Ribhu Gita - Siva Rahasya Purana Amsha 6

ಋಭುಗೀತಾ ೧೫ ॥ ಬ್ರಹ್ಮೈವ ಸರ್ವಂ ಪ್ರಕರಣ ನಿರೂಪಣಮ್ ॥

ಋಭುಃ -

ಮಹಾರಹಸ್ಯಂ ವಕ್ಷ್ಯಾಮಿ ಗುಹ್ಯಾತ್ ಗುಹ್ಯತರಂ ಪುನಃ ।
ಅತ್ಯನ್ತದುರ್ಲಭಂ ಲೋಕೇ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧॥
ಬ್ರಹ್ಮಮಾತ್ರಮಿದಂ ಸರ್ವಂ ಬ್ರಹ್ಮಮಾತ್ರಮಸನ್ನ ಹಿ ।
ಬ್ರಹ್ಮಮಾತ್ರಂ ಶ್ರುತಂ ಸರ್ವಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨॥
ಬ್ರಹ್ಮಮಾತ್ರಂ ಮಹಾಯನ್ತ್ರಂ ಬ್ರಹ್ಮಮಾತ್ರಂ ಕ್ರಿಯಾಫಲಮ್ ।
ಬ್ರಹ್ಮಮಾತ್ರಂ ಮಹಾವಾಕ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩॥
ಬ್ರಹ್ಮಮಾತ್ರಂ ಜಗತ್ಸರ್ವಂ ಬ್ರಹ್ಮಮಾತ್ರಂ ಜಡಾಜಡಮ್ ।
ಬ್ರಹ್ಮಮಾತ್ರಂ ಪರಂ ದೇಹಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪॥
ಬ್ರಹ್ಮಮಾತ್ರಂ ಗುಣಂ ಪ್ರೋಕ್ತಂ ಬ್ರಹ್ಮಮಾತ್ರಮಹಂ ಮಹತ್ ।
ಬ್ರಹ್ಮಮಾತ್ರಂ ಪರಂ ಬ್ರಹ್ಮ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫॥
ಬ್ರಹ್ಮಮಾತ್ರಮಿದಂ ವಸ್ತು ಬ್ರಹ್ಮಮಾತ್ರಂ ಸ ಚ ಪುಮಾನ್ ।
ಬ್ರಹ್ಮಮಾತ್ರಂ ಚ ಯತ್ ಕಿಞ್ಚಿತ್ ಸರ್ವಂ ಬ್ರಹ್ಮೈವ ಕೇವಲಮ್ ॥ ೬॥
ಬ್ರಹ್ಮಮಾತ್ರಮನನ್ತಾತ್ಮಾ ಬ್ರಹ್ಮಮಾತ್ರಂ ಪರಂ ಸುಖಮ್ ।
ಬ್ರಹ್ಮಮಾತ್ರಂ ಪರಂ ಜ್ಞಾನಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೭॥
ಬ್ರಹ್ಮಮಾತ್ರಂ ಪರಂ ಪಾರಂ ಬ್ರಹ್ಮಮಾತ್ರಂ ಪುರತ್ರಯಮ್ ।
ಬ್ರಹ್ಮಮಾತ್ರಮನೇಕತ್ವಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೮॥
ಬ್ರಹ್ಮೈವ ಕೇವಲಂ ಗನ್ಧಂ ಬ್ರಹ್ಮೈವ ಪರಮಂ ಪದಮ್ ।
ಬ್ರಹ್ಮೈವ ಕೇವಲಂ ಘ್ರಾಣಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೯॥
ಬ್ರಹ್ಮೈವ ಕೇವಲಂ ಸ್ಪರ್ಶಂ ಶಬ್ದಂ ಬ್ರಹ್ಮೈವ ಕೇವಲಮ್ ।
ಬ್ರಹ್ಮೈವ ಕೇವಲಂ ರೂಪಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೦॥
ಬ್ರಹ್ಮೈವ ಕೇವಲಂ ಲೋಕಂ ರಸೋ ಬ್ರಹ್ಮೈವ ಕೇವಲಮ್ ।
ಬ್ರಹ್ಮೈವ ಕೇವಲಂ ಚಿತ್ತಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೧॥
ತತ್ಪದಂ ಚ ಸದಾ ಬ್ರಹ್ಮ ತ್ವಂ ಪದಂ ಬ್ರಹ್ಮ ಏವ ಹಿ ।
