ಋಭುಗೀತಾ ೩ ॥ ಶಿವ-ಋಭು ಸಂವಾದ ॥

ಸೂತಃ -

• ತತೋ ಮಹೇಶಾತ್ ಸಂಶ್ರುತ್ಯ ಸೂತ್ರಾಣಿ ಋಭುರೇವ ಹಿ ।
• ಕೈಲಾಸೇಶಂ ಮಹಾದೇವಂ ತುಷ್ಟಾವ ವಿನಯಾಞ್ಜಲಿಃ ॥ ೧॥
• ಲಬ್ಧಜ್ಞಾನೋ ಮಹಾದೇವಾನ್ ಮುನಿಭ್ಯೋಽಕಥಯಚ್ಚ ತತ್ ।
• ತತ್ ಸ್ತುತಿಂ ಚ ಶೃಣುಷ್ವೇತಿ ಜಗಾದ ಗಿರಿಜಾಸುತಃ ॥ ೨॥
• ಜೈಗೀಷವ್ಯಂ ಮಹಾತ್ಮಾನಂ ಜಿತಷಡ್ವರ್ಗಮುತ್ತಮಮ್ ।

ಸ್ಕನ್ದಃ -

• ಸಂಸ್ತುತ್ಯ ಸಾಂಬಮೀಶಾನಮೃಭುರ್ಜ್ಞಾನಮವಿನ್ದತ ।
• ಶಾಂಭವಃ ಸ ಮಹಾಯೋಗೀ ತುಷ್ಟಾವಾಷ್ಟತನುಂ ಹರಮ್ ॥ ೩॥

ಋಭುಃ -

• ಗನ್ಧದ್ವಿಪವರವೃನ್ದತ್ವಚಿರುಚಿಬನ್ಧೋದ್ಯತಪಟ
• ಗನ್ಧಪ್ರಮುಖ ಮದಾನ್ಧವ್ರಜದಲಿ ಹರಿಮುಖನಖರೋದ್ಯತ್
• ಸ್ಕನ್ಧೋದ್ಯನ್ಮುಖ ಬನ್ಧಕ್ಷುರನಿಭ ನಿರ್ಯದ್ರಸದಸೃಭಿನ್ದನ್ನಗಧರ
• ವಿನ್ಧ್ಯಪ್ರಭಶಿವ ಮೇಧ್ಯಪ್ರಭುವರ ।
• ಮೇಧ್ಯೋತ್ತಮಶಿವ ಭೇದ್ಯಾಖಿಲಜಗದುದ್ಯದ್ಭವಗತ
• ವೇದ್ಯಾಗಮಶಿವ ಗದ್ಯಸ್ತುತಪದ ಪದ್ಯಪ್ರಕಟಹೃ -
• ದುದ್ಯದ್ಭವಗದ ವೈದ್ಯೋತ್ತಮ ಪಾಹಿ ಶಮ್ಭೋ ॥ ೪॥
• ಚಣ್ಡದ್ವಿಪಕರ ಕಾಣ್ಡಪ್ರಭಭುಜ ದಣ್ಡೋದ್ಯತನಗ
• ಖಣ್ಡತ್ರಿಪುರ ಮಹಾಣ್ಡಸ್ಫುಟದುಡುಪಶಿಖಣ್ಡ ।
• ದ್ಯುತಿವರ ಗಣ್ಡದ್ವಯ ಕೋದಣ್ಡಾನ್ತಕ ದಣ್ಡಿತಪಾದ ಪಾಹಿ ಶಂಭೋ ॥ ೫॥
• ಕಿಞ್ಚಿಜ್ಜಲಲವ ಸಿಞ್ಚದ್ದ್ವಿಜಕುಲ ಮುಞ್ಚದ್ವೃಜಿನ
• ಕುಲುಂಚದ್ವಿಜಪತಿ ಚಞ್ಚಚ್ಛವಿಜಟ ಕುಞ್ಚತ್ಪದನಖ
• ಮುಞ್ಚನ್ನತವರ ಕರುಣಾ ಪಾಹಿ ಶಂಭೋ ॥ ೬॥
• ದೇವ ಶಙ್ಕರ ಹರಮಹೇಶ್ವರ ಪಾಪತಸ್ಕರ ಅಮರಮಯಸ್ಕರ ।
