Ribhu Gita - Siva Rahasya Purana Amsha 6

ಋಭುಗೀತಾ ೧೯ ॥ ಬ್ರಹ್ಮಾನನ್ದ ಪ್ರಕರಣಮ್ ॥

ಋಭುಃ -

ಬ್ರಹ್ಮಾನನ್ದಂ ಪ್ರವಕ್ಷ್ಯಾಮಿ ತ್ರಿಷು ಲೋಕೇಷು ದುರ್ಲಭಮ್ ।
ಯಸ್ಯ ಶ್ರವಣಮಾತ್ರೇಣ ಸದಾ ಮುಕ್ತಿಮವಾಪ್ನುಯಾತ್ ॥ ೧॥var was ಯುಕ್ತಿಮಾಪ್ನುಯಾತ್
ಪರಮಾನನ್ದೋಽಹಮೇವಾತ್ಮಾ ಸರ್ವದಾನನ್ದಮೇವ ಹಿ ।
ಪೂರ್ಣಾನನ್ದಸ್ವರೂಪೋಽಹಂ ಚಿದಾನನ್ದಮಯಂ ಜಗತ್ ॥ ೨॥
ಸದಾನನ್ತಮನನ್ತೋಽಹಂ ಬೋಧಾನನ್ದಮಿದಂ ಜಗತ್ ।
ಬುದ್ಧಾನನ್ದಸ್ವರೂಪೋಽಹಂ ನಿತ್ಯಾನನ್ದಮಿದಂ ಮನಃ ॥ ೩॥
ಕೇವಲಾನನ್ದಮಾತ್ರೋಽಹಂ ಕೇವಲಜ್ಞಾನವಾನಹಮ್ ।
ಇತಿ ಭಾವಯ ಯತ್ನೇನ ಪ್ರಪಞ್ಚೋಪಶಮಾಯ ವೈ ॥ ೪॥
ಸದಾ ಸತ್ಯಂ ಪರಂ ಜ್ಯೋತಿಃ ಸದಾ ಸತ್ಯಾದಿಲಕ್ಷಣಃ ।
ಸದಾ ಸತ್ಯಾದಿಹೀನಾತ್ಮಾ ಸದಾ ಜ್ಯೋತಿಃ ಪ್ರಿಯೋ ಹ್ಯಹಮ್ ॥ ೫॥
ನಾಸ್ತಿ ಮಿಥ್ಯಾಪ್ರಪಞ್ಚಾತ್ಮಾ ನಾಸ್ತಿ ಮಿಥ್ಯಾ ಮನೋಮಯಃ ।
ನಾಸ್ತಿ ಮಿಥ್ಯಾಭಿಧಾನಾತ್ಮಾ ನಾಸ್ತಿ ಚಿತ್ತಂ ದುರಾತ್ಮವಾನ್ ॥ ೬॥
ನಾಸ್ತಿ ಮೂಢತರೋ ಲೋಕೇ ನಾಸ್ತಿ ಮೂಢತಮೋ ನರಃ ।
ಅಹಮೇವ ಪರಂ ಬ್ರಹ್ಮ ಅಹಮೇವ ಸ್ವಯಂ ಸದಾ ॥ ೭॥
ಇದಂ ಪರಂ ಚ ನಾಸ್ತ್ಯೇವ ಅಹಮೇವ ಹಿ ಕೇವಲಮ್ ।
ಅಹಂ ಬ್ರಹ್ಮಾಸ್ಮಿ ಶುದ್ಧೋಽಸ್ಮಿ ಸರ್ವಂ ಬ್ರಹ್ಮೈವ ಕೇವಲಮ್ ॥ ೮॥
ಜಗತ್ಸರ್ವಂ ಸದಾ ನಾಸ್ತಿ ಚಿತ್ತಮೇವ ಜಗನ್ಮಯಮ್ ।
ಚಿತ್ತಮೇವ ಪ್ರಪಞ್ಚಾಖ್ಯಂ ಚಿತ್ತಮೇವ ಶರೀರಕಮ್ ॥ ೯॥
ಚಿತ್ತಮೇವ ಮಹಾದೋಷಂ ಚಿತ್ತಮೇವ ಹಿ ಬಾಲಕಃ ।
ಚಿತ್ತಮೇವ ಮಹಾತ್ಮಾಽಯಂ ಚಿತ್ತಮೇವ ಮಹಾನಸತ್ ॥ ೧೦॥
