ಋಭುಗೀತಾ ೨೪ ॥ ಅಹಂಬ್ರಹ್ಮ ಪ್ರಕರಣ ನಿರೂಪಣಮ್ ॥

ಋಭುಃ -

• ಪುನಃ ಪುನಃ ಪರಂ ವಕ್ಷ್ಯೇ ಆತ್ಮನೋಽನ್ಯದಸತ್ ಸ್ವತಃ ।
• ಅಸತೋ ವಚನಂ ನಾಸ್ತಿ ಸತೋ ನಾಸ್ತಿ ಸದಾ ಸ್ಥಿತೇ ॥ ೧॥
• ಬ್ರಹ್ಮಾಭ್ಯಾಸ ಪರಸ್ಯಾಹಂ ವಕ್ಷ್ಯೇ ನಿರ್ಣಯಮಾತ್ಮನಃ ।
• ತಸ್ಯಾಪಿ ಸಕೃದೇವಾಹಂ ವಕ್ಷ್ಯೇ ಮಙ್ಗಲಪೂರ್ವಕಮ್ ॥ ೨॥
• ಸರ್ವಂ ಬ್ರಹ್ಮಾಹಮೇವಾಸ್ಮಿ ಚಿನ್ಮಾತ್ರೋ ನಾಸ್ತಿ ಕಿಞ್ಚನ ।
• ಅಹಮೇವ ಪರಂ ಬ್ರಹ್ಮ ಅಹಮೇವ ಚಿದಾತ್ಮಕಮ್ ॥ ೩॥
• ಅಹಂ ಮಮೇತಿ ನಾಸ್ತ್ಯೇವ ಅಹಂ ಜ್ಞಾನೀತಿ ನಾಸ್ತಿ ಚ ।
• ಶುದ್ಧೋಽಹಂ ಬ್ರಹ್ಮರೂಪೋಽಹಮಾನನ್ದೋಽಹಮಜೋ ನರಃ ॥ ೪॥var was ನಜಃ
• ದೇವೋಽಹಂ ದಿವ್ಯಭಾನೋಽಹಂ ತುರ್ಯೋಽಹಂ ಭವಭಾವ್ಯಹಮ್ ।
• ಅಣ್ಡಜೋಽಹಮಶೇಷೋಽಹಮನ್ತರಾದನ್ತರೋಽಸ್ಮ್ಯಹಮ್ ॥ ೫॥
• ಅಮರೋಽಹಮಜಸ್ರೋಽಹಮತ್ಯನ್ತಪರಮೋಽಸ್ಮ್ಯಹಮ್ ।
• ಪರಾಪರಸ್ವರೂಪೋಽಹಂ ನಿತ್ಯಾನಿತ್ಯರಸೋಽಸ್ಮ್ಯಹಮ್ ॥ ೬॥
• ಗುಣಾಗುಣವಿಹೀನೋಽಹಂ ತುರ್ಯಾತುರ್ಯರಸೋಽಸ್ಮ್ಯಹಮ್ ।
• ಶಾನ್ತಾಶಾನ್ತವಿಹೀನೋಽಹಂ ಜ್ಞಾನಾಜ್ಞಾನರಸೋಽಸ್ಮ್ಯಹಮ್ ॥ ೭॥
• ಕಾಲಾಕಾಲವಿಹೀನೋಽಹಮಾತ್ಮಾನಾತ್ಮವಿವರ್ಜಿತಃ ।
• ಲಬ್ಧಾಲಬ್ಧಾದಿಹೀನೋಽಹಂ ಸರ್ವಶೂನ್ಯೋಽಹಮವ್ಯಯಃ ॥ ೮॥
• ಅಹಮೇವಾಹಮೇವಾಹಮನನ್ತರನಿರನ್ತರಮ್ ।
• ಶಾಶ್ವತೋಽಹಮಲಕ್ಷ್ಯೋಽಹಮಾತ್ಮಾ ನ ಪರಿಪೂರ್ಣತಃ ॥ ೯॥
