Ribhu Gita - Siva Rahasya Purana Amsha 6

ಋಭುಗೀತಾ ೩೦ ॥ ಬ್ರಹ್ಮೈಕ-ರೂಪತ್ವ ನಿರೂಪಣ ಪ್ರಕರಣಮ್ ॥

ಋಭುಃ -

ವಕ್ಷ್ಯೇ ಪರಂ ಬ್ರಹ್ಮಮಾತ್ರಂ ಜಗತ್ಸನ್ತ್ಯಾಗಪೂರ್ವಕಮ್ ।
ಸಕೃಚ್ಛ್ರವಣಮಾತ್ರೇಣ ಬ್ರಹ್ಮಭಾವಂ ಪರಂ ಲಭೇತ್ ॥ ೧॥
ಬ್ರಹ್ಮ ಬ್ರಹ್ಮಪರಂ ಮಾತ್ರಂ ನಿರ್ಗುಣಂ ನಿತ್ಯನಿರ್ಮಲಮ್ ।
ಶಾಶ್ವತಂ ಸಮಮತ್ಯನ್ತಂ ಬ್ರಹ್ಮಣೋಽನ್ಯನ್ನ ವಿದ್ಯತೇ ॥ ೨॥
ಅಹಂ ಸತ್ಯಃ ಪರಾನನ್ದಃ ಶುದ್ಧೋ ನಿತ್ಯೋ ನಿರಞ್ಜನಃ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೩॥
ಅಖಣ್ಡೈಕರಸೈವಾಸ್ಮಿ ಪರಿಪೂರ್ಣೋಽಸ್ಮಿ ಸರ್ವದಾ ।
ಬ್ರಹ್ಮೈವ ಸರ್ವಂ ನಾನ್ಯೋಽಸ್ತಿ ಸರ್ವಂ ಬ್ರಹ್ಮ ನ ಸಂಶಯಃ ॥ ೪॥
ಸರ್ವದಾ ಕೇವಲಾತ್ಮಾಹಂ ಸರ್ವಂ ಬ್ರಹ್ಮೇತಿ ನಿತ್ಯಶಃ ।
ಆನನ್ದರೂಪಮೇವಾಹಂ ನಾನ್ಯತ್ ಕಿಞ್ಚಿನ್ನ ಶಾಶ್ವತಮ್ ॥ ೫॥
ಶುದ್ಧಾನನ್ದಸ್ವರೂಪೋಽಹಂ ಶುದ್ಧವಿಜ್ಞಾನಮಾತ್ಮನಃ ।
ಏಕಾಕಾರಸ್ವರೂಪೋಽಹಂ ನೈಕಸತ್ತಾವಿವರ್ಜಿತಃ ॥ ೬॥
ಅನ್ತರಜ್ಞಾನಶುದ್ಧೋಽಹಮಹಮೇವ ಪರಾಯಣಮ್ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೭॥
ಅನೇಕತತ್ತ್ವಹೀನೋಽಹಂ ಏಕತ್ವಂ ಚ ನ ವಿದ್ಯತೇ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೮॥
ಸರ್ವಪ್ರಕಾರರೂಪೋಽಸ್ಮಿ ಸರ್ವಂ ಇತ್ಯಪಿ ವರ್ಜಿತಃ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೯॥
ನಿರ್ಮಲಜ್ಞಾನರೂಪೋಽಹಮಹಮೇವ ನ ವಿದ್ಯತೇ ।
ಶುದ್ಧಬ್ರಹ್ಮಸ್ವರೂಪೋಽಹಂ ವಿಶುದ್ಧಪದವರ್ಜಿತಃ ॥ ೧೦॥
ನಿತ್ಯಾನನ್ದಸ್ವರೂಪೋಽಹಂ ಜ್ಞಾನಾನನ್ದಮಹಂ ಸದಾ ।
ಸೂಕ್ಷ್ಮಾತ್ ಸೂಕ್ಷ್ಮತರೋಽಹಂ ವೈ ಸೂಕ್ಷ್ಮ ಇತ್ಯಾದಿವರ್ಜಿತಃ ॥ ೧೧॥
