RbhugItA 32 || sarva-mithyAtva nirUpaNa prakaraNam ||

RbhuH -

• vakSye punarasattyAgaM brahmanizcayameva ca |
• yasya zravaNamAtreNa sadyo mukto bhavennaraH || 1||
• cittasattA manaHsattA brahmasattA'nyathA sthitA |
• sarvaM mithyA na sandeho brahmaivAhaM na saMzayaH || 2||
• dehasattA liGgasattA bhAvasattA'kSarA sthitA |
• sarvaM mithyA na sandeho brahmaivAhaM na saMzayaH || 3||
• dRzyaM ca darzanaM dRSTA kartA kArayitA kriyA |var was draSTA
• sarvaM mithyA na sandeho brahmaivAhaM na saMzayaH || 4||
• ekaM dvitvaM pRthagbhAvaM asti nAstIti nirNayaH |
• sarvaM mithyA na sandeho brahmaivAhaM na saMzayaH || 5||
• zAstrabhedaM vedabhedaM muktInAM bhedabhAvanam |
• sarvaM mithyA na sandeho brahmaivAhaM na saMzayaH || 6||
• jAtibhedaM varNabhedaM zuddhAzuddhavinirNayaH |
• sarvaM mithyA na sandeho brahmaivAhaM na saMzayaH || 7||
• akhaNDAkAravRttizca akhaNDaikarasaM param |
• sarvaM mithyA na sandeho brahmaivAhaM na saMzayaH || 8||
• parAparavikalpazca puNyapApavikalpanam |
• sarvaM mithyA na sandeho brahmaivAhaM na saMzayaH || 9||
• kalpanAkalpanAdvaitaM manokalpanabhAvanam |
• sarvaM mithyA na sandeho brahmaivAhaM na saMzayaH || 10||
• siddhaM sAdhyaM sAdhanaM ca nAzanaM brahmabhAvanam |
• sarvaM mithyA na sandeho brahmaivAhaM na saMzayaH || 11||
• AtmajJAnaM manodharmaM mano'bhAve kuto bhavet |
• sarvaM mithyA na sandeho brahmaivAhaM na saMzayaH || 12||
• ajJAnaM ca manodharmastadabhAve ca tatkutaH |
• sarvaM mithyA na sandeho brahmaivAhaM na saMzayaH || 13||
• zamo damo manodharmastadabhAve ca tatkutaH |
• sarvaM mithyA na sandeho brahmaivAhaM na saMzayaH || 14||
• bandhamokSau manodharmau tadabhAve kuto bhavet |
• sarvaM mithyA na sandeho brahmaivAhaM na saMzayaH || 15||
• sarvaM mithyA jaganmithyA deho mithyA jaDatvataH |
• sarvaM mithyA na sandeho brahmaivAhaM na saMzayaH || 16||
• brahmalokaH sadA mithyA buddhirUpaM tadeva hi |
• sarvaM mithyA na sandeho brahmaivAhaM na saMzayaH || 17||
• viSNulokaH sadA mithyA zivameva hi sarvadA |
• sarvaM mithyA na sandeho brahmaivAhaM na saMzayaH || 18||
• rudralokaH sadA mithyA ahaMkArasvarUpataH |
• sarvaM mithyA na sandeho brahmaivAhaM na saMzayaH || 19||
• candralokaH sadA mithyA manorUpavikalpanam |
• sarvaM mithyA na sandeho brahmaivAhaM na saMzayaH || 20||
• dizo lokaH sadA mithyA zrotrazabdasamanvitaH |
• sarvaM mithyA na sandeho brahmaivAhaM na saMzayaH || 21||
• sUryalokaH sadA mithyA netrarUpasamanvitaH |
• sarvaM mithyA na sandeho brahmaivAhaM na saMzayaH || 22||
• varuNasya sadA loko jihvArasasamanvitaH |
• sarvaM mithyA na sandeho brahmaivAhaM na saMzayaH || 23||
• tvaco lokaH sadA mithyA vAyoH sparzasamanvitaH |
• sarvaM mithyA na sandeho brahmaivAhaM na saMzayaH || 24||
• azvinorghrANalokazca gandhadvaitasamanvitaH |
• sarvaM mithyA na sandeho brahmaivAhaM na saMzayaH || 25||
• agnerlokaH sadA mithyA vAgeva vacanena tat |
• sarvaM mithyA na sandeho brahmaivAhaM na saMzayaH || 26||
• indralokaH sadA mithyA pANipAdena saMyutaH |
• sarvaM mithyA na sandeho brahmaivAhaM na saMzayaH || 27||
