Ribhu Gita - Siva Rahasya Purana Amsha 6

ಋಭುಗೀತಾ ೨೧ ॥ ಸರ್ವ-ಪ್ರಪಞ್ಚ-ಹೇಯತ್ವ ಪ್ರಕರಣ ನಿರೂಪಣಮ್ ॥

ಋಭುಃ -

ಮಹಾರಹಸ್ಯಂ ವಕ್ಷ್ಯಾಮಿ ವೇದಾನ್ತೇಷು ಚ ಗೋಪಿತಮ್ ।
ಯಸ್ಯ ಶ್ರವಣಮಾತ್ರೇಣ ಬ್ರಹ್ಮೈವ ಭವತಿ ಸ್ವಯಮ್ ॥ ೧॥
ಸಚ್ಚಿದಾನನ್ದಮಾತ್ರೋಽಹಂ ಸರ್ವಂ ಸಚ್ಚಿನ್ಮಯಂ ತತಮ್ ।
ತದೇವ ಬ್ರಹ್ಮ ಸಂಪಶ್ಯತ್ ಬ್ರಹ್ಮೈವ ಭವತಿ ಸ್ವಯಮ್ ॥ ೨॥
ಅಹಂ ಬ್ರಹ್ಮ ಇದಂ ಬ್ರಹ್ಮ ನಾನಾ ಬ್ರಹ್ಮ ನ ಸಂಶಯಃ ।
ಸತ್ಯಂ ಬ್ರಹ್ಮ ಸದಾ ಬ್ರಹ್ಮಾಪ್ಯಹಂ ಬ್ರಹ್ಮೈವ ಕೇವಲಮ್ ॥ ೩॥
ಗುರುರ್ಬ್ರಹ್ಮ ಗುಣೋ ಬ್ರಹ್ಮ ಸರ್ವಂ ಬ್ರಹ್ಮಪರೋಽಸ್ಮ್ಯಹಮ್ ।
ನಾನ್ತಂ ಬ್ರಹ್ಮ ಅಹಂ ಬ್ರಹ್ಮ ಸರ್ವಂ ಬ್ರಹ್ಮಾಪರೋಽಸ್ಮ್ಯಹಮ್ ॥ ೪॥
ವೇದವೇದ್ಯಂ ಪರಂ ಬ್ರಹ್ಮ ವಿದ್ಯಾ ಬ್ರಹ್ಮ ವಿಶೇಷತಃ ।
ಆತ್ಮಾ ಬ್ರಹ್ಮ ಅಹಂ ಬ್ರಹ್ಮ ಆದ್ಯನ್ತಂ ಬ್ರಹ್ಮ ಸೋಽಸ್ಮ್ಯಹಮ್ ॥ ೫॥
ಸತ್ಯಂ ಬ್ರಹ್ಮ ಸದಾ ಬ್ರಹ್ಮ ಅನ್ಯನ್ನಾಸ್ತಿ ಸದಾ ಪರಮ್ ।
ಅಹಂ ಬ್ರಹ್ಮ ತ್ವಹಂ ನಾಸ್ತಿ ಅಹಂಕಾರಪರಂ ನಹಿ ॥ ೬॥
ಅಹಂ ಬ್ರಹ್ಮ ಇದಂ ನಾಸ್ತಿ ಅಯಮಾತ್ಮಾ ಮಹಾನ್ ಸದಾ ।
ವೇದಾನ್ತವೇದ್ಯೋ ಬ್ರಹ್ಮಾತ್ಮಾ ಅಪರಂ ಶಶಶೃಙ್ಗವತ್ ॥ ೭॥
ಭೂತಂ ನಾಸ್ತಿ ಭವಿಷ್ಯಂ ನ ಬ್ರಹ್ಮೈವ ಸ್ಥಿರತಾಂ ಗತಃ ।
ಚಿನ್ಮಯೋಽಹಂ ಜಡಂ ತುಚ್ಛಂ ಚಿನ್ಮಾತ್ರಂ ದೇಹನಾಶನಮ್ ॥ ೮॥
ಚಿತ್ತಂ ಕಿಞ್ಚಿತ್ ಕ್ವಚಿಚ್ಚಾಪಿ ಚಿತ್ತಂ ದೂರೋಽಹಮಾತ್ಮಕಃ ।var was ಹರೋಽಹಮಾತ್ಮಕಃ