ಚಿತ್ತಮೇವ ಹಿ ಮಿಥ್ಯಾತ್ಮಾ ಚಿತ್ತಂ ಶಶವಿಷಾಣವತ್ ।
ಚಿತ್ತಂ ನಾಸ್ತಿ ಸದಾ ಸತ್ಯಂ ಚಿತ್ತಂ ವನ್ಧ್ಯಾಕುಮಾರವತ್ ॥ ೧೧॥
ಚಿತ್ತಂ ಶೂನ್ಯಂ ನ ಸನ್ದೇಹೋ ಬ್ರಹ್ಮೈವ ಸಕಲಂ ಜಗತ್ ।
ಅಹಮೇವ ಹಿ ಚೈತನ್ಯಂ ಅಹಮೇವ ಹಿ ನಿರ್ಗುಣಮ್ ॥ ೧೨॥
ಮನ ಏವ ಹಿ ಸಂಸಾರಂ ಮನ ಏವ ಹಿ ಮಣ್ಡಲಮ್ ।
ಮನ ಏವ ಹಿ ಬನ್ಧತ್ವಂ ಮನ ಏವ ಹಿ ಪಾತಕಮ್ ॥ ೧೩॥
ಮನ ಏವ ಮಹದ್ದುಃಖಂ ಮನ ಏವ ಶರೀರಕಮ್ ।
ಮನ ಏವ ಪ್ರಪಞ್ಚಾಖ್ಯಂ ಮನ ಏವ ಕಲೇವರಮ್ ॥ ೧೪॥
ಮನ ಏವ ಮಹಾಸತ್ತ್ವಂ ಮನ ಏವ ಚತುರ್ಮುಖಃ ।
ಮನ ಏವ ಹರಿಃ ಸಾಕ್ಷಾತ್ ಮನ ಏವ ಶಿವಃ ಸ್ಮೃತಃ ॥ ೧೫॥
ಮನ ಏವೇನ್ದ್ರಜಾಲಾಖ್ಯಂ ಮನಃ ಸಙ್ಕಲ್ಪಮಾತ್ರಕಮ್ ।
ಮನ ಏವ ಮಹಾಪಾಪಂ ಮನ ಏವ ದುರಾತ್ಮವಾನ್ ॥ ೧೬॥
ಮನ ಏವ ಹಿ ಸರ್ವಾಖ್ಯಂ ಮನ ಏವ ಮಹದ್ಭಯಮ್ ।
ಮನ ಏವ ಪರಂ ಬ್ರಹ್ಮ ಮನ ಏವ ಹಿ ಕೇವಲಮ್ ॥ ೧೭॥
ಮನ ಏವ ಚಿದಾಕಾರಂ ಮನ ಏವ ಮನಾಯತೇ ।
ಚಿದೇವ ಹಿ ಪರಂ ರೂಪಂ ಚಿದೇವ ಹಿ ಪರಂ ಪದಮ್ ॥ ೧೮॥
ಪರಂ ಬ್ರಹ್ಮಾಹಮೇವಾದ್ಯ ಪರಂ ಬ್ರಹ್ಮಾಹಮೇವ ಹಿ ।
ಅಹಮೇವ ಹಿ ತೃಪ್ತಾತ್ಮಾ ಅಹಮಾನನ್ದವಿಗ್ರಹಃ ॥ ೧೯॥
ಅಹಂ ಬುದ್ಧಿಃ ಪ್ರವೃದ್ಧಾತ್ಮಾ ನಿತ್ಯಂ ನಿಶ್ಚಲನಿರ್ಮಲಃ ।
ಅಹಮೇವ ಹಿ ಶಾನ್ತಾತ್ಮಾ ಅಹಮಾದ್ಯನ್ತವರ್ಜಿತಃ ॥ ೨೦॥
ಅಹಮೇವ ಪ್ರಕಾಶಾತ್ಮಾ ಅಹಂ ಬ್ರಹ್ಮೈವ ಕೇವಲಮ್ ।
ಅಹಂ ನಿತ್ಯೋ ನ ಸನ್ದೇಹ ಅಹಂ ಬುದ್ಧಿಃ ಪ್ರಿಯಃ ಸದಾ ॥ ೨೧॥var was ಬುದ್ಧಿಪ್ರಿಯಃ ಸದಾ
ಅಹಮೇವಾಹಮೇವೈಕಃ ಅಹಮೇವಾಖಿಲಾಮೃತಃ ।
