ಋಭುಗೀತಾ ೧೬ ॥ ಚಿದೇವ-ತ್ವಂ ಪ್ರಕರಣ ನಿರೂಪಣಮ್ ॥

ಋಭುಃ -

• ಅತ್ಯನ್ತಂ ದುರ್ಲಭಂ ವಕ್ಷ್ಯೇ ವೇದಶಾಸ್ತ್ರಾಗಮಾದಿಷು ।
• ಶೃಣ್ವನ್ತು ಸಾವಧಾನೇನ ಅಸದೇವ ಹಿ ಕೇವಲಮ್ ॥ ೧॥
• ಯತ್ಕಿಞ್ಚಿದ್ ದೃಶ್ಯತೇ ಲೋಕೇ ಯತ್ಕಿಞ್ಚಿದ್ಭಾಷತೇ ಸದಾ ।
• ಯತ್ಕಿಞ್ಚಿದ್ ಭುಜ್ಯತೇ ಕ್ವಾಪಿ ತತ್ಸರ್ವಮಸದೇವ ಹಿ ॥ ೨॥
• ಯದ್ಯತ್ ಕಿಞ್ಚಿಜ್ಜಪಂ ವಾಪಿ ಸ್ನಾನಂ ವಾ ಜಲಮೇವ ವಾ ।
• ಆತ್ಮನೋಽನ್ಯತ್ ಪರಂ ಯದ್ಯತ್ ಅಸತ್ ಸರ್ವಂ ನ ಸಂಶಯಃ ॥ ೩॥
• ಚಿತ್ತಕಾರ್ಯಂ ಬುದ್ಧಿಕಾರ್ಯಂ ಮಾಯಾಕಾರ್ಯಂ ತಥೈವ ಹಿ ।
• ಆತ್ಮನೋಽನ್ಯತ್ ಪರಂ ಕಿಞ್ಚಿತ್ ತತ್ಸರ್ವಮಸದೇವ ಹಿ ॥ ೪॥
• ಅಹನ್ತಾಯಾಃ ಪರಂ ರೂಪಂ ಇದಂತ್ವಂ ಸತ್ಯಮಿತ್ಯಪಿ ।
• ಆತ್ಮನೋಽನ್ಯತ್ ಪರಂ ಕಿಞ್ಚಿತ್ ತತ್ಸರ್ವಮಸದೇವ ಹಿ ॥ ೫॥
• ನಾನಾತ್ವಮೇವ ರೂಪತ್ವಂ ವ್ಯವಹಾರಃ ಕ್ವಚಿತ್ ಕ್ವಚಿತ್ ।
• ಆತ್ಮೀಯ ಏವ ಸರ್ವತ್ರ ತತ್ಸರ್ವಮಸದೇವ ಹಿ ॥ ೬॥
• ತತ್ತ್ವಭೇದಂ ಜಗದ್ಭೇದಂ ಸರ್ವಭೇದಮಸತ್ಯಕಮ್ ।
• ಇಚ್ಛಾಭೇದಂ ಜಗದ್ಭೇದಂ ತತ್ಸರ್ವಮಸದೇವ ಹಿ ॥ ೭॥
• ದ್ವೈತಭೇದಂ ಚಿತ್ರಭೇದಂ ಜಾಗ್ರದ್ಭೇದಂ ಮನೋಮಯಮ್ ।
• ಅಹಂಭೇದಮಿದಂಭೇದಮಸದೇವ ಹಿ ಕೇವಲಮ್ ॥ ೮॥
• ಸ್ವಪ್ನಭೇದಂ ಸುಪ್ತಿಭೇದಂ ತುರ್ಯಭೇದಮಭೇದಕಮ್ ।
• ಕರ್ತೃಭೇದಂ ಕಾರ್ಯಭೇದಂ ಗುಣಭೇದಂ ರಸಾತ್ಮಕಮ್ ।
• ಲಿಙ್ಗಭೇದಮಿದಂಭೇದಮಸದೇವ ಹಿ ಕೇವಲಮ್ ॥ ೯॥