ಸತ್ಯಂ ಜ್ಞಾನಮನನ್ತಂ ಯನ್ನಾನೃತಂ ಜಡದುಃಖಕಮ್ ॥ ೯॥
ಆತ್ಮಾ ಸತ್ಯಮನನ್ತಾತ್ಮಾ ದೇಹಮೇವ ನ ಸಂಶಯಃ ।
ವಾರ್ತಾಪ್ಯಸಚ್ಛ್ರುತಂ ತನ್ನ ಅಹಮೇವ ಮಹೋಮಹಃ ॥ ೧೦॥
ಏಕಸಂಖ್ಯಾಪ್ಯಸದ್ಬ್ರಹ್ಮ ಸತ್ಯಮೇವ ಸದಾಽಪ್ಯಹಮ್ ।
ಸರ್ವಮೇವಮಸತ್ಯಂ ಚ ಉತ್ಪನ್ನತ್ವಾತ್ ಪರಾತ್ ಸದಾ ॥ ೧೧॥
ಸರ್ವಾವಯವಹೀನೋಽಪಿ ನಿತ್ಯತ್ವಾತ್ ಪರಮೋ ಹ್ಯಹಮ್ ।
ಸರ್ವಂ ದೃಶ್ಯಂ ನ ಮೇ ಕಿಞ್ಚಿತ್ ಚಿನ್ಮಯತ್ವಾದ್ವದಾಮ್ಯಹಮ್ ॥ ೧೨॥
ಆಗ್ರಹಂ ಚ ನ ಮೇ ಕಿಞ್ಚಿತ್ ಚಿನ್ಮಯತ್ವಾದ್ವದಾಮ್ಯಹಮ್ ।
ಇದಮಿತ್ಯಪಿ ನಿರ್ದೇಶೋ ನ ಕ್ವಚಿನ್ನ ಕ್ವಚಿತ್ ಸದಾ ॥ ೧೩॥
ನಿರ್ಗುಣಬ್ರಹ್ಮ ಏವಾಹಂ ಸುಗುರೋರುಪದೇಶತಃ ।
ವಿಜ್ಞಾನಂ ಸಗುಣೋ ಬ್ರಹ್ಮ ಅಹಂ ವಿಜ್ಞಾನವಿಗ್ರಹಃ ॥ ೧೪॥
ನಿರ್ಗುಣೋಽಸ್ಮಿ ನಿರಂಶೋಽಸ್ಮಿ ಭವೋಽಸ್ಮಿ ಭರಣೋಽಸ್ಮ್ಯಹಮ್ ।
ದೇವೋಽಸ್ಮಿ ದ್ರವ್ಯಪೂರ್ಣೋಽಸ್ಮಿ ಶುದ್ಧೋಽಸ್ಮಿ ರಹಿತೋಽಸ್ಮ್ಯಹಮ್ ॥ ೧೫॥
ರಸೋಽಸ್ಮಿ ರಸಹೀನೋಽಸ್ಮಿ ತುರ್ಯೋಽಸ್ಮಿ ಶುಭಭಾವನಃ ।
ಕಾಮೋಽಸ್ಮಿ ಕಾರ್ಯಹೀನೋಽಸ್ಮಿ ನಿತ್ಯನಿರ್ಮಲವಿಗ್ರಹಃ ॥ ೧೬॥
ಆಚಾರಫಲಹೀನೋಽಸ್ಮಿ ಅಹಂ ಬ್ರಹ್ಮಾಸ್ಮಿ ಕೇವಲಮ್ ।
ಇದಂ ಸರ್ವಂ ಪರಂ ಬ್ರಹ್ಮ ಅಯಮಾತ್ಮಾ ನ ವಿಸ್ಮಯಃ ॥ ೧೭॥
ಪೂರ್ಣಾಪೂರ್ಣಸ್ವರೂಪಾತ್ಮಾ ನಿತ್ಯಂ ಸರ್ವಾತ್ಮವಿಗ್ರಹಃ ।
ಪರಮಾನನ್ದತತ್ತ್ವಾತ್ಮಾ ಪರಿಚ್ಛಿನ್ನಂ ನ ಹಿ ಕ್ವಚಿತ್ ॥ ೧೮॥
ಏಕಾತ್ಮಾ ನಿರ್ಮಲಾಕಾರ ಅಹಮೇವೇತಿ ಭಾವಯ ।
