Ribhu Gita - Siva Rahasya Purana Amsha 6

ಋಭುಗೀತಾ ೪೧ ॥ ಗ್ರನ್ಥ-ಪ್ರಶಸ್ತಿ ನಿರೂಪಣಮ್ ॥

ಋಭುಃ -

ಅಹಂ ಬ್ರಹ್ಮ ನ ಸನ್ದೇಹಃ ಅಹಂ ಬ್ರಹ್ಮ ನ ಸಂಶಯಃ ।
ಅಹಂ ಬ್ರಹ್ಮೈವ ನಿತ್ಯಾತ್ಮಾ ಅಹಮೇವ ಪರಾತ್ಪರಃ ॥ ೧॥
ಚಿನ್ಮಾತ್ರೋಽಹಂ ನ ಸನ್ದೇಹ ಇತಿ ನಿಶ್ಚಿತ್ಯ ತಂ ತ್ಯಜ ।
ಸತ್ಯಂ ಸತ್ಯಂ ಪುನಃ ಸತ್ಯಮಾತ್ಮನೋಽನ್ಯನ್ನ ಕಿಞ್ಚನ ॥ ೨॥
ಶಿವಪಾದದ್ವಯಂ ಸ್ಪೃಷ್ಟ್ವಾ ವದಾಮೀದಂ ನ ಕಿಞ್ಚನ ।
ಗುರುಪಾದದ್ವಯಂ ಸ್ಪೃಷ್ಟ್ವಾ ವದಾಮೀದಂ ನ ಕಿಞ್ಚನ ॥ ೩॥
ಜಿಹ್ವಯಾ ಪರಶುಂ ತಪ್ತಂ ಧಾರಯಾಮಿ ನ ಸಂಶಯಃ ।
ವೇದಶಾಸ್ತ್ರಾದಿಕಂ ಸ್ಪೃಷ್ಟ್ವಾ ವದಾಮೀದಂ ವಿನಿಶ್ಚಿತಮ್ ॥ ೪॥
ನಿಶ್ಚಯಾತ್ಮನ್ ನಿಶ್ಚಯಸ್ತ್ವಂ ನಿಶ್ಚಯೇನ ಸುಖೀ ಭವ ।
ಚಿನ್ಮಯಸ್ತ್ವಂ ಚಿನ್ಮಯತ್ವಂ ಚಿನ್ಮಯಾನನ್ದ ಏವ ಹಿ ॥ ೫॥
ಬ್ರಹ್ಮೈವ ಬ್ರಹ್ಮಭೂತಾತ್ಮಾ ಬ್ರಹ್ಮೈವ ತ್ವಂ ನ ಸಂಶಯಃ ।
ಸರ್ವಮುಕ್ತಂ ಭಗವತಾ ಯೋಗಿನಾಮಪಿ ದುರ್ಲಭಮ್ ॥ ೬॥
ದೇವಾನಾಂ ಚ ಋಷೀಣಾಂ ಚ ಅತ್ಯನ್ತಂ ದುರ್ಲಭಂ ಸದಾ ।
ಐಶ್ವರಂ ಪರಮಂ ಜ್ಞಾನಮುಪದಿಷ್ಟಂ ಶಿವೇನ ಹಿ ॥ ೭॥
ಏತತ್ ಜ್ಞಾನಂ ಸಮಾನೀತಂ ಕೈಲಾಸಾಚ್ಛಙ್ಕರಾನ್ತಿಕಾತ್ ।
ದೇವಾನಾಂ ದಕ್ಷಿಣಾಮೂರ್ತಿರ್ದಶಸಾಹಸ್ರವತ್ಸರಾನ್ ॥ ೮॥
ವಿಘ್ನೇಶೋ ಬಹುಸಾಹಸ್ರಂ ವತ್ಸರಂ ಚೋಪದಿಷ್ಟವಾನ್ ।
ಸಾಕ್ಷಾಚ್ಛಿವೋಽಪಿ ಪಾರ್ವತ್ಯೈ ವತ್ಸರಂ ಚೋಪದಿಷ್ಟವಾನ್ ॥ ೯॥
ಕ್ಷೀರಾಬ್ಧೌ ಚ ಮಹಾವಿಷ್ಣುರ್ಬ್ರಹ್ಮಣೇ ಚೋಪದಿಷ್ಟವಾನ್ ।
ಕದಾಚಿತ್ಬ್ರಹ್ಮಲೋಕೇ ತು ಮತ್ಪಿತುಶ್ಚೋಕ್ತವಾನಹಮ್ ॥ ೧೦॥
ನಾರದಾದಿ ಋಷೀಣಾಂ ಚ ಉಪದಿಷ್ಟಂ ಮಹದ್ಬಹು ।
ಅಯಾತಯಾಮಂ ವಿಸ್ತಾರಂ ಗೃಹೀತ್ವಾಽಹಮಿಹಾಗತಃ ॥ ೧೧॥
ನ ಸಮಂ ಪಾದಮೇಕಂ ಚ ತೀರ್ಥಕೋಟಿಫಲಂ ಲಭೇತ್ ।
ನ ಸಮಂ ಗ್ರನ್ಥಮೇತಸ್ಯ ಭೂಮಿದಾನಫಲಂ ಲಭೇತ್ ॥ ೧೨॥
ಏಕಾನುಭವಮಾತ್ರಸ್ಯ ನ ಸರ್ವಂ ಸರ್ವದಾನಕಮ್ ।
ಶ್ಲೋಕಾರ್ಧಶ್ರವಣಸ್ಯಾಪಿ ನ ಸಮಂ ಕಿಞ್ಚಿದೇವ ಹಿ ॥ ೧೩॥
