ಋಭುಗೀತಾ ೫೦ ॥ ಸುದರ್ಶನಸ್ಯ ಮುಕ್ತಿಲಾಭ ವರ್ಣನಂ ಚ ॥

ಸ್ಕನ್ದಃ -

• ವಿಷ್ಣುಸ್ತವಾನ್ತೇ ವಿಪ್ರೋಽಸೌ ಸುದರ್ಶನಸಮಾಹ್ವಯಃ ।
• ಸ್ನಾತ್ವಾಽಥ ಮಣಿಕರ್ಣ್ಯಾಂ ಸ ಭಸ್ಮರುದ್ರಾಕ್ಷಭೂಷಣಃ ॥ ೧॥
• ಸಞ್ಜಪನ್ ಶತರುದ್ರೀಯಂ ಪಞ್ಚಾಕ್ಷರಪರಾಯಣಃ ।
• ಸಂಪಾದ್ಯ ಬಿಲ್ವಪತ್ರಾಣಿ ಕಮಲಾನ್ಯಮಲಾನ್ಯಪಿ ॥ ೨॥
• ಗನ್ಧಾಕ್ಷತೈರ್ಧೂಪದೀಪೈರ್ನೈವೇದ್ಯೈರ್ವಿವಿಧೈರಪಿ ।
• ವಿಷ್ಣೂಪದಿಷ್ಟಮಾರ್ಗೇಣ ನಿತ್ಯಮನ್ತರ್ಗೃಹಸ್ಯ ಹಿ ॥ ೩॥
• ಪ್ರದಕ್ಷಿಣಂ ಚಕಾರಾಸೌ ಲಿಙ್ಗಾನ್ಯಭ್ಯರ್ಚಯಂಸ್ತಥಾ ।
• ವಿಶ್ವೇಶ್ವರಾವಿಮುಕ್ತೇಶೌ ವೀರೇಶಂ ಚ ತ್ರಿಲೋಚನಮ್ ॥ ೪॥
• ಕೃತ್ತಿವಾಸಂ ವೃದ್ಧಕಾಲೇ ಕೇದಾರಂ ಶೂಲಟಙ್ಕಕಮ್ ।
• ರತ್ನೇಶಂ ಭಾರಭೂತೇಶಂ ಚನ್ದ್ರೇಶಂ ಸಿದ್ಧಕೇಶ್ವರಮ್ ॥ ೫॥
• ಘಣ್ಟಾಕರ್ಣೇಶ್ವರಂ ಚೈವ ನಾರದೇಶಂ ಯಮೇಶ್ವರಮ್ ।
• ಪುಲಸ್ತಿಪುಲಹೇಶಂ ಚ ವಿಕರ್ಣೇಶಂ ಫಲೇಶ್ವರಮ್ ॥ ೬॥
• ಕದ್ರುದ್ರೇಶಮಖಣ್ಡೇಶಂ ಕೇತುಮಾಲಿಂ ಗಭಸ್ತಿಕಮ್ ।
• ಯಮುನೇಶಂ ವರ್ಣಕೇಶಂ ಭದ್ರೇಶಂ ಜ್ಯೇಷ್ಠಶಙ್ಕರಮ್ ॥ ೭॥
• ನನ್ದಿಕೇಶಂ ಚ ರಾಮೇಶಂ ಕರಮರ್ದೇಶ್ವರಂ ತಥಾ ।
• ಆವರ್ದೇಶಂ ಮತಙ್ಗೇಶಂ ವಾಸುಕೀಶಂ ದ್ರುತೀಶ್ವರಮ್ ॥ ೮॥
• ಸೂರ್ಯೇಶಮರ್ಯಮೇಶಂ ಚ ತೂಣೀಶಂ ಗಾಲವೇಶ್ವರಮ್ ।
• ಕಣ್ವಕಾತ್ಯಾಯನೇಶಂ ಚ ಚನ್ದ್ರಚೂಡೇಶ್ವರಂ ತಥಾ ॥ ೯॥
• ಉದಾವರ್ತೇಶ್ವರಂ ಚೈವ ತೃಣಜ್ಯೋತೀಶ್ವರಂ ಸದಾ ।
• ಕಙ್ಕಣೇಶಂ ತಙ್ಕಣೇಶಂ ಸ್ಕನ್ದೇಶಂ ತಾರಕೇಶ್ವರಮ್ ॥ ೧೦॥
• ಜಮ್ಬುಕೇಶಂ ಚ ಜ್ಞಾನೇಶಂ ನನ್ದೀಶಂ ಗಣಪೇಶ್ವರಮ್ ।
• ಏತಾನ್ಯನ್ತರ್ಗೃಹೇ ವಿಪ್ರಃ ಪೂಜಯನ್ ಪರಯಾ ಮುದಾ ॥ ೧೧॥
• ಢುಣ್ಢ್ಯಾದಿಗಣಪಾಂಶ್ಚೈವ ಭೈರವಂ ಚಾಪಿ ನಿತ್ಯಶಃ ।
• ಅನ್ನಪೂರ್ಣಾಮನ್ನದಾತ್ರೀಂ ಸಾಕ್ಷಾಲ್ಲೋಕೈಕಮಾತರಮ್ ॥ ೧೨॥
• ದಣ್ಡಪಾಣಿಂ ಕ್ಷೇತ್ರಪಾಲಂ ಸಮ್ಯಗಭ್ಯರ್ಚ್ಯ ತಸ್ಥಿವಾನ್ ।
• ತೀರ್ಥಾನ್ಯನ್ಯಾನ್ಯಪಿ ಮುನಿರ್ಮಣಿಕರ್ಣ್ಯಾದಿ ಸತ್ತಮ ॥ ೧೩॥
• ಜ್ಞಾನೋದಂ ಸಿದ್ಧಕೂಪಂ ಚ ವೃದ್ಧಕೂಪಂ ಪಿಶಾಚಕಮ್ ।
• ಋಣಮೋಚನತೀರ್ಥಂ ಚ ಗರ್ಗತೀರ್ಥಂ ಮಹತ್ತರಮ್ ॥ ೧೪॥
• ಸ್ನಾತ್ವಾ ಸನಿಯಮಂ ವಿಪ್ರೋ ನಿತ್ಯಂ ಪಞ್ಚನದೇ ಹೃದೇ ।
• ಕಿರಣಾಂ ಧೂತಪಾಪಾಂ ಚ ಪಞ್ಚಗಙ್ಗಾಮಪಿ ದ್ವಿಜಃ ॥ ೧೫॥
• ಗಙ್ಗಾಂ ಮನೋರಮಾಂ ತುಙ್ಗಾಂ ಸರ್ವಪಾಪಪ್ರಣಾಶಿನೀಮ್ ।
• ಮುಕ್ತಿಮಣ್ಟಪಮಾಸ್ಥಾಯ ಸ ಜಪನ್ ಶತರುದ್ರಿಯಮ್ ॥ ೧೬॥
• ಅಷ್ಟೋತ್ತರಸಹಸ್ರಂ ವೈ ಜಪನ್ ಪಞ್ಚಾಕ್ಷರಂ ದ್ವಿಜಃ ।
• ಪಕ್ಷೇ ಪಕ್ಷೇ ತಥಾ ಕುರ್ವನ್ ಪಞ್ಚಕ್ರೋಶಪ್ರದಕ್ಷಿಣಮ್ ॥ ೧೭॥
• ಅನ್ತರ್ಗೃಹಾದ್ಬಹಿರ್ದೇಶೇ ಚಕಾರಾವಸಥಂ ತದಾ ।
• ಏವಂ ಸಂವಸತಸ್ತಸ್ಯ ಕಾಲೋ ಭೂಯಾನವರ್ತತ ॥ ೧೮॥
• ತತ್ರ ದೃಷ್ಟ್ವಾ ತಪೋನಿಷ್ಠಂ ಸುದರ್ಶನಸಮಾಹ್ವಯಮ್ ।
• ವಿಷ್ಣುಸ್ತದಾ ವೈ ತಂ ವಿಪ್ರಂ ಸಮಾಹೂಯ ಶಿವಾರ್ಚಕಮ್ ॥ ೧೯॥
• ಪುನಃ ಪ್ರಾಹ ಪ್ರಸನ್ನೇನ ಚೇತಸಾ ಮುನಿಸತ್ತಮಮ್ ।