ಅಹಂಭಾವನಯಾ ಯುಕ್ತ ಅಹಂಭಾವೇನ ಸಂಯುತಃ ॥ ೧೯॥
ಶಾನ್ತಂ ಭಾವಯ ಸರ್ವಾತ್ಮಾ ಶಾಮ್ಯತತ್ತ್ವಂ ಮನೋಮಲಃ ।
ದೇಹೋಽಹಮಿತಿ ಸನ್ತ್ಯಜ್ಯ ಬ್ರಹ್ಮಾಹಮಿತಿ ನಿಶ್ಚಿನು ॥ ೨೦॥
ಬ್ರಹ್ಮೈವಾಹಂ ಬ್ರಹ್ಮಮಾತ್ರಂ ಬ್ರಹ್ಮಣೋಽನ್ಯನ್ನ ಕಿಞ್ಚನ ।
ಇದಂ ನಾಹಮಿದಂ ನಾಹಮಿದಂ ನಾಹಂ ಸದಾ ಸ್ಮರ ॥ ೨೧॥
ಅಹಂ ಸೋಽಹಮಹಂ ಸೋಽಹಮಹಂ ಬ್ರಹ್ಮೇತಿ ಭಾವಯ ।
ಚಿದಹಂ ಚಿದಹಂ ಬ್ರಹ್ಮ ಚಿದಹಂ ಚಿದಹಂ ವದ ॥ ೨೨॥
ನೇದಂ ನೇದಂ ಸದಾ ನೇದಂ ನ ತ್ವಂ ನಾಹಂ ಚ ಭಾವಯ ।
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವಂ ವೇದಂ ನ ಕಿಞ್ಚನ ॥ ೨೩॥
ಸರ್ವಂ ಶಬ್ದಾರ್ಥಭವನಂ ಸರ್ವಲೋಕಭಯಂ ನ ಚ ।
ಸರ್ವತೀರ್ಥಂ ನ ಸತ್ಯಂ ಹಿ ಸರ್ವದೇವಾಲಯಂ ನ ಹಿ ॥ ೨೪॥
ಸರ್ವಚೈತನ್ಯಮಾತ್ರತ್ವಾತ್ ಸರ್ವಂ ನಾಮ ಸದಾ ನ ಹಿ ।
ಸರ್ವರೂಪಂ ಪರಿತ್ಯಜ್ಯ ಸರ್ವಂ ಬ್ರಹ್ಮೇತಿ ನಿಶ್ಚಿನು ॥ ೨೫॥
ಬ್ರಹ್ಮೈವ ಸರ್ವಂ ತತ್ಸತ್ಯಂ ಪ್ರಪಞ್ಚಂ ಪ್ರಕೃತಿರ್ನಹಿ ।
ಪ್ರಾಕೃತಂ ಸ್ಮರಣಂ ತ್ಯಜ್ಯ ಬ್ರಹ್ಮಸ್ಮರಣಮಾಹರ ॥ ೨೬॥
ತತಸ್ತದಪಿ ಸನ್ತ್ಯಜ್ಯ ನಿಜರೂಪೇ ಸ್ಥಿರೋ ಭವ ।
ಸ್ಥಿರರೂಪಂ ಪರಿತ್ಯಜ್ಯ ಆತ್ಮಮಾತ್ರಂ ಭವತ್ಯಸೌ ॥ ೨೭॥
ತ್ಯಾಗತ್ವಮಪಿ ಸನ್ತ್ಯಜ್ಯ ಭೇದಮಾತ್ರಂ ಸದಾ ತ್ಯಜ ।
ಸ್ವಯಂ ನಿಜಂ ಸಮಾವೃತ್ಯ ಸ್ವಯಮೇವ ಸ್ವಯಂ ಭಜ ॥ ೨೮॥
ಇದಮಿತ್ಯಙ್ಗುಲೀದೃಷ್ಟಮಿದಮಸ್ತಮಚೇತನಮ್ ।
ಇದಂ ವಾಕ್ಯಂ ಚ ವಾಕ್ಯೇನ ವಾಚಾಽಪಿ ಪರಿವೇದನಮ್ ॥ ೨೯॥
