Ribhu Gita - Siva Rahasya Purana Amsha 6

ಋಭುಗೀತಾ ೧೮ ॥ ಋಭಿ-ನಿದಾಧ ಸಂವಾದಃ ॥

ಋಭುಃ -

ಶೃಣು ಭೂಯಃ ಪರಂ ತತ್ತ್ವಂ ಸದ್ಯೋ ಮೋಕ್ಷಪ್ರದಾಯಕಮ್ ।
ಸರ್ವಂ ಬ್ರಹ್ಮೈವ ಸತತಂ ಸರ್ವಂ ಶಾನ್ತಂ ನ ಸಂಶಯಃ ॥ ೧॥
ಬ್ರಹ್ಮಾಕ್ಷರಮಿದಂ ಸರ್ವಂ ಪರಾಕಾರಮಿದಂ ನಹಿ ।
ಇದಮಿತ್ಯಪಿ ಯದ್ದೋಷಂ ವಯಮಿತ್ಯಪಿ ಭಾಷಣಮ್ ॥ ೨॥
ಯತ್ಕಿಞ್ಚಿತ್ಸ್ಮರಣಂ ನಾಸ್ತಿ ಯತ್ಕಿಞ್ಚಿದ್ ಧ್ಯಾನಮೇವ ಹಿ ।
ಯತ್ಕಿಞ್ಚಿದ್ ಜ್ಞಾನರೂಪಂ ವಾ ತತ್ಸರ್ವಂ ಬ್ರಹ್ಮ ಏವ ಹಿ ॥ ೩॥
ಯತ್ಕಿಞ್ಚಿದ್ ಬ್ರಹ್ಮವಾಕ್ಯಂ ವಾ ಯತ್ಕಿಞ್ಚಿದ್ವೇದವಾಕ್ಯಕಮ್ ।
ಯತ್ಕಿಞ್ಚಿದ್ಗುರುವಾಕ್ಯಂ ವಾ ತತ್ಸರ್ವಂ ಬ್ರಹ್ಮ ಏವ ಹಿ ॥ ೪॥
ಯತ್ಕಿಞ್ಚಿತ್ಕಲ್ಮಷಂ ಸತ್ಯಂ ಯತ್ಕಿಞ್ಚಿತ್ ಪ್ರಿಯಭಾಷಣಮ್ ।
ಯತ್ಕಿಞ್ಚಿನ್ಮನನಂ ಸತ್ತಾ ತತ್ಸರ್ವಂ ಬ್ರಹ್ಮ ಏವ ಹಿ ॥ ೫॥
ಯತ್ಕಿಞ್ಚಿತ್ ಶ್ರವಣಂ ನಿತ್ಯಂ ಯತ್ ಕಿಞ್ಚಿದ್ಧ್ಯಾನಮಶ್ನುತೇ ।
ಯತ್ಕಿಞ್ಚಿನ್ನಿಶ್ಚಯಂ ಶ್ರದ್ಧಾ ತತ್ಸರ್ವಂ ಬ್ರಹ್ಮ ಏವ ಹಿ ॥ ೬॥
ಯತ್ಕಿಞ್ಚಿದ್ ಗುರೂಪದೇಶಂ ಯತ್ಕಿಞ್ಚಿದ್ಗುರುಚಿನ್ತನಮ್ ।
ಯತ್ಕಿಞ್ಚಿದ್ಯೋಗಭೇದಂ ವಾ ತತ್ಸರ್ವಂ ಬ್ರಹ್ಮ ಏವ ಹಿ ॥ ೭॥
ಸರ್ವಂ ತ್ಯಜ್ಯ ಗುರುಂ ತ್ಯಜ್ಯ ಸರ್ವಂ ಸನ್ತ್ಯಜ್ಯ ನಿತ್ಯಶಃ ।
ತೂಷ್ಣೀಮೇವಾಸನಂ ಬ್ರಹ್ಮ ಸುಖಮೇವ ಹಿ ಕೇವಲಮ್ ॥ ೮॥
ಸರ್ವಂ ತ್ಯಕ್ತ್ವಾ ಸುಖಂ ನಿತ್ಯಂ ಸರ್ವತ್ಯಾಗಂ ಸುಖಂ ಮಹತ್ ।
ಸರ್ವತ್ಯಾಗಂ ಪರಾನನ್ದಂ ಸರ್ವತ್ಯಾಗಂ ಪರಂ ಸುಖಮ್ ॥ ೯॥
ಸರ್ವತ್ಯಾಗಂ ಮನಸ್ತ್ಯಾಗಃ ಸರ್ವತ್ಯಾಗಮಹಂಕೃತೇಃ ।
