Ribhu Gita - Siva Rahasya Purana Amsha 6

ಋಭುಗೀತಾ ೩೯ ॥ ಸರ್ವ-ಲಯ ಪ್ರಕರಣಮ್ ॥

ಋಭುಃ -

ಪರಂ ಬ್ರಹ್ಮ ಪ್ರವಕ್ಷ್ಯಾಮಿ ನಿರ್ವಿಕಲ್ಪಂ ನಿರಾಮಯಮ್ ।
ತದೇವಾಹಂ ನ ಸನ್ದೇಹಃ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧॥
ಚಿನ್ಮಾತ್ರಮಮಲಂ ಶಾನ್ತಂ ಸಚ್ಚಿದಾನನ್ದವಿಗ್ರಹಮ್ ।
ಆನನ್ದಂ ಪರಮಾನನ್ದಂ ನಿರ್ವಿಕಲ್ಪಂ ನಿರಞ್ಜನಮ್ ॥ ೨॥
ಗುಣಾತೀತಂ ಜನಾತೀತಮವಸ್ಥಾತೀತಮವ್ಯಯಮ್ ।
ಏವಂ ಭಾವಯ ಚೈತನ್ಯಮಹಂ ಬ್ರಹ್ಮಾಸ್ಮಿ ಸೋಽಸ್ಮ್ಯಹಮ್ ॥ ೩॥
ಸರ್ವಾತೀತಸ್ವರೂಪೋಽಸ್ಮಿ ಸರ್ವಶಬ್ದಾರ್ಥವರ್ಜಿತಃ ।
ಸತ್ಯೋಽಹಂ ಸರ್ವಹನ್ತಾಹಂ ಶುದ್ಧೋಽಹಂ ಪರಮೋಽಸ್ಮ್ಯಹಮ್ ॥ ೪॥
ಅಜೋಽಹಂ ಶಾನ್ತರೂಪೋಽಹಂ ಅಶರೀರೋಽಹಮಾನ್ತರಃ ।
ಸರ್ವಹೀನೋಽಹಮೇವಾಹಂ ಸ್ವಯಮೇವ ಸ್ವಯಂ ಮಹಃ ॥ ೫॥
ಆತ್ಮೈವಾಹಂ ಪರಾತ್ಮಾಹಂ ಬ್ರಹ್ಮೈವಾಹಂ ಶಿವೋಽಸ್ಮ್ಯಹಮ್ ।
ಚಿತ್ತಹೀನಸ್ವರೂಪೋಽಹಂ ಬುದ್ಧಿಹೀನೋಽಹಮಸ್ಮ್ಯಹಮ್ ॥ ೬॥
ವ್ಯಾಪಕೋಽಹಮಹಂ ಸಾಕ್ಷೀ ಬ್ರಹ್ಮಾಹಮಿತಿ ನಿಶ್ಚಯಃ ।
ನಿಷ್ಪ್ರಪಞ್ಚಗಜಾರೂಢೋ ನಿಷ್ಪ್ರಪಞ್ಚಾಶ್ವವಾಹನಃ ॥ ೭॥
ನಿಷ್ಪ್ರಪಞ್ಚಮಹಾರಾಜ್ಯೋ ನಿಷ್ಪ್ರಪಞ್ಚಾಯುಧಾದಿಮಾನ್ ।
ನಿಷ್ಪ್ರಪಞ್ಚಮಹಾವೇದೋ ನಿಷ್ಪ್ರಪಞ್ಚಾತ್ಮಭಾವನಃ ॥ ೮॥
ನಿಷ್ಪ್ರಪಞ್ಚಮಹಾನಿದ್ರೋ ನಿಷ್ಪ್ರಪಞ್ಚಸ್ವಭಾವಕಃ ।
ನಿಷ್ಪ್ರಪಞ್ಚಸ್ತು ಜೀವಾತ್ಮಾ ನಿಷ್ಪ್ರಪಞ್ಚಕಲೇವರಃ ॥ ೯॥
ನಿಷ್ಪ್ರಪಞ್ಚಪರೀವಾರೋ ನಿಷ್ಪ್ರಪಞ್ಚೋತ್ಸವೋ ಭವಃ ।
ನಿಷ್ಪ್ರಪಞ್ಚಸ್ತು ಕಲ್ಯಾಣೋ ನಿಷ್ಪ್ರಪಞ್ಚಸ್ತು ದರ್ಪಣಃ ॥ ೧೦॥
ನಿಷ್ಪ್ರಪಞ್ಚರಥಾರೂಢೋ ನಿಷ್ಪ್ರಪಞ್ಚವಿಚಾರಣಮ್ ।
