RbhugItA 11 || jIvanamukta-prakaraNam ||

RbhuH -

• brahmajJAnaM pravakSyAmi jIvanmuktasya lakSaNam |
• AtmamAtreNa yastiSThet sa jIvanmukta ucyate || 1||
• ahaM brahmavadevedamahamAtmA na saMzayaH |
• caitanyAtmeti yastiSThet sa jIvanmukta ucyate || 2||
• cidAtmAhaM parAtmAhaM nirguNo'haM parAtparaH |
• ityevaM nizcayo yasya sa jIvanmukta ucyate || 3||
• dehatrayAtirikto'haM brahma caitanyamasmyaham |
• brahmAhamiti yasyAntaH sa jIvanmukta ucyate || 4||
• AnandaghanarUpo'smi parAnandaparo'smyaham |
• yazcidevaM parAnandaM sa jIvanmukta ucyate || 5||
• yasya dehAdikaM nAsti yasya brahmeti nizcayaH |
• paramAnandapUrNo yaH sa jIvanmukta ucyate || 6||
• yasya kiJcidahaM nAsti cinmAtreNAvatiSThate |
• parAnando mudAnandaH sa jIvanmukta ucyate || 7||
• caitanyamAtraM yasyAntazcinmAtraikasvarUpavAn |
• na smaratyanyakalanaM sa jIvanmukta ucyate || 8||var was kalalaM
• sarvatra paripUrNAtmA sarvatra kalanAtmakaH |
• sarvatra nityapUrNAtmA sa jIvanmukta ucyate || 9||
• paramAtmaparA nityaM paramAtmeti nizcitaH |
• AnandAkRtiravyaktaH sa jIvanmukta ucyate || 10||
• zuddhakaivalyajIvAtmA sarvasaGgavivarjitaH |
• nityAnandaprasannAtmA sa jIvanmukta ucyate || 11||
• ekarUpaH prazAntAtmA anyacintAvivarjitaH |
• kiJcidastitvahIno yaH sa jIvanmukta ucyate || 12||
• na me cittaM na me buddhirnAhaGkAro na cendriyaH |
• kevalaM brahmamAtratvAt sa jIvanmukta ucyate || 13||
• na me doSo na me deho ne me prANo na me kvacit |
• dRDhanizcayavAn yo'ntaH sa jIvanmukta ucyate || 14||
• na me mAyA na me kAmo na me krodho'paro'smyaham |
• na me kiJcididaM vA'pi sa jIvanmukta ucyate || 15||
• na me doSo na me liGgaM na me bandhaH kvacijjagat |
• yastu nityaM sadAnandaH sa jIvanmukta ucyate || 16||
• na me zrotraM na me nAsA na me cakSurna me manaH |
• na me jihveti yasyAntaH sa jIvanmukta ucyate || 17||
• na me deho na me liGgaM na me kAraNameva ca |
• na me turyamiti svasthaH sa jIvanmukta ucyate || 18||
• idaM sarvaM na me kiJcidayaM sarvaM na me kvacit |
• brahmamAtreNa yastiSThet sa jIvanmukta ucyate || 19||
• na me kiJcinna me kazcinna me kazcit kvacijjagat |
• ahameveti yastiSThet sa jIvanmukta ucyate || 20||
• na me kAlo na me dezo na me vastu na me sthitiH |
• na me snAnaM na me prAsaH sa jIvanmukta ucyate || 21||
• na me tIrthaM na me sevA na me devo na me sthalam |
• na kvacidbhedahIno'yaM sa jIvanmukta ucyate || 22||
• na me bandhaM na me janma na me jJAnaM na me padam |
• na me vAkyamiti svasthaH sa jIvanmukta ucyate || 23||
• na me puNyaM na me pApaM na me kAyaM na me zubham |
• na me dRzyamiti jJAnI sa jIvanmukta ucyate || 24||
• na me zabdo na me sparzo na me rUpaM na me rasaH |
• na me jIva iti jJAtvA sa jIvanmukta ucyate || 25||
• na me sarvaM na me kiJcit na me jIvaM na me kvacit |
• na me bhAvaM na me vastu sa jIvanmukta ucyate || 26||
• na me mokSye na me dvaitaM na me vedo na me vidhiH |
• na me dUramiti svasthaH sa jIvanmukta ucyate || 27||
• na me gururna me ziSyo na me bodho na me paraH |
• na me zreSThaM kvacidvastu sa jIvanmukta ucyate || 28||
• na me brahmA na me viSNurna me rudro na me raviH |
• na me karma kvacidvastu sa jIvanmukta ucyate || 29||
• na me pRthvI na me toyaM na me tejo na me viyat |
• na me kAryamiti svasthaH sa jIvanmukta ucyate || 30||
• na me vArtA na me vAkyaM na me gotraM na me kulam |
• na me vidyeti yaH svasthaH sa jIvanmukta ucyate || 31||
• na me nAdo na me zabdo na me lakSyaM na me bhavaH |
• na me dhyAnamiti svasthaH sa jIvanmukta ucyate || 32||
• na me zItaM na me coSNaM na me moho na me japaH |
• na me sandhyeti yaH svasthaH sa jIvanmukta ucyate || 33||
• na me japo na me mantro na me homo na me nizA |
• na me sarvamiti svasthaH sa jIvanmukta ucyate || 34||
• na me bhayaM na me cAnnaM na me tRSNA na me kSudhA |