• ಆತ್ಮಭೇದಮಸದ್ಭೇದಂ ಸದ್ಭೇದಮಸದಣ್ವಪಿ ।
• ಅತ್ಯನ್ತಾಭಾವಸದ್ಭೇದಮ್ ಅಸದೇವ ಹಿ ಕೇವಲಮ್ ॥ ೧೦॥
• ಅಸ್ತಿಭೇದಂ ನಾಸ್ತಿಭೇದಮಭೇದಂ ಭೇದವಿಭ್ರಮಃ ।
• ಭ್ರಾನ್ತಿಭೇದಂ ಭೂತಿಭೇದಮಸದೇವ ಹಿ ಕೇವಲಮ್ ॥ ೧೧॥
• ಪುನರನ್ಯತ್ರ ಸದ್ಭೇದಮಿದಮನ್ಯತ್ರ ವಾ ಭಯಮ್ ।
• ಪುಣ್ಯಭೇದಂ ಪಾಪಭೇದಂ ಅಸದೇವ ಹಿ ಕೇವಲಮ್ ॥ ೧೨॥
• ಸಙ್ಕಲ್ಪಭೇದಂ ತದ್ಭೇದಂ ಸದಾ ಸರ್ವತ್ರ ಭೇದಕಮ್ ।
• ಜ್ಞಾನಾಜ್ಞಾನಮಯಂ ಸರ್ವಂ ಅಸದೇವ ಹಿ ಕೇವಲಮ್ ॥ ೧೩॥
• ಬ್ರಹ್ಮಭೇದಂ ಕ್ಷತ್ರಭೇದಂ ಭೂತಭೌತಿಕಭೇದಕಮ್ ।
• ಇದಂಭೇದಮಹಂಭೇದಂ ಅಸದೇವ ಹಿ ಕೇವಲಮ್ ॥ ೧೪॥
• ವೇದಭೇದಂ ದೇವಭೇದಂ ಲೋಕಾನಾಂ ಭೇದಮೀದೃಶಮ್ ।
• ಪಞ್ಚಾಕ್ಷರಮಸನ್ನಿತ್ಯಮ್ ಅಸದೇವ ಹಿ ಕೇವಲಮ್ ॥ ೧೫॥
• ಜ್ಞಾನೇನ್ದ್ರಿಯಮಸನ್ನಿತ್ಯಂ ಕರ್ಮೇನ್ದ್ರಿಯಮಸತ್ಸದಾ ।
• ಅಸದೇವ ಚ ಶಬ್ದಾಖ್ಯಂ ಅಸತ್ಯಂ ತತ್ಫಲಂ ತಥಾ ॥ ೧೬॥
• ಅಸತ್ಯಂ ಪಞ್ಚಭೂತಾಖ್ಯಮಸತ್ಯಂ ಪಞ್ಚದೇವತಾಃ ।
• ಅಸತ್ಯಂ ಪಞ್ಚಕೋಶಾಖ್ಯಮ್ ಅಸದೇವ ಹಿ ಕೇವಲಮ್ ॥ ೧೭॥
• ಅಸತ್ಯಂ ಷಡ್ವಿಕಾರಾದಿ ಅಸತ್ಯಂ ಷಟ್ಕಮೂರ್ಮಿಣಾಮ್ ।
• ಅಸತ್ಯಮರಿಷಡ್ವರ್ಗಮಸತ್ಯಂ ಷಡೃತುಸ್ತದಾ ॥ ೧೮॥var was ತಥಾ
• ಅಸತ್ಯಂ ದ್ವಾದಶಮಾಸಾಃ ಅಸತ್ಯಂ ವತ್ಸರಸ್ತಥಾ ।
• ಅಸತ್ಯಂ ಷಡವಸ್ಥಾಖ್ಯಂ ಷಟ್ಕಾಲಮಸದೇವ ಹಿ ॥ ೧೯॥
• ಅಸತ್ಯಮೇವ ಷಟ್ಶಾಸ್ತ್ರಂ ಅಸದೇವ ಹಿ ಕೇವಲಮ್ ।