ತಾತ್ಪರ್ಯಶ್ರವಣಾಭಾವೇ ಪಠಂಸ್ತೂಷ್ಣೀಂ ಸ ಮುಚ್ಯತೇ ।
ಸರ್ವಂ ಸನ್ತ್ಯಜ್ಯ ಸತತಮೇತದ್ಗ್ರನ್ಥಂ ಸಮಭ್ಯಸೇತ್ ॥ ೧೪॥
ಸರ್ವಮನ್ತ್ರಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವದೇವಾಂಶ್ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೧೫॥
ಸರ್ವಸ್ನಾನಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವಭಾವಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೧೬॥
ಸರ್ವಹೋಮಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವದಾನಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೧೭॥
ಸರ್ವಪೂಜಾಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವಗುಹ್ಯಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೧೮॥
ಸರ್ವಸೇವಾಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವಾಸ್ತಿತ್ವಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೧೯॥
ಸರ್ವಪಾಠಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವಾಭ್ಯಾಸಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೨೦॥
ದೇಶಿಕಂ ಚ ಪರಿತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಗುರುಂ ವಾಪಿ ಪರಿತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೨೧॥
ಸರ್ವಲೋಕಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವೈಶ್ವರ್ಯಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೨೨॥
ಸರ್ವಸಙ್ಕಲ್ಪಕಂ ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ।
ಸರ್ವಪುಣ್ಯಂ ಚ ಸನ್ತ್ಯಜ್ಯ ಏತದ್ಗ್ರನ್ಥಂ ಸಮಭ್ಯಸೇತ್ ॥ ೨೩॥
