Ribhu Gita - Siva Rahasya Purana Amsha 6

ಋಭುಗೀತಾ ೩೭ ॥ ಸರ್ವ-ಸಿದ್ಧಾನ್ತ ಪ್ರಕರಣಮ್ ॥

ಋಭುಃ -

ನಿದಾಘ ಶೃಣು ವಕ್ಷ್ಯಾಮಿ ರಹಸ್ಯಂ ಪರಮದ್ಭುತಮ್ ।
ಶ್ಲೋಕೈಕಶ್ರವಣೇನೈವ ಸದ್ಯೋ ಮೋಕ್ಷಮವಾಪ್ನುಯಾತ್ ॥ ೧॥
ಇದಂ ದೃಷ್ಟಂ ಪರಂ ಬ್ರಹ್ಮ ದೃಶ್ಯವದ್ಭಾತಿ ಚಿತ್ತತಃ ।
ಸರ್ವಂ ಚೈತನ್ಯಮಾತ್ರತ್ವಾತ್ ನಾನ್ಯತ್ ಕಿಞ್ಚಿನ್ನ ವಿದ್ಯತೇ ॥ ೨॥
ಇದಮೇವ ಹಿ ನಾಸ್ತ್ಯೇವ ಅಯಮಿತ್ಯಪಿ ನಾಸ್ತಿ ಹಿ ।
ಏಕ ಏವಾಪ್ಯಣುರ್ವಾಪಿ ನಾಸ್ತಿ ನಾಸ್ತಿ ನ ಸಂಶಯಃ ॥ ೩॥
ವ್ಯವಹಾರಮಿದಂ ಕ್ವಾಪಿ ವಾರ್ತಾಮಾತ್ರಮಪಿ ಕ್ವ ವಾ ।
ಬನ್ಧರೂಪಂ ಬನ್ಧವಾರ್ತಾ ಬನ್ಧಕಾರ್ಯಂ ಪರಂ ಚ ವಾ ॥ ೪॥
ಸನ್ಮಾತ್ರಕಾರ್ಯಂ ಸನ್ಮಾತ್ರಮಹಂ ಬ್ರಹ್ಮೇತಿ ನಿಶ್ಚಯಮ್ ।
ದುಃಖಂ ಸುಖಂ ವಾ ಬೋಧೋ ವಾ ಸಾಧಕಂ ಸಾಧ್ಯನಿರ್ಣಯಃ ॥ ೫॥
ಆತ್ಮೇತಿ ಪರಮಾತ್ಮೇತಿ ಜೀವಾತ್ಮೇತಿ ಪೃಥಙ್ ನ ಹಿ ।
ದೇಹೋಽಹಮಿತಿ ಮೂರ್ತೋಽಹಂ ಜ್ಞಾನವಿಜ್ಞಾನವಾನಹಮ್ ॥ ೬॥
ಕಾರ್ಯಕಾರಣರೂಪೋಽಹಮನ್ತಃಕರಣಕಾರ್ಯಕಮ್ ।
ಏಕಮಿತ್ಯೇಕಮಾತ್ರಂ ವಾ ನಾಸ್ತಿ ನಾಸ್ತೀತಿ ಭಾವಯ ॥ ೭॥
ಸರ್ವಸಙ್ಕಲ್ಪಮಾತ್ರೇತಿ ಸರ್ವಂ ಬ್ರಹ್ಮೇತಿ ವಾ ಜಗತ್ ।
ತತ್ತ್ವಜ್ಞಾನಂ ಪರಂ ಬ್ರಹ್ಮ ಓಙ್ಕಾರಾರ್ಥಂ ಸುಖಂ ಜಪಮ್ ॥ ೮॥
ದ್ವೈತಾದ್ವೈತಂ ಸದಾದ್ವೈತಂ ತಥಾ ಮಾನಾವಮಾನಕಮ್ ।
ಸರ್ವಂ ಚೈತನ್ಯಮಾತ್ರತ್ವಾತ್ ನಾನ್ಯತ್ ಕಿಞ್ಚಿನ್ನ ವಿದ್ಯತೇ ॥ ೯॥
ಆತ್ಮಾನನ್ದಮಹಂ ಬ್ರಹ್ಮ ಪ್ರಜ್ಞಾನಂ ಬ್ರಹ್ಮ ಏವ ಹಿ ।