• ಅಸದೇವ ಸದಾ ಜ್ಞಾನಂ ಅಸದೇವ ಹಿ ಕೇವಲಮ್ ॥ ೨೦॥
• ಅನುಕ್ತಮುಕ್ತಂ ನೋಕ್ತಂ ಚ ಅಸದೇವ ಹಿ ಕೇವಲಮ್ ।
• ಅಸತ್ಪ್ರಕರಣಂ ಪ್ರೋಕ್ತಂ ಸರ್ವವೇದೇಷು ದುರ್ಲಭಮ್ ॥ ೨೧॥
• ಭೂಯಃ ಶೃಣು ತ್ವಂ ಯೋಗೀನ್ದ್ರ ಸಾಕ್ಷಾನ್ಮೋಕ್ಷಂ ಬ್ರವೀಮ್ಯಹಮ್ ।
• ಸನ್ಮಾತ್ರಮಹಮೇವಾತ್ಮಾ ಸಚ್ಚಿದಾನನ್ದ ಕೇವಲಮ್ ॥ ೨೨॥
• ಸನ್ಮಯಾನನ್ದಭೂತಾತ್ಮಾ ಚಿನ್ಮಯಾನನ್ದಸದ್ಘನಃ ।
• ಚಿನ್ಮಯಾನನ್ದಸನ್ದೋಹಚಿದಾನನ್ದೋ ಹಿ ಕೇವಲಮ್ ॥ ೨೩॥
• ಚಿನ್ಮಾತ್ರಜ್ಯೋತಿರಾನ್ದಶ್ಚಿನ್ಮಾತ್ರಜ್ಯೋತಿವಿಗ್ರಹಃ ।
• ಚಿನ್ಮಾತ್ರಜ್ಯೋತಿರೀಶಾನಃ ಸರ್ವದಾನನ್ದಕೇವಲಮ್ ॥ ೨೪॥
• ಚಿನ್ಮಾತ್ರಜ್ಯೋತಿರಖಿಲಂ ಚಿನ್ಮಾತ್ರಜ್ಯೋತಿರಸ್ಮ್ಯಹಮ್ ।
• ಚಿನ್ಮಾತ್ರಂ ಸರ್ವಮೇವಾಹಂ ಸರ್ವಂ ಚಿನ್ಮಾತ್ರಮೇವ ಹಿ ॥ ೨೫॥
• ಚಿನ್ಮಾತ್ರಮೇವ ಚಿತ್ತಂ ಚ ಚಿನ್ಮಾತ್ರಂ ಮೋಕ್ಷ ಏವ ಚ ।
• ಚಿನ್ಮಾತ್ರಮೇವ ಮನನಂ ಚಿನ್ಮಾತ್ರಂ ಶ್ರವಣಂ ತಥಾ ॥ ೨೬॥
• ಚಿನ್ಮಾತ್ರಮಹಮೇವಾಸ್ಮಿ ಸರ್ವಂ ಚಿನ್ಮಾತ್ರಮೇವ ಹಿ ।
• ಚಿನ್ಮಾತ್ರಂ ನಿರ್ಗುಣಂ ಬ್ರಹ್ಮ ಚಿನ್ಮಾತ್ರಂ ಸಗುಣಂ ಪರಮ್ ॥ ೨೭॥
• ಚಿನ್ಮಾತ್ರಮಹಮೇವ ತ್ವಂ ಸರ್ವಂ ಚಿನ್ಮಾತ್ರಮೇವ ಹಿ ।
• ಚಿನ್ಮಾತ್ರಮೇವ ಹೃದಯಂ ಚಿನ್ಮಾತ್ರಂ ಚಿನ್ಮಯಂ ಸದಾ ॥ ೨೮॥
• ಚಿದೇವ ತ್ವಂ ಚಿದೇವಾಹಂ ಸರ್ವಂ ಚಿನ್ಮಾತ್ರಮೇವ ಹಿ ।