ಸರ್ವತ್ಯಾಗಂ ಮಹಾಯಾಗಃ ಸರ್ವತ್ಯಾಗಂ ಸುಖಂ ಪರಮ್ ॥ ೧೦॥
ಸರ್ವತ್ಯಾಗಂ ಮಹಾಮೋಕ್ಷಂ ಚಿತ್ತತ್ಯಾಗಂ ತದೇವ ಹಿ ।
ಚಿತ್ತಮೇವ ಜಗನ್ನಿತ್ಯಂ ಚಿತ್ತಮೇವ ಹಿ ಸಂಸೃತಿಃ ॥ ೧೧॥
ಚಿತ್ತಮೇವ ಮಹಾಮಾಯಾ ಚಿತ್ತಮೇವ ಶರೀರಕಮ್ ।
ಚಿತ್ತಮೇವ ಭಯಂ ದೇಹಃ ಚಿತ್ತಮೇವ ಮನೋಮಯಮ್ ॥ ೧೨॥
ಚಿತ್ತಮೇವ ಪ್ರಪಞ್ಚಾಖ್ಯಂ ಚಿತ್ತಮೇವ ಹಿ ಕಲ್ಮಷಮ್ ।
ಚಿತ್ತಮೇವ ಜಡಂ ಸರ್ವಂ ಚಿತ್ತಮೇವೇನ್ದ್ರಿಯಾದಿಕಮ್ ॥ ೧೩॥
ಚಿತ್ತಮೇವ ಸದಾ ಸತ್ಯಂ ಚಿತ್ತಮೇವ ನಹಿ ಕ್ವಚಿತ್ ।
ಚಿತ್ತಮೇವ ಮಹಾಶಾಸ್ತ್ರಂ ಚಿತ್ತಮೇವ ಮನಃಪ್ರದಮ್ ॥ ೧೪॥
ಚಿತ್ತಮೇವ ಸದಾ ಪಾಪಂ ಚಿತ್ತಮೇವ ಸದಾ ಮತಮ್ ।
ಚಿತ್ತಮೇವ ಹಿ ಸರ್ವಾಖ್ಯಂ ಚಿತ್ತಮೇವ ಸದಾ ಜಹಿ ॥ ೧೫॥
ಚಿತ್ತಂ ನಾಸ್ತೀತಿ ಚಿನ್ತಾ ಸ್ಯಾತ್ ಆತ್ಮಮಾತ್ರಂ ಪ್ರಕಾಶತೇ ।
ಚಿತ್ತಮಸ್ತೀತಿ ಚಿನ್ತಾ ಚೇತ್ ಚಿತ್ತತ್ವಂ ಸ್ವಯಮೇವ ಹಿ ॥ ೧೬॥
ಸ್ವಯಮೇವ ಹಿ ಚಿತ್ತಾಖ್ಯಂ ಸ್ವಯಂ ಬ್ರಹ್ಮ ನ ಸಂಶಯಃ ।
ಚಿತ್ತಮೇವ ಹಿ ಸರ್ವಾಖ್ಯಂ ಚಿತ್ತಂ ಸರ್ವಮಿತಿ ಸ್ಮೃತಮ್ ॥ ೧೭॥
ಬ್ರಹ್ಮೈವಾಹಂ ಸ್ವಯಂಜ್ಯೋತಿರ್ಬ್ರಹ್ಮೈವಾಹಂ ನ ಸಂಶಯಃ ।
ಸರ್ವಂ ಬ್ರಹ್ಮ ನ ಸನ್ದೇಹಃ ಸರ್ವಂ ಚಿಜ್ಜ್ಯೋತಿರೇವ ಹಿ ॥ ೧೮॥
ಅಹಂ ಬ್ರಹ್ಮೈವ ನಿತ್ಯಾತ್ಮಾ ಪೂರ್ಣಾತ್ ಪೂರ್ಣತರಂ ಸದಾ ।
ಅಹಂ ಪೃಥ್ವ್ಯಾದಿಸಹಿತಂ ಅಹಮೇವ ವಿಲಕ್ಷಣಮ್ ॥ ೧೯॥
ಅಹಂ ಸೂಕ್ಷ್ಮಶರೀರಾನ್ತಮಹಮೇವ ಪುರಾತನಮ್ ।
ಅಹಮೇವ ಹಿ ಮಾನಾತ್ಮಾ ಸರ್ವಂ ಬ್ರಹ್ಮೈವ ಕೇವಲಮ್ ॥ ೨೦॥