ಅಹಮೇವ ಸ್ವಯಂ ಸಿದ್ಧಃ ಅಹಮೇವಾನುಮೋದಕಃ ॥ ೨೨॥
ಅಹಮೇವ ತ್ವಮೇವಾಹಂ ಸರ್ವಾತ್ಮಾ ಸರ್ವವರ್ಜಿತಃ ।
ಅಹಮೇವ ಪರಂ ಬ್ರಹ್ಮ ಅಹಮೇವ ಪರಾತ್ಪರಃ ॥ ೨೩॥
ಅಹಙ್ಕಾರಂ ನ ಮೇ ದುಃಖಂ ನ ಮೇ ದೋಷಂ ನ ಮೇ ಸುಖಮ್ ।
ನ ಮೇ ಬುದ್ಧಿರ್ನ ಮೇ ಚಿತ್ತಂ ನ ಮೇ ದೇಹೋ ನ ಮೇನ್ದ್ರಿಯಮ್ ॥ ೨೪॥
ನ ಮೇ ಗೋತ್ರಂ ನ ಮೇ ನೇತ್ರಂ ನ ಮೇ ಪಾತ್ರಂ ನ ಮೇ ತೃಣಮ್ ।
ನ ಮೇ ಜಪೋ ನ ಮೇ ಮನ್ತ್ರೋ ನ ಮೇ ಲೋಕೋ ನ ಮೇ ಸುಹೃತ್ ॥ ೨೫॥
ನ ಮೇ ಬನ್ಧುರ್ನ ಮೇ ಶತ್ರುರ್ನ ಮೇ ಮಾತಾ ನ ಮೇ ಪಿತಾ ।
ನ ಮೇ ಭೋಜ್ಯಂ ನ ಮೇ ಭೋಕ್ತಾ ನ ಮೇ ವೃತ್ತಿರ್ನ ಮೇ ಕುಲಮ್ ॥ ೨೬॥
ನ ಮೇ ಜಾತಿರ್ನ ಮೇ ವರ್ಣಃ ನ ಮೇ ಶ್ರೋತ್ರಂ ನ ಮೇ ಕ್ವಚಿತ್ ।
ನ ಮೇ ಬಾಹ್ಯಂ ನ ಮೇ ಬುದ್ಧಿಃ ಸ್ಥಾನಂ ವಾಪಿ ನ ಮೇ ವಯಃ ॥ ೨೭॥
ನ ಮೇ ತತ್ತ್ವಂ ನ ಮೇ ಲೋಕೋ ನ ಮೇ ಶಾನ್ತಿರ್ನ ಮೇ ಕುಲಮ್ ।
ನ ಮೇ ಕೋಪೋ ನ ಮೇ ಕಾಮಃ ಕೇವಲಂ ಬ್ರಹ್ಮಮಾತ್ರತಃ ॥ ೨೮॥
ಕೇವಲಂ ಬ್ರಹ್ಮಮಾತ್ರತ್ವಾತ್ ಕೇವಲಂ ಸ್ವಯಮೇವ ಹಿ ।
ನ ಮೇ ರಾಗೋ ನ ಮೇ ಲೋಭೋ ನ ಮೇ ಸ್ತೋತ್ರಂ ನ ಮೇ ಸ್ಮೃತಿಃ ॥ ೨೯॥
ನ ಮೇ ಮೋಹೋ ನ ಮೇ ತೃಷ್ಣಾ ನ ಮೇ ಸ್ನೇಹೋ ನ ಮೇ ಗುಣಃ ।
ನ ಮೇ ಕೋಶಂ ನ ಮೇ ಬಾಲ್ಯಂ ನ ಮೇ ಯೌವನವಾರ್ಧಕಮ್ ॥ ೩೦॥
ಸರ್ವಂ ಬ್ರಹ್ಮೈಕರೂಪತ್ವಾದೇಕಂ ಬ್ರಹ್ಮೇತಿ ನಿಶ್ಚಿತಮ್ ।
ಬ್ರಹ್ಮಣೋಽನ್ಯತ್ ಪರಂ ನಾಸ್ತಿ ಬ್ರಹ್ಮಣೋಽನ್ಯನ್ನ ಕಿಞ್ಚನ ॥ ೩೧॥
ಬ್ರಹ್ಮಣೋಽನ್ಯದಿದಂ ನಾಸ್ತಿ ಬ್ರಹ್ಮಣೋಽನ್ಯದಿದಂ ನ ಹಿ ।