• ಚಿನ್ಮಾತ್ರಮೇವ ಶಾನ್ತತ್ವಂ ಚಿನ್ಮಾತ್ರಂ ಶಾನ್ತಿಲಕ್ಷಣಮ್ ॥ ೨೯॥
• ಚಿನ್ಮಾತ್ರಮೇವ ವಿಜ್ಞಾನಂ ಚಿನ್ಮಾತ್ರಂ ಬ್ರಹ್ಮ ಕೇವಲಮ್ ।
• ಚಿನ್ಮಾತ್ರಮೇವ ಸಂಕಲ್ಪಂ ಚಿನ್ಮಾತ್ರಂ ಭುವನತ್ರಯಮ್ ॥ ೩೦॥
• ಚಿನ್ಮಾತ್ರಮೇವ ಸರ್ವತ್ರ ಚಿನ್ಮಾತ್ರಂ ವ್ಯಾಪಕೋ ಗುರುಃ ।
• ಚಿನ್ಮಾತ್ರಮೇವ ಶುದ್ಧತ್ವಂ ಚಿನ್ಮಾತ್ರಂ ಬ್ರಹ್ಮ ಕೇವಲಮ್ ॥ ೩೧॥
• ಚಿನ್ಮಾತ್ರಮೇವ ಚೈತನ್ಯಂ ಚಿನ್ಮಾತ್ರಂ ಭಾಸ್ಕರಾದಿಕಮ್ ।
• ಚಿನ್ಮಾತ್ರಮೇವ ಸನ್ಮಾತ್ರಂ ಚಿನ್ಮಾತ್ರಂ ಜಗದೇವ ಹಿ ॥ ೩೨॥
• ಚಿನ್ಮಾತ್ರಮೇವ ಸತ್ಕರ್ಮ ಚಿನ್ಮಾತ್ರಂ ನಿತ್ಯಮಙ್ಗಲಮ್ ।
• ಚಿನ್ಮಾತ್ರಮೇವ ಹಿ ಬ್ರಹ್ಮ ಚಿನ್ಮಾತ್ರಂ ಹರಿರೇವ ಹಿ ॥ ೩೩॥
• ಚಿನ್ಮಾತ್ರಮೇವ ಮೌನಾತ್ಮಾ ಚಿನ್ಮಾತ್ರಂ ಸಿದ್ಧಿರೇವ ಹಿ ।
• ಚಿನ್ಮಾತ್ರಮೇವ ಜನಿತಂ ಚಿನ್ಮಾತ್ರಂ ಸುಖಮೇವ ಹಿ ॥ ೩೪॥
• ಚಿನ್ಮಾತ್ರಮೇವ ಗಗನಂ ಚಿನ್ಮಾತ್ರಂ ಪರ್ವತಂ ಜಲಮ್ ।
• ಚಿನ್ಮಾತ್ರಮೇವ ನಕ್ಷತ್ರಂ ಚಿನ್ಮಾತ್ರಂ ಮೇಘಮೇವ ಹಿ ॥ ೩೫॥
• ಚಿದೇವ ದೇವತಾಕಾರಂ ಚಿದೇವ ಶಿವಪೂಜನಮ್ ।
• ಚಿನ್ಮಾತ್ರಮೇವ ಕಾಠಿನ್ಯಂ ಚಿನ್ಮಾತ್ರಂ ಶೀತಲಂ ಜಲಮ್ ॥ ೩೬॥
• ಚಿನ್ಮಾತ್ರಮೇವ ಮನ್ತವ್ಯಂ ಚಿನ್ಮಾತ್ರಂ ದೃಶ್ಯಭಾವನಮ್ ।
• ಚಿನ್ಮಾತ್ರಮೇವ ಸಕಲಂ ಚಿನ್ಮಾತ್ರಂ ಭುವನಂ ಪಿತಾ ॥ ೩೭॥
• ಚಿನ್ಮಾತ್ರಮೇವ ಜನನೀ ಚಿನ್ಮಾತ್ರಾನ್ನಾಸ್ತಿ ಕಿಞ್ಚನ ।