ಚಿದಾಕಾರೋ ಹ್ಯಹಂ ಪೂರ್ಣಶ್ಚಿದಾಕಾರಮಿದಂ ಜಗತ್ ।
ಚಿದಾಕಾರಂ ಚಿದಾಕಾಶಂ ಚಿದಾಕಾಶಮಹಂ ಸದಾ ॥ ೨೧॥
ಚಿದಾಕಾಶಂ ತ್ವಮೇವಾಸಿ ಚಿದಾಕಾಶಮಹಂ ಸದಾ ।
ಚಿದಾಕಾಶಂ ಚಿದೇವೇದಂ ಚಿದಾಕಾಶಾನ್ನ ಕಿಞ್ಚನ ॥ ೨೨॥
ಚಿದಾಕಾಶತತಂ ಸರ್ವಂ ಚಿದಾಕಾಶಂ ಪ್ರಕಾಶಕಮ್ ।
ಚಿದಾಕಾರಂ ಮನೋ ರೂಪಂ ಚಿದಾಕಾಶಂ ಹಿ ಚಿದ್ಘನಮ್ ॥ ೨೩॥
ಚಿದಾಕಾಶಂ ಪರಂ ಬ್ರಹ್ಮ ಚಿದಾಕಾಶಂ ಚ ಚಿನ್ಮಯಃ ।
ಚಿದಾಕಾಶಂ ಶಿವಂ ಸಾಕ್ಷಾಚ್ಚಿದಾಕಾಶಮಹಂ ಸದಾ ॥ ೨೪॥
ಸಚ್ಚಿದಾನನ್ದರೂಪೋಽಹಂ ಸಚ್ಚಿದಾನನ್ದಶಾಶ್ವತಃ ।
ಸಚ್ಚಿದಾನನ್ದ ಸನ್ಮಾತ್ರಂ ಸಚ್ಚಿದಾನನ್ದಭಾವನಃ ॥ ೨೫॥
ಸಚ್ಚಿದಾನನ್ದಪೂರ್ಣೋಽಹಂ ಸಚ್ಚಿದಾನನ್ದಕಾರಣಮ್ ।
ಸಚ್ಚಿದಾನನ್ದಸನ್ದೋಹಃ ಸಚ್ಚಿದಾನನ್ದ ಈಶ್ವರಃ ॥ ೨೬॥var was ಹೀನಕಃ
ಸಚ್ಚಿದಾನನ್ದನಿತ್ಯೋಽಹಂ ಸಚ್ಚಿದಾನನ್ದಲಕ್ಷಣಮ್ ।
ಸಚ್ಚಿದಾನನ್ದಮಾತ್ರೋಽಹಂ ಸಚ್ಚಿದಾನನ್ದರೂಪಕಃ ॥ ೨೭॥
ಆತ್ಮೈವೇದಮಿದಂ ಸರ್ವಮಾತ್ಮೈವಾಹಂ ನ ಸಂಶಯಃ ।
ಆತ್ಮೈವಾಸ್ಮಿ ಪರಂ ಸತ್ಯಮಾತ್ಮೈವ ಪರಮಂ ಪದಮ್ ॥ ೨೮॥
ಆತ್ಮೈವ ಜಗದಾಕಾರಂ ಆತ್ಮೈವ ಭುವನತ್ರಯಮ್ ।
ಆತ್ಮೈವ ಜಗತಾಂ ಶ್ರೇಷ್ಠಃ ಆತ್ಮೈವ ಹಿ ಮನೋಮಯಃ ॥ ೨೯॥
ಆತ್ಮೈವ ಜಗತಾಂ ತ್ರಾತಾ ಆತ್ಮೈವ ಗುರುರಾತ್ಮನಃ ।
ಆತ್ಮೈವ ಬಹುಧಾ ಭಾತಿ ಆತ್ಮೈವೈಕಂ ಪರಾತ್ಮನಃ ॥ ೩೦॥
ಆತ್ಮೈವ ಪರಮಂ ಬ್ರಹ್ಮ ಆತ್ಮೈವಾಹಂ ನ ಸಂಶಯಃ ।
ಆತ್ಮೈವ ಪರಮಂ ಲೋಕಂ ಆತ್ಮೈವ ಪರಮಾತ್ಮನಃ ॥ ೩೧॥
ಆತ್ಮೈವ ಜೀವರೂಪಾತ್ಮಾ ಆತ್ಮೈವೇಶ್ವರವಿಗ್ರಹಃ ।
ಆತ್ಮೈವ ಹರಿರಾನನ್ದಃ ಆತ್ಮೈವ ಸ್ವಯಮಾತ್ಮನಃ ॥ ೩೨॥