ಅಖಣ್ಡಾನನ್ದಮಾತ್ರೋಽಹಂ ಅಖಣ್ಡಾನನ್ದವಿಗ್ರಹಃ ।
ಸದಾಽಮೃತಸ್ವರೂಪೋಽಹಂ ಸದಾ ಕೈವಲ್ಯವಿಗ್ರಹಃ ॥ ೧೨॥
ಬ್ರಹ್ಮಾನನ್ದಮಿದಂ ಸರ್ವಂ ನಾಸ್ತಿ ನಾಸ್ತಿ ಕದಾಚನ ।
ಜೀವತ್ವಧರ್ಮಹೀನೋಽಹಮೀಶ್ವರತ್ವವಿವರ್ಜಿತಃ ॥ ೧೩॥
ವೇದಶಾಸ್ತ್ರಸ್ವರೂಪೋಽಹಂ ಶಾಸ್ತ್ರಸ್ಮರಣಕಾರಣಮ್ ।
ಜಗತ್ಕಾರಣಕಾರ್ಯಂ ಚ ಬ್ರಹ್ಮವಿಷ್ಣುಮಹೇಶ್ವರಾಃ ॥ ೧೪॥
ವಾಚ್ಯವಾಚಕಭೇದಂ ಚ ಸ್ಥೂಲಸೂಕ್ಷ್ಮಶರೀರಕಮ್ ।
ಜಾಗ್ರತ್ಸ್ವಪ್ನಸುಷುಪ್ತಾದ್ಯಪ್ರಾಜ್ಞತೈಜಸವಿಶ್ವಕಾಃ ॥ ೧೫॥
ಸರ್ವಶಾಸ್ತ್ರಸ್ವರೂಪೋಽಹಂ ಸರ್ವಾನನ್ದಮಹಂ ಸದಾ ।
ಅತೀತನಾಮರೂಪಾರ್ಥ ಅತೀತಃ ಸರ್ವಕಲ್ಪನಾತ್ ॥ ೧೬॥
ದ್ವೈತಾದ್ವೈತಂ ಸುಖಂ ದುಃಖಂ ಲಾಭಾಲಾಭೌ ಜಯಾಜಯೌ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೧೭॥
ಸಾತ್ತ್ವಿಕಂ ರಾಜಸಂ ಭೇದಂ ಸಂಶಯಂ ಹೃದಯಂ ಫಲಮ್ ।
ದೃಕ್ ದೃಷ್ಟಂ ಸರ್ವದ್ರಷ್ಟಾ ಚ ಭೂತಭೌತಿಕದೈವತಮ್ ॥ ೧೮॥
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ।
ತುರ್ಯರೂಪಮಹಂ ಸಾಕ್ಷಾತ್ ಜ್ಞಾನರೂಪಮಹಂ ಸದಾ ॥ ೧೯॥
ಅಜ್ಞಾನಂ ಚೈವ ನಾಸ್ತ್ಯೇವ ತತ್ಕಾರ್ಯಂ ಕುತ್ರ ವಿದ್ಯತೇ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೨೦॥
ಚಿತ್ತವೃತ್ತಿವಿಲಾಸಂ ಚ ಬುದ್ಧೀನಾಮಪಿ ನಾಸ್ತಿ ಹಿ ।
ದೇಹಸಙ್ಕಲ್ಪಹೀನೋಽಹಂ ಬುದ್ಧಿಸಙ್ಕಲ್ಪಕಲ್ಪನಾ ॥ ೨೧॥
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ।
ಬುದ್ಧಿನಿಶ್ಚಯರೂಪೋಽಹಂ ನಿಶ್ಚಯಂ ಚ ಗಲತ್ಯಹೋ ॥ ೨೨॥
ಅಹಂಕಾರಂ ಬಹುವಿಧಂ ದೇಹೋಽಹಮಿತಿ ಭಾವನಮ್ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೨೩॥