• ಇತ್ಯಾದಿಶಬ್ದಮುಕ್ತೋಽಹಂ ಇತ್ಯಾದ್ಯಂ ಚ ನ ಚಾಸ್ಮ್ಯಹಮ್ ।
• ಇತ್ಯಾದಿವಾಕ್ಯಮುಕ್ತೋಽಹಂ ಸರ್ವವರ್ಜಿತದುರ್ಜಯಃ ॥ ೧೦॥
• ನಿರನ್ತರೋಽಹಂ ಭೂತೋಽಹಂ ಭವ್ಯೋಽಹಂ ಭವವರ್ಜಿತಃ ।
• ಲಕ್ಷ್ಯಲಕ್ಷಣಹೀನೋಽಹಂ ಕಾರ್ಯಹೀನೋಽಹಮಾಶುಗಃ ॥ ೧೧॥
• ವ್ಯೋಮಾದಿರೂಪಹೀನೋಽಹಂ ವ್ಯೋಮರೂಪೋಽಹಮಚ್ಯುತಃ ।
• ಅನ್ತರಾನ್ತರಭಾವೋಽಹಮನ್ತರಾನ್ತರವರ್ಜಿತಃ ॥ ೧೨॥
• ಸರ್ವಸಿದ್ಧಾನ್ತರೂಪೋಽಹಂ ಸರ್ವದೋಷವಿವರ್ಜಿತಃ ।
• ನ ಕದಾಚನ ಮುಕ್ತೋಽಹಂ ನ ಬದ್ಧೋಽಹಂ ಕದಾಚನ ॥ ೧೩॥
• ಏವಮೇವ ಸದಾ ಕೃತ್ವಾ ಬ್ರಹ್ಮೈವಾಹಮಿತಿ ಸ್ಮರ ।
• ಏತಾವದೇವ ಮಾತ್ರಂ ತು ಮುಕ್ತೋ ಭವತು ನಿಶ್ಚಯಃ ॥ ೧೪॥
• ಚಿನ್ಮಾತ್ರೋಽಹಂ ಶಿವೋಽಹಂ ವೈ ಶುಭಮಾತ್ರಮಹಂ ಸದಾ ।
• ಸದಾಕಾರೋಽಹಂ ಮುಕ್ತೋಽಹಂ ಸದಾ ವಾಚಾಮಗೋಚರಃ ॥ ೧೫॥
• ಸರ್ವದಾ ಪರಿಪೂರ್ಣೋಽಹಂ ವೇದೋಪಾಧಿವಿವರ್ಜಿತಃ ।
• ಚಿತ್ತಕಾರ್ಯವಿಹೀನೋಽಹಂ ಚಿತ್ತಮಸ್ತೀತಿ ಮೇ ನ ಹಿ ॥ ೧೬॥
• ಯತ್ ಕಿಞ್ಚಿದಪಿ ನಾಸ್ತ್ಯೇವ ನಾಸ್ತ್ಯೇವ ಪ್ರಿಯಭಾಷಣಮ್ ।
• ಆತ್ಮಪ್ರಿಯಮನಾತ್ಮಾ ಹಿ ಇದಂ ಮೇ ವಸ್ತುತೋ ನ ಹಿ ॥ ೧೭॥
• ಇದಂ ದುಃಖಮಿದಂ ಸೌಖ್ಯಮಿದಂ ಭಾತಿ ಅಹಂ ನ ಹಿ ।
• ಸರ್ವವರ್ಜಿತರೂಪೋಽಹಂ ಸರ್ವವರ್ಜಿತಚೇತನಃ ॥ ೧೮॥
• ಅನಿರ್ವಾಚ್ಯಮನಿರ್ವಾಚ್ಯಂ ಪರಂ ಬ್ರಹ್ಮ ರಸೋಽಸ್ಮ್ಯಹಮ್ ।