ಅಸೀತ್ಯೇವ ಪದಂ ಬ್ರಹ್ಮ ಬ್ರಹ್ಮೈಕ್ಯಂ ಕೇವಲಮ್ ಸದಾ ॥ ೧೨॥
ಬ್ರಹ್ಮೈವ ಕೇವಲಂ ಗುಹ್ಯಂ ಬ್ರಹ್ಮ ಬಾಹ್ಯಂ ಚ ಕೇವಲಮ್ ।
ಬ್ರಹ್ಮೈವ ಕೇವಲಂ ನಿತ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೩॥
ಬ್ರಹ್ಮೈವ ತಜ್ಜಲಾನೀತಿ ಜಗದಾದ್ಯನ್ತಯೋಃ ಸ್ಥಿತಿಃ ।
ಬ್ರಹ್ಮೈವ ಜಗದಾದ್ಯನ್ತಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೪॥
ಬ್ರಹ್ಮೈವ ಚಾಸ್ತಿ ನಾಸ್ತೀತಿ ಬ್ರಹ್ಮೈವಾಹಂ ನ ಸಂಶಯಃ ।
ಬ್ರಹ್ಮೈವ ಸರ್ವಂ ಯತ್ ಕಿಞ್ಚಿತ್ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೫॥
ಬ್ರಹ್ಮೈವ ಜಾಗ್ರತ್ ಸರ್ವಂ ಹಿ ಬ್ರಹ್ಮಮಾತ್ರಮಹಂ ಪರಮ್ ।
ಬ್ರಹ್ಮೈವ ಸತ್ಯಮಸ್ತಿತ್ವಂ ಬ್ರಹ್ಮೈವ ತುರ್ಯಮುಚ್ಯತೇ ॥ ೧೬॥
ಬ್ರಹ್ಮೈವ ಸತ್ತಾ ಬ್ರಹ್ಮೈವ ಬ್ರಹ್ಮೈವ ಗುರುಭಾವನಮ್ ।
ಬ್ರಹ್ಮೈವ ಶಿಷ್ಯಸದ್ಭಾವಂ ಮೋಕ್ಷಂ ಬ್ರಹ್ಮೈವ ಕೇವಲಮ್ ॥ ೧೭॥
ಪೂರ್ವಾಪರಂ ಚ ಬ್ರಹ್ಮೈವ ಪೂರ್ಣಂ ಬ್ರಹ್ಮ ಸನಾತನಮ್ ।
ಬ್ರಹ್ಮೈವ ಕೇವಲಂ ಸಾಕ್ಷಾತ್ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೮॥
ಬ್ರಹ್ಮ ಸಚ್ಚಿತ್ಸುಖಂ ಬ್ರಹ್ಮ ಪೂರ್ಣಂ ಬ್ರಹ್ಮ ಸನಾತನಮ್ ।
ಬ್ರಹ್ಮೈವ ಕೇವಲಂ ಸಾಕ್ಷಾತ್ ಸರ್ವಂ ಬ್ರಹ್ಮೈವ ಕೇವಲಮ್ ॥ ೧೯॥
ಬ್ರಹ್ಮೈವ ಕೇವಲಂ ಸಚ್ಚಿತ್ ಸುಖಂ ಬ್ರಹ್ಮೈವ ಕೇವಲಮ್ ।
ಆನನ್ದಂ ಬ್ರಹ್ಮ ಸರ್ವತ್ರ ಪ್ರಿಯರೂಪಮವಸ್ಥಿತಮ್ ॥ ೨೦॥
ಶುಭವಾಸನಯಾ ಜೀವಂ ಶಿವವದ್ಭಾತಿ ಸರ್ವದಾ ।
ಪಾಪವಾಸನಯಾ ಜೀವೋ ನರಕಂ ಭೋಜ್ಯವತ್ ಸ್ಥಿತಮ್ ॥ ೨೧॥
ಬ್ರಹ್ಮೈವೇನ್ದ್ರಿಯವದ್ಭಾನಂ ಬ್ರಹ್ಮೈವ ವಿಷಯಾದಿವತ್ ।
ಬ್ರಹ್ಮೈವ ವ್ಯವಹಾರಶ್ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೨॥
ಬ್ರಹ್ಮೈವ ಸರ್ವಮಾನನ್ದಂ ಬ್ರಹ್ಮೈವ ಜ್ಞಾನವಿಗ್ರಹಮ್ ।
ಬ್ರಹ್ಮೈವ ಮಾಯಾಕಾರ್ಯಾಖ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೩॥
ಬ್ರಹ್ಮೈವ ಯಜ್ಞಸನ್ಧಾನಂ ಬ್ರಹ್ಮೈವ ಹೃದಯಾಮ್ಬರಮ್ ।
ಬ್ರಹ್ಮೈವ ಮೋಕ್ಷಸಾರಾಖ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೪॥
ಬ್ರಹ್ಮೈವ ಶುದ್ಧಾಶುದ್ಧಂ ಚ ಸರ್ವಂ ಬ್ರಹ್ಮೈವ ಕಾರಣಮ್ ।
ಬ್ರಹ್ಮೈವ ಕಾರ್ಯಂ ಭೂಲೋಕಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೫॥