ವಿಷ್ಣುಃ -

• ಭೋಃ ಸುದರ್ಶನವಿಪ್ರೇನ್ದ್ರ ಶಿವಾರ್ಚನಪರಾಯಣ ।
• ಜ್ಞಾನಪಾತ್ರಂ ಭವಾನೇವ ವಿಶ್ವೇಶಕೃಪಯಾಽಧುನಾ ॥ ೨೦॥
• ತ್ವಯಾ ತಪಾಂಸಿ ತಪ್ತಾನಿ ಇಷ್ಟಾ ಯಜ್ಞಾಸ್ತ್ವಯೈವ ಹಿ ।
• ಅಧೀತಾಶ್ಚ ತ್ವಯಾ ವೇದಾಃ ಕಾಶ್ಯಾಂ ವಾಸೋ ಯತಸ್ತವ ॥ ೨೧॥
• ಬಹುಭಿರ್ಜನ್ಮಭಿರ್ಯೇನ ಕೃತಂ ಕ್ಷೇತ್ರೇ ಮಹತ್ತಪಃ ।
• ತಸ್ಯೈವ ಸಿದ್ಧ್ಯತ್ಯಮಲಾ ಕಾಶೀಯಂ ಮುಕ್ತಿಕಾಶಿಕಾ ॥ ೨೨॥
• ತವ ಭಾಗ್ಯಸ್ಯ ನಾನ್ತೋಽಸ್ತಿ ಮುನೇ ತ್ವಂ ಭಾಗ್ಯವಾನಸಿ ।
• ಕಿಞ್ಚೈಕಂ ತವ ವಕ್ಷ್ಯಾಮಿ ಹಿತಮಾತ್ಯನ್ತಿಕಂ ಶೃಣು ॥ ೨೩॥
• ವಿಶ್ವೇಶಕೃಪಯಾ ತೇಽದ್ಯ ಮುಕ್ತಿರನ್ತೇ ಭವಿಷ್ಯತಿ ।
• ರುದ್ರಾಕ್ಷನಾಮಪುಣ್ಯಂ ಯತ್ ನಾಮ್ನಾಂ ಸಾಹಸ್ರಮುತ್ತಮಮ್ ॥ ೨೪॥
• ಉಪದೇಕ್ಷ್ಯಾಮಿ ತೇ ವಿಪ್ರ ನಾಮಸಾಹಸ್ರಮೀಶಿತುಃ ।
• ತೇನಾರ್ಚಯೇಶಂ ವಿಶ್ವೇಶಂ ಬಿಲ್ವಪತ್ರೈರ್ಮನೋಹರೈಃ ॥ ೨೫॥
• ವರ್ಷಮೇಕಂ ನಿರಾಹಾರೋ ವಿಶ್ವೇಶಂ ಪೂಜಯನ್ ಸದಾ ।
• ಸಂವತ್ಸರಾನ್ತೇ ಮುಕ್ತಸ್ತ್ವಂ ಭವಿಷ್ಯತಿ ನ ಸಂಶಯಃ ॥ ೨೬॥
• ತ್ವದ್ದೇಹಾಪಗಮೇ ಮನ್ತ್ರಂ ಪಞ್ಚಾಕ್ಷರಮನುತ್ತಮಮ್ ।
• ದದಾತಿ ದೇವೋ ವಿಶ್ವೇಶಸ್ತೇನ ಮುಕ್ತೋ ಭವಿಷ್ಯತಿ ॥ ೨೭॥
• ಶೈವೇಭ್ಯಃ ಸನ್ನಜೀವೇಭ್ಯೋ ದದಾತೀಮಂ ಮಹಾಮನುಮ್ ।

