Ribhu Gita - Siva Rahasya Purana Amsha 6

ಋಭುಗೀತಾ ೩೫ ॥ ಬ್ರಹ್ಮ-ಭಾವನೋಪದೇಶ ಪ್ರಕರಣಮ್ ॥

ಋಭುಃ -

ನಿದಾಘ ಶೃಣು ಗುಹ್ಯಂ ಮೇ ಸದ್ಯೋ ಮುಕ್ತಿಪ್ರದಂ ನೃಣಾಮ್ ।
ಆತ್ಮೈವ ನಾನ್ಯದೇವೇದಂ ಪರಮಾತ್ಮಾಹಮಕ್ಷತಃ ॥ ೧॥
ಅಹಮೇವ ಪರಂ ಬ್ರಹ್ಮ ಸಚ್ಚಿದಾನನ್ದವಿಗ್ರಹಃ ।
ಅಹಮಸ್ಮಿ ಮಹಾನಸ್ಮಿ ಶಿವೋಽಸ್ಮಿ ಪರಮೋಽಸ್ಮ್ಯಹಮ್ ॥ ೨॥
ಅದೃಶ್ಯಂ ಪರಮಂ ಬ್ರಹ್ಮ ನಾನ್ಯದಸ್ತಿ ಸ್ವಭಾವತಃ ।
ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಂ ಬ್ರಹ್ಮೈವ ಕೇವಲಮ್ ॥ ೩॥
ಶಾನ್ತಂ ಬ್ರಹ್ಮ ಪರಂ ಚಾಸ್ಮಿ ಸರ್ವದಾ ನಿತ್ಯನಿರ್ಮಲಃ ।
ಸರ್ವಂ ನಾಸ್ತ್ಯೇವ ನಾಸ್ತ್ಯೇವ ಅಹಂ ಬ್ರಹ್ಮೈವ ಕೇವಲಮ್ ॥ ೪॥
ಸರ್ವಸಙ್ಕಲ್ಪಮುಕ್ತೋಽಸ್ಮಿ ಸರ್ವಸನ್ತೋಷವರ್ಜಿತಃ ।
ಕಾಲಕರ್ಮಜಗದ್ದ್ವೈತದ್ರಷ್ಟೃದರ್ಶನವಿಗ್ರಹಃ ॥ ೫॥
ಆನನ್ದೋಽಸ್ಮಿ ಸದಾನನ್ದಕೇವಲೋ ಜಗತಾಂ ಪ್ರಿಯಮ್ ।
ಸಮರೂಪೋಽಸ್ಮಿ ನಿತ್ಯೋಽಸ್ಮಿ ಭೂತಭವ್ಯಮಜೋ ಜಯಃ ॥ ೬॥
ಚಿನ್ಮಾತ್ರೋಽಸ್ಮಿ ಸದಾ ಭುಕ್ತೋ ಜೀವೋ ಬನ್ಧೋ ನ ವಿದ್ಯತೇ ।var was ಮುಕ್ತಃ
ಶ್ರವಣಂ ಷಡ್ವಿಧಂ ಲಿಙ್ಗಂ ನೈವಾಸ್ತಿ ಜಗದೀದೃಶಮ್ ॥ ೭॥
ಚಿತ್ತಸಂಸಾರಹೀನೋಽಸ್ಮಿ ಚಿನ್ಮಾತ್ರತ್ವಂ ಜಗತ್ ಸದಾ ।
ಚಿತ್ತಮೇವ ಹಿತಂ ದೇಹ ಅವಿಚಾರಃ ಪರೋ ರಿಪುಃ ॥ ೮॥
ಅವಿಚಾರೋ ಜಗದ್ದುಃಖಮವಿಚಾರೋ ಮಹದ್ಭಯಮ್ ।
ಸದ್ಯೋಽಸ್ಮಿ ಸರ್ವದಾ ತೃಪ್ತಃ ಪರಿಪೂರ್ಣಃ ಪರೋ ಮಹಾನ್ ॥ ೯॥