ಬ್ರಹ್ಮೈವ ನಿತ್ಯತೃಪ್ತಾತ್ಮಾ ಬ್ರಹ್ಮೈವ ಸಕಲಂ ದಿನಮ್ ।
ಬ್ರಹ್ಮೈವ ತೂಷ್ಣೀಂ ಭೂತಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೬॥
ಬ್ರಹ್ಮೈವ ವೇದಸಾರಾರ್ಥಃ ಬ್ರಹ್ಮೈವ ಧ್ಯಾನಗೋಚರಮ್ ।
ಬ್ರಹ್ಮೈವ ಯೋಗಯೋಗಾಖ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೭॥
ನಾನಾರೂಪತ್ವಾದ್ ಬ್ರಹ್ಮ ಉಪಾಧಿತ್ವೇನ ದೃಶ್ಯತೇ ।
ಮಾಯಾಮಾತ್ರಮಿತಿ ಜ್ಞಾತ್ವಾ ವಸ್ತುತೋ ನಾಸ್ತಿ ತತ್ತ್ವತಃ ॥ ೨೮॥
ಬ್ರಹ್ಮೈವ ಲೋಕವದ್ಭಾತಿ ಬ್ರಹ್ಮೈವ ಜನವತ್ತಥಾ ।
ಬ್ರಹ್ಮೈವ ರೂಪವದ್ಭಾತಿ ವಸ್ತುತೋ ನಾಸ್ತಿ ಕಿಞ್ಚನ ॥ ೨೯॥
ಬ್ರಹ್ಮೈವ ದೇವತಾಕಾರಂ ಬ್ರಹ್ಮೈವ ಮುನಿಮಣ್ಡಲಮ್ ।
ಬ್ರಹ್ಮೈವ ಧ್ಯಾನರೂಪಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೦॥
ಬ್ರಹ್ಮೈವ ಜ್ಞಾನವಿಜ್ಞಾನಂ ಬ್ರಹ್ಮೈವ ಪರಮೇಶ್ವರಃ ।
ಬ್ರಹ್ಮೈವ ಶುದ್ಧಬುದ್ಧಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೧॥
ಬ್ರಹ್ಮೈವ ಪರಮಾನದಂ ಬ್ರಹ್ಮೈವ ವ್ಯಾಪಕಂ ಮಹತ್ ।
ಬ್ರಹ್ಮೈವ ಪರಮಾರ್ಥಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೨॥
ಬ್ರಹ್ಮೈವ ಯಜ್ಞರೂಪಂ ಚ ಬ್ರಹ್ಮ ಹವ್ಯಂ ಚ ಕೇವಲಮ್ ।
ಬ್ರಹ್ಮೈವ ಜೀವಭೂತಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೩॥
ಬ್ರಹ್ಮೈವ ಸಕಲಂ ಲೋಕಂ ಬ್ರಹ್ಮೈವ ಗುರುಶಿಷ್ಯಕಮ್ ।
ಬ್ರಹ್ಮೈವ ಸರ್ವಸಿದ್ಧಿಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೪॥
ಬ್ರಹ್ಮೈವ ಸರ್ವಮನ್ತ್ರಂ ಚ ಬ್ರಹ್ಮೈವ ಸಕಲಂ ಜಪಮ್ ।
ಬ್ರಹ್ಮೈವ ಸರ್ವಕಾರ್ಯಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೫॥
ಬ್ರಹ್ಮೈವ ಸರ್ವಶಾನ್ತತ್ವಂ ಬ್ರಹ್ಮೈವ ಹೃದಯಾನ್ತರಮ್ ।
ಬ್ರಹ್ಮೈವ ಸರ್ವಕೈವಲ್ಯಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೬॥
ಬ್ರಹ್ಮೈವಾಕ್ಷರಭಾವಞ್ಚ ಬ್ರಹ್ಮೈವಾಕ್ಷರಲಕ್ಷಣಮ್ ।
ಬ್ರಹ್ಮೈವ ಬ್ರಹ್ಮರೂಪಞ್ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೭॥
ಬ್ರಹ್ಮೈವ ಸತ್ಯಭವನಂ ಬ್ರಹ್ಮೈವಾಹಂ ನ ಸಂಶಯಃ ।
ಬ್ರಹ್ಮೈವ ತತ್ಪದಾರ್ಥಞ್ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೮॥
ಬ್ರಹ್ಮೈವಾಹಂಪದಾರ್ಥಞ್ಚ ಬ್ರಹ್ಮೈವ ಪರಮೇಶ್ವರಃ ।