ಸ್ಕನ್ದಃ -

• ಇತಿ ವಿಷ್ಣುವಚಃ ಶ್ರುತ್ವಾ ಪ್ರಣಮ್ಯಾಹ ಹರಿಂ ತದಾ ।
• ಸುದರ್ಶನೋ ಯಯಾಚೇತ್ಥಂ ನಾಮ್ನಾಂ ಸಾಹಸ್ರಮುತ್ತಮಮ್ ॥ ೨೮॥
• ಭಗವನ್ ದೈತ್ಯವೃನ್ದಘ್ನ ವಿಷ್ಣೋ ಜಿಷ್ಣೋ ನಮೋಽಸ್ತು ತೇ ।
• ಸಹಸ್ರನಾಮ್ನಾಂ ಯದ್ದಿವ್ಯಂ ವಿಶ್ವೇಶಸ್ಯಾಶು ತದ್ವದ ॥ ೨೯॥
• ಯೇನ ಜಪ್ತೇನ ದೇವೇಶಃ ಪೂಜಿತೋ ಬಿಲ್ವಪತ್ರಕೈಃ ।
• ದದಾತಿ ಮೋಕ್ಷಸಾಮ್ರಾಜ್ಯಂ ದೇಹಾನ್ತೇ ತದ್ವದಾಶು ಮೇ ॥ ೩೦॥
• ತದಾ ವಿಪ್ರವಚಃ ಶ್ರುತ್ವಾ ತಸ್ಮೈ ಚೋಪಾದಿಶತ್ ಸ್ವಯಮ್ ।
• ಸಹಸ್ರನಾಮ್ನಾಂ ದೇವಸ್ಯ ಹಿರಣ್ಯಸ್ಯೇತ್ಯಾದಿ ಸತ್ತಮ ॥ ೩೧॥
• ತೇನ ಸಂಪೂಜ್ಯ ವಿಶ್ವೇಶಂ ವರ್ಷಮೇಕಮತನ್ದ್ರಿತಃ ।
• ಕೋಮಲಾರಕ್ತಬಿಲ್ವೈಶ್ಚ ಸ್ತೋತ್ರೇಣಾನೇನ ತುಷ್ಟುವೇ ॥ ೩೨॥

