ಋಭುಗೀತಾ ೪೫ ॥ ನಿದಾಧ-ಕೃತ-ಗುರು-ಸ್ತುತಿ ವರ್ಣನಮ್ ॥
ನಿದಾಘಃ -
- ಪುಣ್ಯೇ ಶಿವರಹಸ್ಯೇಽಸ್ಮಿನ್ನಿತಿಹಾಸೇ ಶಿವೋದಿತೇ ।
- ದೇವ್ಯೈ ಶಿವೇನ ಕಥಿತೇ ದೇವ್ಯಾ ಸ್ಕನ್ದಾಯ ಮೋದತಃ ॥ ೧॥
- ತದೇತಸ್ಮಿನ್ ಹಿ ಷಷ್ಠಾಂಶೇ ಷಡಾಸ್ಯಕಮಲೋದಿತೇ ।
- ಪಾರಮೇಶ್ವರವಿಜ್ಞಾನಂ ಶ್ರುತಮೇತನ್ಮಹಾಘಭಿತ್ ॥ ೨॥
- ಮಹಾಮಾಯಾತಮಸ್ತೋಮವಿನಿವಾರಣಭಾಸ್ಕರಮ್ ।
- ಅಸ್ಯಾಧ್ಯಾಯೈಕಕಥನಾದ್ ವಿಜ್ಞಾನಂ ಮಹದಶ್ನುತೇ ॥ ೩॥
- ಶ್ಲೋಕಸ್ಯ ಶ್ರವಣೇನಾಪಿ ಜೀವನ್ಮುಕ್ತೋ ನ ಸಂಶಯಃ ।
- ಏತದ್ಗ್ರನ್ಥಪ್ರವಕ್ತಾ ಹಿ ಷಣ್ಮುಖಃ ಶಿವ ಏವ ಹಿ ॥ ೪॥
- ಜೈಗೀಷವ್ಯೋ ಮಹಾಯೋಗೀ ಸ ಏವ ಶ್ರವಣೇಽರ್ಹತಿ ।
- ಭಸ್ಮರುದ್ರಾಕ್ಷಧೃಙ್ ನಿತ್ಯಂ ಸದಾ ಹ್ಯತ್ಯಾಶ್ರಮೀ ಮುನಿಃ ॥ ೫॥
- ಏತದ್ಗ್ರನ್ಥಪ್ರವಕ್ತಾ ಹಿ ಸ ಗುರುರ್ನಾತ್ರ ಸಂಶಯಃ ।
- ಏತದ್ಗ್ರನ್ಥಪ್ರವಕ್ತಾ ಹಿ ಪರಂ ಬ್ರಹ್ಮ ನ ಸಂಶಯಃ ॥ ೬॥
- ಏತದ್ಗ್ರನ್ಥಪ್ರವಕ್ತಾ ಹಿ ಶಿವ ಏವ ನ ಚಾಪರಃ ।
- ಏತದ್ಗ್ರನ್ಥಪ್ರವಕ್ತಾ ಹಿ ಸಾಕ್ಷಾದ್ದೇವೀ ನ ಸಂಶಯಃ ॥ ೭॥
- ಏತದ್ಗ್ರನ್ಥಪ್ರವಕ್ತಾ ಹಿ ಗಣೇಶೋ ನಾತ್ರ ಸಂಶಯಃ ।
- ಏತದ್ಗ್ರನ್ಥಪ್ರವಕ್ತಾ ಹಿ ಸ್ಕನ್ದಃ ಸ್ಕನ್ದಿತತಾರಕಃ ॥ ೮॥
- ಏತದ್ಗ್ರನ್ಥಪ್ರವಕ್ತಾ ಹಿ ನನ್ದಿಕೇಶೋ ನ ಸಂಶಯಃ ।
- ಏತದ್ಗ್ರನ್ಥಪ್ರವಕ್ತಾ ಹಿ ದತ್ತಾತ್ರೇಯೋ ಮುನಿಃ ಸ್ವಯಮ್ ॥ ೯॥
- ಏತದ್ಗ್ರನ್ಥಪ್ರವಕ್ತಾ ಹಿ ದಕ್ಷಿಣಾಮೂರ್ತಿರೇವ ಹಿ ।
- ಏತದ್ಗ್ರನ್ಥಾರ್ಥಕಥನೇ ಭಾವನೇ ಮುನಯಃ ಸುರಾಃ ॥ ೧೦॥