ಆತ್ಮನೋಽನ್ಯತ್ ಸದಾ ನಾಸ್ತಿ ಆತ್ಮೈವಾಹಂ ನ ಸಂಶಯಃ ॥ ೩೨॥
ಆತ್ಮನೋಽನ್ಯತ್ ಸುಖಂ ನಾಸ್ತಿ ಆತ್ಮನೋಽನ್ಯದಹಂ ನ ಚ ।
ಗ್ರಾಹ್ಯಗ್ರಾಹಕಹೀನೋಽಹಂ ತ್ಯಾಗತ್ಯಾಜ್ಯವಿವರ್ಜಿತಃ ॥ ೩೩॥
ನ ತ್ಯಾಜ್ಯಂ ನ ಚ ಮೇ ಗ್ರಾಹ್ಯಂ ನ ಬನ್ಧೋ ನ ಚ ಭುಕ್ತಿದಮ್ ।var was ಮುಕ್ತಿದಮ್
ನ ಮೇ ಲೋಕಂ ನ ಮೇ ಹೀನಂ ನ ಶ್ರೇಷ್ಠಂ ನಾಪಿ ದೂಷಣಮ್ ॥ ೩೪॥
ನ ಮೇ ಬಲಂ ನ ಚಣ್ಡಾಲೋ ನ ಮೇ ವಿಪ್ರಾದಿವರ್ಣಕಮ್ ।
ನ ಮೇ ಪಾನಂ ನ ಮೇ ಹ್ರಸ್ವಂ ನ ಮೇ ಕ್ಷೀಣಂ ನ ಮೇ ಬಲಮ್ ॥ ೩೫॥
ನ ಮೇ ಶಕ್ತಿರ್ನ ಮೇ ಭುಕ್ತಿರ್ನ ಮೇ ದೈವಂ ನ ಮೇ ಪೃಥಕ್ ।
ಅಹಂ ಬ್ರಹ್ಮೈಕಮಾತ್ರತ್ವಾತ್ ನಿತ್ಯತ್ವಾನ್ಯನ್ನ ಕಿಞ್ಚನ ॥ ೩೬॥
ನ ಮತಂ ನ ಚ ಮೇ ಮಿಥ್ಯಾ ನ ಮೇ ಸತ್ಯಂ ವಪುಃ ಕ್ವಚಿತ್ ।
ಅಹಮಿತ್ಯಪಿ ನಾಸ್ತ್ಯೇವ ಬ್ರಹ್ಮ ಇತ್ಯಪಿ ನಾಮ ವಾ ॥ ೩೭॥
ಯದ್ಯದ್ಯದ್ಯತ್ಪ್ರಪಞ್ಚೋಽಸ್ತಿ ಯದ್ಯದ್ಯದ್ಯದ್ಗುರೋರ್ವಚಃ ।
ತತ್ಸರ್ವಂ ಬ್ರಹ್ಮ ಏವಾಹಂ ತತ್ಸರ್ವಂ ಚಿನ್ಮಯಂ ಮತಮ್ ॥ ೩೮॥
ಚಿನ್ಮಯಂ ಚಿನ್ಮಯಂ ಬ್ರಹ್ಮ ಸನ್ಮಯಂ ಸನ್ಮಯಂ ಸದಾ ।
ಸ್ವಯಮೇವ ಸ್ವಯಂ ಬ್ರಹ್ಮ ಸ್ವಯಮೇವ ಸ್ವಯಂ ಪರಃ ॥ ೩೯॥
ಸ್ವಯಮೇವ ಸ್ವಯಂ ಮೋಕ್ಷಃ ಸ್ವಯಮೇವ ನಿರನ್ತರಃ ।
ಸ್ವಯಮೇವ ಹಿ ವಿಜ್ಞಾನಂ ಸ್ವಯಮೇವ ಹಿ ನಾಸ್ತ್ಯಕಮ್ ॥ ೪೦॥
ಸ್ವಯಮೇವ ಸದಾಸಾರಃ ಸ್ವಯಮೇವ ಸ್ವಯಂ ಪರಃ ।
ಸ್ವಯಮೇವ ಹಿ ಶೂನ್ಯಾತ್ಮಾ ಸ್ವಯಮೇವ ಮನೋಹರಃ ॥ ೪೧॥
ತೂಷ್ಣೀಮೇವಾಸನಂ ಸ್ನಾನಂ ತೂಷ್ಣೀಮೇವಾಸನಂ ಜಪಃ ।