ಸರ್ವಭಾವಂ ನ ಸನ್ದೇಹಃ ಸರ್ವಂ ನಾಸ್ತಿ ನ ಸಂಶಯಃ ।
ಸರ್ವಂ ತುಚ್ಛಂ ನ ಸನ್ದೇಹಃ ಸರ್ವಂ ಮಾಯಾ ನ ಸಂಶಯಃ ॥ ೩೦॥
ತ್ವಂ ಬ್ರಹ್ಮಾಹಂ ನ ಸನ್ದೇಹೋ ಬ್ರಹ್ಮೈವೇದಂ ನ ಸಂಶಯಃ ।
ಸರ್ವಂ ಚಿತ್ತಂ ನ ಸನ್ದೇಹಃ ಸರ್ವಂ ಬ್ರಹ್ಮ ನ ಸಂಶಯಃ ॥ ೩೧॥
ಬ್ರಹ್ಮಾನ್ಯದ್ಭಾತಿ ಚೇನ್ಮಿಥ್ಯಾ ಸರ್ವಂ ಮಿಥ್ಯಾ ಪರಾವರಾ ।
ನ ದೇಹಂ ಪಞ್ಚಭೂತಂ ವಾ ನ ಚಿತ್ತಂ ಭ್ರಾನ್ತಿಮಾತ್ರಕಮ್ ॥ ೩೨॥
ನ ಚ ಬುದ್ಧೀನ್ದ್ರಿಯಾಭಾವೋ ನ ಮುಕ್ತಿರ್ಬ್ರಹ್ಮಮಾತ್ರಕಮ್ ।
ನಿಮಿಷಂ ಚ ನ ಶಙ್ಕಾಪಿ ನ ಸಙ್ಕಲ್ಪಂ ತದಸ್ತಿ ಚೇತ್ ॥ ೩೩॥
ಅಹಙ್ಕಾರಮಸದ್ವಿದ್ಧಿ ಅಭಿಮಾನಂ ತದಸ್ತಿ ಚೇತ್ ।
ನ ಚಿತ್ತಸ್ಮರಣಂ ತಚ್ಚೇನ್ನ ಸನ್ದೇಹೋ ಜರಾ ಯದಿ ॥ ೩೪॥
ಪ್ರಾಣೋ...ದೀಯತೇ ಶಾಸ್ತಿ ಘ್ರಾಣೋ ಯದಿಹ ಗನ್ಧಕಮ್ ।
ಚಕ್ಷುರ್ಯದಿಹ ಭೂತಸ್ಯ ಶ್ರೋತ್ರಂ ಶ್ರವಣಭಾವನಮ್ ॥ ೩೫॥
ತ್ವಗಸ್ತಿ ಚೇತ್ ಸ್ಪರ್ಶಸತ್ತಾ ಜಿಹ್ವಾ ಚೇದ್ರಸಸಙ್ಗ್ರಹಃ ।
ಜೀವೋಽಸ್ತಿ ಚೇಜ್ಜೀವನಂ ಚ ಪಾದಶ್ಚೇತ್ ಪಾದಚಾರಣಮ್ ॥ ೩೬॥
ಹಸ್ತೌ ಯದಿ ಕ್ರಿಯಾಸತ್ತಾ ಸ್ರಷ್ಟಾ ಚೇತ್ ಸೃಷ್ಟಿಸಂಭವಃ ।
ರಕ್ಷ್ಯಂ ಚೇದ್ರಕ್ಷಕೋ ವಿಷ್ಣುರ್ಭಕ್ಷ್ಯಂ ಚೇದ್ಭಕ್ಷಕಃ ಶಿವಃ ॥ ೩೭॥
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವಂ ಬ್ರಹ್ಮೈವ ಕೇವಲಮ್ ।
ಪೂಜ್ಯಂ ಚೇತ್ ಪೂಜನಂ ಚಾಸ್ತಿ ಭಾಸ್ಯಂ ಚೇದ್ಭಾಸಕಃ ಶಿವಃ ॥ ೩೮॥