ಸುದರ್ಶನಃ -

• ಆಶೀವಿಷಾಙ್ಗಪರಿಮಣ್ಡಲಕಣ್ಠಭಾಗ-
• ರಾಜತ್ಸುಸಾಗರಭವೋಗ್ರವಿಷೋರುಶೋಭ ।
• ಫಾಲಸ್ಫುರಜ್ಜ್ವಲನದೀಪ್ತಿವಿದೀಪಿತಾಶಾ-
• ಶೋಕಾವಕಾಶ ತಪನಾಕ್ಷ ಮೃಗಾಙ್ಕಮೌಲೇ ॥ ೩೩॥
• ಕ್ರುದ್ಧೋಡುಜಾಯಾಪತಿಧೃತಾರ್ಧಶರೀರಶೋಭ
• ಪಾಹ್ಯಾಶು ಶಾಸಿತಮಖಾನ್ಧಕದಕ್ಷಶತ್ರೋ ।
• ಸುತ್ರಾಮವಜ್ರಕರದಣ್ಡವಿಖಣ್ಡಿತೋರು-
• ಪಕ್ಷಾದ್ಯಘಕ್ಷಿತಿಧರೋರ್ಧ್ವಶಯಾವ ಶಂಭೋ ॥ ೩೪॥
• ಉತ್ಫುಲ್ಲಹಲ್ಲಕಲಸತ್ಕರವೀರಮಾಲಾ-
• ಭ್ರಾಜತ್ಸುಕನ್ಧರಶರೀರ ಪಿನಾಕಪಾಣೇ ।
• ಚಞ್ಚತ್ಸುಚನ್ದ್ರಕಲಿಕೋತ್ತಮಚಾರುಮೌಲಿಂ
• ಲಿಙ್ಗೇ ಕುಲುಞ್ಚಪತಿಮಮ್ಬಿಕಯಾ ಸಮೇತಮ್ ॥ ೩೫॥
• ಛಾಯಾಧವಾನುಜಲಸಚ್ಛದನೈಃ ಪರಿಪೂಜ್ಯ ಭಕ್ತ್ಯಾ
• ಮುಕ್ತೇನ ಸ್ವಸ್ಯ ಚ ವಿರಾಜಿತವಂಶಕೋಟ್ಯಾ ।
• ಸಾಯಂ ಸಙ್ಗವಪುಙ್ಗವೋರುವಹನಂ ಶ್ರೀತುಙ್ಗಲಿಙ್ಗಾರ್ಚಕಃ
• ಶಾಙ್ಗಃ ಪಾತಕಸಙ್ಗಭಙ್ಗಚತುರಶ್ಚಾಸಙ್ಗನಿತ್ಯಾನ್ತರಃ ॥ ೩೬॥
• ಫಾಲಾಕ್ಷಸ್ಫುರದಕ್ಷಿಜಸ್ಫುರದುರುಸ್ಫೂಲಿಙ್ಗದಗ್ಧಾಙ್ಗಕಾ-
• ನಙ್ಗೋತ್ತುಙ್ಗಮತಙ್ಗಕೃತ್ತಿವಸನಂ ಲಿಙ್ಗಂ ಭಜೇ ಶಾಙ್ಕರಮ್ ।
• ಅಚ್ಛಾಚ್ಛಾಗವಹಾಂ ಸುರತಾಮೀಕ್ಷಾಶಿನಾನ್ತೇ ವಿಭೋ
• ವೃಷ್ಯಂ ಶಾಙ್ಕರವಾಹನಾಮನಿರತಾಃ ಸೋಮಂ ತಥಾ ವಾಜಿನಮ್ ॥ ೩೭॥
• ತ್ಯಕ್ತ್ವಾ ಜನ್ಮವಿನಾಶನಂ ತ್ವಿತಿ ಮುಹುಸ್ತೇ ಜಿಹ್ವಯಾ ಸತ್ತಮಾಃ
• ಯೇ ಶಂಭೋಃ ಸಕೃದೇವ ನಾಮನಿರತಾಃ ಶಾಙ್ಗಾಃ ಸ್ವತಃ ಪಾವನಾಃ ॥ ೩೮॥
• ಮೃಗಾಙ್ಕ ಮೌಲಿಮೀಶ್ವರಂ ಮೃಗೇನ್ದ್ರಶತ್ರುಜತ್ವಚಮ್ ।
• ವಸಾನಮಿನ್ದುಸಪ್ರಭಂ ಮೃಗಾದ್ಯಬಾಲಸತ್ಕರಮ್ ।
• ಭಜೇ ಮೃಗೇನ್ದ್ರಸಪ್ರಭಂ ..??... ॥ ೩೯॥

ಸ್ಕನ್ದಃ -

• ಏವಂ ಸ್ತುವನ್ತಂ ವಿಶ್ವೇಶಂ ಸುದರ್ಶನಮತನ್ದ್ರಿತಮ್ ।
• ಪ್ರಾಹೇತ್ಥಂ ಶೌರಿಮಾಭಾಷ್ಯ ಶಂಭೋರ್ಭಕ್ತಿವಿವರ್ಧನಮ್ ॥ ೪೦॥