• upendrasya maharloko gamanena padaM yutam |
• sarvaM mithyA na sandeho brahmaivAhaM na saMzayaH || 28||
• mRtyureva sadA nAsti pAyureva visargakam |
• sarvaM mithyA na sandeho brahmaivAhaM na saMzayaH || 29||
• prajApatermaharloko guhyamAnandasaMyutam |
• sarvaM mithyA na sandeho brahmaivAhaM na saMzayaH || 30||
• sarvaM mithyA na sandehaH sarvamAtmeti nizcitam |
• titikSozca samAdhAnaM zraddhA cAcAryabhASaNe || 31||
• mumukSutvaM ca mokSazca mokSArthe mama jIvane |
• catuHsAdhanasaMpannaH so'dhikArIti nizcayaH || 32||
• jIvabrahmaikyasadbhAvaM viyadbrahmeti nizcayaH |
• vedAntabrahmaNo bodhyaM bodhakaM bandhamucyate || 33||
• sarvajJAnanirvRttizcedAnandAvAptikaM phalam |var was nivRtti
• ityevamAdibhiH zabdaiH proktaM sarvamasat sadA || 34||
• sarvazabdArtharUpaM ca nizcayaM bhAvanaM tathA |
• brahmamAtraM paraM satyamanyat sarvamasat sadA || 35||
• anekazabdazravaNamanekArthavicAraNam |
• sarvaM mithyA na sandeho brahmaivAhaM na saMzayaH || 36||
• nAnudhyAyAdbrahmazabdAn ityuktvA ha mahAnasi |
• brahmopadezakAle tu sarvaM coktaM na saMzayaH || 37||
• brahmaivAhamidaM dvaitaM cittasattAvibhAvanam |
• cinmAtro'hamidaM dvaitaM jIvabrahmeti bhAvanam || 38||
• ahaM cinmAtramantraM vA kAryakAraNacintanam |
• akSayAnandavijJAnamakhaNDaikarasAdvayam || 39||
• paraM brahma idaM brahma zAntaM brahma svayaM jagat |
• antarindriyavijJAnaM bAhyendriyanirodhanam || 40||
• sarvopadezakAlaM ca sAmyaM zeSaM mahodayam |
• bhUmirApo'nalo vAyuH khaM mano buddhireva ca || 41||
• kAraNaM kAryabhedaM ca zAstramArgaikakalpanam |
• ahaM brahma idaM brahma sarvaM brahmeti zabdataH || 42||
• satyarUpaM kvacinnAsti satyaM nAma kadA nahi |
• saMzayaM ca viparyAsaM saGkalpaH kAraNaM bhramaH || 43||
• Atmano'nyat kvacinnAsti sarvaM mithyA na saMzayaH |
• mahatAM hyadyate mantrI medhAzuddhizubhAzubham || 44||
• dezabhedaM vastubhedaM na ca caitanyabhedakam |
• Atmano'nyat pRthagbhAvamAtmano'nyannirUpaNam || 45||
• Atmano'nyannAmarUpamAtmano'nyacchubhAzubham |
• Atmano'nyadvastusattA Atmano'nyajjagattrayam || 46||
• Atmano'nyat suHkhaM duHkhamAtmano'nyadvicintanam |
• Atmano'nyatprapaJcaM vA Atmano'nyajjayAjayau || 47||
• Atmano'nyaddevapUjA Atmano'nyacchivArcanam |
• Atmano'nyanmahAdhyAnamAtmano'nyat kalAkramam || 48||
• sarvaM mithyA na sandeho brahma sarvaM na saMzayaH |
• sarvamuktaM bhagavatA nididhyAsastu sarvadA || 49||
• sakRcchravaNamAtreNa hRdayagranthirantimam |
• karmanAzaM ca mUDhAnAM mahatAM muktireva hi || 50||
• anekakoTijananapAtakaM bhasmasAdbhavet |
• satyaM satyaM punaH satyaM satyaM sarvaM vinazyati |
• sadyo muktirna sandeho nAsti maGgalamaGgalam || 51||
• kva bhedabhAvadarzanaM na caiva zokamohahRt
• prapazyatAM zrute zikhAvizeSamaikyabhAvanAt |
• yato bhavejjagAda taM maheza yena jIvitaM
• yadantarA'vizat sadA yathorNanAbhatantuvat || 52||

• || iti zrIzivarahasye zaGkarAkhye SaSThAMze RbhunidAghasaMvAde sarvamithyAtvanirUpaNaprakaraNaM nAma dvAtriMzo'dhyAyaH ||

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com