmayo bhava sarvadA || 48||
• yatra devAstrayo lInaM yatra dehAdayo mRtAH |
• na yatra vyavahAro'sti tanmayo bhava sarvadA || 49||
• yatra magno nirAyAso yatra magno na pazyati |
• yatra magno na janmAdistanmayo bhava sarvadA || 50||
• yatra magno na cAbhAti yatra jAgranna vidyate |
• yatraiva mohamaraNaM tanmayo bhava sarvadA || 51||
• yatraiva kAlamaraNaM yatra yogo layaM gataH |
• yatra satsaGgatirnaSTA tanmayo bhava sarvadA || 52||
• yatraiva brahmaNo rUpaM yatraivAnandamAtrakam |
• yatraiva paramAnandaM tanmayo bhava sarvadA || 53||
• yatra vizvaM kvacinnAsti yatra nAsti tato jagat |
• yatrAntaHkaraNaM nAsti tanmayo bhava sarvadA || 54||
• yatraiva sukhamAtraM ca yatraivAnandamAtrakam |
• yatraiva paramAnandaM tanmayo bhava sarvadA || 55||
• yatra sanmAtracaitanyaM yatra cinmAtramAtrakam |
• yatrAnandamayaM bhAti tanmayo bhava sarvadA || 56||
• yatra sAkSAt paraM brahma yatra sAkSAt svayaM param |
• yatra zAntaM paraM lakSyaM tanmayo bhava sarvadA || 57||
• yatra sAkSAdakhaNDArthaM yatra sAkSAt parAyaNam |
• yatra nAzAdikaM nAsti tanmayo bhava sarvadA || 58||
• yatra sAkSAt svayaM mAtraM yatra sAkSAtsvayaM jayam |
• yatra sAkSAnmahAnAtmA tanmayo bhava sarvadA || 59||
• yatra sAkSAt paraM tattvaM yatra sAkSAt svayaM mahat |
• yatra sAkSAttu vijJAnaM tanmayo bhava sarvadA || 60||
• yatra sAkSAdguNAtItaM yatra sAkSAddhi nirmalam |
• yatra sAkSAt sadAzuddhaM tanmayo bhava sarvadA || 61||
• yatra sAkSAnmahAnAtmA yatra sAkSAt sukhAt sukham |
• yatraiva jJAnavijJAnaM tanmayo bhava sarvadA || 62||
• yatraiva hi svayaM jyotiryatraiva svayamadvayam |
• yatraiva paramAnandaM tanmayo bhava sarvadA || 63||
• evaM tanmayabhAvoktaM evaM nityazanityazaH |
• brahmAhaM saccidAnandaM akhaNDo'haM sadA sukham || 64||
• vijJAnaM brahmamAtro'haM sa zAntaM paramo'smyaham |
• cidahaM cittahIno'haM nAhaM so'haM bhavAmyaham || 65||
• tadahaM cidahaM so'haM nirmalo'hamahaM param |
• paro'haM paramo'haM vai sarvaM tyajya sukhIbhava || 66||
• idaM sarvaM cittazeSaM zuddhatvakamalIkRtam |
• evaM sarvaM parityajya vismRtvA zuddhakASThavat || 67||
• pretavaddehaM saMtyajya kASThavalloSThavat sadA |
• smaraNaM ca parityajya brahmamAtraparo bhava || 68||
• etat prakaraNaM yastu zRNoti sakRdasti vA |
• mahApAtakayukto'pi sarvaM tyaktvA paraM gataH || 69||
• aGgAvabaddhAbhirupAsanAbhi-
• rvadanti vedAH kila tvAmasaGgam |
• samastahRtkozavizeSasaGgaM
• bhUmAnamAtmAnamakhaNDarUpam || 70||

• || iti zrIzivarahasye zaGkarAkhye SaSThAMze RbhunidAghasaMvAde tanmayabhAvopadezaprakaraNaM nAma ekonatriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com