ವಿಷ್ಣುಃ -

• ಅತ್ರೈವಾಮರಣಂ ವಿಪ್ರ ವಸ ತ್ವಂ ನಿಯತಾಶನಃ ।
• ನಾಮ್ನಾಂ ಸಹಸ್ರಂ ಪ್ರಜಪನ್ ಶತರುದ್ರೀಯಮೇವ ಚ ॥ ೪೧॥
• ಅನ್ತರ್ಗೃಹಾತ್ ಬಹಿಃ ಸ್ಥಿತ್ವಾ ಪೂಜಯಾಶು ಮಹೇಶ್ವರಮ್ ।
• ತವಾನ್ತೇ ಭೂರಿಕರುಣೋ ಮೋಕ್ಷಂ ದಾಸ್ಯತ್ಯಸಂಶಯಮ್ ॥ ೪೨॥
• ಸ ಪ್ರಣಮ್ಯಾಹ ವಿಶ್ವೇಶಂ ದೃಷ್ಟ್ವಾ ಪ್ರಾಹ ಸುದರ್ಶನಮ್ ।
• ಧನ್ಯಸ್ತ್ವಂ ಲಿಙ್ಗೇಽಪ್ಯನುದಿನಗಲಿತಸ್ವಾನ್ತರಙ್ಗಾಘಸಙ್ಘಃ
• ಪುಂಸಾಂ ವರ್ಯಾದ್ಯಭಕ್ತ್ಯಾ ಯಮನಿಯಮವರೈರ್ವಿಶ್ವವನ್ದ್ಯಂ ಪ್ರಭಾತೇ ।
• ದತ್ವಾ ಬಿಲ್ವವರಂ ಸದಂಬುಜದಲಂ ಕಿಞ್ಚಿಜ್ಜಲಂ ವಾ ಮುಹುಃ
• ಪ್ರಾಪ್ನೋತೀಶ್ವರಪಾದಪಙ್ಕಜಮುಮಾನಾಥಾದ್ಯ ಮುಕ್ತಿಪ್ರದಮ್ ॥ ೪೩॥
• ಕೋ ವಾ ತ್ವತ್ಸದೃಶೋ ಭವೇದಗಪತಿಪ್ರೇಮೈಕಲಿಙ್ಗಾರ್ಚಕೋ
• ಮುಕ್ತಾನಾಂ ಪ್ರವರೋರ್ಧ್ವಕೇಶವಿಲಸಚ್ಛ್ರೀಭಕ್ತಿಬೀಜಾಙ್ಕುರೈಃ ।
• ದೇವಾ ವಾಪ್ಯಸುರಾಃ ಸುರಾ ಮುನಿವರಾ ಭಾರಾ ಭುವಃ ಕೇವಲಂ
• ವೀರಾ ವಾ ಕರವೀರಪುಷ್ಪವಿಲಸನ್ಮಾಲಾಪ್ರದೇ ನೋ ಸಮಃ ॥ ೪೪॥
• ವನೇ ವಾ ರಾಜ್ಯೇ ವಾಪ್ಯಗಪತಿಸುತಾನಾಯಕಮಹೋ
• ಸ್ಫುರಲ್ಲಿಙ್ಗಾರ್ಚಾಯಾಂ ನಿಯಮಮತಭಾವೇನ ಮನಸಾ ।
• ಹರಂ ಭಕ್ತ್ಯಾ ಸಾಧ್ಯ ತ್ರಿಭುವನತೃಣಾಡಮ್ಬರವರ-
• ಪ್ರರೂಢೈರ್ಭಾಗ್ಯೈರ್ವಾ ನ ಹಿ ಖಲು ಸ ಸಜ್ಜೇತ ಭುವನೇ ॥ ೪೫॥
• ನ ದಾನೈರ್ಯೋಗೈರ್ವಾ ವಿಧಿವಿಹಿತವರ್ಣಾಶ್ರಮಭರೈಃ
• ಅಪಾರೈರ್ವೇದಾನ್ತಪ್ರತಿವಚನವಾಕ್ಯಾನುಸರಣೈಃ ।
• ನ ಮನ್ಯೇಽಹಂ ಸ್ವಾನ್ತೇ ಭವಭಜನಭಾವೇನ ಮನಸಾ
• ಮುಹುರ್ಲಿಙ್ಗಂ ಶಾಙ್ಗಂ ಭಜತಿ ಪರಮಾನನ್ದಕುಹರಃ ॥ ೪೬॥
• ಶರ್ವಂ ಪರವತನನ್ದಿನೀಪತಿಮಹಾನನ್ದಾಮ್ಬುಧೇಃ ಪಾರಗಾ
• ರಾಗತ್ಯಾಗಹೃದಾ ವಿರಾಗಪರಮಾ ಭಸ್ಮಾಙ್ಗರಾಗಾದರಾಃ ।
• ಮಾರಾಪಾರಶರಾಭಿಘಾತರಹಿತಾ ಧೀರೋರುಧಾರಾರಸೈಃ
• ಪಾರಾವಾರಮಹಾಘಸಂಸೃತಿಭರಂ ತೀರ್ಣಾಃ ಶಿವಾಭ್ಯರ್ಚನಾತ್ ॥ ೪೭॥
• ಮಾರ್ಕಣ್ಡೇಯಸುತಂ ಪುರಾಽನ್ತಕಭಯಾದ್ಯೋಽರಕ್ಷದೀಶೋ ಹರಃ
• ತತ್ಪಾದಾಮ್ಬುಜರಾಗರಞ್ಜಿತಮನಾ ನಾಪ್ನೋತಿ ಕಿಂ ವಾ ಫಲಮ್ ।
• ತಂ ಮೃತ್ಯುಞ್ಜಯಮಞ್ಜಸಾ ಪ್ರಣಮತಾಮೋಜೋಜಿಮಧ್ಯೇ ಜಯಂ
• ಜೇತಾರೋತಪರಾಜಯೋ ಜನಿಜರಾರೋಗೈರ್ವಿಮುಕ್ತಿಂ ಲಭೇತ್ ॥ ೪೮॥
