ಋಭುಗೀತಾ ೧ ॥ ಋಭು ಸ್ತುತಿ ॥
- ಹೇಮಾದ್ರಿಂ ಕಿಲ ಮಾತುಲುಙ್ಗಫಲಮಿತ್ಯಾದಾಯ ಮೋದಾಧಿಕೋ
- ಮೌಢ್ಯಾನ್ನಾಕನಿವಾಸಿನಾಂ ಭಯಪರೈರ್ವಾಕ್ಯೈರಿವ ಪ್ರಾರ್ಥಿತಃ ।
- ನೀಲೀಶಾಮ್ಬರನೀಲಮಮ್ಬರತಲಂ ಜಮ್ಬೂಫಲಂ ಭಾವಯನ್
- ತಂ ಮುಞ್ಚನ್ ಗಿರಿಮಮ್ಬರಂ ಪರಿಮೃಶನ್ ಲಮ್ಬೋದರಃ ಪಾತು ಮಾಮ್ ॥ ೧॥
- ವಾಮಂ ಯಸ್ಯ ವಪುಃ ಸಮಸ್ತಜಗತಾಂ ಮಾತಾ ಪಿತಾ ಚೇತರತ್
- ಯತ್ಪಾದಾಮ್ಬುಜನೂಪುರೋದ್ಭವರವಃ ಶಬ್ದಾರ್ಥವಾಕ್ಯಾಸ್ಪದಮ್ ।
- ಯನ್ನೇತ್ರತ್ರಿತಯಂ ಸಮಸ್ತಜಗತಾಮಾಲೋಕಹೇತುಃ ಸದಾ
- ಪಾಯಾದ್ದೈವತಸಾರ್ವಭೌಮಗಿರಿಜಾಲಙ್ಕಾರಮೂರ್ತಿಃ ಶಿವಃ ॥ ೨॥
ಸೂತಃ -
- ಜೈಗೀಷವ್ಯಃ ಪುನರ್ನತ್ವಾ ಷಣ್ಮುಖಂ ಶಿವಸಂಭವಮ್ ।
- ಪಪ್ರಚ್ಛ ಹೃಷ್ಟಸ್ತಂ ತತ್ರ ಮುನಿಭಿರ್ಗಣಪುಙ್ಗವೈಃ ॥ ೩॥
ಜೈಗೀಷವ್ಯಃ -
- ಕರುಣಾಕರ ಸರ್ವಜ್ಞ ಶರಣಾಗತಪಾಲಕ ।
- ಅರುಣಾಧಿಪನೇತ್ರಾಬ್ಜ ಚರಣಸ್ಮರಣೋನ್ಮುಖ ॥ ೪॥
- ಕರುಣಾವರುಣಾಮ್ಭೋಧೇ ತರಣಿದ್ಯುತಿಭಾಸ್ಕರ ।
- ದಿವ್ಯದ್ವಾದಶಲಿಙ್ಗಾನಾಂ ಮಹಿಮಾ ಸಂಶ್ರುತೋ ಮಯಾ ॥ ೫॥
- ತ್ವತ್ತೋಽನ್ಯತ್ ಶ್ರೋತುಮಿಚ್ಛಾಮಿ ಶಿವಾಖ್ಯಾನಮನುತ್ತಮಮ್ ।
- ತ್ವದ್ವಾಕ್ಯಕಞ್ಜಪೀಯೂಷಧಾರಾಭಿಃ ಪಾವಯಾಶು ಮಾಮ್ ॥ ೬॥
ಸೂತಃ -
- ಇತಿ ತಸ್ಯ ಗಿರಾ ತುಷ್ಟಃ ಷಣ್ಮುಖಃ ಪ್ರಾಹ ತಂ ಮುನಿಮ್ ॥ ೭॥
ಶ್ರೀಷಣ್ಮುಖಃ -
- ಶೃಣು ತ್ವಮಗಜಾಕಾನ್ತೇನೋಕ್ತಂ ಜ್ಞಾನಮಹಾರ್ಣವಮ್ ।
- ಋಭವೇ ಯತ್ಪುರಾ ಪ್ರಾಹ ಕೈಲಾಸೇ ಶಙ್ಕರಃ ಸ್ವಯಮ್ ॥ ೮॥