• ಶಿವದಶಂಕರ ಪುರಮಹೇಶ್ವರ ಭವಹರೇಶ್ವರ ಪಾಹಿ ಶಂಭೋ ॥ ೭॥
• ಅಙ್ಗಜಭಙ್ಗ ತುರಙ್ಗರಥಾಙ್ಗ ಜಲಧಿನಿಷಙ್ಗ
• ಧೃತಭುಜಙ್ಗಾಙ್ಗ ದೃಶಿ ಸುಪತಙ್ಗ
• ಕರಸುಕುರಙ್ಗ ಜಟಧೃತಗಙ್ಗ
• ಯಮಿಹೃದಿಸಙ್ಗ ಭಜಶಿವಲಿಙ್ಗ ಭವಭಯಭಙ್ಗ ॥ ೮॥
• ಶಂಬರಕರಶರ ದಮ್ಬರವರಚರ ಡಂಬರಘೋಷಣ ದುಂಬರಫಲಜಗ
• ನಿಕುರುಂಬಭರಹರ ಬಿಂಬಿತಹೃದಿಚಿರ ಲಂಬಿತಪದಯುಗ
• ಲಂಬೋದರಜನಕಾನ್ತಕಹರ ಶಿವ ಬಿನ್ದುವರಾಸನ
• ಬಿನ್ದುಗಹನ ಶರದಿನ್ದುವದನವರ ಕುನ್ದಧವಲ ಗಣವೃನ್ದವಿನತ
• ಭವಭಯಹರ ಪರವರ ಕರುಣಾಕರ ಫಣಿವರಭೂಷಣ
• ಸ್ಮರ ಹರ ಗರಧರ ಪರಿಪಾಹಿ ॥ ೯॥
• ರಾಸಭವೃಷಭೇಭ ಶರಭಾನನಗಣಗುಣನನ್ದಿತ-
• ತ್ರಿಗುಣಪಥಾತಿಗ ಶರವಣಭವನುತ ತರಣಿಸ್ಥಿತ ವರುಣಾಲಯ
• ಕೃತಪಾರಣ ಮುನಿಶರಣಾಯಿತ ಪದಪದ್ಮಾರುಣ ಪಿಙ್ಗಜಟಾಧರ
• ಕುರು ಕರುಣಾಂ ಶಙ್ಕರ ಶಂ ಕುರು ಮೇ ॥ ೧೦॥
• ಜಮ್ಭಪ್ರಹರಣ ಕುಮ್ಭೋದ್ಭವನುತ ಕುಮ್ಭಪ್ರಮಥ ನಿಶುಮ್ಭದ್ಯುತಿಹರ
• ಭಿನ್ದದ್ರಣಗಣ ಡಿಮ್ಭಾಯಿತಸುರ ತಾರಕಹರಸುತ
• ಕುಂಭ್ಯುದ್ಯತಪದ ವಿನ್ಧ್ಯಸ್ಥಿತದಿತಿಮಾನ್ದ್ಯಪ್ರಹರ ಮದಾನ್ಧದ್ವಿಪವರ
• ಕೃತ್ತಿಪ್ರವರ ಸುಧಾನ್ಧೋನುತಪದ ಬುದ್ಧ್ಯಾಗಮಶಿವ
• ಮೇಧ್ಯಾತಿಥಿವರದ ಮಮಾವನ್ಧ್ಯಂ ಕುರು ದಿವಸಂ
• ತವ ಪೂಜನತಃ ಪರಿಪಾಹಿ ಶಂಭೋ ॥ ೧೧॥
• ಕುನ್ದಸದೃಶ ಮಕರನ್ದನಿಭಸುರವೃನ್ದವಿನುತ ಕುರುವಿನ್ದಮಣಿಗಣ
• ವೃನ್ದನಿಭಾಙ್ಘ್ರಿಜಮನ್ದರ ವಸದಿನ್ದುಮಕುಟ ಶರದಂಬುಜಕೃಶ
• ಗರನಿನ್ದನಗಲ ಸುನ್ದರಗಿರಿತನಯಾಕೃತಿ