• ಭೂತಾಯಾಂ ಭೂತನಾಥಂ ತ್ವಘಮತಿತಿಲಕಾಕಾರಭಿಲ್ಲೋತ್ಥಶಲ್ಯೈಃ
• ಧಾವನ್ ಭಲ್ಲೂಕಪೃಷ್ಠೇ ನಿಶಿ ಕಿಲ ಸುಮಹದ್ವ್ಯಾಘ್ರಭೀತ್ಯಾಽರುರೋಹ ।
• ಬಿಲ್ವಂ ನಲ್ವಪ್ರಭಂ ತಚ್ಛದಘನಮಸಕೃತ್ ಪಾತಯಾಮಾಸ ಮೂಲೇ
• ನಿದ್ರಾತನ್ದ್ರೋಜ್ಝಿತೋಽಸೌ ಮೃಗಗಣಕಲನೇ ಮೂಲಲಿಙ್ಗೇಽಥ ಶಾಙ್ಗೇ ॥ ೪೯॥
• ತೇನಾಭೂದ್ಭಗವಾನ್ ಗಣೋತ್ತಮವರೋ ಮುಕ್ತಾಘಸಙ್ಘಸ್ತದಾ
• ಚಣ್ಡಾಂಶೋಸ್ತನಯೇನ ಪೂಜಿತಪದಃ ಸಾರೂಪ್ಯಮಾಪೇಶಿತುಃ ।
• ಗಙ್ಗಾಚನ್ದ್ರಕಲಾಕಪರ್ದವಿಲಸತ್ಫಾಲಸ್ಫುಲಿಙ್ಗೋಜ್ಜ್ವಲದ್
• ವಾಲನ್ಯಙ್ಕುಕರಾಗ್ರಸಂಗತಮಹಾಶೂಲಾಹಿ ಟಂಕೋದ್ಯತಃ ॥ ೫೦॥
• ಚೈತ್ರೇ ಚಿತ್ರೈಃ ಪಾತಕೈರ್ವಿಪ್ರಮುಕ್ತೋ ವೈಶಾಖೇ ವೈ ದುಃಖಶಾಖಾವಿಮುಕ್ತಃ ।
• ಜ್ಯೇಷ್ಠೇ ಶ್ರೇಷ್ಠೋ ಭವತೇಷಾಢಮಾಸಿ ಪುತ್ರಪ್ರಾಪ್ತಿಃ ಶ್ರಾವಣೇ ಶ್ರಾನ್ತಿನಾಶಃ ॥ ೫೧॥
• ಭಾದ್ರೇ ಭದ್ರೋ ಭವತೇ ಚಾಶ್ವಿನೇ ವೈ ಅಶ್ವಪ್ರಾಪ್ತಿಃ ಕಾರ್ತಿಕೇ ಕೀರ್ತಿಲಾಭಃ ।
• ಮಾರ್ಗೇ ಮುಕ್ತೇರ್ಮಾರ್ಗಮೇತಲ್ಲಭೇತ ಪುಷ್ಯೇ ಪುಣ್ಯಂ ಮಾಘಕೇ ಚಾಘನಾಶಃ ॥ ೫೨॥
• ಫಲ್ಗು ತ್ವಂಹೋ ಫಾಲ್ಗುನೇ ಮಾಸಿ
• ನಶ್ಯೇದೀಶಾರ್ಚಾತೋ ಬಿಲ್ವಪತ್ರೈಶ್ಚಲಿಙ್ಗೇ ।
• ಏವಂ ತತ್ತನ್ಮಾಸಿ ಪೂಜ್ಯೇಶಲಿಙ್ಗಂ
• ಚಿತ್ರೈಃ ಪಾಪೈರ್ವಿಪ್ರಮುಕ್ತೋ ದ್ವಿಜೇನ್ದ್ರಃ ॥ ೫೩॥
• ದೂರ್ವಾಙ್ಕುರೈರಭಿನವೈಃ ಶಶಿಧಾಮಚೂಡ-
• ಲಿಙ್ಗಾರ್ಚನೇನ ಪರಿಶೇಷಯದಙ್ಕುರಾಣಿ ।
• ಸಂಸಾರಘೋರತರರೂಪಕರಾಣಿ ಸದ್ಯಃ
• ಮುಕ್ತ್ಯಙ್ಕುರಾಣಿ ಪರಿವರ್ಧಯತೀಹ ಧನ್ಯಃ ॥ ೫೪॥
• ಗೋಕ್ಷೀರೇಕ್ಷುಕ್ಷೌದ್ರಖಣ್ಡಾಜ್ಯದಧ್ನಾ
• ಸನ್ನಾರೇಲೈಃ ಪಾನಸಾಮ್ರಾದಿಸಾರೈಃ ।
• ವಿಶ್ವೇಶಾನಂ ಸತ್ಸಿತಾರತ್ನತೋಯೈಃ
• ಗನ್ಧೋದೈರ್ವಾ ಸಿಞ್ಚ್ಯ ದೋಷೈರ್ವಿಮುಕ್ತಃ ॥ ೫೫॥
• ಲಿಙ್ಗಂ ಚನ್ದನಲೇಪಸಙ್ಗತಮುಮಾಕಾನ್ತಸ್ಯ ಪಶ್ಯನ್ತಿ ಯೇ
• ತೇ ಸಂಸಾರಭುಜಙ್ಗಭಙ್ಗಪತನಾನಙ್ಗಾಙ್ಗಸಙ್ಗೋಜ್ಝಿತಾಃ ।
• ವ್ಯಙ್ಗಂ ಸರ್ವಸಮರ್ಚನಂ ಭಗವತಃ ಸಾಙ್ಗಂ ಭವೇಚ್ಛಾಙ್ಕರಂ
• ಶಙ್ಗಾಪಾಙ್ಗಕೃಪಾಕಟಾಕ್ಷಲಹರೀ ತಸ್ಮಿಂಶ್ಚಿರಂ ತಿಷ್ಠತಿ ॥ ೫೬॥
• ಮುರಲಿಸರಲಿರಾಗೈರ್ಮರ್ದಲೈಸ್ತಾಲಶಙ್ಖೈಃ