- ಬ್ರಹ್ಮಸೂನುಃ ಪುರಾ ವಿಪ್ರೋ ಗತ್ವಾ ನತ್ವಾ ಮಹೇಶ್ವರಮ್ ।
- ಋಭುರ್ವಿಭುಂ ತದಾ ಶಂಭುಂ ತುಷ್ಟಾವ ಪ್ರಣತೋ ಮುದಾ ॥ ೯॥
ಋಭುಃ -
- ದಿವಾಮಣಿನಿಶಾಪತಿಸ್ಫುಟಕೃಪೀಟಯೋನಿಸ್ಫುರ-
- ಲ್ಲಲಾಟಭಸಿತೋಲ್ಲಸದ್ವರತ್ರಿಪುಣ್ಡ್ರಭಾಗೋಜ್ವಲಮ್ ।var was ತ್ರಿಪುಣ್ಟ್ರ
- ಭಜಾಮಿ ಭುಜಗಾಙ್ಗದಂ ವಿಧೃತಸಾಮಿಸೋಮಪ್ರಭಾ-
- ವಿರಾಜಿತಕಪರ್ದಕಂ ಕರಟಿಕೃತ್ತಿಭೂಷ್ಯತ್ಕಟಿಮ್ ॥ ೧೦॥
- ಫಾಲಾಕ್ಷಾಧ್ವರದಕ್ಷಶಿಕ್ಷಕವಲಕ್ಷೋಕ್ಷೇಶವಾಹೋತ್ತಮ-
- ತ್ರ್ಯಕ್ಷಾಕ್ಷಯ್ಯ ಫಲಪ್ರದಾವಭಸಿತಾಲಙ್ಕಾರರುದ್ರಾಕ್ಷಧೃಕ್ ।
- ಚಕ್ಷುಃಶ್ರೋತ್ರವರಾಙ್ಗಹಾರಸುಮಹಾವಕ್ಷಃಸ್ಥಲಾಧ್ಯಕ್ಷ ಮಾಂ
- ಭಕ್ಷ್ಯೀಭೂತಗರಪ್ರಭಕ್ಷ ಭಗವನ್ ಭಿಕ್ಷ್ವರ್ಚ್ಯಪಾದಾಮ್ಬುಜ ॥ ೧೧॥
- ಗಙ್ಗಾಚನ್ದ್ರಕಲಾಲಲಾಮ ಭಗವನ್ ಭೂಭೃತ್ಕುಮಾರೀಸಖ
- ಸ್ವಾಮಿಂಸ್ತೇ ಪದಪದ್ಮಭಾವಮತುಲಂ ಕಷ್ಟಾಪಹಂ ದೇಹಿ ಮೇ ।
- ತುಷ್ಟೋಽಹಂ ಶಿಪಿವಿಷ್ಟಹೃಷ್ಟಮನಸಾ ಭ್ರಷ್ಟಾನ್ನ ಮನ್ಯೇ ಹರಿ-
- ಬ್ರಹ್ಮೇನ್ದ್ರಾನಮರಾನ್ ತ್ರಿವಿಷ್ಟಪಗತಾನ್ ನಿಷ್ಠಾ ಹಿ ಮೇ ತಾದೃಶೀ ॥ ೧೨॥
- ನೃತ್ತಾಡಂಬರಸಜ್ಜಟಾಪಟಲಿಕಾಭ್ರಾಮ್ಯನ್ಮಹೋಡುಚ್ಛಟಾ
- ತ್ರುಟ್ಯತ್ಸೋಮಕಲಾಲಲಾಮಕಲಿಕಾ ಶಮ್ಯಾಕಮೌಲೀನತಮ್ ।
- ಉಗ್ರಾನುಗ್ರಭವೋಗ್ರದುರ್ಗಜಗದುದ್ಧಾರಾಗ್ರಪಾದಾಮ್ಬುಜಂ
- ರಕ್ಷೋವಕ್ಷಕುಠಾರಭೂತಮುಮಯಾ ವೀಕ್ಷೇ ಸುಕಾಮಪ್ರದಮ್ ॥ ೧೩॥
- ಫಾಲಂ ಮೇ ಭಸಿತತ್ರಿಪುಣ್ಡ್ರರಚಿತಂ ತ್ವತ್ಪಾದಪದ್ಮಾನತಂ ??