• na me cAtmeti yaH svasthaH sa jIvanmukta ucyate || 35||
• na me pUrvaM na me pazcAt na me cordhvaM na me dizaH |
• na cittamiti svasthaH sa jIvanmukta ucyate || 36||
• na me vaktavyamalpaM vA na me zrotavyamaNvapi |
• na me mantavyamISadvA sa jIvanmukta ucyate || 37||
• na me bhoktavyamISadvA na me dhyAtavyamaNvapi |
• na me smartavyamevAyaM sa jIvanmukta ucyate || 38||
• na me bhogo na me rogo na me yogo na me layaH |
• na me sarvamiti svasthaH sa jIvanmukta ucyate || 39||
• na me'stitvaM na me jAtaM na me vRddhaM na me kSayaH |
• adhyAropo na me svasthaH sa jIvanmukta ucyate || 40||
• adhyAropyaM na me kiJcidapavAdo na me kvacit |
• na me kiJcidahaM yattu sa jIvanmukta ucyate || 41||
• na me zuddhirna me zubhro na me caikaM na me bahu |
• na me bhUtaM na me kAryaM sa jIvanmukta ucyate || 42||
• na me ko'haM na me cedaM na me nAnyaM na me svayam |
• na me kazcinna me svasthaH sa jIvanmukta ucyate || 43||
• na me mAMsaM na me raktaM na me medo na me zakRt |
• na me kRpA na me'stIti sa jIvanmukta ucyate || 44||
• na me sarvaM na me zuklaM na me nIlaM na me pRthak |
• na me svasthaH svayaM yo vA sa jIvanmukta ucyate || 45||
• na me tApaM na me lobho na me gauNa na me yazaH |
• ne me tattvamiti svasthaH sa jIvanmukta ucyate || 46||
• na me bhrAntirna me jJAnaM na me guhyaM na me kulam |
• na me kiJciditi dhyAyan sa jIvanmukta ucyate || 47||
• na me tyAjyaM na me grAhyaM na me hAsyaM na me layaH |
• na me daivamiti svasthaH sa jIvanmukta ucyate || 48||
• na me vrataM na me glAniH na me zocyaM na me sukham |
• na me nyUnaM kvacidvastu sa jIvanmukta ucyate || 49||
• na me jJAtA na me jJAnaM na me jJeyaM na me svayam |
• na me sarvamiti jJAnI sa jIvanmukta ucyate || 50||
• na me tubhyaM na me mahyaM na me tvatto na me tvaham |
• na me gururna me yastu sa jIvanmukta ucyate || 51||
• na me jaDaM na me caityaM na me glAnaM na me zubham |
• na me na meti yastiSThet sa jIvanmukta ucyate || 52||
• na me gotraM na me sUtraM na me pAtraM na me kRpA |
• na me kiJciditi dhyAyI sa jIvanmukta ucyate || 53||
• na me cAtmA na me nAtmA na me svargaM na me phalam |
• na me dUSyaM kvacidvastu sa jIvanmukta ucyate || 54||
• na me'bhyAso na me vidyA na me zAntirna me damaH |
• na me puramiti jJAnI sa jIvanmukta ucyate || 55||
• na me zalyaM na me zaGkA na me suptirna me manaH |
• na me vikalpa ityAptaH sa jIvanmukta ucyate || 56||
• na me jarA na me bAlyaM na me yauvanamaNvapi |
• na me mRtirna me dhvAntaM sa jIvanmukta ucyate || 57||
• na me lokaM na me bhogaM na me sarvamiti smRtaH |
• na me maunamiti prAptaM sa jIvanmukta ucyate || 58||
• ahaM brahma hyahaM brahma hyahaM brahmeti nizcayaH |
• cidahaM cidahaM ceti sa jIvanmukta ucyate || 59||
• brahmaivAhaM cidevAhaM paraivAhaM na saMzayaH |
• svayameva svayaM jyotiH sa jIvanmukta ucyate || 60||
• svayameva svayaM pazyet svayameva svayaM sthitaH |
• svAtmanyeva svayaM bhUtaH sa jIvanmukta ucyate || 61||
• svAtmAnandaM svayaM bhuMkSve svAtmarAjye svayaM vase |
• svAtmarAjye svayaM pazye sa jIvanmukta ucyate || 62||
• svayamevAhamekAgraH svayameva svayaM prabhuH |
• svasvarUpaH svayaM pazye sa jIvanmukta ucyate || 63||
• jIvanmuktiprakaraNaM sarvavedeSu durlabham |
• yaH zRNoti sakRdvApi brahmaiva bhavati svayam || 64||
• ye vedavAdavidhikalpitabhedabuddhyA
• puNyAbhisandhitadhiyA parikarzayantaH |
• dehaM svakIyamatiduHkhaparaM parAbhi-
• steSAM sukhAya na tu jAtu taveza pAdAt || 65||
• kaH santareta bhavasAgarametadutya-
• ttaraGgasadRzaM janimRtyurUpam |
• IzArcanAvidhisubodhitabhedahIna-
• jJAnoDupena prataredbhavabhAvayuktaH || 66||

• || iti zrIzivarahasye zaGkarAkhye SaSThAMze RbhunidAghasaMvAde jIvanmuktaprakaraNaM nAma ekAdazo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com