RbhugItA 17 || sarva siddhAnta saMgraha prakaraNam ||
RbhuH -
- nidAgha zRNu guhyaM me sarvasiddhAntasaGgraham |
- dvaitAdvaitamidaM zUnyaM zAntaM brahmaiva sarvadA || 1||
- ahameva paraM brahma ahameva parAt param |
- dvaitAdvaitamidaM zUnyaM zAntaM brahmaiva kevalam || 2||
- ahameva hi zAntAtmA ahameva hi sarvagaH |
- ahameva hi zuddhAtmA ahameva hi nityazaH || 3||
- ahameva hi nAnAtmA ahameva hi nirguNaH |
- ahameva hi nityAtmA ahameva hi kAraNam || 4||
- ahameva hi jagat sarvaM idaM caivAhameva hi |
- ahameva hi modAtmA ahameva hi muktidaH || 5||
- ahameva hi caitanyaM ahameva hi cinmayaH |
- ahameva hi caitanyamahaM sarvAntaraH sadA || 6||
- ahameva hi bhUtAtmA bhautikaM tvahameva hi |
- ahameva tvamevAhamahamevAhameva hi || 7||
- jIvAtmA tvahamevAhamahameva parezvaraH |
- ahameva vibhurnityamahameva svayaM sadA || 8||
- ahamevAkSaraM sAkSAt ahameva hi me priyam |
- ahameva sadA brahma ahameva sadA'vyayaH || 9||
- ahamevAhamevAgre ahamevAntarAntaraH |
- ahameva cidAkAzamahamevAvabhAsakaH || 10||
- ahameva sadA sraSTA ahameva hi rakSakaH |
- ahameva hi lIlAtmA ahameva hi nizcayaH || 11||
- ahameva sadA sAkSI tvameva tvaM purAtanaH |
- tvameva hi paraM brahma tvameva hi nirantaram || 12||
- ahamevAhamevAhamahameva tvameva hi |
- ahamevAdvayAkAraH ahameva videhakaH || 13||
- ahameva mamAdhAraH ahameva sadAtmakaH |
- ahamevopazAntAtmA ahameva titikSakaH || 14||
- ahameva samAdhAnaM zraddhA cApyahameva hi |
- ahameva mahAvyoma ahameva kalAtmakaH || 15||
- ahameva hi kAmAntaH ahameva sadAntaraH |
- ahameva purastAcca ahaM pazcAdahaM sadA || 16||
- ahameva hi vizvAtmA ahameva hi kevalam |
- ahameva paraM brahma ahameva parAtparaH || 17||
- ahameva cidAnandaH ahameva sukhAsukham |
- ahameva gurutvaM ca ahamevAcyutaH sadA || 18||
- ahameva hi vedAntaH ahameva hi cintanaH |
- deho'haM zuddhacaitanyaH ahaM saMzayavarjitaH || 19||
- ahameva paraM jyotirahameva paraM padam |
- ahamevAvinAzyAtmA ahameva purAtanaH || 20||
- ahaM brahma na sandehaH ahameva hi niSkalaH |
- ahaM turyo na sandehaH ahamAtmA na saMzayaH || 21||
- ahamityapi hIno'hamahaM bhAvanavarjitaH |
- ahameva hi bhAvAntA ahameva hi zobhanam || 22||
- ahameva kSaNAtItaH ahameva hi maGgalam |
- ahamevAcyutAnandaH ahameva nirantaram || 23||
- ahamevAprameyAtmA ahaM saMkalpavarjitaH |
- ahaM buddhaH paraMdhAma ahaM buddhivivarjitaH || 24||
- ahameva sadA satyaM ahameva sadAsukham |
- ahameva sadA labhyaM ahaM sulabhakAraNam || 25||
- ahaM sulabhavijJAnaM durlabho jJAninAM sadA |
- ahaM cinmAtra evAtmA ahameva hi cidghanaH || 26||
- ahameva tvamevAhaM brahmaivAhaM na saMzayaH |
- ahamAtmA na sandehaH sarvavyApI na saMzayaH || 27||
- ahamAtmA priyaM satyaM satyaM satyaM punaH punaH |
- ahamAtmA'jaro vyApI ahamevAtmano guruH || 28||
- ahamevAmRto mokSo ahameva hi nizcalaH |
- ahameva hi nityAtmA ahaM mukto na saMzayaH || 29||
- ahameva sadA zuddhaH ahameva hi nirguNaH |
- ahaM prapaJcahIno'haM ahaM dehavivarjitaH || 30||
- ahaM kAmavihInAtmA ahaM mAyAvivarjitaH |
- ahaM doSapravRttAtmA ahaM saMsAravarjitaH || 31||
- ahaM saGkalparahito vikalparahitaH zivaH |
- ahameva hi turyAtmA ahameva hi nirmalaH || 32||
- ahameva sadA jyotirahameva sadA prabhuH |
- ahameva sadA brahma ahameva sadA paraH || 33||
- ahameva sadA jJAnamahameva sadA mRduH |
- ahameva hi cittaM ca ahaM mAnavivarjitaH || 34||
- ahaMkArazca saMsAramahaGkAramasatsadA |
- ahameva hi cinmAtraM matto'nyannAsti nAsti hi || 35||
- ahameva hi me satyaM matto'nyannAsti kiJcana |
- matto'nyattatpadaM nAsti matto'nyat tvatpadaM nahi || 36||
- puNyamityapi na kvApi pApamityapi nAsti hi |
- idaM bhedamayaM bhedaM sadasadbhedamityapi || 37||
- nAsti nAsti tvayA satyaM satyaM satyaM punaH punaH |
- nAsti nAsti sadA nAsti sarvaM nAstIti nizcayaH || 38||
- idameva paraM brahma ahaM brahma tvameva hi |
- kAlo brahma kalA brahma kAryaM brahma kSaNaM tadA || 39||
- sarvaM brahmApyahaM brahma brahmAsmIti na saMzayaH |
- cittaM brahma mano brahma satyaM brahma sadA'smyaham || 40||
- nirguNaM brahma nityaM ca nirantaramahaM paraH |
- AdyantaM brahma evAhaM AdyantaM ca nahi kvacit || 41||
- ahamityapi vArtA'pi smaraNaM bhASaNaM na ca |
- sarvaM brahmaiva sandehastvamityapi na hi kvacit || 42||
- vaktA nAsti na sandehaH eSA gItA sudurlabhaH |
- sadyo mokSapradaM hyetat sadyo muktiM prayacchati || 43||
- sadya eva paraM brahma padaM prApnoti nizcayaH |
- sakRcchravaNamAtreNa sadyo muktiM prayacchati || 44||
- etattu durlabhaM loke trailokye'pi ca durlabham |
- ahaM brahma na sandeha ityevaM bhAvayet dRDham |
- tataH sarvaM parityajya tUSNIM tiSTha yathA sukham || 45||
sUtaH -
- bhuvanagaganamadhyadhyAnayogAGgasaGge
- yamaniyamavizeSairbhasmarAgAGgasaGgaiH |
- sukhamukhabharitAzAH kozapAzAdvihInA
- hRdi muditaparAzAH zAMbhavAH zaMbhuvacca || 46||
- || iti zrIzivarahasye zaGkarAkhye SaSThAMze RbhunidAghasaMvAde sarvasiddhAntasaMgrahaprakaraNaM nAma saptadazo'dhyAyaH ||
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com