ಏತದ್ಗ್ರನ್ಥಂ ಪರಂ ಬ್ರಹ್ಮ ಏತದ್ಗ್ರನ್ಥಂ ಸಮಭ್ಯಸೇತ್ ।
ಅತ್ರೈವ ಸರ್ವವಿಜ್ಞಾನಂ ಅತ್ರೈವ ಪರಮಂ ಪದಮ್ ॥ ೨೪॥
ಅತ್ರೈವ ಪರಮೋ ಮೋಕ್ಷ ಅತ್ರೈವ ಪರಮಂ ಸುಖಮ್ ।
ಅತ್ರೈವ ಚಿತ್ತವಿಶ್ರಾನ್ತಿರತ್ರೈವ ಗ್ರನ್ಥಿಭೇದನಮ್ ॥ ೨೫॥
ಅತ್ರೈವ ಜೀವನ್ಮುಕ್ತಿಶ್ಚ ಅತ್ರೈವ ಸಕಲೋ ಜಪಃ ।
ಏತದ್ಗ್ರನ್ಥಂ ಪಠಂಸ್ತೂಷ್ಣೀಂ ಸದ್ಯೋ ಮುಕ್ತಿಮವಾಪ್ನುಯಾತ್ ॥ ೨೬॥
ಸರ್ವಶಾಸ್ತ್ರಂ ಚ ಸನ್ತ್ಯಜ್ಯ ಏತನ್ಮಾತ್ರಂ ಸದಾಭ್ಯಸೇತ್ ।
ದಿನೇ ದಿನೇ ಚೈಕವಾರಂ ಪಠೇಚ್ಚೇನ್ಮುಕ್ತ ಏವ ಸಃ ॥ ೨೭॥
ಜನ್ಮಮಧ್ಯೇ ಸಕೃದ್ವಾಪಿ ಶ್ರುತಂ ಚೇತ್ ಸೋಽಪಿ ಮುಚ್ಯತೇ ।
ಸರ್ವಶಾಸ್ತ್ರಸ್ಯ ಸಿದ್ಧಾನ್ತಂ ಸರ್ವವೇದಸ್ಯ ಸಂಗ್ರಹಮ್ ॥ ೨೮॥
ಸಾರಾತ್ ಸಾರತರಂ ಸಾರಂ ಸಾರಾತ್ ಸಾರತರಂ ಮಹತ್ ।
ಏತದ್ಗ್ರನ್ಥಸ್ಯ ನ ಸಮಂ ತ್ರೈಲೋಕ್ಯೇಽಪಿ ಭವಿಷ್ಯತಿ ॥ ೨೯ ॥
ನ ಪ್ರಸಿದ್ಧಿಂ ಗತೇ ಲೋಕೇ ನ ಸ್ವರ್ಗೇಽಪಿ ಚ ದುರ್ಲಭಮ್ ।
ಬ್ರಹ್ಮಲೋಕೇಷು ಸರ್ವೇಷು ಶಾಸ್ತ್ರೇಷ್ವಪಿ ಚ ದುರ್ಲಭಮ್ ॥ ೩೦॥
ಏತದ್ಗ್ರನ್ಥಂ ಕದಾಚಿತ್ತು ಚೌರ್ಯಂ ಕೃತ್ವಾ ಪಿತಾಮಹಃ ।
ಕ್ಷೀರಾಬ್ಧೌ ಚ ಪರಿತ್ಯಜ್ಯ ಸರ್ವೇ ಮುಞ್ಚನ್ತು ನೋ ಇತಿ ॥ ೩೧॥
ಜ್ಞಾತ್ವಾ ಕ್ಷೀರಸಮುದ್ರಸ್ಯ ತೀರೇ ಪ್ರಾಪ್ತಂ ಗೃಹೀತವಾನ್ ।
ಗೃಹೀತಂ ಚಾಪ್ಯಸೌ ದೃಷ್ಟ್ವಾ ಶಪಥಂ ಚ ಪ್ರದತ್ತವಾನ್ ॥ ೩೨॥
ತತ್ ಆರಭ್ಯ ತಲ್ಲೋಕಂ ತ್ಯಕ್ತ್ವಾಹಮಿಮಮಾಗತಃ ।
ಅತ್ಯದ್ಭುತಮಿದಂ ಜ್ಞಾನಂ ಗ್ರನ್ಥಂ ಚೈವ ಮಹಾದ್ಭುತಮ್ ॥ ೩೩॥
ತದ್ ಜ್ಞೋ ವಕ್ತಾ ಚ ನಾಸ್ತ್ಯೇವ ಗ್ರನ್ಥಶ್ರೋತಾ ಚ ದುರ್ಲಭಃ ।
ಆತ್ಮನಿಷ್ಠೈಕಲಭ್ಯೋಽಸೌ ಸದ್ಗುರುರ್ನೈಷ ಲಭ್ಯತೇ ॥ ೩೪॥
ಗ್ರನ್ಥವನ್ತೋ ನ ಲಭ್ಯನ್ತೇ ತೇನ ನ ಖ್ಯಾತಿರಾಗತಾ ।
ಭವತೇ ದರ್ಶಿತಂ ಹ್ಯೇತದ್ಗಮಿಷ್ಯಾಮಿ ಯಥಾಗತಮ್ ॥ ೩೫॥
ಏತಾವದುಕ್ತಮಾತ್ರೇಣ ನಿದಾಘ ಋಷಿಸತ್ತಮಃ ।
ಪತಿತ್ವಾ ಪಾದಯೋಸ್ತಸ್ಯ ಆನನ್ದಾಶ್ರುಪರಿಪ್ಲುತಃ ॥ ೩೬॥
