RbhugItA 15 || brahmaiva sarvaM prakaraNa nirUpaNam ||

RbhuH -

• mahArahasyaM vakSyAmi guhyAt guhyataraM punaH |
• atyantadurlabhaM loke sarvaM brahmaiva kevalam || 1||
• brahmamAtramidaM sarvaM brahmamAtramasanna hi |
• brahmamAtraM zrutaM sarvaM sarvaM brahmaiva kevalam || 2||
• brahmamAtraM mahAyantraM brahmamAtraM kriyAphalam |
• brahmamAtraM mahAvAkyaM sarvaM brahmaiva kevalam || 3||
• brahmamAtraM jagatsarvaM brahmamAtraM jaDAjaDam |
• brahmamAtraM paraM dehaM sarvaM brahmaiva kevalam || 4||
• brahmamAtraM guNaM proktaM brahmamAtramahaM mahat |
• brahmamAtraM paraM brahma sarvaM brahmaiva kevalam || 5||
• brahmamAtramidaM vastu brahmamAtraM sa ca pumAn |
• brahmamAtraM ca yat kiJcit sarvaM brahmaiva kevalam || 6||
• brahmamAtramanantAtmA brahmamAtraM paraM sukham |
• brahmamAtraM paraM jJAnaM sarvaM brahmaiva kevalam || 7||
• brahmamAtraM paraM pAraM brahmamAtraM puratrayam |
• brahmamAtramanekatvaM sarvaM brahmaiva kevalam || 8||
• brahmaiva kevalaM gandhaM brahmaiva paramaM padam |
• brahmaiva kevalaM ghrANaM sarvaM brahmaiva kevalam || 9||
• brahmaiva kevalaM sparzaM zabdaM brahmaiva kevalam |
• brahmaiva kevalaM rUpaM sarvaM brahmaiva kevalam || 10||
• brahmaiva kevalaM lokaM raso brahmaiva kevalam |
• brahmaiva kevalaM cittaM sarvaM brahmaiva kevalam || 11||
• tatpadaM ca sadA brahma tvaM padaM brahma eva hi |
• asItyeva padaM brahma brahmaikyaM kevalam sadA || 12||
• brahmaiva kevalaM guhyaM brahma bAhyaM ca kevalam |
• brahmaiva kevalaM nityaM sarvaM brahmaiva kevalam || 13||
• brahmaiva tajjalAnIti jagadAdyantayoH sthitiH |
• brahmaiva jagadAdyantaM sarvaM brahmaiva kevalam || 14||
• brahmaiva cAsti nAstIti brahmaivAhaM na saMzayaH |
• brahmaiva sarvaM yat kiJcit sarvaM brahmaiva kevalam || 15||
• brahmaiva jAgrat sarvaM hi brahmamAtramahaM param |
• brahmaiva satyamastitvaM brahmaiva turyamucyate || 16||
• brahmaiva sattA brahmaiva brahmaiva gurubhAvanam |
• brahmaiva ziSyasadbhAvaM mokSaM brahmaiva kevalam || 17||
• pUrvAparaM ca brahmaiva pUrNaM brahma sanAtanam |
• brahmaiva kevalaM sAkSAt sarvaM brahmaiva kevalam || 18||
• brahma saccitsukhaM brahma pUrNaM brahma sanAtanam |
• brahmaiva kevalaM sAkSAt sarvaM brahmaiva kevalam || 19||
• brahmaiva kevalaM saccit sukhaM brahmaiva kevalam |
• AnandaM brahma sarvatra priyarUpamavasthitam || 20||
• zubhavAsanayA jIvaM zivavadbhAti sarvadA |
• pApavAsanayA jIvo narakaM bhojyavat sthitam || 21||
• brahmaivendriyavadbhAnaM brahmaiva viSayAdivat |
• brahmaiva vyavahArazca sarvaM brahmaiva kevalam || 22||
• brahmaiva sarvamAnandaM brahmaiva jJAnavigraham |
• brahmaiva mAyAkAryAkhyaM sarvaM brahmaiva kevalam || 23||
• brahmaiva yajJasandhAnaM brahmaiva hRdayAmbaram |
• brahmaiva mokSasArAkhyaM sarvaM brahmaiva kevalam || 24||
• brahmaiva zuddhAzuddhaM ca sarvaM brahmaiva kAraNam |
• brahmaiva kAryaM bhUlokaM sarvaM brahmaiva kevalam || 25||
• brahmaiva nityatRptAtmA brahmaiva sakalaM dinam |
• brahmaiva tUSNIM bhUtAtmA sarvaM brahmaiva kevalam || 26||
• brahmaiva vedasArArthaH brahmaiva dhyAnagocaram |
• brahmaiva yogayogAkhyaM sarvaM brahmaiva kevalam || 27||
• nAnArUpatvAd brahma upAdhitvena dRzyate |
• mAyAmAtramiti jJAtvA vastuto nAsti tattvataH || 28||
• brahmaiva lokavadbhAti brahmaiva janavattathA |
• brahmaiva rUpavadbhAti vastuto nAsti kiJcana || 29||
• brahmaiva devatAkAraM brahmaiva munimaNDalam |
• brahmaiva dhyAnarUpaM ca sarvaM brahmaiva kevalam || 30||
• brahmaiva jJAnavijJAnaM brahmaiva paramezvaraH |
• brahmaiva zuddhabuddhAtmA sarvaM brahmaiva kevalam || 31||
• brahmaiva paramAnadaM brahmaiva vyApakaM mahat |
• brahmaiva paramArthaM ca sarvaM brahmaiva kevalam || 32||