ಬ್ರಹ್ಮಾಹಮಪಿ ಕಾಣೋಽಹಂ ಬಧಿರೋಽಹಂ ಪರೋಽಸ್ಮ್ಯಹಮ್ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೨೪॥
ದೇಹೋಽಹಮಿತಿ ತಾದಾತ್ಮ್ಯಂ ದೇಹಸ್ಯ ಪರಮಾತ್ಮನಃ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೨೫॥
ಸರ್ವೋಽಹಮಿತಿ ತಾದಾತ್ಮ್ಯಂ ಸರ್ವಸ್ಯ ಪರಮಾತ್ಮನಃ ।
ಇತಿ ಭಾವಯ ಯತ್ನೇನ ಬ್ರಹ್ಮೈವಾಹಮಿತಿ ಪ್ರಭೋ ॥ ೨೬॥
ದೃಢನಿಶ್ಚಯಮೇವೇದಂ ಸತ್ಯಂ ಸತ್ಯಮಹಂ ಪರಮ್ ।
ದೃಢನಿಶ್ಚಯಮೇವಾತ್ರ ಸದ್ಗುರೋರ್ವಾಕ್ಯನಿಶ್ಚಯಮ್ ॥ ೨೭॥
ದೃಢನಿಶ್ಚಯಸಾಮ್ರಾಜ್ಯೇ ತಿಷ್ಠ ತಿಷ್ಠ ಸದಾ ಪರಃ ।
ಅಹಮೇವ ಪರಂ ಬ್ರಹ್ಮ ಆತ್ಮಾನನ್ದಪ್ರಕಾಶಕಃ ॥ ೨೮॥
ಶಿವಪೂಜಾ ಶಿವಶ್ಚಾಹಂ ವಿಷ್ಣುರ್ವಿಷ್ಣುಪ್ರಪೂಜನಮ್ ।
ಯದ್ಯತ್ ಸಂವೇದ್ಯತೇ ಕಿಞ್ಚಿತ್ ಯದ್ಯನ್ನಿಶ್ಚೀಯತೇ ಕ್ವಚಿತ್ ॥ ೨೯॥
ತದೇವ ತ್ವಂ ತ್ವಮೇವಾಹಂ ಇತ್ಯೇವಂ ನಾಸ್ತಿ ಕಿಞ್ಚನ ।
ಇದಂ ಚಿತ್ತಮಿದಂ ದೃಶ್ಯಂ ಇತ್ಯೇವಮಿತಿ ನಾಸ್ತಿ ಹಿ ॥ ೩೦॥
ಸದಸದ್ಭಾವಶೇಷೋಽಪಿ ತತ್ತದ್ಭೇದಂ ನ ವಿದ್ಯತೇ ।
ಸುಖರೂಪಮಿದಂ ಸರ್ವಂ ಸುಖರೂಪಮಿದಂ ನ ಚ ॥ ೩೧॥
ಲಕ್ಷಭೇದಂ ಸಕೃದ್ಭೇದಂ ಸರ್ವಭೇದಂ ನ ವಿದ್ಯತೇ ।
ಬ್ರಹ್ಮಾನನ್ದೋ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೩೨॥
ಬ್ರಹ್ಮಭೇದಂ ತುರ್ಯಭೇದಂ ಜೀವಭೇದಮಭೇದಕಮ್ ।
ಇದಮೇವ ಹಿ ನೋತ್ಪನ್ನಂ ಸರ್ವದಾ ನಾಸ್ತಿ ಕಿಞ್ಚನ ॥ ೩೩॥
ಸ ದೇವಮಿತಿ ನಿರ್ದೇಶೋ ನಾಸ್ತಿ ನಾಸ್ತ್ಯೇವ ಸರ್ವದಾ ।
ಅಸ್ತಿ ಚೇತ್ ಕಿಲ ವಕ್ತವ್ಯಂ ನಾಸ್ತಿ ಚೇತ್ ಕಥಮುಚ್ಯತೇ ॥ ೩೪॥
ಪರಂ ವಿಶೇಷಮೇವೇತಿ ನಾಸ್ತಿ ಕಿಞ್ಚಿತ್ ಸದಾ ಮಯಿ ।
ಚಞ್ಚಲಂ ಮನಶ್ಚೈವ ನಾಸ್ತಿ ನಾಸ್ತಿ ನ ಸಂಶಯಃ ॥ ೩೫॥
