ಋಭುಗೀತಾ ೪೨ ॥ ನಿದಾಧಾನುಭವ ವರ್ಣನ ಪ್ರಕರಣಮ್ ॥

ಋಭುಃ -

• ಶ್ರುತಂ ಕಿಞ್ಚಿನ್ಮಯಾ ಪ್ರೋಕ್ತಂ ಬ್ರಹ್ಮಜ್ಞಾನಂ ಸುದುರ್ಲಭಮ್ ।
• ಮನಸಾ ಧಾರಿತಂ ಬ್ರಹ್ಮ ಚಿತ್ತಂ ಕೀದೃಕ್ ಸ್ಥಿತಂ ವದ ॥ ೧॥

ನಿದಾಘಃ -

• ಶೃಣು ತ್ವಂ ಸುಗುರೋ ಬ್ರಹ್ಮಂಸ್ತ್ವತ್ಪ್ರಸಾದಾದ್ವದಾಮ್ಯಹಮ್ ।
• ಮಮಾಜ್ಞಾನಂ ಮಹಾದೋಷಂ ಮಹಾಜ್ಞಾನನಿರೋಧಕಮ್ ॥ ೨॥
• ಸದಾ ಕರ್ಮಣಿ ವಿಶ್ವಾಸಂ ಪ್ರಪಞ್ಚೇ ಸತ್ಯಭಾವನಮ್ ।
• ನಷ್ಟಂ ಸರ್ವಂ ಕ್ಷಣಾದೇವ ತ್ವತ್ಪ್ರಸಾದಾನ್ಮಹದ್ಭಯಮ್ ॥ ೩॥
• ಏತಾವನ್ತಮಿಮಂ ಕಾಲಮಜ್ಞಾನರಿಪುಣಾ ಹೃತಮ್ ।
• ಮಹದ್ಭಯಂ ಚ ನಷ್ಟಂ ಮೇ ಕರ್ಮತತ್ತ್ವಂ ಚ ನಾಶಿತಮ್ ॥ ೪॥
• ಅಜ್ಞಾನಂ ಮನಸಾ ಪೂರ್ವಮಿದಾನೀಂ ಬ್ರಹ್ಮತಾಂ ಗತಮ್ ।
• ಪುರಾಹಂ ಚಿತ್ತವದ್ಭೂತಃ ಇದಾನೀಂ ಸನ್ಮಯೋಽಭವಮ್ ॥ ೫॥
• ಪೂರ್ವಮಜ್ಞಾನವದ್ಭಾವಂ ಇದಾನೀಂ ಸನ್ಮಯಂ ಗತಮ್ ।
• ಅಜ್ಞಾನವತ್ ಸ್ಥಿತೋಽಹಂ ವೈ ಬ್ರಹ್ಮೈವಾಹಂ ಪರಂ ಗತಃ ॥ ೬॥
• ಪುರಾಽಹಂ ಚಿತ್ತವದ್ಭ್ರಾನ್ತೋ ಬ್ರಹ್ಮೈವಾಹಂ ಪರಂ ಗತಃ ।
• ಸರ್ವೋ ವಿಗಲಿತೋ ದೋಷಃ ಸರ್ವೋ ಭೇದೋ ಲಯಂ ಗತಃ ॥ ೭॥
• ಸರ್ವಃ ಪ್ರಪಞ್ಚೋ ಗಲಿತಶ್ಚಿತ್ತಮೇವ ಹಿ ಸರ್ವಗಮ್ ।
• ಸರ್ವಾನ್ತಃಕರಣಂ ಲೀನಂ ಬ್ರಹ್ಮಸದ್ಭಾವಭಾವನಾತ್ ॥ ೮॥
• ಅಹಮೇವ ಚಿದಾಕಾಶ ಅಹಮೇವ ಹಿ ಚಿನ್ಮಯಃ ।
• ಅಹಮೇವ ಹಿ ಪೂರ್ಣಾತ್ಮಾ ಅಹಮೇವ ಹಿ ನಿರ್ಮಲಃ ॥ ೯॥
• ಅಹಮೇವಾಹಮೇವೇತಿ ಭಾವನಾಪಿ ವಿನಿರ್ಗತಾ ।
• ಅಹಮೇವ ಚಿದಾಕಾಶೋ ಬ್ರಾಹ್ಮಣತ್ವಂ ನ ಕಿಞ್ಚನ ॥ ೧೦॥
• ಶೂದ್ರೋಽಹಂ ಶ್ವಪಚೋಽಹಂ ವೈ ವರ್ಣೀ ಚಾಪಿ ಗೃಹಸ್ಥಕಃ ।
• ವಾನಪ್ರಸ್ಥೋ ಯತಿರಹಮಿತ್ಯಯಂ ಚಿತ್ತವಿಭ್ರಮಃ ॥ ೧೧॥
• ತತ್ತದಾಶ್ರಮಕರ್ಮಾಣಿ ಚಿತ್ತೇನ ಪರಿಕಲ್ಪಿತಮ್ ।
• ಅಹಮೇವ ಹಿ ಲಕ್ಷ್ಯಾತ್ಮಾ ಅಹಮೇವ ಹಿ ಪೂರ್ಣಕಃ ॥ ೧೨॥
• ಅಹಮೇವಾನ್ತರಾತ್ಮಾ ಹಿ ಅಹಮೇವ ಪರಾಯಣಮ್ ।
• ಅಹಮೇವ ಸದಾಧಾರ ಅಹಮೇವ ಸುಖಾತ್ಮಕಃ ॥ ೧೩॥
• ತ್ವತ್ಪ್ರಸಾದಾದಹಂ ಬ್ರಹ್ಮಾ ತ್ವತ್ಪ್ರಸಾದಾಜ್ಜನಾರ್ದನಃ ।