• ಚಿನ್ಮಾತ್ರಮೇವ ನಯನಂ ಚಿನ್ಮಾತ್ರಂ ಶ್ರವಣಂ ಸುಖಮ್ ॥ ೩೮॥
• ಚಿನ್ಮಾತ್ರಮೇವ ಕರಣಂ ಚಿನ್ಮಾತ್ರಂ ಕಾರ್ಯಮೀಶ್ವರಮ್ ।
• ಚಿನ್ಮಾತ್ರಂ ಚಿನ್ಮಯಂ ಸತ್ಯಂ ಚಿನ್ಮಾತ್ರಂ ನಾಸ್ತಿ ನಾಸ್ತಿ ಹಿ ॥ ೩೯॥
• ಚಿನ್ಮಾತ್ರಮೇವ ವೇದಾನ್ತಂ ಚಿನ್ಮಾತ್ರಂ ಬ್ರಹ್ಮ ನಿಶ್ಚಯಮ್ ।
• ಚಿನ್ಮಾತ್ರಮೇವ ಸದ್ಭಾವಿ ಚಿನ್ಮಾತ್ರಂ ಭಾತಿ ನಿತ್ಯಶಃ ॥ ೪೦॥
• ಚಿದೇವ ಜಗದಾಕಾರಂ ಚಿದೇವ ಪರಮಂ ಪದಮ್ ।
• ಚಿದೇವ ಹಿ ಚಿದಾಕಾರಂ ಚಿದೇವ ಹಿ ಚಿದವ್ಯಯಃ ॥ ೪೧॥
• ಚಿದೇವ ಹಿ ಶಿವಾಕಾರಂ ಚಿದೇವ ಹಿ ಶಿವವಿಗ್ರಹಃ ।
• ಚಿದಾಕಾರಮಿದಂ ಸರ್ವಂ ಚಿದಾಕಾರಂ ಸುಖಾಸುಖಮ್ ॥ ೪೨॥
• ಚಿದೇವ ಹಿ ಜಡಾಕಾರಂ ಚಿದೇವ ಹಿ ನಿರನ್ತರಮ್ ।
• ಚಿದೇವಕಲನಾಕಾರಂ ಜೀವಾಕಾರಂ ಚಿದೇವ ಹಿ ॥ ೪೩॥
• ಚಿದೇವ ದೇವತಾಕಾರಂ ಚಿದೇವ ಶಿವಪೂಜನಮ್ ।
• ಚಿದೇವ ತ್ವಂ ಚಿದೇವಾಹಂ ಸರ್ವಂ ಚಿನ್ಮಾತ್ರಮೇವ ಹಿ ॥ ೪೪॥
• ಚಿದೇವ ಪರಮಾಕಾರಂ ಚಿದೇವ ಹಿ ನಿರಾಮಯಮ್ ।
• ಚಿನ್ಮಾತ್ರಮೇವ ಸತತಂ ಚಿನ್ಮಾತ್ರಂ ಹಿ ಪರಾಯಣಮ್ ॥ ೪೫॥
• ಚಿನ್ಮಾತ್ರಮೇವ ವೈರಾಗ್ಯಂ ಚಿನ್ಮಾತ್ರಂ ನಿರ್ಗುಣಂ ಸದಾ ।
• ಚಿನ್ಮಾತ್ರಮೇವ ಸಞ್ಚಾರಂ ಚಿನ್ಮಾತ್ರಂ ಮನ್ತ್ರತನ್ತ್ರಕಮ್ ॥ ೪೬॥
• ಚಿದಾಕಾರಮಿದಂ ವಿಶ್ವಂ ಚಿದಾಕಾರಂ ಜಗತ್ತ್ರಯಮ್ ।
• ಚಿದಾಕಾರಮಹಙ್ಕಾರಂ ಚಿದಾಕಾರಂ ಪರಾತ್ ಪರಮ್ ॥ ೪೭॥