- ನ ಶಕ್ತಾ ಮುನಿಶಾರ್ದೂಲ ತ್ವದೃತೇಽಹಂ ಶಿವಂ ಶಪೇ ।
- ಏತದ್ಗ್ರನ್ಥಾರ್ಥವಕ್ತಾರಂ ಗುರುಂ ಸರ್ವಾತ್ಮನಾ ಯಜೇತ್ ॥ ೧೧॥
- ಏತದ್ಗ್ರನ್ಥಪ್ರವಕ್ತಾ ತು ಶಿವೋ ವಿಘ್ನೇಶ್ವರಃ ಸ್ವಯಮ್ ।
- ಪಿತಾ ಹಿ ಜನ್ಮದೋ ದಾತಾ ಗುರುರ್ಜನ್ಮವಿನಾಶಕಃ ॥ ೧೨॥
- ಏತದ್ಗ್ರನ್ಥಂ ಸಮಭ್ಯಸ್ಯ ಗುರೋರ್ವಾಕ್ಯಾದ್ವಿಶೇಷತಃ ।
- ನ ದುಹ್ಯೇತ ಗುರುಂ ಶಿಷ್ಯೋ ಮನಸಾ ಕಿಞ್ಚ ಕಾಯತಃ ॥ ೧೩॥
- ಗುರುರೇವ ಶಿವಃ ಸಾಕ್ಷಾತ್ ಗುರುರೇವ ಶಿವಃ ಸ್ವಯಮ್ ।
- ಶಿವೇ ರುಷ್ಟೇ ಗುರುಸ್ತ್ರಾತಾ ಗುರೌ ರುಷ್ಟೇ ನ ಕಶ್ಚನ ॥ ೧೪॥
- ಏತದ್ಗ್ರನ್ಥಪದಾಭ್ಯಾಸೇ ಶ್ರದ್ಧಾ ವೈ ಕಾರಣಂ ಪರಮ್ ।
- ಅಶ್ರದ್ಧಧಾನಃ ಪುರುಷೋ ನೈತಲ್ಲೇಶಮಿಹಾರ್ಹತಿ ॥ ೧೫॥
- ಶ್ರದ್ಧೈವ ಪರಮಂ ಶ್ರೇಯೋ ಜೀವಬ್ರಹ್ಮೈಕ್ಯಕಾರಣಮ್ ।
- ಅಸ್ತಿ ಬ್ರಹ್ಮೇತಿ ಚ ಶ್ರುತ್ವಾ ಭಾವಯನ್ ಸನ್ತ ಏವ ಹಿ ॥ ೧೬॥
- ಶಿವಪ್ರಸಾದಹೀನೋ ಯೋ ನೈತದ್ಗ್ರನ್ಥಾರ್ಥವಿದ್ಭವೇತ್ ।
- ಭಾವಗ್ರಾಹ್ಯೋಽಯಮಾತ್ಮಾಯಂ ಪರ ಏಕಃ ಶಿವೋ ಧ್ರುವಃ ॥ ೧೭॥
- ಸರ್ವಮನ್ಯತ್ ಪರಿತ್ಯಜ್ಯ ಧ್ಯಾಯೀತೇಶಾನಮವ್ಯಯಮ್ ।
- ಶಿವಜ್ಞಾನಮಿದಂ ಶುದ್ಧಂ ದ್ವೈತಾದ್ವೈತವಿನಾಶನಮ್ ॥ ೧೮॥
- ಅನ್ಯೇಷು ಚ ಪುರಾಣೇಷು ಇತಿಹಾಸೇಷು ನ ಕ್ವಚಿತ್ ।
- ಏತಾದೃಶಂ ಶಿವಜ್ಞಾನಂ ಶ್ರುತಿಸಾರಮಹೋದಯಮ್ ॥ ೧೯॥
- ಉಕ್ತಂ ಸಾಕ್ಷಾಚ್ಛಿವೇನೈತದ್ ಯೋಗಸಾಂಖ್ಯವಿವರ್ಜಿತಮ್ ।
- ಭಾವನಾಮಾತ್ರಸುಲಭಂ ಭಕ್ತಿಗಮ್ಯಮನಾಮಯಮ್ ॥ ೨೦॥
- ಮಹಾನನ್ದಪ್ರದಂ ಸಾಕ್ಷಾತ್ ಪ್ರಸಾದೇನೈವ ಲಭ್ಯತೇ ।