• brahmaiva yajJarUpaM ca brahma havyaM ca kevalam |
• brahmaiva jIvabhUtAtmA sarvaM brahmaiva kevalam || 33||
• brahmaiva sakalaM lokaM brahmaiva guruziSyakam |
• brahmaiva sarvasiddhiM ca sarvaM brahmaiva kevalam || 34||
• brahmaiva sarvamantraM ca brahmaiva sakalaM japam |
• brahmaiva sarvakAryaM ca sarvaM brahmaiva kevalam || 35||
• brahmaiva sarvazAntatvaM brahmaiva hRdayAntaram |
• brahmaiva sarvakaivalyaM sarvaM brahmaiva kevalam || 36||
• brahmaivAkSarabhAvaJca brahmaivAkSaralakSaNam |
• brahmaiva brahmarUpaJca sarvaM brahmaiva kevalam || 37||
• brahmaiva satyabhavanaM brahmaivAhaM na saMzayaH |
• brahmaiva tatpadArthaJca sarvaM brahmaiva kevalam || 38||
• brahmaivAhaMpadArthaJca brahmaiva paramezvaraH |
• brahmaiva tvaMpadArthaJca sarvaM brahmaiva kevalam || 39||
• brahmaiva yadyat paramaM brahmaiveti parAyaNam |
• brahmaiva kalanAbhAvaM sarvaM brahmaiva kevalam || 40||
• brahma sarvaM na sandeho brahmaiva tvaM sadAzivaH |
• brahmaivedaM jagat sarvaM sarvaM brahmaiva kevalam || 41||
• brahmaiva sarvasulabhaM brahmaivAtmA svayaM svayam |
• brahmaiva sukhamAtratvAt sarvaM brahmaiva kevalam || 42||
• brahmaiva sarvaM brahmaiva brahmaNo'nyadasat sadA |
• brahmaiva brahmamAtrAtmA sarvaM brahmaiva kevalam || 43||
• brahmaiva sarvavAkyArthaH brahmaiva paramaM padam |
• brahmaiva satyAsatyaM ca sarvaM brahmaiva kevalam || 44||
• brahmaivaikamanAdyantaM brahmaivaikaM na saMzayaH |
• brahmaivaikaM cidAnandaH sarvaM brahmaiva kevalam || 45||
• brahmaivaikaM sukhaM nityaM brahmaivaikaM parAyaNam |
• brahmaivaikaM paraM brahma sarvaM brahmaiva kevalam || 46||
• brahmaiva cit svayaM svasthaM brahmaiva guNavarjitam |
• brahmaivAtyantikaM sarvaM sarvaM brahmaiva kevalam || 47||
• brahmaiva nirmalaM sarvaM brahmaiva sulabhaM sadA |
• brahmaiva satyaM satyAnAM sarvaM brahmaiva kevalam || 48||
• brahmaiva saukhyaM saukhyaM ca brahmaivAhaM sukhAtmakam |
• brahmaiva sarvadA proktaM sarvaM brahmaiva kevalam || 49||
• brahmaivamakhilaM brahma brahmaikaM sarvasAkSikam |
• brahmaiva bhUribhavanaM sarvaM brahmaiva kevalam || 50||
• brahmaiva paripUrNAtmA brahmaivaM sAramavyayam |
• brahmaiva kAraNaM mUlaM brahmaivaikaM parAyaNam || 51||
• brahmaiva sarvabhUtAtmA brahmaiva sukhavigraham |
• brahmaiva nityatRptAtmA sarvaM brahmaiva kevalam || 52||
• brahmaivAdvaitamAtrAtmA brahmaivAkAzavat prabhuH |
• brahmaiva hRdayAnandaH sarvaM brahmaiva kevalam || 53||
• brahmaNo'nyat paraM nAsti brahmaNo'nyajjaganna ca |
• brahmaNo'nyadahaM nAhaM sarvaM brahmaiva kevalam || 54||
• brahmaivAnyasukhaM nAsti brahmaNo'nyat phalaM na hi |
• brahmaNo'nyat tRNaM nAsti sarvaM brahmaiva kevalam || 55||
• brahmaNo'nyat padaM mithyA brahmaNo'nyanna kiJcana |
• brahmaNo'nyajjaganmithyA sarvaM brahmaiva kevalam || 56||
• brahmaNo'nyadahaM mithyA brahmamAtrohameva hi |
• brahmaNo'nyo gururnAsti sarvaM brahmaiva kevalam || 57||
• brahmaNo'nyadasat kAryaM brahmaNo'nyadasadvapuH |
• brahmaNo'nyanmano nAsti sarvaM brahmaiva kevalam || 58||
• brahmaNo'nyajjaganmithyA brahmaNo'nyanna kiJcana |
• brahmaNo'nyanna cAhantA sarvaM brahmaiva kevalam || 59||
• brahmaiva sarvamityevaM proktaM prakaraNaM mayA |
• yaH paThet zrAvayet sadyo brahmaiva bhavati svayam || 60||
• asti brahmeti vede idamidamakhilaM veda so sadbhavet |
• saccAsacca jagattathA zrutivaco brahmaiva tajjAdikam ||
• yato vidyaivedaM pariluThati mohena jagati |
• ato vidyApAdo paribhavati brahmaiva hi sadA || 61||

• || iti zrIzivarahasye zaGkarAkhye SaSThAMze RbhunidAghasaMvAde brahmaiva sarvaM prakaraNanirUpaNaM nAma paJcadazo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com