• ಚಿದಾಕಾರಮಿದಂ ಭೇದಂ ಚಿದಾಕಾರಂ ತೃಣಾದಿಕಮ್ ।
• ಚಿದಾಕಾರಂ ಚಿದಾಕಾಶಂ ಚಿದಾಕಾರಮರೂಪಕಮ್ ॥ ೪೮॥
• ಚಿದಾಕಾರಂ ಮಹಾನನ್ದಂ ಚಿದಾಕಾರಂ ಸುಖಾತ್ ಸುಖಮ್ ।
• ಚಿದಾಕಾರಂ ಸುಖಂ ಭೋಜ್ಯಂ ಚಿದಾಕಾರಂ ಪರಂ ಗುರುಮ್ ॥ ೪೯॥
• ಚಿದಾಕಾರಮಿದಂ ವಿಶ್ವಂ ಚಿದಾಕಾರಮಿದಂ ಪುಮಾನ್ ।
• ಚಿದಾಕಾರಮಜಂ ಶಾನ್ತಂ ಚಿದಾಕಾರಮನಾಮಯಮ್ ॥ ೫೦॥
• ಚಿದಾಕಾರಂ ಪರಾತೀತಂ ಚಿದಾಕಾರಂ ಚಿದೇವ ಹಿ ।
• ಚಿದಾಕಾರಂ ಚಿದಾಕಾಶಂ ಚಿದಾಕಾಶಂ ಶಿವಾಯತೇ ॥ ೫೧॥
• ಚಿದಾಕಾರಂ ಸದಾ ಚಿತ್ತಂ ಚಿದಾಕಾರಂ ಸದಾಽಮೃತಮ್ ।
• ಚಿದಾಕಾರಂ ಚಿದಾಕಾಶಂ ತದಾ ಸರ್ವಾನ್ತರಾನ್ತರಮ್ ॥ ೫೨॥
• ಚಿದಾಕಾರಮಿದಂ ಪೂರ್ಣಂ ಚಿದಾಕಾರಮಿದಂ ಪ್ರಿಯಮ್ ।
• ಚಿದಾಕಾರಮಿದಂ ಸರ್ವಂ ಚಿದಾಕಾರಮಹಂ ಸದಾ ॥ ೫೩॥
• ಚಿದಾಕಾರಮಿದಂ ಸ್ಥಾನಂ ಚಿದಾಕಾರಂ ಹೃದಮ್ಬರಮ್ ।
• ಚಿದಾಬೋಧಂ ಚಿದಾಕಾರಂ ಚಿದಾಕಾಶಂ ತತಂ ಸದಾ ॥ ೫೪॥
• ಚಿದಾಕಾರಂ ಸದಾ ಪೂರ್ಣಂ ಚಿದಾಕಾರಂ ಮಹತ್ಫಲಮ್ ।
• ಚಿದಾಕಾರಂ ಪರಂ ತತ್ತ್ವಂ ಚಿದಾಕಾರಂ ಪರಂ ಭವಾನ್ ॥ ೫೫॥
• ಚಿದಾಕಾರಂ ಸದಾಮೋದಂ ಚಿದಾಕಾರಂ ಸದಾ ಮೃತಮ್ ।
• ಚಿದಾಕಾರಂ ಪರಂ ಬ್ರಹ್ಮ ಚಿದಹಂ ಚಿದಹಂ ಸದಾ ॥ ೫೬॥
• ಚಿದಹಂ ಚಿದಹಂ ಚಿತ್ತಂ ಚಿತ್ತಂ ಸ್ವಸ್ಯ ನ ಸಂಶಯಃ ।
• ಚಿದೇವ ಜಗದಾಕಾರಂ ಚಿದೇವ ಶಿವಶಙ್ಕರಃ ॥ ೫೭॥
• ಚಿದೇವ ಗಗನಾಕಾರಂ ಚಿದೇವ ಗಣನಾಯಕಮ್ ।