ಇದಂ ರೂಪಮಹಂ ರೂಪಂ ಪ್ರಿಯಾಪ್ರಿಯವಿಚಾರಣಮ್ ॥ ೧೦॥
ಯದ್ಯತ್ ಸಂಭಾವ್ಯತೇ ಲೋಕೇ ಯದ್ಯತ್ ಸಾಧನಕಲ್ಪನಮ್ ।
ಯದ್ಯನ್ತರಹಿತಂ ಬ್ರಹ್ಮಭಾವನಂ ಚಿತ್ತನಿರ್ಮಿತಮ್ ॥ ೧೧॥
ಸ್ಥೂಲದೇಹೋಽಹಮೇವಾತ್ರ ಸೂಕ್ಷ್ಮದೇಹೋಽಹಮೇವ ಹಿ ।
ಬುದ್ಧೇರ್ಭೇದಂ ಮನೋಭೇದಂ ಅಹಂಕಾರಂ ಜಡಂ ಚ ತತ್ ॥ ೧೨॥
ಸರ್ವಂ ಚೈತನ್ಯಮಾತ್ರತ್ವಾತ್ ನಾನ್ಯತ್ ಕಿಞ್ಚಿನ್ನ ವಿದ್ಯತೇ ।
ಶ್ರವಣಂ ಮನನಂ ಚೈವ ಸಾಕ್ಷಾತ್ಕಾರವಿಚಾರಣಮ್ ॥ ೧೩॥
ಆತ್ಮೈವಾಹಂ ಪರಂ ಚೈವ ನಾಹಂ ಮೋಹಮಯಂ ಸ್ವಯಮ್ ।
ಬ್ರಹ್ಮೈವ ಸರ್ವಮೇವೇದಂ ಬ್ರಹ್ಮೈವ ಪರಮಂ ಪದಮ್ ॥ ೧೪॥
ಬ್ರಹ್ಮೈವ ಕಾರಣಂ ಕಾರ್ಯಂ ಬ್ರಹ್ಮೈವ ಜಗತಾಂ ಜಯಃ ।
ಬ್ರಹ್ಮೈವ ಸರ್ವಂ ಚೈತನ್ಯಂ ಬ್ರಹ್ಮೈವ ಮನಸಾಯತೇ ॥ ೧೫॥
ಬ್ರಹ್ಮೈವ ಜೀವವದ್ಭಾತಿ ಬ್ರಹ್ಮೈವ ಚ ಹರೀಯತೇ ।
ಬ್ರಹ್ಮೈವ ಶಿವವದ್ಭಾತಿ ಬ್ರಹ್ಮೈವ ಪ್ರಿಯಮಾತ್ಮನಃ ॥ ೧೬॥
ಬ್ರಹ್ಮೈವ ಶಾನ್ತಿವದ್ಭಾತಿ ಬ್ರಹ್ಮಣೋಽನ್ಯನ್ನ ಕಿಞ್ಚನ ।
ನಾಹಂ ನ ಚಾಯಂ ನೈವಾನ್ಯನ್ನೋತ್ಪನ್ನಂ ನ ಪರಾತ್ ಪರಮ್ ॥ ೧೭॥
ನ ಚೇದಂ ನ ಚ ಶಾಸ್ತ್ರಾರ್ಥಂ ನ ಮೀಮಾಂಸಂ ನ ಚೋದ್ಭವಮ್ ।
ನ ಲಕ್ಷಣಂ ನ ವೇದಾದಿ ನಾಪಿ ಚಿತ್ತಂ ನ ಮೇ ಮನಃ ॥ ೧೮॥
ನ ಮೇ ನಾಯಂ ನೇದಮಿದಂ ನ ಬುದ್ಧಿನಿಶ್ಚಯಂ ಸದಾ ।
ಕದಾಚಿದಪಿ ನಾಸ್ತ್ಯೇವ ಸತ್ಯಂ ಸತ್ಯಂ ನ ಕಿಞ್ಚನ ॥ ೧೯॥
ನೈಕಮಾತ್ರಂ ನ ಚಾಯಂ ವಾ ನಾನ್ತರಂ ನ ಬಹಿರ್ನ ಹಿ ।
ಈಷಣ್ಮಾತ್ರಂ ಚ ನ ದ್ವೈತಂ ನ ಜನ್ಯಂ ನ ಚ ದೃಶ್ಯಕಮ್ ॥ ೨೦॥
