ಋಭುಗೀತಾ ೨೭ ॥ ಆನನ್ದ-ರೂಪತ್ವ ನಿರೂಪಣ ಪ್ರಕರಣಮ್ ॥
ಋಭುಃ -
- ವಕ್ಷ್ಯೇ ಪ್ರಕರಣಂ ಸತ್ಯಂ ಬ್ರಹ್ಮಾನನ್ದಮನೋಮಯಮ್ ।
- ಕಾರ್ಯಕಾರಣನಿರ್ಮುಕ್ತಂ ನಿತ್ಯಾನನ್ದಮಯಂ ತ್ವಿದಮ್ ॥ ೧॥
- ಅಕ್ಷಯಾನನ್ದ ಏವಾಹಮಾತ್ಮಾನನ್ದಪ್ರಕಾಶಕಮ್ ।
- ಜ್ಞಾನಾನನ್ದಸ್ವರೂಪೋಽಹಂ ಲಕ್ಷ್ಯಾನನ್ದಮಯಂ ಸದಾ ॥ ೨॥
- ವಿಷಯಾನನ್ದಶೂನ್ಯೋಽಹಂ ಮಿಥ್ಯಾನನ್ದಪ್ರಕಾಶಕಃ ।
- ವೃತ್ತಿಶೂನ್ಯಸುಖಾತ್ಮಾಹಂ ವೃತ್ತಿಶೂನ್ಯಸುಖಾತ್ಪರಮ್ ॥ ೩॥
- ಜಡಾನನ್ದಪ್ರಕಾಶಾತ್ಮಾ ಆತ್ಮಾನನ್ದರಸೋಽಸ್ಮ್ಯಹಮ್ ।
- ಆತ್ಮಾನನ್ದವಿಹೀನೋಽಹಂ ನಾಸ್ತ್ಯಾನನ್ದಾತ್ಮವಿಗ್ರಹಃ ॥ ೪॥
- ಕಾರ್ಯಾನನ್ದವಿಹೀನೋಽಹಂ ಕಾರ್ಯಾನನ್ದಕಲಾತ್ಮಕಃ ।
- ಗುಣಾನನ್ದವಿಹೀನೋಽಹಂ ಗುಹ್ಯಾನನ್ದಸ್ವರೂಪವಾನ್ ॥ ೫॥
- ಗುಪ್ತಾನನ್ದಸ್ವರೂಪೋಽಹಂ ಕೃತ್ಯಾನನ್ದಮಹಾನಹಮ್ ।
- ಜ್ಞೇಯಾನನ್ದವಿಹೀನೋಽಹಂ ಗೋಪ್ಯಾನನ್ದವಿವರ್ಜಿತಃ ॥ ೬॥
- ಸದಾನನ್ದಸ್ವರೂಪೋಽಹಂ ಮುದಾನನ್ದನಿಜಾತ್ಮಕಃ ।
- ಲೋಕಾನನ್ದೋ ಮಹಾನನ್ದೋ ಲೋಕಾತೀತಮಹಾನಯಮ್ ॥ ೭॥
- ಭೇದಾನನ್ದಶ್ಚಿದಾನನ್ದಃ ಸುಖಾನನ್ದೋಽಹಮದ್ವಯಃ ।
- ಕ್ರಿಯಾನನ್ದೋಽಕ್ಷಯಾನನ್ದೋ ವೃತ್ತ್ಯಾನನ್ದವಿವರ್ಜಿತಃ ॥ ೮॥
- ಸರ್ವಾನನ್ದೋಽಕ್ಷಯಾನನ್ದಶ್ಚಿದಾನನ್ದೋಽಹಮವ್ಯಯಃ ।
- ಸತ್ಯಾನನ್ದಃ ಪರಾನನ್ದಃ ಸದ್ಯೋನನ್ದಃ ಪರಾತ್ಪರಃ ॥ ೯॥
- ವಾಕ್ಯಾನನ್ದಮಹಾನನ್ದಃ ಶಿವಾನನ್ದೋಽಹಮದ್ವಯಃ ।
- ಶಿವಾನನ್ದೋತ್ತರಾನನ್ದ ಆದ್ಯಾನನ್ದವಿವರ್ಜಿತಃ ॥ ೧೦॥
- ಅಮಲಾತ್ಮಾ ಪರಾನನ್ದಶ್ಚಿದಾನನ್ದೋಽಹಮದ್ವಯಃ ।