ಆತ್ಮೈವಾನನ್ದಸನ್ದೋಹ ಆತ್ಮೈವೇದಂ ಸದಾ ಸುಖಮ್ ।
ಆತ್ಮೈವ ನಿತ್ಯಶುದ್ಧಾತ್ಮಾ ಆತ್ಮೈವ ಜಗತಃ ಪರಃ ॥ ೩೩॥
ಆತ್ಮೈವ ಪಞ್ಚಭೂತಾತ್ಮಾ ಆತ್ಮೈವ ಜ್ಯೋತಿರಾತ್ಮನಃ ।
ಆತ್ಮೈವ ಸರ್ವದಾ ನಾನ್ಯದಾತ್ಮೈವ ಪರಮೋಽವ್ಯಯಃ ॥ ೩೪॥
ಆತ್ಮೈವ ಹ್ಯಾತ್ಮಭಾಸಾತ್ಮಾ ಆತ್ಮೈವ ವಿಭುರವ್ಯಯಃ ।
ಆತ್ಮೈವ ಬ್ರಹ್ಮವಿಜ್ಞಾನಂ ಆತ್ಮೈವಾಹಂ ತ್ವಮೇವ ಹಿ ॥ ೩೫॥
ಆತ್ಮೈವ ಪರಮಾನನ್ದ ಆತ್ಮೈವಾಹಂ ಜಗನ್ಮಯಃ ।
ಆತ್ಮೈವಾಹಂ ಜಗದ್ಭಾನಂ ಆತ್ಮೈವಾಹಂ ನ ಕಿಞ್ಚನ ॥ ೩೬॥
ಆತ್ಮೈವ ಹ್ಯಾತ್ಮನಃ ಸ್ನಾನಮಾತ್ಮೈವ ಹ್ಯಾತ್ಮನೋ ಜಪಃ ।
ಆತ್ಮೈವ ಹ್ಯಾತ್ಮನೋ ಮೋದಮಾತ್ಮೈವಾತ್ಮಪ್ರಿಯಃ ಸದಾ ॥ ೩೭॥
ಆತ್ಮೈವ ಹ್ಯಾತ್ಮನೋ ನಿತ್ಯೋ ಹ್ಯಾತ್ಮೈವ ಗುಣಭಾಸಕಃ ।
ಆತ್ಮೈವ ತುರ್ಯರೂಪಾತ್ಮಾ ಆತ್ಮಾತೀತಸ್ತತಃ ಪರಃ ॥ ೩೮॥
ಆತ್ಮೈವ ನಿತ್ಯಪೂರ್ಣಾತ್ಮಾ ಆತ್ಮೈವಾಹಂ ನ ಸಂಶಯಃ ।
ಆತ್ಮೈವ ತ್ವಮಹಂ ಚಾತ್ಮಾ ಸರ್ವಮಾತ್ಮೈವ ಕೇವಲಮ್ ॥ ೩೯॥
ನಿತ್ಯೋಽಹಂ ನಿತ್ಯಪೂರ್ಣೋಽಹಂ ನಿತ್ಯೋಽಹಂ ಸರ್ವದಾ ಸದಾ ।
ಆತ್ಮೈವಾಹಂ ಜಗನ್ನಾನ್ಯದ್ ಅಮೃತಾತ್ಮಾ ಪುರಾತನಃ ॥ ೪೦॥
ಪುರಾತನೋಽಹಂ ಪುರುಷೋಽಹಮೀಶಃ ಪರಾತ್ ಪರೋಽಹಂ ಪರಮೇಶ್ವರೋಽಹಮ್ ।
ಭವಪ್ರದೋಽಹಂ ಭವನಾಶನೋಽಹಂ ಸುಖಪ್ರದೋಽಹಂ ಸುಖರೂಪಮದ್ವಯಮ್ ॥ ೪೧॥
ಆನನ್ದೋಽಹಮಶೇಷೋಽಹಮಮೃತೋಹಂ ನ ಸಂಶಯಃ ।
ಅಜೋಽಹಮಾತ್ಮರೂಪೋಽಹಮನ್ಯನ್ನಾಸ್ತಿ ಸದಾ ಪ್ರಿಯಃ ॥ ೪೨॥
ಬ್ರಹ್ಮೈವಾಹಮಿದಂ ಬ್ರಹ್ಮ ಸರ್ವಂ ಬ್ರಹ್ಮ ಸದಾಽವ್ಯಯಃ ।
ಸದಾ ಸರ್ವಪದಂ ನಾಸ್ತಿ ಸರ್ವಮೇವ ಸದಾ ನ ಹಿ ॥ ೪೩॥