• ದೇಹವರಾಙ್ಗಬಿನ್ದುಕಲಿತ ಶಿವಲಿಙ್ಗಗಹನ ಸುತಸಿನ್ದುರವರಮುಖ
• ಬನ್ಧುರವರಸಿನ್ಧುನದೀತಟ ಲಿಙ್ಗನಿವಹವರದಿಗ್ವಸ ಪಾಹಿ ಶಂಭೋ ॥ ೧೨॥
• ಪನ್ನಗಾಭರಣ ಮಾರಮಾರಣ ವಿಭೂತಿಭೂಷಣ ಶೈಲಜಾರಮಣ ।
• ಆಪದುದ್ಧರಣ ಯಾಮಿನೀರಮಣಶೇಖರ ಸುಖದ ಪಾಹಿ ಶಂಭೋ ॥ ೧೩॥
• ದಕ್ಷಾಧ್ವರವರಶಿಕ್ಷ ಪ್ರಭುವರ ತ್ರ್ಯಕ್ಷ ಪ್ರಬಲಮಹೋಕ್ಷಸ್ಥಿತ
• ಸಿತವಕ್ಷಸ್ಸ್ಥಲಕುಲಚಕ್ಷುಃಶ್ರವಸ ವರಾಕ್ಷಸ್ರಜ ಹರ ।
• ವೀಕ್ಷಾನಿಹತಾಧೋಕ್ಷಜಾತ್ಮಜ ವರಕಕ್ಷಾಶ್ರಯ ಪುರಪಕ್ಷವಿದಾರಣ
• ಲೀಕ್ಷಾಯಿತಸುರ ಭಿಕ್ಷಾಶನ ಹರ ಪದ್ಮಾಕ್ಷಾರ್ಚನತುಷ್ಟ
• ಭಗಾಕ್ಷಿಹರಾವ್ಯಯ ಶಙ್ಕರ ಮೋಕ್ಷಪ್ರದ ಪರಿಪಾಹಿ ಮಹೇಶ್ವರ ॥ ೧೪॥
• ಅಕ್ಷಯಫಲದ ಶುಭಾಕ್ಷ ಹರಾಕ್ಷತತಕ್ಷಕಕರ
• ಗರಭಕ್ಷ ಪರಿಸ್ಫುರದಕ್ಷ ಕ್ಷಿತಿರಥ ಸುರಪಕ್ಷಾವ್ಯಯ ।
• ಪುರಹರ ಭವ ಹರ ಹರಿಶರ ಶಿವ ಶಿವ
• ಶಙ್ಕರ ಕುರು ಕುರು ಕರುಣಾಂ ಶಶಿಮೌಲೇ ॥ ೧೫॥
• ಭಜಾಮ್ಯಗಸುತಾಧವಂ ಪಶುಪತಿಂ ಮಹೋಕ್ಷಧ್ವಜಂ
• ವಲಕ್ಷಭಸಿತೋಜ್ಜ್ವಲಂ ಪ್ರಕಟದಕ್ಷದಾಹಾಕ್ಷಿಕಮ್ ।
• ಭಗಾಕ್ಷಿಹರಣಂ ಶಿವಂ ಪ್ರಮಥಿತೋರುದಕ್ಷಾಧ್ವರಂ
• ಪ್ರಪಕ್ಷಸುರತಾಮುನಿಪ್ರಮಥಶಿಕ್ಷಿತಾಧೋಕ್ಷಜಮ್ ॥ ೧೬॥
• ಶ್ರೀನಾಥಾಕ್ಷಿಸರೋಜರಾಜಿತಪದಾಂಭೋಜೈಕಪೂಜೋತ್ಸವೈ-
• ರ್ನಿತ್ಯಂ ಮಾನಸಮೇತದಸ್ತು ಭಗವನ್ ಸದ್ರಾಜಮೌಲೇ ಹರ ।
• ಭೂಷಾಭೂತಭುಜಙ್ಗಸಙ್ಗತ ಮಹಾಭಸ್ಮಾಙ್ಗನೇತ್ರೋಜ್ವಲ-
• ಜ್ಜ್ವಾಲಾದಗ್ಧಮನಙ್ಗಪತಙ್ಗದೃಗುಮಾಕಾನ್ತಾವ ಗಙ್ಗಾಧರ ॥ ೧೭॥
• ಸ್ವಾತ್ಮಾನನ್ದಪರಾಯಣಾಂಬುಜಭವಸ್ತುತ್ಯಾಽಧುನಾ ಪಾಹಿ ಮಾಮ್