ನಿಷ್ಪ್ರಪಞ್ಚಗುಹಾನ್ತಸ್ಥೋ ನಿಷ್ಪ್ರಪಞ್ಚಪ್ರದೀಪಕಮ್ ॥ ೧೧॥
ನಿಷ್ಪ್ರಪಞ್ಚಪ್ರಪೂರ್ಣಾತ್ಮಾ ನಿಷ್ಪ್ರಪಞ್ಚೋಽರಿಮರ್ದನಃ ।
ಚಿತ್ತಮೇವ ಪ್ರಪಞ್ಚೋ ಹಿ ಚಿತ್ತಮೇವ ಜಗತ್ತ್ರಯಮ್ ॥ ೧೨॥
ಚಿತ್ತಮೇವ ಮಹಾಮೋಹಶ್ಚಿತ್ತಮೇವ ಹಿ ಸಂಸೃತಿಃ ।
ಚಿತ್ತಮೇವ ಮಹಾಪಾಪಂ ಚಿತ್ತಮೇವ ಹಿ ಪುಣ್ಯಕಮ್ ॥ ೧೩॥
ಚಿತ್ತಮೇವ ಮಹಾಬನ್ಧಶ್ಚಿತ್ತಮೇವ ವಿಮೋಕ್ಷದಮ್ ।
ಬ್ರಹ್ಮಭಾವನಯಾ ಚಿತ್ತಂ ನಾಶಮೇತಿ ನ ಸಂಶಯಃ ॥ ೧೪॥
ಬ್ರಹ್ಮಭಾವನಯಾ ದುಃಖಂ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ದ್ವೈತಂ ನಾಶಮೇತಿ ನ ಸಂಶಯಃ ॥ ೧೫॥
ಬ್ರಹ್ಮಭಾವನಯಾ ಕಾಮಃ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಕ್ರೋಧಃ ನಾಶಮೇತಿ ನ ಸಂಶಯಃ ॥ ೧೬॥
ಬ್ರಹ್ಮಭಾವನಯಾ ಲೋಭಃ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಗ್ರನ್ಥಿಃ ನಾಶಮೇತಿ ನ ಸಂಶಯಃ ॥ ೧೭॥
ಬ್ರಹ್ಮಭಾವನಯಾ ಸರ್ವಂ ಬ್ರಹ್ಮಭಾವನಯಾ ಮದಃ ।
ಬ್ರಹ್ಮಭಾವನಯಾ ಪೂಜಾ ನಾಶಮೇತಿ ನ ಸಂಶಯಃ ॥ ೧೮॥
ಬ್ರಹ್ಮಭಾವನಯಾ ಧ್ಯಾನಂ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಸ್ನಾನಂ ನಾಶಮೇತಿ ನ ಸಂಶಯಃ ॥ ೧೯॥
ಬ್ರಹ್ಮಭಾವನಯಾ ಮನ್ತ್ರೋ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಪಾಪಂ ನಾಶಮೇತಿ ನ ಸಂಶಯಃ ॥ ೨೦॥
ಬ್ರಹ್ಮಭಾವನಯಾ ಪುಣ್ಯಂ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ದೋಷೋ ನಾಶಮೇತಿ ನ ಸಂಶಯಃ ॥ ೨೧॥
ಬ್ರಹ್ಮಭಾವನಯಾ ಭ್ರಾನ್ತಿಃ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ದೃಶ್ಯಂ ನಾಶಮೇತಿ ನ ಸಂಶಯಃ ॥ ೨೨॥