ನಿರ್ಗುಣೋಽಹಂ ನಿರಾಧಾರ ಅಹಂ ನಾಸ್ತೀತಿ ಸರ್ವದಾ ।
ಅನರ್ಥಮೂಲಂ ನಾಸ್ತ್ಯೇವ ಮಾಯಾಕಾರ್ಯಂ ನ ಕಿಞ್ಚನ ॥ ೪೪॥
ಅವಿದ್ಯಾವಿಭವೋ ನಾಸ್ತಿ ಅಹಂ ಬ್ರಹ್ಮ ನ ಸಂಶಯಃ ।
ಸರ್ವಂ ಬ್ರಹ್ಮ ಚಿದಾಕಾಶಂ ತದೇವಾಹಂ ನ ಸಂಶಯಃ ॥ ೪೫॥
ತದೇವಾಹಂ ಸ್ವಯಂ ಚಾಹಂ ಪರಂ ಚಾಹಂ ಪರೇಶ್ವರಃ ।
ವಿದ್ಯಾಧರೋಽಹಮೇವಾತ್ರ ವಿದ್ಯಾವಿದ್ಯೇ ನ ಕಿಞ್ಚನ ॥ ೪೬॥
ಚಿದಹಂ ಚಿದಹಂ ನಿತ್ಯಂ ತುರ್ಯೋಽಹಂ ತುರ್ಯಕಃ ಪರಃ ।
ಬ್ರಹ್ಮೈವ ಸರ್ವಂ ಬ್ರಹ್ಮೈವ ಸರ್ವಂ ಬ್ರಹ್ಮ ಸದಾಽಸ್ಮ್ಯಹಮ್ ॥ ೪೭॥
ಮತ್ತೋಽನ್ಯನ್ನಾಪರಂ ಕಿಞ್ಚಿನ್ಮತ್ತೋಽನ್ಯದ್ಬ್ರಹ್ಮ ಚ ಕ್ವಚಿತ್ ।
ಮತ್ತೋಽನ್ಯತ್ ಪರಮಂ ನಾಸ್ತಿ ಮತ್ತೋಽನ್ಯಚ್ಚಿತ್ಪದಂ ನಹಿ ॥ ೪೮॥
ಮತ್ತೋಽನ್ಯತ್ ಸತ್ಪದಂ ನಾಸ್ತಿ ಮತ್ತೋಽನ್ಯಚ್ಚಿತ್ಪದಂ ನ ಮೇ ।
ಮತ್ತೋಽನ್ಯತ್ ಭವನಂ ನಾಸ್ತಿ ಮತ್ತೋಽನ್ಯದ್ ಬ್ರಹ್ಮ ಏವ ನ ॥ ೪೯॥
ಮತ್ತೋಽನ್ಯತ್ ಕಾರಣಂ ನಾಸ್ತಿ ಮತ್ತೋಽನ್ಯತ್ ಕಿಞ್ಚಿದಪ್ಯಣು ।
ಮತ್ತೋಽನ್ಯತ್ ಸತ್ತ್ವರೂಪಂ ಚ ಮತ್ತೋಽನ್ಯತ್ ಶುದ್ಧಮೇವ ನ ॥ ೫೦॥
ಮತ್ತೋಽನ್ಯತ್ ಪಾವನಂ ನಾಸ್ತಿ ಮತ್ತೋಽನ್ಯತ್ ತತ್ಪದಂ ನ ಹಿ ।
ಮತ್ತೋಽನ್ಯತ್ ಧರ್ಮರೂಪಂ ವಾ ಮತ್ತೋಽನ್ಯದಖಿಲಂ ನ ಚ ॥ ೫೧॥
ಮತ್ತೋಽನ್ಯದಸದೇವಾತ್ರ ಮತ್ತೋಽನ್ಯನ್ಮಿಥ್ಯಾ ಏವ ಹಿ ।
ಮತ್ತೋಽನ್ಯದ್ಭಾತಿ ಸರ್ವಸ್ವಂ ಮತ್ತೋಽನ್ಯಚ್ಛಶಶೃಙ್ಗವತ್ ॥ ೫೨॥
ಮತ್ತೋಽನ್ಯದ್ಭಾತಿ ಚೇನ್ಮಿಥ್ಯಾ ಮತ್ತೋಽನ್ಯಚ್ಚೇನ್ದ್ರಜಾಲಕಮ್ ।