- ಪಾಹೀಶಾನ ದಯಾನಿಧಾನ ಭಗವನ್ ಫಾಲಾನಲಾಕ್ಷ ಪ್ರಭೋ ।
- ಕಣ್ಠೋ ಮೇ ಶಿತಿಕಣ್ಠನಾಮ ಭವತೋ ರುದ್ರಾಕ್ಷಧೃಕ್ ಪಾಹಿ ಮಾಂ
- ಕರ್ಣೌ ಮೇ ಭುಜಗಾಧಿಪೋರುಸುಮಹಾಕರ್ಣ ಪ್ರಭೋ ಪಾಹಿ ಮಾಮ್ ॥ ೧೪॥
- ನಿತ್ಯಂ ಶಙ್ಕರನಾಮಬೋಧಿತಕಥಾಸಾರಾದರಂ ಶಙ್ಕರಂ
- ವಾಚಂ ರುದ್ರಜಪಾದರಾಂ ಸುಮಹತೀಂ ಪಞ್ಚಾಕ್ಷರೀಮಿನ್ದುಧೃಕ್ ।
- ಬಾಹೂ ಮೇ ಶಶಿಭೂಷಣೋತ್ತಮ ಮಹಾಲಿಙ್ಗಾರ್ಚನಾಯೋದ್ಯತೌ
- ಪಾಹಿ ಪ್ರೇಮರಸಾರ್ದ್ರಯಾಽದ್ಯ ಸುದೃಶಾ ಶಮ್ಭೋ ಹಿರಣ್ಯಪ್ರಭ ॥ ೧೫॥
- ಭಾಸ್ವದ್ಬಾಹುಚತುಷ್ಟಯೋಜ್ಜ್ವಲ ಸದಾ ನೇತ್ರೇ ತ್ರಿನೇತ್ರೇ ಪ್ರಭೋ
- ತ್ವಲ್ಲಿಙ್ಗೋತ್ತಮದರ್ಶನೇನ ಸುತರಾಂ ತೃಪ್ತೈಃ ಸದಾ ಪಾಹಿ ಮೇ ।
- ಪಾದೌ ಮೇ ಹರಿನೇತ್ರಪೂಜಿತಪದದ್ವನ್ದ್ವಾವ ನಿತ್ಯಂ ಪ್ರಭೋ
- ತ್ವಲ್ಲಿಙ್ಗಾಲಯಪ್ರಕ್ರಮಪ್ರಣತಿಭಿರ್ಮಾನ್ಯೌ ಚ ಧನ್ಯೌ ವಿಭೋ ॥ ೧೬॥
- ಧನ್ಯಸ್ತ್ವಲ್ಲಿಙ್ಗಸಙ್ಗೇಪ್ಯನುದಿನಗಲಿತಾನಙ್ಗಸಙ್ಗಾನ್ತರಙ್ಗಃ
- ಪುಂಸಾಮರ್ಥೈಕಶಕ್ತ್ಯಾ ಯಮನಿಯಮವರೈರ್ವಿಶ್ವವನ್ದ್ಯ ಪ್ರಭೋ ಯಃ ।
- ದತ್ವಾ ಬಿಲ್ವದಲಂ ಸದಮ್ಬುಜವರಂ ಕಿಞ್ಚಿಜ್ಜಲಂ ವಾ ಮುಹುಃ
- ಪ್ರಾಪ್ನೋತೀಶ್ವರಪಾದಪಙ್ಕಜಮುಮಾನಾಥಾದ್ಯ ಮುಕ್ತಿಪ್ರದಮ್ ॥ ೧೭॥
- ಉಮಾರಮಣ ಶಙ್ಕರ ತ್ರಿದಶವನ್ದ್ಯ ವೇದೇಡ್ಯ ಹೃತ್
- ತ್ವದೀಯಪರಭಾವತೋ ಮಮ ಸದೈವ ನಿರ್ವಾಣಕೃತ್ ।
- ಭವಾರ್ಣವನಿವಾಸಿನಾಂ ಕಿಮು ಭವತ್ಪದಾಮ್ಭೋರುಹ-