ನ ಭಾವನಂ ನ ಸ್ಮರಣಂ ನ ವಿಸ್ಮರಣಮಣ್ವಪಿ ।
ನ ಕಾಲದೇಶಕಲನಂ ನ ಸಙ್ಕಲ್ಪಂ ನ ವೇದನಮ್ ॥ ೨೧॥
ನ ವಿಜ್ಞಾನಂ ನ ದೇಹಾನ್ಯಂ ನ ವೇದೋಽಹಂ ನ ಸಂಸೃತಿಃ ।
ನ ಮೇ ದುಃಖಂ ನ ಮೇ ಮೋಕ್ಷಂ ನ ಗತಿರ್ನ ಚ ದುರ್ಗತಿಃ ॥ ೨೨॥
ನಾತ್ಮಾ ನಾಹಂ ನ ಜೀವೋಽಹಂ ನ ಕೂಟಸ್ಥೋ ನ ಜಾಯತೇ ।
ನ ದೇಹೋಽಹಂ ನ ಚ ಶ್ರೋತ್ರಂ ನ ತ್ವಗಿನ್ದ್ರಿಯದೇವತಾ ॥ ೨೩॥
ಸರ್ವಂ ಚೈತನ್ಯಮಾತ್ರತ್ವಾತ್ ಸರ್ವಂ ನಾಸ್ತ್ಯೇವ ಸರ್ವದಾ ।
ಅಖಣ್ಡಾಕಾರರೂಪತ್ವಾತ್ ಸರ್ವಂ ನಾಸ್ತ್ಯೇವ ಸರ್ವದಾ ॥ ೨೪॥
ಹುಂಕಾರಸ್ಯಾವಕಾಶೋ ವಾ ಹುಂಕಾರಜನನಂ ಚ ವಾ ।
ನಾಸ್ತ್ಯೇವ ನಾಸ್ತಿ ನಾಸ್ತ್ಯೇವ ನಾಸ್ತಿ ನಾಸ್ತಿ ಕದಾಚನ ॥ ೨೫॥
ಅನ್ಯತ್ ಪದಾರ್ಥಮಲ್ಪಂ ವಾ ಅನ್ಯದೇವಾನ್ಯಭಾಷಣಮ್ ।
ಆತ್ಮನೋಽನ್ಯದಸತ್ಯಂ ವಾ ಸತ್ಯಂ ವಾ ಭ್ರಾನ್ತಿರೇವ ಚ ॥ ೨೬॥
ನಾಸ್ತ್ಯೇವ ನಾಸ್ತಿ ನಾಸ್ತ್ಯೇವ ನಾಸ್ತಿ ಶಬ್ದೋಽಪಿ ನಾಸ್ತಿ ಹಿ ।
ಸರ್ವಂ ಚೈತನ್ಯಮಾತ್ರತ್ವಾತ್ ಸರ್ವಂ ನಾಸ್ತ್ಯೇವ ಸರ್ವದಾ ॥ ೨೭॥
ಸರ್ವಂ ಬ್ರಹ್ಮ ನ ಸನ್ದೇಹೋ ಬ್ರಹ್ಮೈವಾಹಂ ನ ಸಂಶಯಃ ।
ವಾಕ್ಯಂ ಚ ವಾಚಕಂ ಸರ್ವಂ ವಕ್ತಾ ಚ ತ್ರಿಪುಟೀದ್ವಯಮ್ ॥ ೨೮॥
ಜ್ಞಾತಾ ಜ್ಞಾನಂ ಜ್ಞೇಯಭೇದಂ ಮಾತೃಮಾನಮಿತಿ ಪ್ರಿಯಮ್ ।
ಯದ್ಯಚ್ಛಾಸ್ತ್ರೇಷು ನಿರ್ಣೀತಂ ಯದ್ಯದ್ವೇದೇಷು ನಿಶ್ಚಿತಮ್ ॥ ೨೯॥
ಪರಾಪರಮತೀತಂ ಚ ಅತೀತೋಽಹಮವೇದನಮ್ ।
ಗುರುರ್ಗುರೂಪದೇಶಶ್ಚ ಗುರುಂ ವಕ್ಷ್ಯೇ ನ ಕಸ್ಯಚಿತ್ ॥ ೩೦॥
ಗುರುರೂಪಾ ಗುರುಶ್ರದ್ಧಾ ಸದಾ ನಾಸ್ತಿ ಗುರುಃ ಸ್ವಯಮ್ ।