• ... ... ... ... ... ... ... ... |
• ಗಿರಿಜಾಮುಖಸಖ ಷಣ್ಮುಖ ಪಞ್ಚಮುಖೋದ್ಯತದುರ್ಮುಖಮುಖ-
• ಹರ ಆಖುವಹೋನ್ಮುಖ ಲೇಖಗಣೋನ್ಮುಖ ಶಙ್ಕರ ಖಗಗಮಪರಿಪೂಜ್ಯ ॥ ೧೮॥
• ಕೋಟಿಜನ್ಮವಿಪ್ರಕರ್ಮಶುದ್ಧಚಿತ್ತವರ್ತ್ಮನಾಂ
• ಶ್ರೌತಸಿದ್ಧಶುದ್ಧಭಸ್ಮದಗ್ಧಸರ್ವವರ್ಷ್ಮಣಾಮ್ ।
• ರುದ್ರಭುಕ್ತಮೇಧ್ಯಭುಕ್ತಿದಗ್ಧಸರ್ವಪಾಪ್ಮನಾಂ
• ರುದ್ರಸೂಕ್ತಿ ಉಕ್ತಿಭಕ್ತಿಭುಕ್ತಿಮುಕ್ತಿದಾಯಿಕಾಮ್ ।
• ಪುರಹರ ಇಷ್ಟತುಷ್ಟಿಮುಕ್ತಿಲಾಸ್ಯವಾಸನಾ
• ಭಕ್ತಿಭಾಸಕೈಲಾಸಮೀಶ ಆಶು ಲಭ್ಯತೇ ॥ ೧೯॥

ಸ್ಕನ್ದಃ -

• ತತ್ಸ್ತುತ್ಯಾ ತೋಷಿತಃ ಶಂಭುಸ್ತಮಾಹ ಋಭುಮೀಶ್ವರಃ ।
• ಪ್ರಸನ್ನಃ ಕರುಣಾಮ್ಭೋಧಿರಮ್ಭೋಜಸುತಮೋದನಃ ॥ ೨೦॥

ಈಶ್ವರಃ -

• ವೇದಾನ್ತಪಾಠಪಠನೇನ ಹಠಾದಿಯೋಗೈಃ
• ಶ್ರೀನೀಲಕಣ್ಠಪದಭಕ್ತಿವಿಕುಣ್ಠಭಾವಾಃ ।
• ಯೇ ಕರ್ಮಠಾ ಯತಿವರಾ ಹರಿಸೌರಿಗೇಹೇ
• ಸಾಲಾವೃಕೈರ್ವರಕಠೋರಕುಠಾರಘಾತೈಃ ॥ ೨೧॥
• ಭಿನ್ನೋತ್ತಮಾಙ್ಗಹೃದಯಾಶ್ಚ ಭುಸುಣ್ಡಿಭಿಸ್ತೇ ।
• ಭಿಕ್ಷಾಶನಾ ಜರಠರಾಸಭವದ್ಭ್ರಮನ್ತಿ ॥ ೨೨॥
• ವಿದ್ಯುಚ್ಚಞ್ಚಲಜೀವಿತೇಽಪಿ ನ ಮನಾಗುತ್ಪದ್ಯತೇ ಶಾಂಭವೀ
• ಭಕ್ತಿರ್ಭೀಮಪದಾಮ್ಬುಜೋತ್ತಮಪದೇ ಭಸ್ಮತ್ರಿಪುಣ್ಡ್ರೇಽಪಿ ಚ ।
• ರುದ್ರಾಕ್ಷಾಮಲರುದ್ರಸೂಕ್ತಿಜಪನೇ ನಿಷ್ಠಾ ಕನಿಷ್ಠಾತ್ಮನಾಂ
• ವಿಷ್ಠಾವಿಷ್ಟಕುನಿಷ್ಠಕಷ್ಟಕುಧಿಯಾಂ ದುಷ್ಟಾತ್ಮನಾಂ ಸರ್ವದಾ ॥ ೨೩॥
• ಭ್ರಷ್ಟಾನಾಂ ದುರದೃಷ್ಟತೋ ಜನಿಜರಾನಾಶೇನ ನಷ್ಟಾತ್ಮನಾಂ
