Ribhu Gita - Siva Rahasya Purana Amsha 6

ಋಭುಗೀತಾ ೩೩ ॥ ಸಚ್ಚಿದಾನನ್ದ ರೂಪತಾ ಪ್ರಕರಣಮ್ ॥

ಋಭುಃ -

ವಕ್ಷ್ಯೇ ಪರಂ ಬ್ರಹ್ಮಮಾತ್ರಮನುತ್ಪನ್ನಮಿದಂ ಜಗತ್ ।
ಸತ್ಪದಾನನ್ದಮಾತ್ರೋಽಹಮನುತ್ಪನ್ನಮಿದಂ ಜಗತ್ ॥ ೧॥
ಆತ್ಮೈವಾಹಂ ಪರಂ ಬ್ರಹ್ಮ ನಾನ್ಯತ್ ಸಂಸಾರದೃಷ್ಟಯಃ ।
ಸತ್ಪದಾನನ್ದಮಾತ್ರೋಽಹಮನುತ್ಪನ್ನಮಿದಂ ಜಗತ್ ॥ ೨॥
ಸತ್ಪದಾನನ್ದಮಾತ್ರೋಽಹಂ ಚಿತ್ಪದಾನನ್ದವಿಗ್ರಹಮ್ ।
ಅಹಮೇವಾಹಮೇವೈಕಮಹಮೇವ ಪರಾತ್ ಪರಃ ॥ ೩॥
ಸಚ್ಚಿದಾನದಮೇವೈಕಮಹಂ ಬ್ರಹ್ಮೈವ ಕೇವಲಮ್ ।
ಅಹಮಸ್ಮಿ ಸದಾ ಭಾಮಿ ಏವಂ ರೂಪಂ ಕುತೋಽಪ್ಯಸತ್ ॥ ೪॥
ತ್ವಮಿತ್ಯೇವಂ ಪರಂ ಬ್ರಹ್ಮ ಚಿನ್ಮಯಾನನ್ದರೂಪವಾನ್ ।
ಚಿದಾಕಾರಂ ಚಿದಾಕಾಶಂ ಚಿದೇವ ಪರಮಂ ಸುಖಮ್ ॥ ೫॥
ಆತ್ಮೈವಾಹಮಸನ್ನಾಹಂ ಕೂಟಸ್ಥೋಽಹಂ ಗುರುಃ ಪರಃ ।
ಕಾಲಂ ನಾಸ್ತಿ ಜಗನ್ನಾಸ್ತಿ ಕಲ್ಮಷತ್ವಾನುಭಾವನಮ್ ॥ ೬॥
ಅಹಮೇವ ಪರಂ ಬ್ರಹ್ಮ ಅಹಮೇವ ಸದಾ ಶಿವಃ ।
ಶುದ್ಧಚೈತನ್ಯ ಏವಾಹಂ ಶುದ್ಧಸತ್ವಾನುಭಾವನಃ ॥ ೭॥
ಅದ್ವಯಾನನ್ದಮಾತ್ರೋಽಹಮವ್ಯಯೋಽಹಂ ಮಹಾನಹಮ್ ।
ಸರ್ವಂ ಬ್ರಹ್ಮೈವ ಸತತಂ ಸರ್ವಂ ಬ್ರಹ್ಮೈವ ನಿರ್ಮಲಃ ॥ ೮॥
ಸರ್ವಂ ಬ್ರಹ್ಮೈವ ನಾನ್ಯೋಽಸ್ತಿ ಸರ್ವಂ ಬ್ರಹ್ಮೈವ ಚೇತನಃ ।
ಸರ್ವಪ್ರಕಾಶರೂಪೋಽಹಂ ಸರ್ವಪ್ರಿಯಮನೋ ಹ್ಯಹಮ್ ॥ ೯॥
ಏಕಾನ್ತೈಕಪ್ರಕಾಶೋಽಹಂ ಸಿದ್ಧಾಸಿದ್ಧವಿವರ್ಜಿತಃ ।
ಸರ್ವಾನ್ತರ್ಯಾಮಿರೂಪೋಽಹಂ ಸರ್ವಸಾಕ್ಷಿತ್ವಲಕ್ಷಣಮ್ ॥ ೧೦॥
ಶಮೋ ವಿಚಾರಸನ್ತೋಷರೂಪೋಽಹಮಿತಿ ನಿಶ್ಚಯಃ ।
ಪರಮಾತ್ಮಾ ಪರಂ ಜ್ಯೋತಿಃ ಪರಂ ಪರವಿವರ್ಜಿತಃ ॥ ೧೧॥