• ಪಟುಪಟಹನಿನಾದಧ್ವಾನ್ತಸನ್ಧಾನಘೋಷೈಃ ।
• ದುನ್ದುಭ್ಯಾಘಾತವಾದೈರ್ವರಯುವತಿಮಹಾನೃತ್ತಸಂರಂಭರಙ್ಗೈಃ
• ದರ್ಶೇಷ್ವಾದರ್ಶದರ್ಶೋ ಭಗವತಿ ಗಿರಿಜಾನಾಯಕೇ ಮುಕ್ತಿಹೇತುಃ ॥ ೫೭॥
• ಸ್ವಚ್ಛಚ್ಛತ್ರಛವೀನಾಂ ವಿವಿಧಜಿತಮಹಾಚ್ಛಾಯಯಾ ಛನ್ನಮೈಶಂ
• ಶೀರ್ಷಂ ವಿಚ್ಛಿನ್ನಪಾಪೋ ಭವತಿ ಭವಹರಃ ಪೂಜಕಃ ಶಮ್ಭುಭಕ್ತ್ಯಾ ।
• ಚಞ್ಚಚ್ಚನ್ದ್ರಾಭಕಾಣ್ಡಪ್ರವಿಲಸದಮಲಸ್ವರ್ಣರತ್ನಾಗ್ರಭಾಭಿ-
• ರ್ದೀಪ್ಯಚ್ಚಾಮರಕೋಟಿಭಿಃ ಸ್ಫುಟಪಟಘಟಿತೈಶ್ಚಾಕಚಕ್ಯೈಃ ಪತಾಕೈಃ ॥ ೫೮॥
• ಸಂಪಶ್ಯಾರುಣಭೂರುಹೋತ್ತಮಶಿಖಾಸಂಲೇಢಿತಾರಾಗಣಂ
• ತಾರಾನಾಥಕಲಾಧರೋರುಸುಮಹಾಲಿಙ್ಗೌಘಸಂಸೇವಿತಮ್ ।
• ಬಿಲ್ವಾನಾಂ ಕುಲಮೇತದತ್ರ ಸುಮಹಾಪಾಪೌಘಸಂಹಾರಕೃತ್
• ವಾರಾಣಾಂ ನಿಖಿಲಪ್ರಮೋದಜನಕಂ ಶಮ್ಭೋಃ ಪ್ರಿಯಂ ಕೇವಲಮ್ ॥ ೫೯॥
• ಅನ್ನಂ ಪೋತ್ರಿಮಲಾಯತೇ ಧನರಸಂ ಕೌಲೇಯಮೂತ್ರಾಯತೇ
• ಸಂವೇಶೋ ನಿಗಲಾಯತೇ ಮಮ ಸದಾನನ್ದೋ ಕನ್ದಾಯತೇ ।
• ಶಮ್ಭೋ ತೇ ಸ್ಮರಣಾನ್ತರಾಯಭರಿತ ಪ್ರಾಣಃ ಕೃಪಾಣಾಯತೇ ॥ ೬೦॥
• ಕಃ ಕಲ್ಪದ್ರುಮುಪೇಕ್ಷ್ಯ ಚಿತ್ತಫಲದಂ ತೂಲಾದಿದಾನಕ್ಷಯಂ
• ಬಬ್ಬೂಲಂ ಪರಿಸೇವತೇ ಕ್ಷುದಧಿಕೋ ವಾತೂಲದಾನಕ್ಷಮಮ್ ।
• ತದ್ವಚ್ಛಙ್ಕರಕಿಙ್ಕರೋ ವಿಧಿಹರಿಬ್ರಹ್ಮೇನ್ದ್ರಚನ್ದ್ರಾನಲಾನ್
• ಸೇವೇದ್ಯೋ ವಿಧಿವಞ್ಚಿತಃ ಕಲಿಬಲಪ್ರಾಚುರ್ಯತೋ ಮೂಢಧೀಃ ॥ ೬೧॥
• ಸುವರ್ಣಾಣ್ಡೋದ್ಭೂತಸ್ತುತಿಗತಿಸಮರ್ಚ್ಯಾಣ್ಡಜವರ-
• ಪ್ರಪಾದಂ ತ್ವಾಂ ಕಶ್ಚಿದ್ ಭಜತಿ ಭುವನೇ ಭಕ್ತಿಪರಮಃ ।
• ಮಹಾಚಣ್ಡೋದ್ದಣ್ಡಪ್ರಕಟಿತಭುವಂ ತಾಣ್ಡವಪರಂ
• ವಿಭುಂ ಸನ್ತಂ ನಿತ್ಯಂ ಭಜ ಭಗಣನಾಥಾಮಲಜಟಮ್ ॥ ೬೨॥
• ಅಜಗವಕರ ವಿಷ್ಣುಬಾಣ ಶಮ್ಭೋ
• ದುರಿತಹರಾನ್ತಕನಾಶ ಪಾಹಿ ಮಾಮನಾಥಮ್ ।
• ಭವದಭಯಪದಾಬ್ಜವರ್ಯಮೇತ
• ಮಮ ಚಿತ್ತಸರಸ್ತಟಾನ್ನಯಾತು ಚಾದ್ಯ ॥ ೬೩॥
• ಇತ್ಥಂ ವಿಷ್ಣುಶ್ಚ ಕಾಶ್ಯಾಂ ಪ್ರಮಥಪತಿಮಗಾತ್ ಪೂಜ್ಯ ವಿಶ್ವೇಶ್ವರಂ ತಂ
• ಕ್ಷಿತಿಸುರವರವರ್ಯಂ ಚಾನುಶಾಸ್ಯೇತ್ಥಮಿಷ್ಟಮ್ ।
• ಸ ಚ ಮುನಿಗಣಮಧ್ಯೇ ಪ್ರಾಪ್ಯ ಮುಕ್ತಿಂ ತಥಾನ್ತೇ
• ಪ್ರಮಥಪತಿಪದಾಬ್{}ಜೇ ಲೀನಹೀನಾಙ್ಗಸಙ್ಗಃ ॥ ೬೪॥