• ಜ್ಯೇಷ್ಠಶ್ರೀಶಿಪಿವಿಷ್ಟಚಾರುಚರಣಾಂಭೋಜಾರ್ಚನಾನಾದರಃ ।
• ತೇನಾನಿಷ್ಟಪರಂಪರಾಸಮುದಯೈರಷ್ಟಾಕೃತೇರ್ನ ಸ್ಮೃತಿಃ
• ವಿಷ್ಠಾಪೂರಿತದುರ್ಮುಖೇಷು ನರಕೇ ಭ್ರಷ್ಟೇ ಚಿರಂ ಸಂಸ್ಥಿತಿಃ ॥ ೨೪॥
• ಅಜ್ಞಾಯತ್ತೇಷ್ವಭಿಜ್ಞಾಃ ಸುರವರನಿಕರಂ ಸ್ತೋತ್ರಶಾಸ್ತ್ರಾದಿತುಷ್ಟಂ
• ಸತ್ರಾಶಂ ಮನ್ತ್ರಮಾತ್ರೈರ್ವಿಧಿವಿಹಿತಧಿಯಾ ಸಾಮಭಾಗೈರ್ಯಜನ್ತಿ ।
• ಶ್ರಾದ್ಧೇ ಶ್ರದ್ಧಾಭರಣಹರಣಭ್ರಾನ್ತರೂಪಾನ್ಪಿತೄಂಸ್ತೇ
• ತತ್ತಚ್ಛ್ರದ್ಧಾಸಮುದಿತಮನಃ ಸ್ವಾನ್ತರಾ ಶಮ್ಭುಮೀಶಮ್ ॥
• ನಾಭ್ಯರ್ಚನ್ತಿ ಪ್ರಣತಶರಣಂ ಮೋಕ್ಷದಂ ಮಾಂ ಮಹೇಶಮ್ ॥ ೨೫॥
• ಆರ್ಯಾಃ ಶರ್ವಸಮರ್ಚನೇನ ಸತತಂ ದೂರ್ವಾದಲೈಃ ಕೋಮಲೈಃ
• ಬಿಲ್ವಾಖರ್ವದಲೈಶ್ಚ ಶಙ್ಕರಮಹಾಭಾಗಂ ಹೃದನ್ತಃ ಸದಾ ।
• ಪರ್ವಸ್ವಪ್ಯವಿಶೇಷಿತೇನ ಮನಸಾ ಗರ್ವಂ ವಿಹಾಯಾದರಾತ್
• ದುರ್ಗಾಣ್ಯಾಶು ತರನ್ತಿ ಶಙ್ಕರಕೃಪಾಪೀಯೂಷಧಾರಾರಸೈಃ ॥ ೨೬ ॥
• ಶ್ರೀಚನ್ದ್ರಚೂಡಚರಣಾಂಬುಜ ಪೂಜನೇನ
• ಕಾಲಂ ನಯನ್ತಿ ಪಶುಪಾಶವಿಮುಕ್ತಿಹೇತೋಃ ।
• ಭಾವಾಃ ಪರಂ ಭಸಿತಫಾಲಲಸತ್ತ್ರಿಪುಣ್ಡ್ರ-
• ರುದ್ರಾಕ್ಷಕಙ್ಕಣಲಸತ್ಕರದಣ್ಡಯುಗ್ಮಾಃ ॥ ೨೭॥
• ಪಞ್ಚಾಕ್ಷರಪ್ರಣವಸೂಕ್ತಧಿಯಾ ವದನ್ತಿ
• ನಾಮಾನಿ ಶಾಂಭವಮನೋಹರದಾನಿ ಶಂಭೋ ।
• ಮುಕ್ತಿಪ್ರದಾನಿ ಸತತಂ ಶಿವಭಕ್ತವರ್ಯಾಃ
• ಯೇ ಬಿಲ್ವಮೂಲಶಿವಲಿಙ್ಗಸಮರ್ಚನೇನ ॥ ೨೮॥
• ಕಾಲಂ ನಯೇದ್ವಿಮಲಕೋಮಲಬಿಲ್ವಪತ್ರೈಃ
• ನೋ ತಸ್ಯ ಕಾಲಜಭಯಂ ಭವತಾಪಪಾಪಮ್ ।