ಪರಿಪೂರ್ಣಸ್ವರೂಪೋಽಹಂ ಪರಮಾತ್ಮಾಽಹಮಚ್ಯುತಃ ।
ಸರ್ವವೇದಸ್ವರೂಪೋಽಹಂ ಸರ್ವಶಾಸ್ತ್ರಸ್ಯ ನಿರ್ಣಯಃ ॥ ೧೨॥
ಲೋಕಾನನ್ದಸ್ವರೂಪೋಽಹಂ ಮುಖ್ಯಾನನ್ದಸ್ಯ ನಿರ್ಣಯಃ ।
ಸರ್ವಂ ಬ್ರಹ್ಮೈವ ಭೂರ್ನಾಸ್ತಿ ಸರ್ವಂ ಬ್ರಹ್ಮೈವ ಕಾರಣಮ್ ॥ ೧೩॥
ಸರ್ವಂ ಬ್ರಹ್ಮೈವ ನಾಕಾರ್ಯಂ ಸರ್ವಂ ಬ್ರಹ್ಮ ಸ್ವಯಂ ವರಃ ।
ನಿತ್ಯಾಕ್ಷರೋಽಹಂ ನಿತ್ಯೋಽಹಂ ಸರ್ವಕಲ್ಯಾಣಕಾರಕಮ್ ॥ ೧೪॥
ಸತ್ಯಜ್ಞಾನಪ್ರಕಾಶೋಽಹಂ ಮುಖ್ಯವಿಜ್ಞಾನವಿಗ್ರಹಃ ।
ತುರ್ಯಾತುರ್ಯಪ್ರಕಾಶೋಽಹಂ ಸಿದ್ಧಾಸಿದ್ಧಾದಿವರ್ಜಿತಃ ॥ ೧೫॥
ಸರ್ವಂ ಬ್ರಹ್ಮೈವ ಸತತಂ ಸರ್ವಂ ಬ್ರಹ್ಮ ನಿರನ್ತರಮ್ ।
ಸರ್ವಂ ಬ್ರಹ್ಮ ಚಿದಾಕಾಶಂ ನಿತ್ಯಬ್ರಹ್ಮ ನಿರಞ್ಜನಮ್ ॥ ೧೬॥
ಸರ್ವಂ ಬ್ರಹ್ಮ ಗುಣಾತೀತಂ ಸರ್ವಂ ಬ್ರಹ್ಮೈವ ಕೇವಲಮ್ ।
ಸರ್ವಂ ಬ್ರಹ್ಮೈವ ಇತ್ಯೇವಂ ನಿಶ್ಚಯಂ ಕುರು ಸರ್ವದಾ ॥ ೧೭॥
ಬ್ರಹ್ಮೈವ ಸರ್ವಮಿತ್ಯೇವಂ ಸರ್ವದಾ ದೃಢನಿಶ್ಚಯಃ ।
ಸರ್ವಂ ಬ್ರಹ್ಮೈವ ಇತ್ಯೇವಂ ನಿಶ್ಚಯಿತ್ವಾ ಸುಖೀ ಭವ ॥ ೧೮॥
ಸರ್ವಂ ಬ್ರಹ್ಮೈವ ಸತತಂ ಭಾವಾಭಾವೌ ಚಿದೇವ ಹಿ ।
ದ್ವೈತಾದ್ವೈತವಿವಾದೋಽಯಂ ನಾಸ್ತಿ ನಾಸ್ತಿ ನ ಸಂಶಯಃ ॥ ೧೯॥
ಸರ್ವವಿಜ್ಞಾನಮಾತ್ರೋಽಹಂ ಸರ್ವಂ ಬ್ರಹ್ಮೇತಿ ನಿಶ್ಚಯಃ ।
ಗುಹ್ಯಾದ್ಗುಹ್ಯತರಂ ಸೋಽಹಂ ಗುಣಾತೀತೋಽಹಮದ್ವಯಃ ॥ ೨೦॥
ಅನ್ವಯವ್ಯತಿರೇಕಂ ಚ ಕಾರ್ಯಾಕಾರ್ಯಂ ವಿಶೋಧಯ ।
ಸಚ್ಚಿದಾನನ್ದರೂಪೋಽಹಮನುತ್ಪನ್ನಮಿದಂ ಜಗತ್ ॥ ೨೧॥
ಬ್ರಹ್ಮೈವ ಸರ್ವಮೇವೇದಂ ಚಿದಾಕಾಶಮಿದಂ ಜಗತ್ ।
ಬ್ರಹ್ಮೈವ ಪರಮಾನನ್ದಂ ಆಕಾಶಸದೃಶಂ ವಿಭು ॥ ೨೨॥