ನಿತ್ಯಶುದ್ಧೋಽಸ್ಮಿ ಬುದ್ಧೋಽಸ್ಮಿ ಚಿದಾಕಾಶೋಽಸ್ಮಿ ಚೇತನಃ ।
ಆತ್ಮೈವ ನಾನ್ಯದೇವೇದಂ ಪರಮಾತ್ಮಾಽಹಮಕ್ಷತಃ ॥ ೧೦॥
ಸರ್ವದೋಷವಿಹೀನೋಽಸ್ಮಿ ಸರ್ವತ್ರ ವಿತತೋಽಸ್ಮ್ಯಹಮ್ ।
ವಾಚಾತೀತಸ್ವರೂಪೋಽಸ್ಮಿ ಪರಮಾತ್ಮಾಽಹಮಕ್ಷತಃ ॥ ೧೧॥
ಚಿತ್ರಾತೀತಂ ಪರಂ ದ್ವನ್ದ್ವಂ ಸನ್ತೋಷಃ ಸಮಭಾವನಮ್ ।
ಅನ್ತರ್ಬಹಿರನಾದ್ಯನ್ತಂ ಸರ್ವಭೇದವಿನಿರ್ಣಯಮ್ ॥ ೧೨॥
ಅಹಂಕಾರಂ ಬಲಂ ಸರ್ವಂ ಕಾಮಂ ಕ್ರೋಧಂ ಪರಿಗ್ರಹಮ್ ।
ಬ್ರಹ್ಮೇನ್ದ್ರೋವಿಷ್ಣುರ್ವರುಣೋ ಭಾವಾಭಾವವಿನಿಶ್ಚಯಃ ॥ ೧೩॥
ಜೀವಸತ್ತಾ ಜಗತ್ಸತ್ತಾ ಮಾಯಾಸತ್ತಾ ನ ಕಿಞ್ಚನ ।
ಗುರುಶಿಷ್ಯಾದಿಭೇದಂ ಚ ಕಾರ್ಯಾಕಾರ್ಯವಿನಿಶ್ಚಯಃ ॥ ೧೪॥
ತ್ವಂ ಬ್ರಹ್ಮಾಸೀತಿ ವಕ್ತಾ ಚ ಅಹಂ ಬ್ರಹ್ಮಾಸ್ಮಿ ಸಂಭವಃ ।
ಸರ್ವವೇದಾನ್ತವಿಜ್ಞಾನಂ ಸರ್ವಾಮ್ನಾಯವಿಚಾರಣಮ್ ॥ ೧೫॥
ಇದಂ ಪದಾರ್ಥಸದ್ಭಾವಮಹಂ ರೂಪೇಣ ಸಂಭವಮ್ ।
ವೇದವೇದಾನ್ತಸಿದ್ಧಾನ್ತಜಗದ್ಭೇದಂ ನ ವಿದ್ಯತೇ ॥ ೧೬॥
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವಮಿತ್ಯೇವ ನಾಸ್ತಿ ಹಿ ।
ಕೇವಲಂ ಬ್ರಹ್ಮಶಾನ್ತಾತ್ಮಾ ಅಹಮೇವ ನಿರನ್ತರಮ್ ॥ ೧೭॥
ಶುಭಾಶುಭವಿಭೇದಂ ಚ ದೋಷಾದೋಷಂ ಚ ಮೇ ನ ಹಿ ।
ಚಿತ್ತಸತ್ತಾ ಜಗತ್ಸತ್ತಾ ಬುದ್ಧಿವೃತ್ತಿವಿಜೃಮ್ಭಣಮ್ ॥ ೧೮॥
ಬ್ರಹ್ಮೈವ ಸರ್ವದಾ ನಾನ್ಯತ್ ಸತ್ಯಂ ಸತ್ಯಂ ನಿಜಂ ಪದಮ್ ।
ಆತ್ಮಾಕಾರಮಿದಂ ದ್ವೈತಂ ಮಿಥ್ಯೈವ ನ ಪರಃ ಪುಮಾನ್ ॥ ೧೯॥
ಸಚ್ಚಿದಾನನ್ದಮಾತ್ರೋಽಹಂ ಸರ್ವಂ ಕೇವಲಮವ್ಯಯಮ್ ।