• ಸನ್ತಾಪಭೂಪಜನಿತಂ ಭಜತಾಂ ಮಹೇಶಮ್ ॥ ೨೯॥
• ಶಶ್ವದ್ವಿಶ್ವೇಶಪಾದೌ ಯಮಶಮನಿಯಮೈರ್ಭೂತಿರುದ್ರಾಕ್ಷಗಾತ್ರೋ
• ವಿಶ್ವತ್ರಸ್ತೋ ಭುಜಙ್ಗಾಙ್ಗದವರಗಿರಿಜಾನಾಯಕೇ ಲಬ್ಧಭಕ್ತಿಃ ।
• ಮುಗ್ಧೋಽಪ್ಯಧ್ಯಾತ್ಮವಿದ್ ಯೋ ಭವತಿ ಭವಹರಸ್ಯಾರ್ಚಯಾ ಪ್ರಾಪ್ತಕಾಮಃ ॥ ೩೦॥
• ಶಬ್ದೈರಬ್ದಶತೇಽಪಿ ನೈವ ಸ ಲಭೇತ್ ಜ್ಞಾನಂ ನ ತರ್ಕಭ್ರಮೈಃ
• ಮೀಮಾಂಸಾ ದ್ವಯತಸ್ತಥಾದ್ವಯಪದಂ ಕಿಂ ಸಾಂಖ್ಯಸಂಖ್ಯಾ ವದ ।
• ಯೋಗಾಯಾಸಪರಂಪರಾದಿವಿಹಿತೈರ್ವೇದಾನ್ತಕಾನ್ತಾರಕೇ
• ಶ್ರಾಮ್ಯನ್ ಭಕ್ತಿವಿವರ್ಜಿತೇನ ಮನಸಾ ಶಮ್ಭೋಃ ಪದೇ ಮುಕ್ತಯೇ ॥ ೩೧॥
• ಕಿಂ ಗಙ್ಗಯಾ ವಾ ಮಕರೇ ಪ್ರಯಾಗ-
• ಸ್ನಾನೇನ ವಾ ಯೋಗಮಖಕ್ರಿಯಾದ್ಯೈಃ ।
• ಯತ್ರಾರ್ಚಿತಂ ಲಿಙ್ಗವರಂ ಶಿವಸ್ಯ
• ತತ್ರೈವ ಸರ್ವಾರ್ಥಪರಂಪರಾ ಸ್ಯಾತ್ ॥ ೩೨॥
• ಶ್ರೀಶೈಲೋ ಹಿಮಭೂಧರೋಽರುಣಗಿರಿರ್ವೃದ್ಧಾದ್ರಿಗೋಪರ್ವತೌ
• ಶ್ರೀಮದ್ಧೇಮಸಭಾವಿಹಾರ ಭಗವನ್ ನೃತ್ತಂ ತ್ರಿನೇತ್ರೋ ಗಿರಿಃ ।
• ಕೈಲಾಸೋತ್ತರದಕ್ಷಿಣೌ ಚ ಭಗವಾನ್ ಯತ್ರಾರ್ಚನೇ ಶಙ್ಕರೋ
• ಲಿಙ್ಗೇ ಸನ್ನಿಹಿತೋ ವಸತ್ಯನುದಿನಂ ಶಾಙ್ಗಸ್ಯ ಹೃತ್ಪಙ್ಕಜೇ ॥ ೩೩॥
• ತತ್ರಾವಿಮುಕ್ತಂ ಶಶಿಚೂಡವಾಸಂ
• ಓಂಕಾರಕಾಲಞ್ಜರ ರುದ್ರಕೋಟಿಮ್ ।
• ಗಙ್ಗಾಬುಧೇಃ ಸಙ್ಗಮಮಮ್ಬಿಕಾಪತಿ-
• ಪ್ರಿಯಂ ತು ಗೋಕರ್ಣಕಸಹ್ಯಜಾತಟಮ್ ॥ ೩೪॥
• ಯತ್ರಾಭ್ಯರ್ಣಗತಂ ಮಹೇಶಕರುಣಾಪೂರ್ಣಂ ತು ತೂರ್ಣಂ ಹೃದಾ
• ಲಿಙ್ಗಂ ಪೂಜಿತಮಪ್ಯಪಾಸ್ತದುರಿತಂ ತೀರ್ಥಾನಿ ಗಙ್ಗಾದಯಃ ।