• ಅಹಂ ಬ್ರಹ್ಮ ನ ಸನ್ದೇಹ ಅಹಮೇವ ಪರಾತ್ ಪರಃ ॥ ೧೯॥
• ಅಹಂ ಚೈತನ್ಯಭೂತಾತ್ಮಾ ದೇಹೋ ನಾಸ್ತಿ ಕದಾಚನ ।
• ಲಿಙ್ಗದೇಹಂ ಚ ನಾಸ್ತ್ಯೇವ ಕಾರಣಂ ದೇಹಮೇವ ನ ॥ ೨೦॥
• ಅಹಂ ತ್ಯಕ್ತ್ವಾ ಪರಂ ಚಾಹಂ ಅಹಂ ಬ್ರಹ್ಮಸ್ವರೂಪತಃ ।
• ಕಾಮಾದಿವರ್ಜಿತೋಽತೀತಃ ಕಾಲಭೇದಪರಾತ್ಪರಃ ॥ ೨೧॥
• ಬ್ರಹ್ಮೈವೇದಂ ನ ಸಂವೇದ್ಯಂ ನಾಹಂ ಭಾವಂ ನ ವಾ ನಹಿ ।
• ಸರ್ವಸಂಶಯಸಂಶಾನ್ತೋ ಬ್ರಹ್ಮೈವಾಹಮಿತಿ ಸ್ಥಿತಿಃ ॥ ೨೨॥
• ನಿಶ್ಚಯಂ ಚ ನ ಮೇ ಕಿಞ್ಚಿತ್ ಚಿನ್ತಾಭಾವಾತ್ ಸದಾಽಕ್ಷರಃ ।
• ಚಿದಹಂ ಚಿದಹಂ ಬ್ರಹ್ಮ ಚಿದಹಂ ಚಿದಹಂ ಸದಾ ॥ ೨೩॥
• ಏವಂ ಭಾವನಯಾ ಯುಕ್ತಸ್ತ್ಯಕ್ತಶಙ್ಕಃ ಸುಖೀಭವ ।
• ಸರ್ವಸಙ್ಗಂ ಪರಿತ್ಯಜ್ಯ ಆತ್ಮೈಕ್ಯೈವಂ ಭವಾನ್ವಹಮ್ ॥ ೨೪॥
• ಸಙ್ಗಂ ನಾಮ ಪ್ರವಕ್ಷ್ಯೇಽಹಂ ಬ್ರಹ್ಮಾಹಮಿತಿ ನಿಶ್ಚಯಃ ।
• ಸತ್ಯೋಽಹಂ ಪರಮಾತ್ಮಾಽಹಂ ಸ್ವಯಮೇವ ಸ್ವಯಂ ಸ್ವಯಮ್ ॥ ೨೫॥
• ನಾಹಂ ದೇಹೋ ನ ಚ ಪ್ರಾಣೋ ನ ದ್ವನ್ದ್ವೋ ನ ಚ ನಿರ್ಮಲಃ ।
• ಏಷ ಏವ ಹಿ ಸತ್ಸಙ್ಗಃ ಏಷ ಏವ ಹಿ ನಿರ್ಮಲಃ ॥ ೨೬॥
• ಮಹತ್ಸಙ್ಗೇ ಮಹದ್ಬ್ರಹ್ಮಭಾವನಂ ಪರಮಂ ಪದಮ್ ।
• ಅಹಂ ಶಾನ್ತಪ್ರಭಾವೋಽಹಂ ಅಹಂ ಬ್ರಹ್ಮ ನ ಸಂಶಯಃ ॥ ೨೭॥
• ಅಹಂ ತ್ಯಕ್ತಸ್ವರೂಪೋಽಹಂ ಅಹಂ ಚಿನ್ತಾದಿವರ್ಜಿತಃ ।
• ಏಷ ಏವ ಹಿ ಸತ್ಸಙ್ಗಃ ಏಷ ನಿತ್ಯಂ ಭವಾನಹಮ್ ॥ ೨೮॥