• ತ್ವತ್ಪ್ರಸಾದಾಚ್ಚಿದಾಕಾಶಃ ಶಿವೋಽಹಂ ನಾತ್ರ ಸಂಶಯಃ ॥ ೧೪॥
• ತ್ವತ್ಪ್ರಸಾದಾದಹಂ ಚಿದ್ವೈ ತ್ವತ್ಪ್ರಸಾದಾನ್ನ ಮೇ ಜಗತ್ ।
• ತ್ವತ್ಪ್ರಸಾದಾದ್ವಿಮುಕ್ತೋಽಸ್ಮಿ ತ್ವತ್ಪ್ರಸಾದಾತ್ ಪರಂ ಗತಃ ॥ ೧೫॥
• ತ್ವತ್ಪ್ರಸಾದಾದ್ವ್ಯಾಪಕೋಽಹಂ ತ್ವತ್ಪ್ರಸಾದಾನ್ನಿರಙ್ಕುಶಃ ।
• ತ್ವತ್ಪ್ರಸಾದೇನ ತೀರ್ಣೋಽಹಂ ತ್ವತ್ಪ್ರಸಾದಾನ್ಮಹತ್ಸುಖಮ್ ॥ ೧೬॥
• ತ್ವತ್ಪ್ರಸಾದಾದಹಂ ಬ್ರಹ್ಮ ತ್ವತ್ಪ್ರಸಾದಾತ್ ತ್ವಮೇವ ನ ।
• ತ್ವತ್ಪ್ರಸಾದಾದಿದಂ ನಾಸ್ತಿ ತ್ವತ್ಪ್ರಸಾದಾನ್ನ ಕಿಞ್ಚನ ॥ ೧೭॥
• ತ್ವತ್ಪ್ರಸಾದಾನ್ನ ಮೇ ಕಿಞ್ಚಿತ್ ತ್ವತ್ಪ್ರಸಾದಾನ್ನ ಮೇ ವಿಪತ್ ।
• ತ್ವತ್ಪ್ರಸಾದಾನ್ನ ಮೇ ಭೇದಸ್ತ್ವತ್ಪ್ರಸಾದಾನ್ನ ಮೇ ಭಯಮ್ ॥ ೧೮॥
• ತ್ವತ್ಪ್ರಸಾದಾನ್ನಮೇ ರೋಗಸ್ತ್ವತ್ಪ್ರಸಾದಾನ್ನ ಮೇ ಕ್ಷತಿಃ ।
• ಯತ್ಪಾದಾಮ್ಬುಜಪೂಜಯಾ ಹರಿರಭೂದರ್ಚ್ಯೋ ಯದಂಘ್ರ್ಯರ್ಚನಾ-
• ದರ್ಚ್ಯಾಽಭೂತ್ ಕಮಲಾ ವಿಧಿಪ್ರಭೃತಯೋ ಹ್ಯರ್ಚ್ಯಾ ಯದಾಜ್ಞಾವಶಾತ್ ।
• ತಂ ಕಾಲಾನ್ತಕಮನ್ತಕಾನ್ತಕಮುಮಾಕಾನ್ತಂ ಮುಹುಃ ಸನ್ತತಂ
• ಸನ್ತಃ ಸ್ವಾನ್ತಸರೋಜರಾಜಚರಣಾಮ್ಭೋಜಂ ಭಜನ್ತ್ಯಾದರಾತ್ ॥ ೧೯॥
• ಕಿಂ ವಾ ಧರ್ಮಶತಾಯುತಾರ್ಜಿತಮಹಾಸೌಖ್ಯೈಕಸೀಮಾಯುತಂ
• ನಾಕಂ ಪಾತಮಹೋಗ್ರದುಃಖನಿಕರಂ ದೇವೇಷು ತುಷ್ಟಿಪ್ರದಮ್ ।
• ತಸ್ಮಾಚ್ಛಙ್ಕರಲಿಙ್ಗಪೂಜನಮುಮಾಕಾನ್ತಪ್ರಿಯಂ ಮುಕ್ತಿದಂ
• ಭೂಮಾನನ್ದಘನೈಕಮುಕ್ತಿಪರಮಾನನ್ದೈಕಮೋದಂ ಮಹಃ ॥ ೨೦॥
• ಯೇ ಶಾಂಭವಾಃ ಶಿವರತಾಃ ಶಿವನಾಮಮಾತ್ರ-
• ಶಬ್ದಾಕ್ಷರಜ್ಞಹೃದಯಾ ಭಸಿತತ್ರಿಪುಣ್ಡ್ರಾಃ ।
• ಯಾಂ ಪ್ರಾಪ್ನುವನ್ತಿ ಗತಿಮೀಶಪದಾಂಬುಜೋದ್ಯದ್-
• ಧ್ಯಾನಾನುರಕ್ತಹೃದಯಾ ನ ಹಿ ಯೋಗಸಾಂಖ್ಯೈಃ ॥ ೨೧॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ನಿದಾಘಾನುಭವವರ್ಣನಪ್ರಕರಣಂ ನಾಮ ದ್ವಿಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com