- ವೃತ್ತ್ಯಾನನ್ದಪರಾನನ್ದೋ ವಿದ್ಯಾತೀತೋ ಹಿ ನಿರ್ಮಲಃ ॥ ೧೧॥
- ಕಾರಣಾತೀತ ಆನನ್ದಶ್ಚಿದಾನನ್ದೋಽಹಮದ್ವಯಃ ।
- ಸರ್ವಾನನ್ದಃ ಪರಾನನ್ದೋ ಬ್ರಹ್ಮಾನನ್ದಾತ್ಮಭಾವನಃ ॥ ೧೨॥
- ಜೀವಾನನ್ದೋ ಲಯಾನನ್ದಶ್ಚಿದಾನನ್ದಸ್ವರೂಪವಾನ್ ।
- ಶುದ್ಧಾನನ್ದಸ್ವರೂಪಾತ್ಮಾ ಬುದ್ಧ್ಯಾನನ್ದೋ ಮನೋಮಯಃ ॥ ೧೩॥
- ಶಬ್ದಾನನ್ದೋ ಮಹಾನನ್ದಶ್ಚಿದಾನನ್ದೋಽಹಮದ್ವಯಃ ।
- ಆನನ್ದಾನನ್ದಶೂನ್ಯಾತ್ಮಾ ಭೇದಾನನ್ದವಿಶೂನ್ಯಕಃ ॥ ೧೪॥
- ದ್ವೈತಾನನ್ದಪ್ರಭಾವಾತ್ಮಾ ಚಿದಾನನ್ದೋಽಹಮದ್ವಯಃ ।
- ಏವಮಾದಿಮಹಾನನ್ದ ಅಹಮೇವೇತಿ ಭಾವಯ ॥ ೧೫॥
- ಶಾನ್ತಾನನ್ದೋಽಹಮೇವೇತಿ ಚಿದಾನನ್ದಪ್ರಭಾಸ್ವರಃ ।
- ಏಕಾನನ್ದಪರಾನನ್ದ ಏಕ ಏವ ಚಿದವ್ಯಯಃ ॥ ೧೬॥
- ಏಕ ಏವ ಮಹಾನಾತ್ಮಾ ಏಕಸಂಖ್ಯಾವಿವರ್ಜಿತಃ ।
- ಏಕತತ್ತ್ವಮಹಾನನ್ದಸ್ತತ್ತ್ವಭೇದವಿವರ್ಜಿತಃ ॥ ೧೭॥
- ವಿಜಿತಾನನ್ದಹೀನೋಽಹಂ ನಿರ್ಜಿತಾನನ್ದಹೀನಕಃ ।
- ಹೀನಾನನ್ದಪ್ರಶಾನ್ತೋಽಹಂ ಶಾನ್ತೋಽಹಮಿತಿ ಶಾನ್ತಕಃ ॥ ೧೮॥
- ಮಮತಾನನ್ದಶಾನ್ತೋಽಹಮಹಮಾದಿಪ್ರಕಾಶಕಮ್ ।
- ಸರ್ವದಾ ದೇಹಶಾನ್ತೋಽಹಂ ಶಾನ್ತೋಽಹಮಿತಿ ವರ್ಜಿತಃ ॥ ೧೯॥
- ಬ್ರಹ್ಮೈವಾಹಂ ನ ಸಂಸಾರೀ ಇತ್ಯೇವಮಿತಿ ಶಾನ್ತಕಃ ।
- ಅನ್ತರಾದನ್ತರೋಽಹಂ ವೈ ಅನ್ತರಾದನ್ತರಾನ್ತರಃ ॥ ೨೦॥
- ಏಕ ಏವ ಮಹಾನನ್ದ ಏಕ ಏವಾಹಮಕ್ಷರಃ ।
- ಏಕ ಏವಾಕ್ಷರಂ ಬ್ರಹ್ಮ ಏಕ ಏವಾಕ್ಷರೋಽಕ್ಷರಃ ॥ ೨೧॥
- ಏಕ ಏವ ಮಹಾನಾತ್ಮಾ ಏಕ ಏವ ಮನೋಹರಃ ।
- ಏಕ ಏವಾದ್ವಯೋಽಹಂ ವೈ ಏಕ ಏವ ನ ಚಾಪರಃ ॥ ೨೨॥
- ಏಕ ಏವ ನ ಭೂರಾದಿ ಏಕ ಏವ ನ ಬುದ್ಧಯಃ ।