ಬ್ರಹ್ಮೈವ ಸಚ್ಚಿದಾನನ್ದಂ ಸದಾ ವಾಚಾಮಗೋಚರಮ್ ।
ಬ್ರಹ್ಮೈವ ಸರ್ವಮೇವೇದಮಸ್ತಿ ನಾಸ್ತೀತಿ ಕೇಚನ ॥ ೨೩॥
ಆನನ್ದಭಾವನಾ ಕಿಞ್ಚಿತ್ ಸದಸನ್ಮಾತ್ರ ಏವ ಹಿ ।
ಬ್ರಹ್ಮೈವ ಸರ್ವಮೇವೇದಂ ಸದಾ ಸನ್ಮಾತ್ರಮೇವ ಹಿ ॥ ೨೪॥
ಬ್ರಹ್ಮೈವ ಸರ್ವಮೇವದಂ ಚಿದ್ಘನಾನನ್ದವಿಗ್ರಹಮ್ ।
ಬ್ರಹ್ಮೈವ ಸಚ್ಚ ಸತ್ಯಂ ಚ ಸನಾತನಮಹಂ ಮಹತ್ ॥ ೨೫॥
ಬ್ರಹ್ಮೈವ ಸಚ್ಚಿದಾನನ್ದಂ ಓತಪ್ರೋತೇವ ತಿಷ್ಠತಿ ।
ಬ್ರಹ್ಮೈವ ಸಚ್ಚಿದಾನನ್ದಂ ಸರ್ವಾಕಾರಂ ಸನಾತನಮ್ ॥ ೨೬॥
ಬ್ರಹ್ಮೈವ ಸಚ್ಚಿದಾನನ್ದಂ ಪರಮಾನದಮವ್ಯಯಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಮಾಯಾತೀತಂ ನಿರಞ್ಜನಮ್ ॥ ೨೭॥
ಬ್ರಹ್ಮೈವ ಸಚ್ಚಿದಾನನ್ದಂ ಸತ್ತಾಮಾತ್ರಂ ಸುಖಾತ್ ಸುಖಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಚಿನ್ಮಾತ್ರೈಕಸ್ವರೂಪಕಮ್ ॥ ೨೮॥
ಬ್ರಹ್ಮೈವ ಸಚ್ಚಿದಾನನ್ದಂ ಸರ್ವಭೇದವಿವರ್ಜಿತಮ್ ।
ಸಚ್ಚಿದಾನನ್ದಂ ಬ್ರಹ್ಮೈವ ನಾನಾಕಾರಮಿವ ಸ್ಥಿತಮ್ ॥ ೨೯॥
ಬ್ರಹ್ಮೈವ ಸಚ್ಚಿದಾನನ್ದಂ ಕರ್ತಾ ಚಾವಸರೋಽಸ್ತಿ ಹಿ ।
ಸಚ್ಚಿದಾನದಂ ಬ್ರಹ್ಮೈವ ಪರಂ ಜ್ಯೋತಿಃ ಸ್ವರೂಪಕಮ್ ॥ ೩೦॥
ಬ್ರಹ್ಮೈವ ಸಚ್ಚಿದಾನನ್ದಂ ನಿತ್ಯನಿಶ್ಚಲಮವ್ಯಯಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ವಾಚಾವಧಿರಸಾವಯಮ್ ॥ ೩೧॥
ಬ್ರಹ್ಮೈವ ಸಚ್ಚಿದಾನನ್ದಂ ಸ್ವಯಮೇವ ಸ್ವಯಂ ಸದಾ ।
ಬ್ರಹ್ಮೈವ ಸಚ್ಚಿದಾನನ್ದಂ ನ ಕರೋತಿ ನ ತಿಷ್ಠತಿ ॥ ೩೨॥
ಬ್ರಹ್ಮೈವ ಸಚ್ಚಿದಾನನ್ದಂ ನ ಗಚ್ಛತಿ ನ ತಿಷ್ಠತಿ ।