• ಸರ್ವಸಙ್ಕಲ್ಪಹೀನೋಽಹಂ ಸರ್ವವೃತ್ತಿವಿವರ್ಜಿತಃ ।
• ಅಮೃತೋಽಹಮಜೋ ನಿತ್ಯಂ ಮೃತಿಭೀತಿರತೀತಿಕಃ ॥ ೨೯॥
• ಸರ್ವಕಲ್ಯಾಣರೂಪೋಽಹಂ ಸರ್ವದಾ ಪ್ರಿಯರೂಪವಾನ್ ।
• ಸಮಲಾಙ್ಗೋ ಮಲಾತೀತಃ ಸರ್ವದಾಹಂ ಸದಾನುಗಃ ॥ ೩೦॥
• ಅಪರಿಚ್ಛಿನ್ನಸನ್ಮಾತ್ರಂ ಸತ್ಯಜ್ಞಾನಸ್ವರೂಪವಾನ್ ।
• ನಾದಾನ್ತರೋಽಹಂ ನಾದೋಽಹಂ ನಾಮರೂಪವಿವರ್ಜಿತಃ ॥ ೩೧॥
• ಅತ್ಯನ್ತಾಭಿನ್ನಹೀನೋಽಹಮಾದಿಮಧ್ಯಾನ್ತವರ್ಜಿತಃ ।
• ಏವಂ ನಿತ್ಯಂ ದೃಢಾಭ್ಯಾಸ ಏವಂ ಸ್ವಾನುಭವೇನ ಚ ॥ ೩೨॥
• ಏವಮೇವ ಹಿ ನಿತ್ಯಾತ್ಮಭಾವನೇನ ಸುಖೀ ಭವ ।
• ಏವಮಾತ್ಮಾ ಸುಖಂ ಪ್ರಾಪ್ತಃ ಪುನರ್ಜನ್ಮ ನ ಸಂಭವೇತ್ ॥ ೩೩॥
• ಸದ್ಯೋ ಮುಕ್ತೋ ಭವೇದ್ಬ್ರಹ್ಮಾಕಾರೇಣ ಪರಿತಿಷ್ಠತಿ ।
• ಆತ್ಮಾಕಾರಮಿದಂ ವಿಶ್ವಮಾತ್ಮಾಕಾರಮಹಂ ಮಹತ್ ॥ ೩೪॥
• ಆತ್ಮೈವ ನಾನ್ಯದ್ಭೂತಂ ವಾ ಆತ್ಮೈವ ಮನ ಏವ ಹಿ ।
• ಆತ್ಮೈವ ಚಿತ್ತವದ್ಭಾತಿ ಆತ್ಮೈವ ಸ್ಮೃತಿವತ್ ಕ್ವಚಿತ್ ॥ ೩೫॥
• ಆತ್ಮೈವ ವೃತ್ತಿವದ್ಭಾತಿ ಆತ್ಮೈವ ಕ್ರೋಧವತ್ ಸದಾ ।var was ವೃತ್ತಿಮದ್ಭಾತಿ
• ಆತ್ಮೈವ ಶ್ರವಣಂ ತದ್ವದಾತ್ಮೈವ ಮನನಂ ಚ ತತ್ ॥ ೩೬॥
• ಆತ್ಮೈವೋಪಕ್ರಮಂ ನಿತ್ಯಮುಪಸಂಹಾರಮಾತ್ಮವತ್ ।
• ಆತ್ಮೈವಾಭ್ಯಾಂ ಸಮಂ ನಿತ್ಯಮಾತ್ಮೈವಾಪೂರ್ವತಾಫಲಮ್ ॥ ೩೭॥
• ಅರ್ಥವಾದವದಾತ್ಮಾ ಹಿ ಪರಮಾತ್ಮೋಪಪತ್ತಿ ಹಿ ।