• ಪುಣ್ಯಾಶ್ಚಾಶ್ರಮಸಂಘಕಾ ಗಿರಿವರಕ್ಷೇತ್ರಾಣಿ ಶಂಭೋಃ ಪದಂ
• ಭಕ್ತಿಯುಕ್ತಭಜನೇನ ಮಹೇಶೇ ಶಕ್ತಿವಜ್ಜಗದಿದಂ ಪರಿಭಾತಿ ॥ ೩೫॥
• ಕರ್ಮನ್ದಿವೃನ್ದಾ ಅಪಿ ವೇದಮೌಲಿ-
• ಸಿದ್ಧಾನ್ತವಾಕ್ಯಕಲನೇಽಪಿ ಭವನ್ತಿ ಮನ್ದಾಃ ।
• ಕಾಮಾದಿಬದ್ಧಹೃದಯಾಃ ಸಿತಭಸ್ಮಪುಣ್ಡ್ರ-
• ರುದ್ರಾಕ್ಷ ಶಙ್ಕರಸಮರ್ಚನತೋ ವಿಹೀನಾಃ ॥ ೩೬॥
• ಹೀನಾ ಭವನ್ತಿ ಬಹುಧಾಪ್ಯಬುಧಾ ಭವನ್ತಿ
• ಮತ್ಪ್ರೇಮವಾಸಭವನೇಷು ವಿಹೀನವಾಸಾಃ ॥ ೩೭॥
• ಅಷ್ಟಮ್ಯಾಮಷ್ಟಮೂರ್ತಿರ್ನಿಶಿ ಶಶಿದಿವಸೇ ಸೋಮಚೂಡಂ ತು ಮುಕ್ತ್ಯೈ
• ಭೂತಾಯಾಂ ಭೂತನಾಥಂ ಧೃತಭಸಿತತನುರ್ವೀತದೋಷೇ ಪ್ರದೋಷೇ ।
• ಗವ್ಯೈಃ ಪಞ್ಚಾಮೃತಾದ್ಯೈಃ ಫಲವರಜರಸೈರ್ಬಿಲ್ವಪತ್ರೈಶ್ಚ ಲಿಙ್ಗೇ
• ತುಙ್ಗೇ ಶಾಙ್ಗೇಽಪ್ಯಸಙ್ಗೋ ಭಜತಿ ಯತಹೃದಾ ನಕ್ತಭುಕ್ತ್ಯೈಕಭಕ್ತಃ ॥ ೩೮॥
• ಜ್ಞಾನಾನುತ್ಪತ್ತಯೇ ತದ್ಧರಿವಿಧಿಸಮತಾಬುದ್ಧಿರೀಶಾನಮೂರ್ತೌ
• ಭಸ್ಮಾಕ್ಷಾಧೃತಿರೀಶಲಿಙ್ಗಭಜನಾಶೂನ್ಯಂ ತು ದುರ್ಮಾನಸಮ್ ।
• ಶಂಭೋಸ್ತೀರ್ಥಮಹತ್ಸುತೀರ್ಥವರಕೇ ನಿನ್ದಾವರೇ ಶಾಙ್ಕರೇ
• ಶ್ರೀಮದ್ರುದ್ರಜಪಾದ್ಯದ್ರೋಹಕರಣಾತ್ ಜ್ಞಾನಂ ನ ಚೋತ್ಪದ್ಯತೇ ॥ ೩೯॥
• ಈಶೋತ್ಕರ್ಷಧಿಯೈಕಲಿಙ್ಗನಿಯಮಾದಭ್ಯರ್ಚನಂ ಭಸ್ಮಧೃಕ್
• ರುದ್ರಾಕ್ಷಾಮಲ ಸಾರಮನ್ತ್ರ ಸುಮಹಾಪಞ್ಚಾಕ್ಷರೇ ಜಾಪಿನಾಮ್ ।
• ಈಶಸ್ಥಾನನಿವಾಸಶಾಂಭವಕಥಾ ಭಕ್ತಿಶ್ಚ ಸಂಕೀರ್ತನಂ
• ಭಕ್ತಸ್ಯಾರ್ಚನತೋ ಭವೇತ್ ಸುಮಹಾಜ್ಞಾನಂ ಪರಂ ಮುಕ್ತಿದಮ್ ॥ ೪೦॥
• ಆದ್ಯನ್ತಯೋರ್ಯಃ ಪ್ರಣವೇನ ಯುಕ್ತಂ