ಬ್ರಹ್ಮೈವ ಸಚ್ಚಿದಾನನ್ದಂ ಬ್ರಹ್ಮಣೋಽನ್ಯನ್ನ ಕಿಞ್ಚನ ॥ ೩೩॥
ಬ್ರಹ್ಮೈವ ಸಚ್ಚಿದಾನನ್ದಂ ನ ಶುಕ್ಲಂ ನ ಚ ಕೃಷ್ಣಕಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಸರ್ವಾಧಿಷ್ಠಾನಮವ್ಯಯಮ್ ॥ ೩೪॥
ಬ್ರಹ್ಮೈವ ಸಚ್ಚಿದಾನನ್ದಂ ನ ತೂಷ್ಣೀಂ ನ ವಿಭಾಷಣಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಸತ್ತ್ವಂ ನಾಹಂ ನ ಕಿಞ್ಚನ ॥ ೩೫॥
ಬ್ರಹ್ಮೈವ ಸಚ್ಚಿದಾನನ್ದಂ ಪರಾತ್ಪರಮನುದ್ಭವಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ತತ್ತ್ವಾತೀತಂ ಮಹೋತ್ಸವಮ್ ॥ ೩೬॥
ಬ್ರಹ್ಮೈವ ಸಚ್ಚಿದಾನನ್ದಂ ಪರಮಾಕಾಶಮಾತತಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಸರ್ವದಾ ಗುರುರೂಪಕಮ್ ॥ ೩೭॥
ಬ್ರಹ್ಮೈವ ಸಚ್ಚಿದಾನನ್ದಂ ಸದಾ ನಿರ್ಮಲವಿಗ್ರಹಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಶುದ್ಧಚೈತನ್ಯಮಾತತಮ್ ॥ ೩೮॥
ಬ್ರಹ್ಮೈವ ಸಚ್ಚಿದಾನನ್ದಂ ಸ್ವಪ್ರಕಾಶಾತ್ಮರೂಪಕಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ನಿಶ್ಚಯಂ ಚಾತ್ಮಕಾರಣಮ್ ॥ ೩೯॥
ಬ್ರಹ್ಮೈವ ಸಚ್ಚಿದಾನನ್ದಂ ಸ್ವಯಮೇವ ಪ್ರಕಾಶತೇ ।
ಬ್ರಹ್ಮೈವ ಸಚ್ಚಿದಾನನ್ದಂ ನಾನಾಕಾರ ಇತಿ ಸ್ಥಿತಮ್ ॥ ೪೦॥
ಬ್ರಹ್ಮೈವ ಸಚ್ಚಿದಾಕಾರಂ ಭ್ರಾನ್ತಾಧಿಷ್ಠಾನರೂಪಕಮ್ ।
ಬ್ರಹ್ಮೈವ ಸಚ್ಚಿದಾನನ್ದಂ ಸರ್ವಂ ನಾಸ್ತಿ ನ ಮೇ ಸ್ಥಿತಮ್ ॥ ೪೧॥
ವಾಚಾಮಗೋಚರಂ ಬ್ರಹ್ಮ ಸಚ್ಚಿದಾನದವಿಗ್ರಹಮ್ ।