ಆತ್ಮೈವ ಗುರುರಾತ್ಮೈವ ಅನ್ಯಾಭಾವಾನ್ನ ಸಂಶಯಃ ॥ ೩೧॥
ಆತ್ಮನಃ ಶುಭಮಾತ್ಮೈವ ಅನ್ಯಾಭಾವಾನ್ನ ಸಂಶಯಃ ।
ಆತ್ಮನೋ ಮೋಹಮಾತ್ಮೈವ ಆತ್ಮನೋಽಸ್ತಿ ನ ಕಿಞ್ಚನ ॥ ೩೨॥
ಆತ್ಮನಃ ಸುಖಮಾತ್ಮೈವ ಅನ್ಯನ್ನಾಸ್ತಿ ನ ಸಂಶಯಃ ।
ಆತ್ಮನ್ಯೇವಾತ್ಮನಃ ಶಕ್ತಿಃ ಆತ್ಮನ್ಯೇವಾತ್ಮನಃ ಪ್ರಿಯಮ್ ॥ ೩೩॥
ಆತ್ಮನ್ಯೇವಾತ್ಮನಃ ಸ್ನಾನಂ ಆತ್ಮನ್ಯೇವಾತ್ಮನೋ ರತಿಃ ।
ಆತ್ಮಜ್ಞಾನಂ ಪರಂ ಶ್ರೇಯಃ ಆತ್ಮಜ್ಞಾನಂ ಸುದುರ್ಲಭಮ್ ॥ ೩೪॥
ಆತ್ಮಜ್ಞಾನಂ ಪರಂ ಬ್ರಹ್ಮ ಆತ್ಮಜ್ಞಾನಂ ಸುಖಾತ್ ಸುಖಮ್ ।
ಆತ್ಮಜ್ಞಾನಾತ್ ಪರಂ ನಾಸ್ತಿ ಆತ್ಮಜ್ಞಾನಾತ್ ಸ್ಮೃತಿರ್ನ ಹಿ ॥ ೩೫॥
ಬ್ರಹ್ಮೈವಾತ್ಮಾ ನ ಸನ್ದೇಹ ಆತ್ಮೈವ ಬ್ರಹ್ಮಣಃ ಸ್ವಯಮ್ ।
ಸ್ವಯಮೇವ ಹಿ ಸರ್ವತ್ರ ಸ್ವಯಮೇವ ಹಿ ಚಿನ್ಮಯಃ ॥ ೩೬॥
ಸ್ವಯಮೇವ ಚಿದಾಕಾಶಃ ಸ್ವಯಮೇವ ನಿರನ್ತರಮ್ ।
ಸ್ವಯಮೇವ ಚ ನಾನಾತ್ಮಾ ಸ್ವಯಮೇವ ಚ ನಾಪರಃ ॥ ೩೭॥
ಸ್ವಯಮೇವ ಗುಣಾತೀತಃ ಸ್ವಯಮೇವ ಮಹತ್ ಸುಖಮ್ ।
ಸ್ವಯಮೇವ ಹಿ ಶಾನ್ತಾತ್ಮಾ ಸ್ವಯಮೇವ ಹಿ ನಿಷ್ಕಲಃ ॥ ೩೮॥
ಸ್ವಯಮೇವ ಚಿದಾನನ್ದಃ ಸ್ವಯಮೇವ ಮಹತ್ಪ್ರಭುಃ ।
ಸ್ವಯಮೇವ ಸದಾ ಸಾಕ್ಷೀ ಸ್ವಯಮೇವ ಸದಾಶಿವಃ ॥ ೩೯॥
ಸ್ವಯಮೇವ ಹರಿಃ ಸಾಕ್ಷಾತ್ ಸ್ವಯಮೇವ ಪ್ರಜಾಪತಿಃ ।
ಸ್ವಯಮೇವ ಪರಂ ಬ್ರಹ್ಮ ಬ್ರಹ್ಮ ಏವ ಸ್ವಯಂ ಸದಾ ॥ ೪೦॥
ಸರ್ವಂ ಬ್ರಹ್ಮ ಸ್ವಯಂ ಬ್ರಹ್ಮ ಸ್ವಯಂ ಬ್ರಹ್ಮ ನ ಸಂಶಯಃ ।
ದೃಢನಿಶ್ಚಯಮೇವ ತ್ವಂ ಸರ್ವಥಾ ಕುರು ಸರ್ವದಾ ॥ ೪೧॥