ಬ್ರಹ್ಮಭಾವನಯಾ ಸಙ್ಗೋ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ತೇಜೋ ನಾಶಮೇತಿ ನ ಸಂಶಯಃ ॥ ೨೩॥
ಬ್ರಹ್ಮಭಾವನಯಾ ಪ್ರಜ್ಞಾ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಸತ್ತಾ ನಾಶಮೇತಿ ನ ಸಂಶಯಃ ॥ ೨೪॥
ಬ್ರಹ್ಮಭಾವನಯಾ ಭೀತಿಃ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ವೇದಃ ನಾಶಮೇತಿ ನ ಸಂಶಯಃ ॥ ೨೫॥
ಬ್ರಹ್ಮಭಾವನಯಾ ಶಾಸ್ತ್ರಂ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ನಿದ್ರಾ ನಾಶಮೇತಿ ನ ಸಂಶಯಃ ॥ ೨೬॥
ಬ್ರಹ್ಮಭಾವನಯಾ ಕರ್ಮ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ತುರ್ಯಂ ನಾಶಮೇತಿ ನ ಸಂಶಯಃ ॥ ೨೭॥
ಬ್ರಹ್ಮಭಾವನಯಾ ದ್ವನ್ದ್ವಂ ನಾಶಮೇತಿ ನ ಸಂಶಯಃ ।
ಬ್ರಹ್ಮಭಾವನಯಾ ಪೃಚ್ಛೇದಹಂ ಬ್ರಹ್ಮೇತಿ ನಿಶ್ಚಯಮ್ ॥ ೨೮॥
ನಿಶ್ಚಯಂ ಚಾಪಿ ಸನ್ತ್ಯಜ್ಯ ಸ್ವಸ್ವರೂಪಾನ್ತರಾಸನಮ್ ।
ಅಹಂ ಬ್ರಹ್ಮ ಪರಂ ಬ್ರಹ್ಮ ಚಿದ್ಬ್ರಹ್ಮ ಬ್ರಹ್ಮಮಾತ್ರಕಮ್ ॥ ೨೯॥
ಜ್ಞಾನಮೇವ ಪರಂ ಬ್ರಹ್ಮ ಜ್ಞಾನಮೇವ ಪರಂ ಪದಮ್ ।
ದಿವಿ ಬ್ರಹ್ಮ ದಿಶೋ ಬ್ರಹ್ಮ ಮನೋ ಬ್ರಹ್ಮ ಅಹಂ ಸ್ವಯಮ್ ॥ ೩೦॥
ಕಿಞ್ಚಿದ್ಬ್ರಹ್ಮ ಬ್ರಹ್ಮ ತತ್ತ್ವಂ ತತ್ತ್ವಂ ಬ್ರಹ್ಮ ತದೇವ ಹಿ ।
ಅಜೋ ಬ್ರಹ್ಮ ಶುಭಂ ಬ್ರಹ್ಮ ಆದಿಬ್ರಹ್ಮ ಬ್ರವೀಮಿ ತಮ್ ॥ ೩೧॥
ಅಹಂ ಬ್ರಹ್ಮ ಹವಿರ್ಬ್ರಹ್ಮ ಕಾರ್ಯಬ್ರಹ್ಮ ತ್ವಹಂ ಸದಾ ।
ನಾದೋ ಬ್ರಹ್ಮ ನದಂ ಬ್ರಹ್ಮ ತತ್ತ್ವಂ ಬ್ರಹ್ಮ ಚ ನಿತ್ಯಶಃ ॥ ೩೨॥
ಏತದ್ಬ್ರಹ್ಮ ಶಿಖಾ ಬ್ರಹ್ಮ ತದ್ಬ್ರಹ್ಮ ಬ್ರಹ್ಮ ಶಾಶ್ವತಮ್ ।