ಸೂತಃ -

• ಇತ್ಥಂ ಶ್ರುತ್ವಾ ಮುನೀನ್ದ್ರೋಽಸೌ ಜೈಗೀಷವ್ಯೋಽವದದ್ವಿಭುಮ್ ।
• ಪ್ರಣಿಪತ್ಯ ಪ್ರಹೃಷ್ಟಾತ್ಮಾ ಷಷ್ಠಾಂಶಂ ವೈ ಷಡಾಸ್ಯತಃ ॥ ೬೫॥

ಜೈಗೀಷವ್ಯಃ -

• ಮಾರಮಾರಕಜಾನನ್ದವಸತೇರ್ಮಹಿಮಾ ಕಥಮ್ ।
• ನಾಮ್ನಾಂ ಸಹಸ್ರಮೇತಚ್ಚ ವದ ಮೇ ಕರುಣಾನಿಧೇ ॥ ೬೬॥
• ಕ್ಷೇತ್ರಾಣಾಂ ಚಾಪ್ಯಥಾನ್ಯಾನಾಂ ಮಹಿಮಾಂ ವದ ಸದ್ಗುರೋ ।
• ಶೂರತಾರಕಸಂಹರ್ತಸ್ತ್ವತ್ತೋ ನಾನ್ಯೋ ಗುರುರ್ಮಮ ॥ ೬೭॥
• ತಚ್ಛ್ರುತ್ವಾ ತು ಮುನೇರ್ವಾಕ್ಯಂ ಸ್ಕನ್ದಃ ಪ್ರಾಹಾಥ ತಂ ಮುನಿಮ್ ।

ಸ್ಕನ್ದಃ -

• ಆಗಾಮಿನ್ಯಂಶಕೇಽಸ್ಮಿಂಸ್ತವ ಹೃದಯಮಹಾನನ್ದಸಿನ್ಧೌ ವಿಧೂತ್ಥ-
• ಪ್ರಾಚುರ್ಯಪ್ರಕಟೈಃ ಕರೋಪಮಮಹಾಸಪ್ತಮಾಂಶೇ ವಿಶೇಷೇ ।
• ನಾಮ್ನಾಂ ಚಾಪಿ ಸಹಸ್ರಕಂ ಭಗವತಃ ಶಮ್ಭೋಃ ಪ್ರಿಯಂ ಕೇವಲಂ
• ಅಸ್ಯಾನನ್ದವನಸ್ಯ ಚೈವ ಮಹಿಮಾ ತ್ವಂ ವೈ ಶೃಣುಷ್ವಾದರಾತ್ ॥ ೬೮॥
• ಉಗ್ರೋಂಽಶಃ ಶಶಿಶೇಖರೇಣ ಕಥಿತೋ ವೇದಾನ್ತಸಾರಾತ್ಮಕಃ
• ಷಷ್ಠಃ ಷಣ್ಮುಖಸತ್ತಮಾಯ ಸ ದದೌ ತದ್ಬ್ರಹ್ಮಣೇ ಸೋಽಪ್ಯದಾತ್ ।
• ಪುತ್ರಾಯಾತ್ಮಭವಾಯ ತದ್ಭವಹರಂ ಶ್ರುತ್ವಾ ಭವೇದ್ ಜ್ಞಾನವಿತ್
• ಚೋಕ್ತ್ವಾ ಜನ್ಮಶತಾಯುತಾರ್ಜಿತಮಹಾಪಾಪೈರ್ವಿಮುಕ್ತೋ ಭವೇತ್ ॥ ೬೯॥
• ಶ್ರುತ್ವಾಂಶಮೇತದ್ ಭವತಾಪಪಾಪಹಂ ಶಿವಾಸ್ಪದಜ್ಞಾನದಮುತ್ತಮಂ ಮಹತ್ ।
• ಧ್ಯಾನೇನ ವಿಜ್ಞಾನದಮಾತ್ಮದರ್ಶನಂ ದದಾತಿ ಶಮ್ಭೋಃ ಪದಭಕ್ತಿಭಾವತಃ ॥ ೭೦॥

ಸೂತಃ -

• ಅಧ್ಯಾಯಪಾದಾಧ್ಯಯನೇಽಪಿ ವಿದ್ಯಾ ಬುದ್ಧ್ಯಾ ಹೃದಿ ಧ್ಯಾಯತಿ ಬನ್ಧಮುಕ್ತ್ಯೈ ।
• ಸ್ವಾಧ್ಯಾಯತಾನ್ತಾಯ ಶಮಾನ್ವಿತಾಯ ದದ್ಯಾದ್ಯದದ್ಯಾನ್ನ ವಿಭೇದ್ಯಮೇತತ್ ॥ ೭೧॥
• ಇತ್ಥಂ ಸೂತವಚೋದ್ಯತಮಹಾನನ್ದೈಕಮೋದಪ್ರಭಾ
• ಭಾಸ್ವದ್ಭಾಸ್ಕರಸಪ್ರಭಾ ಮುನಿವರಾಃ ಸಂತುಷ್ಟುವುಸ್ತಂ ತದಾ ।
• ವೇದೋದ್ಯದ್ವಚನಾಶಿಷಾ ಪ್ರಹೃಷಿತಾಃ ಸೂತಂ ಜಯೇತ್ಯುಚ್ಚರನ್
• ಪ್ಯಾಹೋ ಜಗ್ಮುರತೀವ ಹರ್ಷಿತಹೃದಾ ವಿಶ್ವೇಶ್ವರಂ ವೀಕ್ಷಿತುಮ್ ॥ ೭೨॥
• ॥ ಶಙ್ಕರಾಖ್ಯಃ ಷಷ್ಠಾಂಶಃ ಸಮಾಪ್ತಃ॥
• ॥ ಸರ್ವಂ ಶ್ರೀರಮಣಾರ್ಪಣಮಸ್ತು ॥

• ॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಸುದರ್ಶನಸ್ಯ ಮುಕ್ತಿಲಾಭವರ್ಣನಂ ಅಂಶಶ್ರವಣಫಲನಿರೂಪಣಂ ಚ ನಾಮ ಪಞ್ಚಾಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com