ವಿಚಾರಯನ್ ಸ್ವಯಂ ಬ್ರಹ್ಮ ಬ್ರಹ್ಮಮಾತ್ರಂ ಸ್ವಯಂ ಭವೇತ್ ।
ಏತದೇವ ಪರಂ ಬ್ರಹ್ಮ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೪೨॥
ಏಷ ಏವ ಪರೋ ಮೋಕ್ಷ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಏಷ ಏವ ಕೃತಾರ್ಥೋ ಹಿ ಏಷ ಏವ ಸುಖಂ ಸದಾ ॥ ೪೩॥
ಏತದೇವ ಸದಾ ಜ್ಞಾನಂ ಸ್ವಯಂ ಬ್ರಹ್ಮ ಸ್ವಯಂ ಮಹತ್ ।
ಅಹಂ ಬ್ರಹ್ಮ ಏತದೇವ ಸದಾ ಜ್ಞಾನಂ ಸ್ವಯಂ ಮಹತ್ ॥ ೪೪॥
ಅಹಂ ಬ್ರಹ್ಮ ಏತದೇವ ಸ್ವಭಾವಂ ಸತತಂ ನಿಜಮ್ ।
ಅಹಂ ಬ್ರಹ್ಮ ಏತದೇವ ಸದಾ ನಿತ್ಯಂ ಸ್ವಯಂ ಸದಾ ॥ ೪೫॥
ಅಹಂ ಬ್ರಹ್ಮ ಏತದೇವ ಬನ್ಧನಾಶಂ ನ ಸಂಶಯಃ ।
ಅಹಂ ಬ್ರಹ್ಮ ಏತದೇವ ಸರ್ವಸಿದ್ಧಾನ್ತನಿಶ್ಚಯಮ್ ॥ ೪೬॥
ಏಷ ವೇದಾನ್ತಸಿದ್ಧಾನ್ತ ಅಹಂ ಬ್ರಹ್ಮ ನ ಸಂಶಯಃ ।
ಸರ್ವೋಪನಿಷದಾಮರ್ಥಃ ಸರ್ವಾನನ್ದಮಯಂ ಜಗತ್ ॥ ೪೭॥
ಮಹಾವಾಕ್ಯಸ್ಯ ಸಿದ್ಧಾನ್ತ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಸಾಕ್ಷಾಚ್ಛಿವಸ್ಯ ಸಿದ್ಧಾನ್ತ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೪೮॥
ನಾರಾಯಣಸ್ಯ ಸಿದ್ಧಾನ್ತ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಚತುರ್ಮುಖಸ್ಯ ಸಿದ್ಧಾನ್ತ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೪೯॥
ಋಷೀಣಾಂ ಹೃದಯಂ ಹ್ಯೇತತ್ ದೇವಾನಾಮುಪದೇಶಕಮ್ ।