ಬ್ರಹ್ಮಾ ವಿಷ್ಣುಶ್ಚ ರುದ್ರಶ್ಚ ಈಶ್ವರಶ್ಚ ಸದಾಶಿವಃ ॥ ೨೦॥
ಮನೋ ಜಗದಹಂ ಭೇದಂ ಚಿತ್ತವೃತ್ತಿಜಗದ್ಭಯಮ್ ।
ಸರ್ವಾನನ್ದಮಹಾನನ್ದಮಾತ್ಮಾನನ್ದಮನನ್ತಕಮ್ ॥ ೨೧॥
ಅತ್ಯನ್ತಸ್ವಲ್ಪಮಲ್ಪಂ ವಾ ಪ್ರಪಞ್ಚಂ ನಾಸ್ತಿ ಕಿಞ್ಚನ ।
ಪ್ರಪಞ್ಚಮಿತಿ ಶಬ್ದೋ ವಾ ಸ್ಮರಣಂ ವಾ ನ ವಿದ್ಯತೇ ॥ ೨೨॥
ಅನ್ತರಸ್ಥಪ್ರಪಞ್ಚಂ ವಾ ಕ್ವಚಿನ್ನಾಸ್ತಿ ಕ್ವಚಿದ್ಬಹಿಃ ।
ಯತ್ ಕಿಞ್ಚಿದೇವಂ ತೂಷ್ಣೀಂ ವಾ ಯಚ್ಚ ಕಿಞ್ಚಿತ್ ಸದಾ ಕ್ವ ವಾ ॥ ೨೩॥
ಯೇನ ಕೇನ ಯದಾ ಕಿಞ್ಚಿದ್ಯಸ್ಯ ಕಸ್ಯ ನ ಕಿಞ್ಚನ ।
ಶುದ್ಧಂ ಮಲಿನರೂಪಂ ವಾ ಬ್ರಹ್ಮವಾಕ್ಯಮಬೋಧಕಮ್ ॥ ೨೪॥
ಈದೃಷಂ ತಾದೃಷಂ ವೇತಿ ನ ಕಿಞ್ಚಿತ್ ವಕ್ತುಮರ್ಹತಿ ।
ಬ್ರಹ್ಮೈವ ಸರ್ವಂ ಸತತಂ ಬ್ರಹ್ಮೈವ ಸಕಲಂ ಮನಃ ॥ ೨೫॥
ಆನನ್ದಂ ಪರಮಾನದಂ ನಿತ್ಯಾನನ್ದಂ ಸದಾಽದ್ವಯಮ್ ।
ಚಿನ್ಮಾತ್ರಮೇವ ಸತತಂ ನಾಸ್ತಿ ನಾಸ್ತಿ ಪರೋಽಸ್ಮ್ಯಹಮ್ ॥ ೨೬॥
ಪ್ರಪಞ್ಚಂ ಸರ್ವದಾ ನಾಸ್ತಿ ಪ್ರಪಞ್ಚಂ ಚಿತ್ರಮೇವ ಚ ।
ಚಿತ್ತಮೇವ ಹಿ ಸಂಸಾರಂ ನಾನ್ಯತ್ ಸಂಸಾರಮೇವ ಹಿ ॥ ೨೭॥
ಮನ ಏವ ಹಿ ಸಂಸಾರೋ ದೇಹೋಽಹಮಿತಿ ರೂಪಕಮ್ ।
ಸಙ್ಕಲ್ಪಮೇವ ಸಂಸಾರಂ ತನ್ನಾಶೇಽಸೌ ವಿನಶ್ಯತಿ ॥ ೨೮॥
ಸಙ್ಕಲ್ಪಮೇವ ಜನನಂ ತನ್ನಾಶೇಽಸೌ ವಿನಶ್ಯತಿ ।
ಸಙ್ಕಲ್ಪಮೇವ ದಾರಿದ್ರ್ಯಂ ತನ್ನಾಶೇಽಸೌ ವಿನಶ್ಯತಿ ॥ ೨೯॥
ಸಙ್ಕಲ್ಪಮೇವ ಮನನಂ ತನ್ನಾಶೇಽಸೌ ವಿನಶ್ಯತಿ ।
ಆತ್ಮೈವ ನಾನ್ಯದೇವೇದಂ ಪರಮಾತ್ಮಾಽಹಮಕ್ಷತಃ ॥ ೩೦॥