ಸಚ್ಚಿದಾನನ್ದರೂಪೋಽಹಮನುತ್ಪನ್ನಮಿದಮ್ ಜಗತ್ ॥ ೪೨॥
ಬ್ರಹ್ಮೈವೇದಂ ಸದಾ ಸತ್ಯಂ ನಿತ್ಯಮುಕ್ತಂ ನಿರಞ್ಜನಮ್ ।
ಸಚ್ಚಿದಾನನ್ದಂ ಬ್ರಹ್ಮೈವ ಏಕಮೇವ ಸದಾ ಸುಖಮ್ ॥ ೪೩॥
ಸಚ್ಚಿದಾನನ್ದಂ ಬ್ರಹ್ಮೈವ ಪೂರ್ಣಾತ್ ಪೂರ್ಣತರಂ ಮಹತ್ ।
ಸಚ್ಚಿದಾನನ್ದಂ ಬ್ರಹ್ಮೈವ ಸರ್ವವ್ಯಾಪಕಮೀಶ್ವರಮ್ ॥ ೪೪॥
ಸಚ್ಚಿದಾನನ್ದಂ ಬ್ರಹ್ಮೈವ ನಾಮರೂಪಪ್ರಭಾಸ್ವರಮ್ ।
ಸಚ್ಚಿದಾನನ್ದಂ ಬ್ರಹ್ಮೈವ ಅನನ್ತಾನನ್ದನಿರ್ಮಲಮ್ ॥ ೪೫॥
ಸಚ್ಚಿದಾನನ್ದಂ ಬ್ರಹ್ಮೈವ ಪರಮಾನನ್ದದಾಯಕಮ್ ।
ಸಚ್ಚಿದಾನನ್ದಂ ಬ್ರಹ್ಮೈವ ಸನ್ಮಾತ್ರಂ ಸದಸತ್ಪರಮ್ ॥ ೪೬॥
ಸಚ್ಚಿದಾನನ್ದಂ ಬ್ರಹ್ಮೈವ ಸರ್ವೇಷಾಂ ಪರಮವ್ಯಯಮ್ ।
ಸಚ್ಚಿದಾನನ್ದಂ ಬ್ರಹ್ಮೈವ ಮೋಕ್ಷರೂಪಂ ಶುಭಾಶುಭಮ್ ॥ ೪೭॥
ಸಚ್ಚಿದಾನನ್ದಂ ಬ್ರಹ್ಮೈವ ಪರಿಚ್ಛಿನ್ನಂ ನ ಹಿ ಕ್ವಚಿತ್ ।
ಬ್ರಹ್ಮೈವ ಸರ್ವಮೇವೇದಂ ಶುದ್ಧಬುದ್ಧಮಲೇಪಕಮ್ ॥ ೪೮॥
ಸಚ್ಚಿದಾನನ್ದರೂಪೋಽಹಮನುತ್ಪನ್ನಮಿದಂ ಜಗತ್ ।
ಏತತ್ ಪ್ರಕರಣಂ ಸತ್ಯಂ ಸದ್ಯೋಮುಕ್ತಿಪ್ರದಾಯಕಮ್ ॥ ೪೯॥
ಸರ್ವದುಃಖಕ್ಷಯಕರಂ ಸರ್ವವಿಜ್ಞಾನದಾಯಕಮ್ ।
ನಿತ್ಯಾನನ್ದಕರಂ ಸತ್ಯಂ ಶಾನ್ತಿದಾನ್ತಿಪ್ರದಾಯಕಮ್ ॥ ೫೦॥
ಯಸ್ತ್ವನ್ತಕಾನ್ತಕಮಹೇಶ್ವರಪಾದಪದ್ಮ-
ಲೋಲಮ್ಬಸಪ್ರಭಹೃದಾ ಪರಿಶೀಲಕಶ್ಚ ।
ವೃನ್ದಾರವೃನ್ದವಿನತಾಮಲದಿವ್ಯಪಾದೋ
ಭಾವೋ ಭವೋದ್ಭವಕೃಪಾವಶತೋ ಭವೇಚ್ಚ ॥ ೫೧॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸಚ್ಚಿದಾನನ್ದರೂಪತಾಪ್ರಕರಣಂ ನಾಮ ತ್ರಯಸ್ತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com