ಸರ್ವಂ ಮಿಥ್ಯಾ ನ ಸನ್ದೇಹಃ ಸರ್ವಂ ಚಿನ್ಮಾತ್ರಮೇವ ಹಿ ।
ಅಸ್ತಿ ಚೇತ್ ಕಾರಣಂ ಸತ್ಯಂ ಕಾರ್ಯಂ ಚೈವ ಭವಿಷ್ಯತಿ ॥ ೩೯॥
ನಾಸ್ತಿ ಚೇನ್ನಾಸ್ತಿ ಹೀನೋಽಹಂ ಬ್ರಹ್ಮೈವಾಹಂ ಪರಾಯಣಮ್ ।
ಅತ್ಯನ್ತದುಃಖಮೇತದ್ಧಿ ಅತ್ಯನ್ತಸುಖಮವ್ಯಯಮ್ ॥ ೪೦॥
ಅತ್ಯನ್ತಂ ಜನ್ಮಮಾತ್ರಂ ಚ ಅತ್ಯನ್ತಂ ರಣಸಂಭವಮ್ ।
ಅತ್ಯನ್ತಂ ಮಲಿನಂ ಸರ್ವಮತ್ಯನ್ತಂ ನಿರ್ಮಲಂ ಪರಮ್ ॥ ೪೧॥
ಅತ್ಯನ್ತಂ ಕಲ್ಪನಂ ದುಷ್ಟಂ ಅತ್ಯನ್ತಂ ನಿರ್ಮಲಂ ತ್ವಹಮ್ ।
ಅತ್ಯನ್ತಂ ಸರ್ವದಾ ದೋಷಮತ್ಯನ್ತಂ ಸರ್ವದಾ ಗುಣಮ್ ॥ ೪೨॥
ಅತ್ಯನ್ತಂ ಸರ್ವದಾ ಶುಭ್ರಮತ್ಯನ್ತಂ ಸರ್ವದಾ ಮಲಮ್ ।
ಅತ್ಯನ್ತಂ ಸರ್ವದಾ ಚಾಹಮತ್ಯನ್ತಂ ಸರ್ವದಾ ಇದಮ್ ॥ ೪೩॥
ಅತ್ಯನ್ತಂ ಸರ್ವದಾ ಬ್ರಹ್ಮ ಅತ್ಯನ್ತಂ ಸರ್ವದಾ ಜಗತ್ ।
ಏತಾವದುಕ್ತಮಭಯಮಹಂ ಭೇದಂ ನ ಕಿಞ್ಚನ ॥ ೪೪॥
ಸದಸದ್ವಾಪಿ ನಾಸ್ತ್ಯೇವ ಸದಸದ್ವಾಪಿ ವಾಕ್ಯಕಮ್ ।
ನಾಸ್ತಿ ನಾಸ್ತಿ ನ ಸನ್ದೇಹೋ ಬ್ರಹ್ಮೈವಾಹಂ ನ ಸಂಶಯಃ ॥ ೪೫॥
ಕಾರಣಂ ಕಾರ್ಯರೂಪಂ ವಾ ಸರ್ವಂ ನಾಸ್ತಿ ನ ಸಂಶಯಃ ।
ಕರ್ತಾ ಭೋಕ್ತಾ ಕ್ರಿಯಾ ವಾಪಿ ನ ಭೋಜ್ಯಂ ಭೋಗತೃಪ್ತತಾ ॥ ೪೬॥
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವ ಶಬ್ದೋ ನ ವಾಸ್ತವಮ್ ।
ಭೂತಂ ಭವಿಷ್ಯಂ ವಾರ್ತಂ ತು ಕಾರ್ಯಂ ವಾ ನಾಸ್ತಿ ಸರ್ವದಾ ॥ ೪೭॥
ಸದಸದ್ಭೇದ್ಯಭೇದಂ ವಾ ನ ಗುಣಾ ಗುಣಭಾಗಿನಃ ।
ನಿರ್ಮಲಂ ವಾ ಮಲಂ ವಾಪಿ ನಾಸ್ತಿ ನಾಸ್ತಿ ನ ಕಿಞ್ಚನ ॥ ೪೮॥