ಏವಮೇವ ಸದಾ ಪೂರ್ಣೋ ನಿರೀಹಸ್ತಿಷ್ಠ ಶಾನ್ತಧೀಃ ।
ಸರ್ವಂ ಬ್ರಹ್ಮಾಸ್ಮಿ ಪೂರ್ಣೋಽಸ್ಮಿ ಏವಂ ಚ ನ ಕದಾಚನ ॥ ೩೬॥
ಆನನ್ದೋಽಹಂ ವರಿಷ್ಠೋಽಹಂ ಬ್ರಹ್ಮಾಸ್ಮೀತ್ಯಪಿ ನಾಸ್ತಿ ಹಿ ।
ಬ್ರಹ್ಮಾನನ್ದಮಹಾನನ್ದಮಾತ್ಮಾನನ್ದಮಖಣ್ಡಿತಮ್ ॥ ೩೭॥
ಇದಂ ಪರಮಹನ್ತಾ ಚ ಸರ್ವದಾ ನಾಸ್ತಿ ಕಿಞ್ಚನ ।
ಇದಂ ಸರ್ವಮಿತಿ ಖ್ಯಾತಿ ಆನನ್ದಂ ನೇತಿ ನೋ ಭ್ರಮಃ ॥ ೩೮॥
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ।
ಲಕ್ಷ್ಯಲಕ್ಷಣಭಾವಂ ಚ ದೃಶ್ಯದರ್ಶನದೃಶ್ಯತಾ ॥ ೩೯॥
ಅತ್ಯನ್ತಾಭಾವಮೇವೇತಿ ಸರ್ವದಾನುಭವಂ ಮಹತ್ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೪೦॥
ಗುಹ್ಯಂ ಮನ್ತ್ರಂ ಗುಣಂ ಶಾಸ್ತ್ರಂ ಸತ್ಯಂ ಶ್ರೋತ್ರಂ ಕಲೇವರಮ್ ।
ಮರಣಂ ಜನನಂ ಕಾರ್ಯಂ ಕಾರಣಂ ಪಾವನಂ ಶುಭಮ್ ॥ ೪೧॥
ಕಾಮಕ್ರೋಧೌ ಲೋಭಮೋಹೌ ಮದೋ ಮಾತ್ಸರ್ಯಮೇವ ಹಿ ।
ದ್ವೈತದೋಷಂ ಭಯಂ ಶೋಕಂ ಸರ್ವಂ ನಾಸ್ತ್ಯೇವ ಸರ್ವದಾ ॥ ೪೨॥
ಇದಂ ನಾಸ್ತ್ಯೇವ ನಾಸ್ತ್ಯೇವ ನಾಸ್ತ್ಯೇವ ಸಕಲಂ ಸುಖಮ್ ।
ಇದಂ ಬ್ರಹ್ಮೇತಿ ಮನನಮಹಂ ಬ್ರಹ್ಮೇತಿ ಚಿನ್ತನಮ್ ॥ ೪೩॥
ಅಹಂ ಬ್ರಹ್ಮೇತಿ ಮನನಂ ತ್ವಂ ಬ್ರಹ್ಮತ್ವವಿನಾಶನಮ್ ।
ಸತ್ಯತ್ವಂ ಬ್ರಹ್ಮವಿಜ್ಞಾನಂ ಅಸತ್ಯತ್ವಂ ನ ಬಾಧ್ಯತೇ ॥ ೪೪॥
ಏಕ ಏವ ಪರೋ ಹ್ಯಾತ್ಮಾ ಏಕತ್ವಶ್ರಾನ್ತಿವರ್ಜಿತಃ ।
ಸರ್ವಂ ಬ್ರಹ್ಮ ಸದಾ ಬ್ರಹ್ಮ ತದ್ಬ್ರಹ್ಮಾಹಂ ನ ಸಂಶಯಃ ॥ ೪೫॥
ಜೀವರೂಪಾ ಜೀವಭಾವಾ ಜೀವಶಬ್ದತ್ರಯಂ ನ ಹಿ ।
ಈಶರೂಪಂ ಚೇಶಭಾವಂ ಈಶಶಬ್ದಂ ಚ ಕಲ್ಪಿತಮ್ ॥ ೪೬॥
ನಾಕ್ಷರಂ ನ ಚ ಸರ್ವಂ ವಾ ನ ಪದಂ ವಾಚ್ಯವಾಚಕಮ್ ।
ಹೃದಯಂ ಮನ್ತ್ರತನ್ತ್ರಂ ಚ ಚಿತ್ತಂ ಬುದ್ಧಿರ್ನ ಕಿಞ್ಚನ ॥ ೪೭॥