- ಪ್ರಭಾವಭಜನಾದರಂ ಭವತಿ ಮಾನಸಂ ಮುಕ್ತಿದಮ್ ॥ ೧೮॥
- ಸಂಸಾರಾರ್ಗಲಪಾದಬದ್ಧಜನತಾಸಂಮೋಚನಂ ಭರ್ಗ ತೇ
- ಪಾದದ್ವನ್ದ್ವಮುಮಾಸನಾಥ ಭಜತಾಂ ಸಂಸಾರಸಂಭರ್ಜಕಮ್ ।
- ತ್ವನ್ನಾಮೋತ್ತಮಗರ್ಜನಾದಘಕುಲಂ ಸನ್ತರ್ಜಿತಂ ವೈ ಭವೇದ್
- ದುಃಖಾನಾಂ ಪರಿಮಾರ್ಜಕಂ ತವಕೃಪಾವೀಕ್ಷಾವತಾಂ ಜಾಯತೇ ॥ ೧೯॥
- ವಿಧಿಮುಣ್ಡಕರೋತ್ತಮೋರುಮೇರುಕೋದಣ್ಡಖಣ್ಡಿತಪುರಾಣ್ಡಜವಾಹಬಾಣ
- ಪಾಹಿ ಕ್ಷಮಾರಥವಿಕರ್ಷಸುವೇದವಾಜಿಹೇಷಾನ್ತಹರ್ಷಿತಪದಾಮ್ಬುಜ ವಿಶ್ವನಾಥ ॥ ೨೦॥
- ವಿಭೂತೀನಾಮನ್ತೋ ನ ಹಿ ಖಲು ಭವಾನೀರಮಣ ತೇ
- ಭವೇ ಭಾವಂ ಕಶ್ಚಿತ್ ತ್ವಯಿ ಭವಹ ಭಾಗ್ಯೇನ ಲಭತೇ ।
- ಅಭಾವಂ ಚಾಜ್ಞಾನಂ ಭವತಿ ಜನನಾದ್ಯೈಶ್ಚ ರಹಿತಃ
- ಉಮಾಕಾನ್ತ ಸ್ವಾನ್ತೇ ಭವದಭಯಪಾದಂ ಕಲಯತಃ ॥ ೨೧॥
- ವರಂ ಶಂಭೋ ಭಾವೈರ್ಭವಭಜನಭಾವೇನ ನಿತರಾಂ
- ಭವಾಮ್ಭೋಧಿರ್ನಿತ್ಯಂ ಭವತಿ ವಿತತಃ ಪಾಂಸುಬಹುಲಃ ।
- ವಿಮುಕ್ತಿಂ ಭುಕ್ತಿಂ ಚ ಶ್ರುತಿಕಥಿತಭಸ್ಮಾಕ್ಷವರಧೃಕ್
- ಭವೇ ಭರ್ತುಃ ಸರ್ವೋ ಭವತಿ ಚ ಸದಾನನ್ದಮಧುರಃ ॥ ೨೨॥
- ಸೋಮಸಾಮಜಸುಕೃತ್ತಿಮೌಲಿಧೃಕ್ ಸಾಮಸೀಮಶಿರಸಿ ಸ್ತುತಪಾದ ।
- ಸಾಮಿಕಾಯಗಿರಿಜೇಶ್ವರ ಶಮ್ಭೋ ಪಾಹಿ ಮಾಮಖಿಲದುಃಖಸಮೂಹಾತ್ ॥ ೨೩॥
- ಭಸ್ಮಾಙ್ಗರಾಗ ಭುಜಗಾಙ್ಗ ಮಹೋಕ್ಷಸಙ್ಗ
- ಗಙ್ಗಾಮ್ಬುಸಙ್ಗ ಸುಜಟಾ ನಿಟಿಲ ಸ್ಫುಲಿಙ್ಗ ।
- ಲಿಙ್ಗಾಙ್ಗ ಭಙ್ಗಿತಮನಙ್ಗ ವಿಹಙ್ಗವಾಹ-
- ಸಮ್ಪೂಜ್ಯಪಾದ ಸದಸಙ್ಗ ಜನಾನ್ತರಙ್ಗ ॥ ೨೪॥