ಭಾಷ್ಯಂ ವಾ ಭಾಷಣಂ ವಾಽಪಿ ನಾಸ್ತಿ ನಾಸ್ತಿ ನ ಕಿಞ್ಚನ ।
ಪ್ರಬಲಂ ದುರ್ಬಲಂ ವಾಪಿ ಅಹಂ ಚ ತ್ವಂ ಚ ವಾ ಕ್ವಚಿತ್ ॥ ೪೯॥
ಗ್ರಾಹ್ಯಂ ಚ ಗ್ರಾಹಕಂ ವಾಪಿ ಉಪೇಕ್ಷ್ಯಂ ನಾತ್ಮನಃ ಕ್ವಚಿತ್ ।
ತೀರ್ಥಂ ವಾ ಸ್ನಾನರೂಪಂ ವಾ ದೇವೋ ವಾ ದೇವ ಪೂಜನಮ್ ॥ ೫೦॥
ಜನ್ಮ ವಾ ಮರಣಂ ಹೇತುರ್ನಾಸ್ತಿ ನಾಸ್ತಿ ನ ಕಿಞ್ಚನ ।
ಸತ್ಯಂ ವಾ ಸತ್ಯರೂಪಂ ವಾ ನಾಸ್ತಿ ನಾಸ್ತಿ ನ ಕಿಞ್ಚನ ॥ ೫೧॥
ಮಾತರಃ ಪಿತರೋ ವಾಪಿ ದೇಹೋ ವಾ ನಾಸ್ತಿ ಕಿಞ್ಚನ ।
ದೃಗ್ರೂಪಂ ದೃಶ್ಯರೂಪಂ ವಾ ನಾಸ್ತಿ ನಾಸ್ತೀಹ ಕಿಞ್ಚನ ॥ ೫೨॥
ಮಾಯಾಕಾರ್ಯಂ ಚ ಮಾಯಾ ವಾ ನಾಸ್ತಿ ನಾಸ್ತೀಹ ಕಿಞ್ಚನ ।
ಜ್ಞಾನಂ ವಾ ಜ್ಞಾನಭೇದೋ ವಾ ನಾಸ್ತಿ ನಾಸ್ತೀಹ ಕಿಞ್ಚನ ॥ ೫೩॥
ಸರ್ವಪ್ರಪಞ್ಚಹೇಯತ್ವಂ ಪ್ರೋಕ್ತಂ ಪ್ರಕರಣಂ ಚ ತೇ ।
ಯಃ ಶೃಣೋತಿ ಸಕೃದ್ವಾಪಿ ಆತ್ಮಾಕಾರಂ ಪ್ರಪದ್ಯತೇ ॥ ೫೪॥

ಸ್ಕನ್ದಃ -

ಮಾಯಾ ಸಾ ತ್ರಿಗುಣಾ ಗಣಾಧಿಪಗುರೋರೇಣಾಙ್ಕಚೂಡಾಮಣೇಃ
ಪಾದಾಮ್ಭೋಜಸಮರ್ಚನೇನ ವಿಲಯಂ ಯಾತ್ಯೇವ ನಾಸ್ತ್ಯನ್ಯಥಾ ।
ವಿದ್ಯಾ ಹೃದ್ಯತಮಾ ಸುವಿದ್ಯುದಿವ ಸಾ ಭಾತ್ಯೇವ ಹೃತ್ಪಙ್ಕಜೇ
ಯಸ್ಯಾನಲ್ಪತಪೋಭಿರುಗ್ರಕರಣಾದೃಕ್ ತಸ್ಯ ಮುಕ್ತಿಃ ಸ್ಥಿರಾ ॥ ೫೫॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸರ್ವಪ್ರಪಞ್ಚಹೇಯತ್ವಪ್ರಕರಣವರ್ಣನಂ ನಾಮ ಏಕವಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com