ಉವಾಚ ವಾಕ್ಯಂ ಸಾನನ್ದಂ ಸಾಷ್ಟಾಙ್ಗಂ ಪ್ರಣಿಪತ್ಯ ಚ ।

ನಿದಾಘಃ -

ಅಹೋ ಬ್ರಹ್ಮನ್ ಕೃತಾರ್ಥೋಽಸ್ಮಿ ಕೃತಾರ್ಥೋಽಸ್ಮಿ ನ ಸಂಶಯಃ ।
ಭವತಾಂ ದರ್ಶನೇನೈವ ಮಜ್ಜನ್ಮ ಸಫಲಂ ಕೃತಮ್ ॥ ೩೭॥
ಏಕವಾಕ್ಯಸ್ಯ ಮನನೇ ಮುಕ್ತೋಽಹಂ ನಾತ್ರ ಸಂಶಯಃ ।
ನಮಸ್ಕರೋಮಿ ತೇ ಪಾದೌ ಸೋಪಚಾರಂ ನ ವಾಸ್ತವೌ ॥ ೩೮॥
ತಸ್ಯಾಪಿ ನಾವಕಾಶೋಽಸ್ತಿ ಅಹಮೇವ ನ ವಾಸ್ತವಮ್ ।
ತ್ವಮೇವ ನಾಸ್ತಿ ಮೇ ನಾಸ್ತಿ ಬ್ರಹ್ಮೇತಿ ವಚನಂ ನ ಚ ॥ ೩೯॥
ಬ್ರಹ್ಮೇತಿ ವಚನಂ ನಾಸ್ತಿ ಬ್ರಹ್ಮಭಾವಂ ನ ಕಿಞ್ಚನ ।
ಏತದ್ಗ್ರನ್ಥಂ ನ ಮೇ ನಾಸ್ತಿ ಸರ್ವಂ ಬ್ರಹ್ಮೇತಿ ವಿದ್ಯತೇ ॥ ೪೦॥
ಸರ್ವಂ ಬ್ರಹ್ಮೇತಿ ವಾಕ್ಯಂ ನ ಸರ್ವಂ ಬ್ರಹ್ಮೇತಿ ತಂ ನ ಹಿ ।
ತದಿತಿ ದ್ವೈತಭಿನ್ನಂ ತು ತ್ವಮಿತಿ ದ್ವೈತಮಪ್ಯಲಮ್ ॥ ೪೧॥
ಏವಂ ಕಿಞ್ಚಿತ್ ಕ್ವಚಿನ್ನಾಸ್ತಿ ಸರ್ವಂ ಶಾನ್ತಂ ನಿರಾಮಯಮ್ ।
ಏಕಮೇವ ದ್ವಯಂ ನಾಸ್ತಿ ಏಕತ್ವಮಪಿ ನಾಸ್ತಿ ಹಿ ॥ ೪೨॥
ಭಿನ್ನದ್ವನ್ದ್ವಂ ಜಗದ್ದೋಷಂ ಸಂಸಾರದ್ವೈತವೃತ್ತಿಕಮ್ ।
ಸಾಕ್ಷಿವೃತ್ತಿಪ್ರಪಞ್ಚಂ ವಾ ಅಖಣ್ಡಾಕಾರವೃತ್ತಿಕಮ್ ॥ ೪೩॥
ಅಖಣ್ಡೈಕರಸೋ ನಾಸ್ತಿ ಗುರುರ್ವಾ ಶಿಷ್ಯ ಏವ ವಾ ।
ಭವದ್ದರ್ಶನಮಾತ್ರೇಣ ಸರ್ವಮೇವಂ ನ ಸಂಶಯಃ ॥ ೪೪॥
ಬ್ರಹ್ಮಜ್ಯೋತಿರಹಂ ಪ್ರಾಪ್ತೋ ಜ್ಯೋತಿಷಾಂ ಜ್ಯೋತಿರಸ್ಮ್ಯಹಮ್ ।
ನಮಸ್ತೇ ಸುಗುರೋ ಬ್ರಹ್ಮನ್ ನಮಸ್ತೇ ಗುರುನನ್ದನ ।
ಏವಂ ಕೃತ್ಯ ನಮಸ್ಕಾರಂ ತೂಷ್ಣೀಮಾಸ್ತೇ ಸುಖೀ ಸ್ವಯಮ್ ॥ ೪೫॥
ಕಿಂ ಚಣ್ಡಭಾನುಕರಮಣ್ಡಲದಣ್ಡಿತಾನಿ
ಕಾಷ್ಠಾಮುಖೇಷು ಗಲಿತಾನಿ ನಮಸ್ತತೀತಿ ।
ಯಾದೃಕ್ಚ ತಾದೃಗಥ ಶಙ್ಕರಲಿಙ್ಗಸಙ್ಗ-
ಭಙ್ಗೀನಿ ಪಾಪಕಲಶೈಲಕುಲಾನಿ ಸದ್ಯಃ ।
ಶ್ರೀಮೃತ್ಯುಞ್ಜಯ ರಞ್ಜಯ ತ್ರಿಭುವನಾಧ್ಯಕ್ಷ ಪ್ರಭೋ ಪಾಹಿ ನಃ ॥ ೪೬॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಗ್ರನ್ಥಪ್ರಶಸ್ತಿನಿರೂಪಣಂ ನಾಮ ಏಕಚತ್ವಾರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com