ಮತ್ತೋಽನ್ಯತ್ ಸಂಶಯೋ ನಾಸ್ತಿ ಮತ್ತೋಽನ್ಯತ್ ಕಾರ್ಯ ಕಾರಣಮ್ ॥ ೫೩॥
ಬ್ರಹ್ಮಮಾತ್ರಮಿದಂ ಸರ್ವಂ ಸೋಽಹಮಸ್ಮೀತಿ ಭಾವನಮ್ ।
ಸರ್ವಮುಕ್ತಂ ಭಗವತಾ ಏವಮೇವೇತಿ ನಿಶ್ಚಿನು ॥ ೫೪॥
ಬಹುನೋಕ್ತೇನ ಕಿಂ ಯೋಗಿನ್ ನಿಶ್ಚಯಂ ಕುರು ಸರ್ವದಾ ।
ಸಕೃನ್ನಿಶ್ಚಯಮಾತ್ರೇಣ ಬ್ರಹ್ಮೈವ ಭವತಿ ಸ್ವಯಮ್ ॥ ೫೫॥
ವನನಗಭುವನಂ ಯಚ್ಛಙ್ಕರಾನ್ನಾನ್ಯದಸ್ತಿ
ಜಗದಿದಮಸುರಾದ್ಯಂ ದೇವದೇವಃ ಸ ಏವ ।
ತನುಮನಗಮನಾದ್ಯೈಃ ಕೋಶಕಾಶಾವಕಾಶೇ
ಸ ಖಲು ಪರಶಿವಾತ್ಮಾ ದೃಶ್ಯತೇ ಸೂಕ್ಷ್ಮಬುದ್ಧ್ಯಾ ॥ ೫೬॥
ಚಕ್ಷುಃಶ್ರೋತ್ರಮನೋಽಸವಶ್ಚ ಹೃದಿ ಖಾದುದ್ಭಾಸಿತಧ್ಯಾನ್ತರಾತ್
ತಸ್ಮಿನ್ನೇವ ವಿಲೀಯತೇ ಗತಿಪರಂ ಯದ್ವಾಸನಾ ವಾಸಿನೀ ।
ಚಿತ್ತಂ ಚೇತಯತೇ ಹೃದಿನ್ದ್ರಿಯಗಣಂ ವಾಚಾಂ ಮನೋದೂರಗಂ
ತಂ ಬ್ರಹ್ಮಾಮೃತಮೇತದೇವ ಗಿರಿಜಾಕಾನ್ತಾತ್ಮನಾ ಸಂಜ್ಞಿತಮ್ ॥ ೫೭॥

॥ ಇತಿ ಶ್ರೀಶಿವರಹಸ್ಯೇ ಶಙ್ಕರಾಖ್ಯೇ ಷಷ್ಠಾಂಶೇ ಋಭುನಿದಾಘಸಂವಾದೇ ಅಷ್ಟಾದಶೋಽಧ್ಯಾಯಃ ॥

Special Thanks

The Sanskrit works, published by Sri Ramanasramam, have been approved to be posted on sanskritdocuments.org by permission of Sri V.S. Ramanan, President, Sri Ramanasramam.

Credits

Encoded by Anil Sharma anilandvijaya at gmail.com
Proofread by Sunder Hattangadi and Anil Sharma

https://sanskritdocuments.org

Send corrections to sanskrit at cheerful.com