• ಚಿದೇವ ಭುವನಾಕಾರಂ ಚಿದೇವ ಭವಭಾವನಮ್ ॥ ೫೮॥
• ಚಿದೇವ ಹೃದಯಾಕಾರಂ ಚಿದೇವ ಹೃದಯೇಶ್ವರಃ ।
• ಚಿದೇವ ಅಮೃತಾಕಾರಂ ಚಿದೇವ ಚಲನಾಸ್ಪದಮ್ ॥ ೫೯॥
• ಚಿದೇವಾಹಂ ಚಿದೇವಾಹಂ ಚಿನ್ಮಯಂ ಚಿನ್ಮಯಂ ಸದಾ ।
• ಚಿದೇವ ಸತ್ಯವಿಶ್ವಾಸಂ ಚಿದೇವ ಬ್ರಹ್ಮಭಾವನಮ್ ॥ ೬೦॥
• ಚಿದೇವ ಪರಮಂ ದೇವಂ ಚಿದೇವ ಹೃದಯಾಲಯಮ್ ।
• ಚಿದೇವ ಸಕಲಾಕಾರಂ ಚಿದೇವ ಜನಮಣ್ಡಲಮ್ ॥ ೬೧॥
• ಚಿದೇವ ಸರ್ವಮಾನನ್ದಂ ಚಿದೇವ ಪ್ರಿಯಭಾಷಣಮ್ ।
• ಚಿದೇವ ತ್ವಂ ಚಿದೇವಾಹಂ ಸರ್ವಂ ಚಿನ್ಮಾತ್ರಮೇವ ಹಿ ॥ ೬೨॥
• ಚಿದೇವ ಪರಮಂ ಧ್ಯಾನಂ ಚಿದೇವ ಪರಮರ್ಹಣಮ್ ।
• ಚಿದೇವ ತ್ವಂ ಚಿದೇವಾಹಂ ಸರ್ವಂ ಚಿನ್ಮಯಮೇವ ಹಿ ॥ ೬೩॥
• ಚಿದೇವ ತ್ವಂ ಪ್ರಕರಣಂ ಸರ್ವವೇದೇಷು ದುರ್ಲಭಮ್ ।
• ಸಕೃಚ್ಛ್ರವಣಮಾತ್ರೇಣ ಬ್ರಹ್ಮೈವ ಭವತಿ ಧ್ರುವಮ್ ॥ ೬೪॥
• ಯಸ್ಯಾಭಿಧ್ಯಾನಯೋಗಾಜ್ಜನಿಮೃತಿವಿವಶಾಃ ಶಾಶ್ವತಂ ವೃತ್ತಿಭಿರ್ಯೇ
• ಮಾಯಾಮೋಹೈರ್ವಿಹೀನಾ ಹೃದುದರಭಯಜಂ ಛಿದ್ಯತೇ ಗ್ರನ್ಥಿಜಾತಮ್ ।
• ವಿಶ್ವಂ ವಿಶ್ವಾಧಿಕರಸಂ ಭವತಿ ಭವತೋ ದರ್ಶನಾದಾಪ್ತಕಾಮಃ
• ಸೋ ನಿತ್ಯೋ ನಿರ್ವಿಕಲ್ಪೋ ಭವತಿ ಭುವಿ ಸದಾ ಬ್ರಹ್ಮಭೂತೋಽನ್ತರಾತ್ಮಾ ॥ ೬೫॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಚಿದೇವತ್ವಂಪ್ರಕರಣವರ್ಣನಂ ನಾಮ ಷೋಡಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com