RbhugItA 42 || nidAdhAnubhava varNana prakaraNam ||
RbhuH -
- zrutaM kiJcinmayA proktaM brahmajJAnaM sudurlabham |
- manasA dhAritaM brahma cittaM kIdRk sthitaM vada || 1||
nidAghaH -
- zRNu tvaM suguro brahmaMstvatprasAdAdvadAmyaham |
- mamAjJAnaM mahAdoSaM mahAjJAnanirodhakam || 2||
- sadA karmaNi vizvAsaM prapaJce satyabhAvanam |
- naSTaM sarvaM kSaNAdeva tvatprasAdAnmahadbhayam || 3||
- etAvantamimaM kAlamajJAnaripuNA hRtam |
- mahadbhayaM ca naSTaM me karmatattvaM ca nAzitam || 4||
- ajJAnaM manasA pUrvamidAnIM brahmatAM gatam |
- purAhaM cittavadbhUtaH idAnIM sanmayo'bhavam || 5||
- pUrvamajJAnavadbhAvaM idAnIM sanmayaM gatam |
- ajJAnavat sthito'haM vai brahmaivAhaM paraM gataH || 6||
- purA'haM cittavadbhrAnto brahmaivAhaM paraM gataH |
- sarvo vigalito doSaH sarvo bhedo layaM gataH || 7||
- sarvaH prapaJco galitazcittameva hi sarvagam |
- sarvAntaHkaraNaM lInaM brahmasadbhAvabhAvanAt || 8||
- ahameva cidAkAza ahameva hi cinmayaH |
- ahameva hi pUrNAtmA ahameva hi nirmalaH || 9||
- ahamevAhameveti bhAvanApi vinirgatA |
- ahameva cidAkAzo brAhmaNatvaM na kiJcana || 10||
- zUdro'haM zvapaco'haM vai varNI cApi gRhasthakaH |
- vAnaprastho yatirahamityayaM cittavibhramaH || 11||
- tattadAzramakarmANi cittena parikalpitam |
- ahameva hi lakSyAtmA ahameva hi pUrNakaH || 12||
- ahamevAntarAtmA hi ahameva parAyaNam |
- ahameva sadAdhAra ahameva sukhAtmakaH || 13||
- tvatprasAdAdahaM brahmA tvatprasAdAjjanArdanaH |
- tvatprasAdAccidAkAzaH zivo'haM nAtra saMzayaH || 14||
- tvatprasAdAdahaM cidvai tvatprasAdAnna me jagat |
- tvatprasAdAdvimukto'smi tvatprasAdAt paraM gataH || 15||
- tvatprasAdAdvyApako'haM tvatprasAdAnniraGkuzaH |
- tvatprasAdena tIrNo'haM tvatprasAdAnmahatsukham || 16||
- tvatprasAdAdahaM brahma tvatprasAdAt tvameva na |
- tvatprasAdAdidaM nAsti tvatprasAdAnna kiJcana || 17||
- tvatprasAdAnna me kiJcit tvatprasAdAnna me vipat |
- tvatprasAdAnna me bhedastvatprasAdAnna me bhayam || 18||
- tvatprasAdAnname rogastvatprasAdAnna me kSatiH |
- yatpAdAmbujapUjayA harirabhUdarcyo yadaMghryarcanA-
- darcyA'bhUt kamalA vidhiprabhRtayo hyarcyA yadAjJAvazAt |
- taM kAlAntakamantakAntakamumAkAntaM muhuH santataM
- santaH svAntasarojarAjacaraNAmbhojaM bhajantyAdarAt || 19||
- kiM vA dharmazatAyutArjitamahAsaukhyaikasImAyutaM
- nAkaM pAtamahograduHkhanikaraM deveSu tuSTipradam |
- tasmAcchaGkaraliGgapUjanamumAkAntapriyaM muktidaM
- bhUmAnandaghanaikamuktiparamAnandaikamodaM mahaH || 20||
- ye zAMbhavAH zivaratAH zivanAmamAtra-
- zabdAkSarajJahRdayA bhasitatripuNDrAH |
- yAM prApnuvanti gatimIzapadAMbujodyad-
- dhyAnAnuraktahRdayA na hi yogasAMkhyaiH || 21||
- || iti zrIzivarahasye zaGkarAkhye SaSThAMze RbhunidAghasaMvAde nidAghAnubhavavarNanaprakaraNaM nAma dvicatvAriMzo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com