• ಇಚ್ಛಾ ಪ್ರಾರಭ್ಯವದ್ಬ್ರಹ್ಮ ಇಚ್ಛಾಮಾರಭ್ಯವತ್ ಪರಃ ॥ ೩೮॥var was ಪ್ರಾರಬ್ಧವದ್
• ಪರೇಚ್ಛಾರಬ್ಧವದ್ಬ್ರಹ್ಮಾ ಇಚ್ಛಾಶಕ್ತಿಶ್ಚಿದೇವ ಹಿ ।
• ಅನಿಚ್ಛಾಶಕ್ತಿರಾತ್ಮೈವ ಪರೇಚ್ಛಾಶಕ್ತಿರವ್ಯಯಃ ॥ ೩೯॥
• ಪರಮಾತ್ಮೈವಾಧಿಕಾರೋ ವಿಷಯಂ ಪರಮಾತ್ಮನಃ ।
• ಸಂಬನ್ಧಂ ಪರಮಾತ್ಮೈವ ಪ್ರಯೋಜನಂ ಪರಾತ್ಮಕಮ್ ॥ ೪೦॥
• ಬ್ರಹ್ಮೈವ ಪರಮಂ ಸಙ್ಗಂ ಕರ್ಮಜಂ ಬ್ರಹ್ಮ ಸಙ್ಗಮಮ್ ।
• ಬ್ರಹ್ಮೈವ ಭ್ರಾನ್ತಿಜಂ ಭಾತಿ ದ್ವನ್ದ್ವಂ ಬ್ರಹ್ಮೈವ ನಾನ್ಯತಃ ॥ ೪೧॥
• ಸರ್ವಂ ಬ್ರಹ್ಮೇತಿ ನಿಶ್ಚಿತ್ಯ ಸದ್ಯ ಏವ ವಿಮೋಕ್ಷದಮ್ ।
• ಸವಿಕಲ್ಪಸಮಾಧಿಸ್ಥಂ ನಿರ್ವಿಕಲ್ಪಸಮಾಧಿ ಹಿ ॥ ೪೨॥
• ಶಬ್ದಾನುವಿದ್ಧಂ ಬ್ರಹ್ಮೈವ ಬ್ರಹ್ಮ ದೃಶ್ಯಾನುವಿದ್ಧಕಮ್ ।
• ಬ್ರಹ್ಮೈವಾದಿಸಮಾಧಿಶ್ಚ ತನ್ಮಧ್ಯಮಸಮಾಧಿಕಮ್ ॥ ೪೩॥
• ಬ್ರಹ್ಮೈವ ನಿಶ್ಚಯಂ ಶೂನ್ಯಂ ತದುಕ್ತಮಸಮಾಧಿಕಮ್ ।
• ದೇಹಾಭಿಮಾನರಹಿತಂ ತದ್ವೈರಾಗ್ಯಸಮಾಧಿಕಮ್ ॥ ೪೪॥
• ಏತದ್ಭಾವನಯಾ ಶಾನ್ತಂ ಜೀವನ್ಮುಕ್ತಸಮಾಧಿಕಃ ।
• ಅತ್ಯನ್ತಂ ಸರ್ವಶಾನ್ತತ್ವಂ ದೇಹೋ ಮುಕ್ತಸಮಾಧಿಕಮ್ ॥ ೪೫॥
• ಏತದಭ್ಯಾಸಿನಾಂ ಪ್ರೋಕ್ತಂ ಸರ್ವಂ ಚೈತತ್ಸಮನ್ವಿತಮ್ ।
• ಸರ್ವಂ ವಿಸ್ಮೃತ್ಯ ವಿಸ್ಮೃತ್ಯ ತ್ಯಕ್ತ್ವಾ ತ್ಯಕ್ತ್ವಾ ಪುನಃ ಪುನಃ ॥ ೪೬॥
• ಸರ್ವವೃತ್ತಿಂ ಚ ಶೂನ್ಯೇನ ಸ್ಥಾಸ್ಯಾಮೀತಿ ವಿಮುಚ್ಯ ಹಿ ।