- ಏಕ ಏವ ಪ್ರಶಾನ್ತೋಽಹಂ ಏಕ ಏವ ಸುಖಾತ್ಮಕಃ ॥ ೨೩॥
- ಏಕ ಏವ ನ ಕಾಮಾತ್ಮಾ ಏಕ ಏವ ನ ಕೋಪಕಮ್ ।
- ಏಕ ಏವ ನ ಲೋಭಾತ್ಮಾ ಏಕ ಏವ ನ ಮೋಹಕಃ ॥ ೨೪॥
- ಏಕ ಏವ ಮದೋ ನಾಹಂ ಏಕ ಏವ ನ ಮೇ ರಸಃ ।
- ಏಕ ಏವ ನ ಚಿತ್ತಾತ್ಮಾ ಏಕ ಏವ ನ ಚಾನ್ಯಕಃ ॥ ೨೫॥
- ಏಕ ಏವ ನ ಸತ್ತಾತ್ಮಾ ಏಕ ಏವ ಜರಾಮರಃ ।
- ಏಕ ಏವ ಹಿ ಪೂರ್ಣಾತ್ಮಾ ಏಕ ಏವ ಹಿ ನಿಶ್ಚಲಃ ॥ ೨೬॥
- ಏಕ ಏವ ಮಹಾನನ್ದ ಏಕ ಏವಾಹಮೇಕವಾನ್ ।
- ದೇಹೋಽಹಮಿತಿ ಹೀನೋಽಹಂ ಶಾನ್ತೋಽಹಮಿತಿ ಶಾಶ್ವತಃ ॥ ೨೭॥
- ಶಿವೋಽಹಮಿತಿ ಶಾನ್ತೋಽಹಂ ಆತ್ಮೈವಾಹಮಿತಿ ಕ್ರಮಃ ।
- ಜೀವೋಽಹಮಿತಿ ಶಾನ್ತೋಽಹಂ ನಿತ್ಯಶುದ್ಧಹೃದನ್ತರಃ ॥ ೨೮॥
- ಏವಂ ಭಾವಯ ನಿಃಶಙ್ಕಂ ಸದ್ಯೋ ಮುಕ್ತಸ್ತ್ವಮದ್ವಯೇ ।
- ಏವಮಾದಿ ಸುಶಬ್ದಂ ವಾ ನಿತ್ಯಂ ಪಠತು ನಿಶ್ಚಲಃ ॥ ೨೯॥
- ಕಾಲಸ್ವಭಾವೋ ನಿಯತೈಶ್ಚ ಭೂತೈಃ
- ಜಗದ್ವಿಜಾಯೇತ ಇತಿ ಶ್ರುತೀರಿತಮ್ ।
- ತದ್ವೈ ಮೃಷಾ ಸ್ಯಾಜ್ಜಗತೋ ಜಡತ್ವತಃ
- ಇಚ್ಛಾಭವಂ ಚೈತದಥೇಸ್ವರಸ್ಯ ॥ ೩೦॥
- ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಆನನ್ದರೂಪತ್ವನಿರೂಪಣಪ್ರಕರಣಂ ನಾಮ ಸಪ್ತವಿಂಶೋಽಧ್ಯಾಯಃ ॥
Special Thanks
The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.
Credits
Encoded by Anil Sharma anilandvijaya at gmail.com
Proofread by Sunder Hattangadi and Anil Sharma
https://sanskritdocuments.org
Send corrections to sanskrit at cheerful.com