ನಿತ್ಯಮಾತ್ಮಮಯಂ ಬೋಧಮಹಮೇವ ಸದಾ ಮಹಾನ್ ।
ಆತ್ಮೈವ ನಾನ್ಯದೇವೇದಂ ಪರಮಾತ್ಮಾಽಹಮಕ್ಷತಃ ॥ ೩೧॥
ಇತ್ಯೇವಂ ಭಾವಯೇನ್ನಿತ್ಯಂ ಕ್ಷಿಪ್ರಂ ಮುಕ್ತೋ ಭವಿಷ್ಯತಿ ।
ತ್ವಮೇವ ಬ್ರಹ್ಮರೂಪೋಽಸಿ ತ್ವಮೇವ ಬ್ರಹ್ಮವಿಗ್ರಹಃ ॥ ೩೨॥
ಏವಂ ಚ ಪರಮಾನನ್ದಂ ಧ್ಯಾತ್ವಾ ಧ್ಯಾತ್ವಾ ಸುಖೀಭವ ।
ಸುಖಮಾತ್ರಂ ಜಗತ್ ಸರ್ವಂ ಪ್ರಿಯಮಾತ್ರಂ ಪ್ರಪಞ್ಚಕಮ್ ॥ ೩೩॥
ಜಡಮಾತ್ರಮಯಂ ಲೋಕಂ ಬ್ರಹ್ಮಮಾತ್ರಮಯಂ ಸದಾ ।
ಬ್ರಹ್ಮೈವ ನಾನ್ಯದೇವೇದಂ ಪರಮಾತ್ಮಾಽಹಮವ್ಯಯಃ ॥ ೩೪॥
ಏಕ ಏವ ಸದಾ ಏಷ ಏಕ ಏವ ನಿರನ್ತರಮ್ ।
ಏಕ ಏವ ಪರಂ ಬ್ರಹ್ಮ ಏಕ ಏವ ಚಿದವ್ಯಯಃ ॥ ೩೫॥
ಏಕ ಏವ ಗುಣಾತೀತ ಏಕ ಏವ ಸುಖಾವಹಃ ।
ಏಕ ಏವ ಮಹಾನಾತ್ಮಾ ಏಕ ಏವ ನಿರನ್ತರಮ್ ॥ ೩೬॥
ಏಕ ಏವ ಚಿದಾಕಾರ ಏಕ ಏವಾತ್ಮನಿರ್ಣಯಃ ।
ಬ್ರಹ್ಮೈವ ನಾನ್ಯದೇವೇದಂ ಪರಮಾತ್ಮಾಽಹಮಕ್ಷತಃ ॥ ೩೭॥
ಪರಮಾತ್ಮಾಹಮನ್ಯನ್ನ ಪರಮಾನನ್ದಮನ್ದಿರಮ್ ।
ಇತ್ಯೇವಂ ಭಾವಯನ್ನಿತ್ಯಂ ಸದಾ ಚಿನ್ಮಯ ಏವ ಹಿ ॥ ೩೮॥

ಸೂತಃ -

ವಿರಿಞ್ಚಿವಞ್ಚನಾತತಪ್ರಪಞ್ಚಪಞ್ಚಬಾಣಭಿತ್
ಸುಕಾಞ್ಚನಾದ್ರಿಧಾರಿಣಂ ಕುಲುಞ್ಚನಾಂ ಪತಿಂ ಭಜೇ ।
ಅಕಿಞ್ಚನೇಽಪಿ ಸಿಞ್ಚಕೇ ಜಲೇನ ಲಿಙ್ಗಮಸ್ತಕೇ
ವಿಮುಞ್ಚತಿ ಕ್ಷಣಾದಘಂ ನ ಕಿಞ್ಚಿದತ್ರ ಶಿಷ್ಯತೇ ॥ ೩೯॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮಭಾವನೋಪದೇಶಪ್ರಕರಣಂ ನಾಮ ಪಞ್ಚತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com