ನಿಜಂ ಬ್ರಹ್ಮ ಸ್ವತೋ ಬ್ರಹ್ಮ ನಿತ್ಯಂ ಬ್ರಹ್ಮ ತ್ವಮೇವ ಹಿ ॥ ೩೩॥
ಸುಖಂ ಬ್ರಹ್ಮ ಪ್ರಿಯಂ ಬ್ರಹ್ಮ ಮಿತ್ರಂ ಬ್ರಹ್ಮ ಸದಾಮೃತಮ್ ।
ಗುಹ್ಯಂ ಬ್ರಹ್ಮ ಗುರುರ್ಬ್ರಹ್ಮ ಋತಂ ಬ್ರಹ್ಮ ಪ್ರಕಾಶಕಮ್ ॥ ೩೪॥
ಸತ್ಯಂ ಬ್ರಹ್ಮ ಸಮಂ ಬ್ರಹ್ಮ ಸಾರಂ ಬ್ರಹ್ಮ ನಿರಞ್ಜನಮ್ ।
ಏಕಂ ಬ್ರಹ್ಮ ಹರಿರ್ಬ್ರಹ್ಮ ಶಿವೋ ಬ್ರಹ್ಮ ನ ಸಂಶಯಃ ॥ ೩೫॥
ಇದಂ ಬ್ರಹ್ಮ ಸ್ವಯಂ ಬ್ರಹ್ಮ ಲೋಕಂ ಬ್ರಹ್ಮ ಸದಾ ಪರಃ ।
ಆತ್ಮಬ್ರಹ್ಮ ಪರಂ ಬ್ರಹ್ಮ ಆತ್ಮಬ್ರಹ್ಮ ನಿರನ್ತರಃ ॥ ೩೬॥
ಏಕಂ ಬ್ರಹ್ಮ ಚಿರಂ ಬ್ರಹ್ಮ ಸರ್ವಂ ಬ್ರಹ್ಮಾತ್ಮಕಂ ಜಗತ್ ।
ಬ್ರಹ್ಮೈವ ಬ್ರಹ್ಮ ಸದ್ಬ್ರಹ್ಮ ತತ್ಪರಂ ಬ್ರಹ್ಮ ಏವ ಹಿ ॥ ೩೭॥
ಚಿದ್ಬ್ರಹ್ಮ ಶಾಶ್ವತಂ ಬ್ರಹ್ಮ ಜ್ಞೇಯಂ ಬ್ರಹ್ಮ ನ ಚಾಪರಃ ।
ಅಹಮೇವ ಹಿ ಸದ್ಬ್ರಹ್ಮ ಅಹಮೇವ ಹಿ ನಿರ್ಗುಣಮ್ ॥ ೩೮॥
ಅಹಮೇವ ಹಿ ನಿತ್ಯಾತ್ಮಾ ಏವಂ ಭಾವಯ ಸುವ್ರತ ।
ಅಹಮೇವ ಹಿ ಶಾಸ್ತ್ರಾರ್ಥ ಇತಿ ನಿಶ್ಚಿತ್ಯ ಸರ್ವದಾ ॥ ೩೯॥
ಆತ್ಮೈವ ನಾನ್ಯದ್ಭೇದೋಽಸ್ತಿ ಸರ್ವಂ ಮಿಥ್ಯೇತಿ ನಿಶ್ಚಿನು ।
ಆತ್ಮೈವಾಹಮಹಂ ಚಾತ್ಮಾ ಅನಾತ್ಮಾ ನಾಸ್ತಿ ನಾಸ್ತಿ ಹಿ ॥ ೪೦॥
ವಿಶ್ವಂ ವಸ್ತುತಯಾ ವಿಭಾತಿ ಹೃದಯೇ ಮೂಢಾತ್ಮನಾಂ ಬೋಧತೋ-
ಽಪ್ಯಜ್ಞಾನಂ ನ ನಿವರ್ತತೇ ಶ್ರುತಿಶಿರೋವಾರ್ತಾನುವೃತ್ತ್ಯಾಽಪಿ ಚ ।
ವಿಶ್ವೇಶಸ್ಯ ಸಮರ್ಚನೇನ ಸುಮಹಾಲಿಙ್ಗಾರ್ಚನಾದ್ಭಸ್ಮಧೃಕ್
ರುದ್ರಾಕ್ಷಾಮಲಧಾರಣೇನ ಭಗವದ್ಧ್ಯಾನೇನ ಭಾತ್ಯಾತ್ಮವತ್ ॥ ೪೧॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸರ್ವಲಯಪ್ರಕರಣಂ ನಾಮ ಏಕೋನಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com