ಬ್ರಹ್ಮೈವ ತ್ವಂಪದಾರ್ಥಞ್ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೩೯॥
ಬ್ರಹ್ಮೈವ ಯದ್ಯತ್ ಪರಮಂ ಬ್ರಹ್ಮೈವೇತಿ ಪರಾಯಣಮ್ ।
ಬ್ರಹ್ಮೈವ ಕಲನಾಭಾವಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೦॥
ಬ್ರಹ್ಮ ಸರ್ವಂ ನ ಸನ್ದೇಹೋ ಬ್ರಹ್ಮೈವ ತ್ವಂ ಸದಾಶಿವಃ ।
ಬ್ರಹ್ಮೈವೇದಂ ಜಗತ್ ಸರ್ವಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೧॥
ಬ್ರಹ್ಮೈವ ಸರ್ವಸುಲಭಂ ಬ್ರಹ್ಮೈವಾತ್ಮಾ ಸ್ವಯಂ ಸ್ವಯಮ್ ।
ಬ್ರಹ್ಮೈವ ಸುಖಮಾತ್ರತ್ವಾತ್ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೨॥
ಬ್ರಹ್ಮೈವ ಸರ್ವಂ ಬ್ರಹ್ಮೈವ ಬ್ರಹ್ಮಣೋಽನ್ಯದಸತ್ ಸದಾ ।
ಬ್ರಹ್ಮೈವ ಬ್ರಹ್ಮಮಾತ್ರಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೩॥
ಬ್ರಹ್ಮೈವ ಸರ್ವವಾಕ್ಯಾರ್ಥಃ ಬ್ರಹ್ಮೈವ ಪರಮಂ ಪದಮ್ ।
ಬ್ರಹ್ಮೈವ ಸತ್ಯಾಸತ್ಯಂ ಚ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೪॥
ಬ್ರಹ್ಮೈವೈಕಮನಾದ್ಯನ್ತಂ ಬ್ರಹ್ಮೈವೈಕಂ ನ ಸಂಶಯಃ ।
ಬ್ರಹ್ಮೈವೈಕಂ ಚಿದಾನನ್ದಃ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೫॥
ಬ್ರಹ್ಮೈವೈಕಂ ಸುಖಂ ನಿತ್ಯಂ ಬ್ರಹ್ಮೈವೈಕಂ ಪರಾಯಣಮ್ ।
ಬ್ರಹ್ಮೈವೈಕಂ ಪರಂ ಬ್ರಹ್ಮ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೬॥
ಬ್ರಹ್ಮೈವ ಚಿತ್ ಸ್ವಯಂ ಸ್ವಸ್ಥಂ ಬ್ರಹ್ಮೈವ ಗುಣವರ್ಜಿತಮ್ ।
ಬ್ರಹ್ಮೈವಾತ್ಯನ್ತಿಕಂ ಸರ್ವಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೭॥
ಬ್ರಹ್ಮೈವ ನಿರ್ಮಲಂ ಸರ್ವಂ ಬ್ರಹ್ಮೈವ ಸುಲಭಂ ಸದಾ ।
ಬ್ರಹ್ಮೈವ ಸತ್ಯಂ ಸತ್ಯಾನಾಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೮॥
ಬ್ರಹ್ಮೈವ ಸೌಖ್ಯಂ ಸೌಖ್ಯಂ ಚ ಬ್ರಹ್ಮೈವಾಹಂ ಸುಖಾತ್ಮಕಮ್ ।
ಬ್ರಹ್ಮೈವ ಸರ್ವದಾ ಪ್ರೋಕ್ತಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೪೯॥
ಬ್ರಹ್ಮೈವಮಖಿಲಂ ಬ್ರಹ್ಮ ಬ್ರಹ್ಮೈಕಂ ಸರ್ವಸಾಕ್ಷಿಕಮ್ ।
ಬ್ರಹ್ಮೈವ ಭೂರಿಭವನಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೦॥
ಬ್ರಹ್ಮೈವ ಪರಿಪೂರ್ಣಾತ್ಮಾ ಬ್ರಹ್ಮೈವಂ ಸಾರಮವ್ಯಯಮ್ ।