ತೂಷ್ಣೀಮೇವಾಸನಂ ಪೂಜಾ ತೂಷ್ಣೀಮೇವಾಸನಂ ಪರಃ ॥ ೪೨॥
ವಿಚಾರ್ಯ ಮನಸಾ ನಿತ್ಯಮಹಂ ಬ್ರಹ್ಮೇತಿ ನಿಶ್ಚಿನು ।
ಅಹಂ ಬ್ರಹ್ಮ ನ ಸನ್ದೇಹಃ ಏವಂ ತೂಷ್ಣೀಂಸ್ಥಿತಿರ್ಜಪಃ ॥ ೪೩॥
ಸರ್ವಂ ಬ್ರಹ್ಮೈವ ನಾಸ್ತ್ಯನ್ಯತ್ ಸರ್ವಂ ಜ್ಞಾನಮಯಂ ತಪಃ ।
ಸ್ವಯಮೇವ ಹಿ ನಾಸ್ತ್ಯೇವ ಸರ್ವಾತೀತಸ್ವರೂಪವಾನ್ ॥ ೪೪॥
ವಾಚಾತೀತಸ್ವರೂಪೋಽಹಂ ವಾಚಾ ಜಪ್ಯಮನರ್ಥಕಮ್ ।
ಮಾನಸಃ ಪರಮಾರ್ಥೋಽಯಂ ಏತದ್ಭೇದಮಹಂ ನ ಮೇ ॥ ೪೫॥
ಕುಣಪಂ ಸರ್ವಭೂತಾದಿ ಕುಣಪಂ ಸರ್ವಸಙ್ಗ್ರಹಮ್ ।
ಅಸತ್ಯಂ ಸರ್ವದಾ ಲೋಕಮಸತ್ಯಂ ಸಕಲಂ ಜಗತ್ ॥ ೪೬॥
ಅಸತ್ಯಮನ್ಯದಸ್ತಿತ್ವಮಸತ್ಯಂ ನಾಸ್ತಿ ಭಾಷಣಮ್ ।
ಅಸತ್ಯಾಕಾರಮಸ್ತಿತ್ವಂ ಬ್ರಹ್ಮಮಾತ್ರಂ ಸದಾ ಸ್ವಯಮ್ ॥ ೪೭॥
ಅಸತ್ಯಂ ವೇದವೇದಾಙ್ಗಂ ಅಸತ್ಯಂ ಶಾಸ್ತ್ರನಿಶ್ಚಯಃ ।
ಅಸತ್ಯಂ ಶ್ರವಣಂ ಹ್ಯೇತದಸತ್ಯಂ ಮನನಂ ಚ ತತ್ ॥ ೪೮॥
ಅಸತ್ಯಂ ಚ ನಿದಿಧ್ಯಾಸಃ ಸಜಾತೀಯಮಸತ್ಯಕಮ್ ।
ವಿಜಾತೀಯಮಸತ್ ಪ್ರೋಕ್ತಂ ಸತ್ಯಂ ಸತ್ಯಂ ನ ಸಂಶಯಃ ।
ಸರ್ವಂ ಬ್ರಹ್ಮ ಸದಾ ಬ್ರಹ್ಮ ಏಕಂ ಬ್ರಹ್ಮ ಚಿದವ್ಯಯಮ್ ॥ ೪೯॥
ಚೇತೋವಿಲಾಸಜನಿತಂ ಕಿಲ ವಿಶ್ವಮೇತ-
ದ್ವಿಶ್ವಾಧಿಕಸ್ಯ ಕೃಪಯಾ ಪರಿಪೂರ್ಣಭಾಸ್ಯಾತ್ ।
ನಾಸ್ತ್ಯನ್ಯತಃ ಶ್ರುತಿಶಿರೋತ್ಥಿತವಾಕ್ಯಮೋಘ-
ಶಾಸ್ತ್ರಾನುಸಾರಿಕರಣೈರ್ಭವತೇ ವಿಮುಕ್ತ್ಯೈ ॥ ೫೦॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮಾನನ್ದಪ್ರಕರಣಂ ನಾಮ ಏಕೋನವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com