ಸರ್ವದೇಶಿಕಸಿದ್ಧಾನ್ತ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೫೦॥
ಯಚ್ಚ ಯಾವಚ್ಚ ಭೂತಾನಾಂ ಮಹೋಪದೇಶ ಏವ ತತ್ ।
ಅಹಂ ಬ್ರಹ್ಮ ಮಹಾಮೋಕ್ಷಂ ಪರಂ ಚೈತದಹಂ ಸ್ವಯಮ್ ॥ ೫೧॥
ಅಹಂ ಚಾನುಭವಂ ಚೈತನ್ಮಹಾಗೋಪ್ಯಮಿದಂ ಚ ತತ್ ।
ಅಹಂ ಬ್ರಹ್ಮ ಏತದೇವ ಸದಾ ಜ್ಞಾನಂ ಸ್ವಯಂ ಮಹತ್ ॥ ೫೨॥
ಮಹಾಪ್ರಕಾಶಮೇವೈತತ್ ಅಹಂ ಬ್ರಹ್ಮ ಏವ ತತ್ ।
ಏತದೇವ ಮಹಾಮನ್ತ್ರಂ ಏತದೇವ ಮಹಾಜಪಃ ॥ ೫೩॥
ಏತದೇವ ಮಹಾಸ್ನಾನಮಹಂ ಬ್ರಹ್ಮೇತಿ ನಿಶ್ಚಯಃ ।
ಏತದೇವ ಮಹಾತೀರ್ಥಮಹಂ ಬ್ರಹ್ಮೇತಿ ನಿಶ್ಚಯಃ ॥ ೫೪॥
ಏತದೇವ ಮಹಾಗಙ್ಗಾ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಏಷ ಏವ ಪರೋ ಧರ್ಮ ಅಹಂ ಬ್ರಹ್ಮೇತಿ ನಿಶ್ಚಯಃ ॥ ೫೫॥
ಏಷ ಏವ ಮಹಾಕಾಶ ಅಹಂ ಬ್ರಹ್ಮೇತಿ ನಿಶ್ಚಯಃ ।
ಏತದೇವ ಹಿ ವಿಜ್ಞಾನಮಹಂ ಬ್ರಹ್ಮಾಸ್ಮಿ ಕೇವಲಮ್ ।
ಸರ್ವಸಿದ್ಧಾನ್ತಮೇವೈತದಹಂ ಬ್ರಹ್ಮೇತಿ ನಿಶ್ಚಯಃ ॥ ೫೬॥
ಸವ್ಯಾಸವ್ಯತಯಾದ್ಯವಜ್ಞಹೃದಯಾ ಗೋಪೋದಹಾರ್ಯಃ ಸ್ರಿಯಃ
ಪಶ್ಯನ್ತ್ಯಮ್ಬುಜಮಿತ್ರಮಣ್ಡಲಗತಂ ಶಂಭುಂ ಹಿರಣ್ಯಾತ್ಮಕಮ್ ।
ಸರ್ವತ್ರ ಪ್ರಸೃತೈಃ ಕರೈರ್ಜಗದಿದಂ ಪುಷ್ಣಾತಿ ಮುಷ್ಣನ್ ಧನೈಃ
ಘೃಷ್ಟಂ ಚೌಷಧಿಜಾಲಮಮ್ಬುನಿಕರೈರ್ವಿಶ್ವೋತ್ಥಧೂತಂ ಹರಃ ॥ ೫೭॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಸರ್ವಸಿದ್ಧಾನ್ತಪ್ರಕರಣಂ ನಾಮ ಸಪ್ತತ್ರಿಂಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com