ಬ್ರಹ್ಮೈವ ಕಾರಣಂ ಮೂಲಂ ಬ್ರಹ್ಮೈವೈಕಂ ಪರಾಯಣಮ್ ॥ ೫೧॥
ಬ್ರಹ್ಮೈವ ಸರ್ವಭೂತಾತ್ಮಾ ಬ್ರಹ್ಮೈವ ಸುಖವಿಗ್ರಹಮ್ ।
ಬ್ರಹ್ಮೈವ ನಿತ್ಯತೃಪ್ತಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೨॥
ಬ್ರಹ್ಮೈವಾದ್ವೈತಮಾತ್ರಾತ್ಮಾ ಬ್ರಹ್ಮೈವಾಕಾಶವತ್ ಪ್ರಭುಃ ।
ಬ್ರಹ್ಮೈವ ಹೃದಯಾನನ್ದಃ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೩॥
ಬ್ರಹ್ಮಣೋಽನ್ಯತ್ ಪರಂ ನಾಸ್ತಿ ಬ್ರಹ್ಮಣೋಽನ್ಯಜ್ಜಗನ್ನ ಚ ।
ಬ್ರಹ್ಮಣೋಽನ್ಯದಹಂ ನಾಹಂ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೪॥
ಬ್ರಹ್ಮೈವಾನ್ಯಸುಖಂ ನಾಸ್ತಿ ಬ್ರಹ್ಮಣೋಽನ್ಯತ್ ಫಲಂ ನ ಹಿ ।
ಬ್ರಹ್ಮಣೋಽನ್ಯತ್ ತೃಣಂ ನಾಸ್ತಿ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೫॥
ಬ್ರಹ್ಮಣೋಽನ್ಯತ್ ಪದಂ ಮಿಥ್ಯಾ ಬ್ರಹ್ಮಣೋಽನ್ಯನ್ನ ಕಿಞ್ಚನ ।
ಬ್ರಹ್ಮಣೋಽನ್ಯಜ್ಜಗನ್ಮಿಥ್ಯಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೬॥
ಬ್ರಹ್ಮಣೋಽನ್ಯದಹಂ ಮಿಥ್ಯಾ ಬ್ರಹ್ಮಮಾತ್ರೋಹಮೇವ ಹಿ ।
ಬ್ರಹ್ಮಣೋಽನ್ಯೋ ಗುರುರ್ನಾಸ್ತಿ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೭॥
ಬ್ರಹ್ಮಣೋಽನ್ಯದಸತ್ ಕಾರ್ಯಂ ಬ್ರಹ್ಮಣೋಽನ್ಯದಸದ್ವಪುಃ ।
ಬ್ರಹ್ಮಣೋಽನ್ಯನ್ಮನೋ ನಾಸ್ತಿ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೮॥
ಬ್ರಹ್ಮಣೋಽನ್ಯಜ್ಜಗನ್ಮಿಥ್ಯಾ ಬ್ರಹ್ಮಣೋಽನ್ಯನ್ನ ಕಿಞ್ಚನ ।
ಬ್ರಹ್ಮಣೋಽನ್ಯನ್ನ ಚಾಹನ್ತಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೫೯॥
ಬ್ರಹ್ಮೈವ ಸರ್ವಮಿತ್ಯೇವಂ ಪ್ರೋಕ್ತಂ ಪ್ರಕರಣಂ ಮಯಾ ।
ಯಃ ಪಠೇತ್ ಶ್ರಾವಯೇತ್ ಸದ್ಯೋ ಬ್ರಹ್ಮೈವ ಭವತಿ ಸ್ವಯಮ್ ॥ ೬೦॥
ಅಸ್ತಿ ಬ್ರಹ್ಮೇತಿ ವೇದೇ ಇದಮಿದಮಖಿಲಂ ವೇದ ಸೋ ಸದ್ಭವೇತ್ ।
ಸಚ್ಚಾಸಚ್ಚ ಜಗತ್ತಥಾ ಶ್ರುತಿವಚೋ ಬ್ರಹ್ಮೈವ ತಜ್ಜಾದಿಕಮ್ ॥
ಯತೋ ವಿದ್ಯೈವೇದಂ ಪರಿಲುಠತಿ ಮೋಹೇನ ಜಗತಿ ।
ಅತೋ ವಿದ್ಯಾಪಾದೋ ಪರಿಭವತಿ ಬ್ರಹ್ಮೈವ ಹಿ ಸದಾ ॥ ೬೧॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಬ್ರಹ್ಮೈವ ಸರ್ವಂ ಪ್ರಕರಣನಿರೂಪಣಂ ನಾಮ ಪಞ್ಚದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com