• ಶ್ರೀರುದ್ರಮನ್ತ್ರಂ ಪ್ರಜಪತ್ಯಘಘ್ನಮ್ ।
• ತಸ್ಯಾಂಘ್ರಿರೇಣುಂ ಶಿರಸಾ ವಹನ್ತಿ
• ಬ್ರಹ್ಮಾದಯಃ ಸ್ವಾಘನಿವೃತ್ತಿಕಾಮಾಃ ॥ ೪೧॥
• ಅಪೂರ್ವಾಥರ್ವೋಕ್ತ ಶ್ರುತಿಶಿರಸಿ ವಿಜ್ಞಾನಮನಘಂ
• ಮಹಾಖರ್ವಾಜ್ಞಾನಪ್ರಶಮನಕರಂ ಯೋ ವಿರಚಯೇತ್ ।
• ಮುನೇ ಹೃತ್ಪರ್ವಾಣಾಂ ವಿಶಸನಕರಂ ಸಪ್ತಮನುಭಿ-
• ರ್ವ್ರತಂ ಶೀರ್ಷಣ್ಯಂ ಯೋ ವಿರಚಯತಿ ತಸ್ಯೇದಮುದಿತಮ್ ॥ ೪೨॥
• ಗುರೌ ಯಸ್ಯ ಪ್ರೇಮ ಶ್ರುತಿಶಿರಸಿ ಸೂತ್ರಾರ್ಥಪದಗಂ
• ಮಯಿ ಶ್ರದ್ಧಾ ವೃದ್ಧಾ ಭವತಿ ಕಿಲ ತಸ್ಯೈಷ ಸುಲಭಃ ।
• ಅನನ್ಯೋ ಮಾರ್ಗೋಽಯಮ್ ಅಕಥಿತಮಿದಂ ತ್ವಯ್ಯಪಿ ಮುದಾ
• ಯದಾ ಗೋಪ್ಯೋ ಮುಗ್ಧೇ ಸುವಿಹಿತಮುನಿಷ್ವೇವ ದಿಶ ವೈ ॥ ೪೩॥

ಸ್ಕನ್ದಃ -

• ಇತಿ ಸ್ತುತ್ವಾ ಶಂಭೋಃ ಪ್ರಮುದಿತಮನಾಸ್ತ್ವೇಷ ಸ ಋಭುಃ
• ಮುನಿರ್ನತ್ವಾ ದೇವಂ ನಗಮಗಪದೀಶಸ್ಯ ನಿಲಯಮ್ ।
• ಯತೋ ಗಙ್ಗಾ ತುಙ್ಗಾ ಪ್ರಪತತಿ ಹಿಮಾದ್ರೇಃ ಶಿಖರತೋ
• ಮುನೀನ್ದ್ರೇಷ್ವಾಹೇದಂ ತದಪಿ ಶೃಣು ವಿಪ್ರೋತ್ತಮ ಹೃದಾ ॥ ೪೪॥

ಋಭುಃ -

• ಪತನ್ತ್ವಶನಯೋ ಮುಹುರ್ಗಿರಿವರೈಃ ಸಮುದ್ರೋರ್ವರಾ
• ಭವತ್ವಧರಸಂಪ್ಲವಾ ಗ್ರಹಗಣಾಃ ಸುರಾ ಯಾನ್ತ್ವಘಃ ।
• ಭವಜ್ಜನಿಮ ಪೂಜನಾನ್ಮಮ ಮನೋ ನ ಯಾತ್ಯನ್ಯತಃ
• ಶಪಾಮಿ ಪ್ರಪದೇ ಪ್ರಭೋಸ್ತವ ಸರೋರುಹಾಭೇ ಹರ ॥ ೪೫॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಶಿವಋಭುಸಂವಾದೋ ನಾಮ ತೃತೀಯೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com