- ವಾತ್ಸಲ್ಯಂ ಮಯಿ ತಾದೃಶಂ ತವನಚೇಚ್ಚನ್ದ್ರಾರ್ಧ ಚೂಡಾಮಣೇ
- ಧಿಕ್ಕೃತ್ಯಾಪಿ ವಿಮುಚ್ಯ ವಾ ತ್ವಯಿ ಯತೋ ಧನ್ಯೋ ಧರಣ್ಯಾಮಹಮ್ ।
- ಸಕ್ಷಾರಂ ಲವಣಾರ್ಣವಸ್ಯ ಸಲಿಲಂ ಧಾರಾ ಧರೇಣ ಕ್ಷಣಾತ್
- ಆದಾಯೋಜ್ಝಿತಮಾಕ್ಷಿತೌ ಹಿ ಜಗತಾಂ ಆಸ್ವಾದನೀಯಾಂ ದೃಶಾಮ್ ॥ ೨೫॥
- ತ್ವತ್ ಕೈಲಾಸವರೇ ವಿಶೋಕಹೃದಯಾಃ ಕ್ರೋಧೋಜ್ಝಿತಾಚ್ಚಾಣ್ಡಜಾಃ
- ತಸ್ಮಾನ್ಮಾಮಪಿ ಭೇದಬುದ್ಧಿರಹಿತಂ ಕುರ್ವೀಶ ತೇಽನುಗ್ರಹಾತ್ ।
- ತ್ವದ್ವಕ್ತ್ರಾಮಲ ನಿರ್ಜರೋಜ್ಝಿತ ಮಹಾಸಂಸಾರ ಸಂತಾಪಹಂ
- ವಿಜ್ಞಾನಂ ಕರುಣಾಽದಿಶಾದ್ಯ ಭಗವನ್ ಲೋಕಾವನಾಯ ಪ್ರಭೋ ॥ ೨೬॥
- ಸಾರಙ್ಗೀ ಸಿಂಹಶಾಬಂ ಸ್ಪೃಶತಿ ಸುತಧಿಯಾ ನನ್ದಿನೀ ವ್ಯಾಘ್ರಪೋತಂ
- ಮಾರ್ಜಾರೀ ಹಂಸಬಾಲಂ ಪ್ರಣಯಪರವಶಾ ಕೇಕಿಕಾನ್ತಾ ಭುಜಙ್ಗಮ್ ।
- ವೈರಾಣ್ಯಾಜನ್ಮಜಾತಾನ್ಯಪಿ ಗಲಿತಮದಾ ಜನ್ತವೋಽನ್ಯೇ ತ್ಯಜನ್ತಿ
- ಭಕ್ತಾಸ್ತ್ವತ್ಪಾದಪದ್ಮೇ ಕಿಮು ಭಜನವತಃ ಸರ್ವಸಿದ್ಧಿಂ ಲಭನ್ತೇ ॥ ೨೭॥
ಸ್ಕನ್ದಃ -
- ಇತ್ಥಂ ಋಭುಸ್ತುತಿಮುಮಾವರಜಾನಿರೀಶಃ
- ಶ್ರುತ್ವಾ ತಮಾಹ ಗಣನಾಥವರೋ ಮಹೇಶಃ ।
- ಜ್ಞಾನಂ ಭವಾಮಯವಿನಾಶಕರಂ ತದೇವ
- ತಸ್ಮೈ ತದೇವ ಕಥಯೇ ಶೃಣು ಪಾಶಮುಕ್ತ್ಯೈ ॥ ೨೮॥
- ॥ ಇತಿ ಶ್ರೀಶಿವರಹಸ್ಯೇ ಶಂಕರಾಖ್ಯೇ ಷಷ್ಠಾಂಶೇ ಋಭುಸ್ತುತಿರ್ನಾಮ ಪ್ರಥಮೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com