ಮೂಢೋ ಜ್ಞಾನೀ ವಿವೇಕೀ ವಾ ಶುದ್ಧ ಇತ್ಯಪಿ ನಾಸ್ತಿ ಹಿ ।
ನಿಶ್ಚಯಂ ಪ್ರಣವಂ ತಾರಂ ಆತ್ಮಾಯಂ ಗುರುಶಿಷ್ಯಕಮ್ ॥ ೪೮॥
ತೂಷ್ಣೀಂ ತೂಷ್ಣೀಂ ಮಹಾತೂಷ್ಣೀಂ ಮೌನಂ ವಾ ಮೌನಭಾವನಮ್ ।
ಪ್ರಕಾಶನಂ ಪ್ರಕಾಶಂ ಚ ಆತ್ಮಾನಾತ್ಮವಿವೇಚನಮ್ ॥ ೪೯॥
ಧ್ಯಾನಯೋಗಂ ರಾಜಯೋಗಂ ಭೋಗಮಷ್ಟಾಙ್ಗಲಕ್ಷಣಮ್ ।
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ॥ ೫೦॥
ಅಸ್ತಿತ್ವಭಾಷಣಂ ಚಾಪಿ ನಾಸ್ತಿತ್ವಸ್ಯ ಚ ಭಾಷಣಮ್ ।
ಪಞ್ಚಾಶದ್ವರ್ಣರೂಪೋಽಹಂ ಚತುಃಷಷ್ಟಿಕಲಾತ್ಮಕಃ ॥ ೫೧॥
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ।
ಬ್ರಹ್ಮೈವಾಹಂ ಪ್ರಸನ್ನಾತ್ಮಾ ಬ್ರಹ್ಮೈವಾಹಂ ಚಿದವ್ಯಯಃ ॥ ೫೨॥
ಶಾಸ್ತ್ರಜ್ಞಾನವಿದೂರೋಽಹಂ ವೇದಜ್ಞಾನವಿದೂರಕಃ ।
ಉಕ್ತಂ ಸರ್ವಂ ಪರಂ ಬ್ರಹ್ಮ ನಾಸ್ತಿ ಸನ್ದೇಹಲೇಶತಃ ॥ ೫೩॥
ಸರ್ವಂ ಬ್ರಹ್ಮ ನ ಸನ್ದೇಹಸ್ತದ್ಬ್ರಹ್ಮಾಹಂ ನ ಸಂಶಯಃ ।
ಬ್ರಹ್ಮೈವಾಹಂ ಪ್ರಸನ್ನಾತ್ಮಾ ಬ್ರಹ್ಮೈವಾಹಂ ಚಿದವ್ಯಯಃ ॥ ೫೪॥
ಇತ್ಯೇವಂ ಬ್ರಹ್ಮತನ್ಮಾತ್ರಂ ತತ್ರ ತುಭ್ಯಂ ಪ್ರಿಯಂ ತತಃ ।
ಯಸ್ತು ಬುದ್ಧ್ಯೇತ ಸತತಂ ಸರ್ವಂ ಬ್ರಹ್ಮ ನ ಸಂಶಯಃ ।
ನಿತ್ಯಂ ಶೃಣ್ವನ್ತಿ ಯೇ ಮರ್ತ್ಯಾಸ್ತೇ ಚಿನ್ಮಾತ್ರಮಯಾಮಲಾಃ ॥ ೫೫॥
ಸನ್ದೇಹಸನ್ದೇಹಕರೋಽರ್ಯಕಾಸ್ವಕೈಃ
ಕರಾದಿಸನ್ದೋಹಜಗದ್ವಿಕಾರಿಭಿಃ ।
ಯೋ ವೀತಮೋಹಂ ನ ಕರೋತಿ ದುರ್ಹೃದಂ
ವಿದೇಹಮುಕ್ತಿಂ ಶಿವದೃಕ್ಪ್ರಭಾವತಃ ॥ ೫೬॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮೈಕರೂಪತ್ವನಿರೂಪಣಪ್ರಕರಣಂ ನಾಮ ತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com