• ನ ಸ್ಥಾಸ್ಯಾಮೀತಿ ವಿಸ್ಮೃತ್ಯ ಭಾಸ್ಯಾಮೀತಿ ಚ ವಿಸ್ಮರ ॥ ೪೭॥
• ಚೈತನ್ಯೋಽಹಮಿತಿ ತ್ಯಕ್ತ್ವಾ ಸನ್ಮಾತ್ರೋಽಹಮಿತಿ ತ್ಯಜ ।
• ತ್ಯಜನಂ ಚ ಪರಿತ್ಯಜ್ಯ ಭಾವನಂ ಚ ಪರಿತ್ಯಜ ॥ ೪೮॥
• ಸರ್ವಂ ತ್ಯಕ್ತ್ವಾ ಮನಃ ಕ್ಷಿಪ್ರಂ ಸ್ಮರಣಂ ಚ ಪರಿತ್ಯಜ ।
• ಸ್ಮರಣಂ ಕಿಞ್ಚಿದೇವಾತ್ರ ಮಹಾಸಂಸಾರಸಾಗರಮ್ ॥ ೪೯॥
• ಸ್ಮರಣಂ ಕಿಞ್ಚಿದೇವಾತ್ರ ಮಹಾದುಃಖಂ ಭವೇತ್ ತದಾ ।
• ಮಹಾದೋಷಂ ಭವಂ ಬನ್ಧಂ ಚಿತ್ತಜನ್ಮ ಶತಂ ಮನಃ ॥ ೫೦॥
• ಪ್ರಾರಬ್ಧಂ ಹೃದಯಗ್ರನ್ಥಿ ಬ್ರಹ್ಮಹತ್ಯಾದಿ ಪಾತಕಮ್ ।
• ಸ್ಮರಣಂ ಚೈವಮೇವೇಹ ಬನ್ಧಮೋಕ್ಷಸ್ಯ ಕಾರಣಮ್ ॥ ೫೧॥
• ಅಹಂ ಬ್ರಹ್ಮಪ್ರಕರಣಂ ಸರ್ವದುಃಖವಿನಾಶಕಮ್ ।
• ಸರ್ವಪ್ರಪಞ್ಚಶಮನಂ ಸದ್ಯೋ ಮೋಕ್ಷಪ್ರದಂ ಸದಾ ।
• ಏತಚ್ಛ್ರವಣಮಾತ್ರೇಣ ಬ್ರಹ್ಮೈವ ಭವತಿ ಸ್ವಯಮ್ ॥ ೫೨॥
• ಭಕ್ತ್ಯಾ ಪದ್ಮದಲಾಕ್ಷಪೂಜಿತಪದಧ್ಯಾನಾನುವೃತ್ತ್ಯಾ ಮನಃ
• ಸ್ವಾನ್ತಾನನ್ತಪಥಪ್ರಚಾರವಿಧುರಂ ಮುಕ್ತ್ಯೈ ಭವೇನ್ಮಾನಸಮ್ ।
• ಸಙ್ಕಲ್ಪೋಜ್ಝಿತಮೇತದಲ್ಪಸುಮಹಾಶೀಲೋ ದಯಾಮ್ಭೋನಿಧೌ
• ಕಶ್ಚಿತ್ ಸ್ಯಾಚ್ಛಿವಭಕ್ತಧುರ್ಯಸುಮಹಾಶಾನ್ತಃ ಶಿವಪ್ರೇಮತಃ ॥ ೫೩॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಅಹಂ ಬ್ರಹ್ಮಪ್ರಕರಣನಿರೂಪಣಂ ನಾಮ ಚತುರ್ವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com