- ತಸ್ಯೈತೇ ಕಥಿತಾ ಹ್ಯರ್ಥಾಃ ಪ್ರಕಾಶನ್ತೇ ಮಹಾತ್ಮನಃ ॥ ೨೧॥
- ಏತದ್ಗ್ರನ್ಥಂ ಗುರೋಃ ಶ್ರುತ್ವಾ ನ ಪೂಜಾಂ ಕುರುತೇ ಯದಿ ।
- ಶ್ವಾನಯೋನಿಶತಂ ಪ್ರಾಪ್ಯ ಚಣ್ಡಾಲಃ ಕೋಟಿಜನ್ಮಸು ॥ ೨೨॥
- ಏತದ್ಗ್ರನ್ಥಸ್ಯ ಮಾಹಾತ್ಮ್ಯಂ ನ ಯಜನ್ತೀಶ್ವರಂ ಹೃದಾ ।
- ಸ ಸೂಕರೋ ಭವತ್ಯೇವ ಸಹಸ್ರಪರಿವತ್ಸರಾನ್ ॥ ೨೩॥
- ಏತದ್ಗ್ರನ್ಥಾರ್ಥವಕ್ತಾರಮಭ್ಯಸೂಯೇತ ಯೋ ದ್ವಿಜಃ ।
- ಅನೇಕಬ್ರಹ್ಮಕಲ್ಪಂ ಚ ವಿಷ್ಠಾಯಾಂ ಜಾಯತೇ ಕ್ರಿಮಿಃ ॥ ೨೪॥
- ಏತದ್ಗ್ರನ್ಥಾರ್ಥವಿದ್ಬ್ರಹ್ಮಾ ಸ ಬ್ರಹ್ಮ ಭವತಿ ಸ್ವಯಮ್ ।
- ಕಿಂ ಪುನರ್ಬಹುನೋಕ್ತೇನ ಜ್ಞಾನಮೇತದ್ವಿಮುಕ್ತಿದಮ್ ॥ ೨೫॥
- ಯಸ್ತ್ವೇತಚ್ಛೃಣುಯಾಚ್ಛಿವೋದಿಮಹಾವೇದಾನ್ತಾಂಬುಧಿ (?)
- ವೀಚಿಜಾತಪುಣ್ಯಂ ನಾಪೇಕ್ಷತ್ಯನಿಶಂ ನ ಚಾಬ್ದಕಲ್ಪೈಃ ।
- ಶಬ್ದಾನಾಂ ನಿಖಿಲೋ ರಸೋ ಹಿ ಸ ಶಿವಃ ಕಿಂ ವಾ ತುಷಾದ್ರಿ
- ಪರಿಖಂಡನತೋ ಭವೇತ್ ಸ್ಯಾತ್ ತಣ್ಡುಲೋಽಪಿ ಸ ಮೃಷಾ ಭವಮೋಹಜಾಲಮ್ ॥ ೨೬॥
- ತದ್ವತ್ ಸರ್ವಮಶಾಸ್ತ್ರಮಿತ್ಯೇವ ಹಿ ಸತ್ಯಂ
- ದ್ವೈತೋತ್ಥಂ ಪರಿಹಾಯ ವಾಕ್ಯಜಾಲಮ್ ।
- ಏವಂ ತ್ವಂ ತ್ವನಿಶಂ ಭಜಸ್ವ ನಿತ್ಯಂ
- ಶಾನ್ತೋದ್ಯಖಿಲವಾಕ್ ಸಮೂಹಭಾವನಾ ॥ ೨೭॥
- ಸತ್ಯತ್ವಾಭಾವಭಾವಿತೋಽನುರೂಪಶೀಲಃ ।
- ಸಂಪಶ್ಯನ್ ಜಗದಿದಮಾಸಮಞ್ಜಸಂ ಸದಾ ಹಿ ॥ ೨೮॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ನಿದಾಘಕೃತಗುರುಸ್ತುತಿವರ್ಣನಂ ನಾಮ ಪಞ್ಚಚತ್ವಾರಿಂಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com